“གསུམ་བརྒྱད”རྒྱལ་སྤྱིའི་བུད་མེད་དུས་ཆེན་ཐེངས་115པ་འཆར་ཉེར་ཡོད་པའི་སྐབས་སུ། རང་སྐྱོང་ལྗོངས་ཏང་ཨུད་ཀྱི་ཆོག་མཆན་ཐོབ་པ་བརྒྱུད། རང་སྐྱོང་ལྗོངས་ཀྱིས“གསུམ་བརྒྱད”རྒྱལ་སྤྱིའི་བུད་མེད་དུས་ཆེན་ལ་དྲན་གསོ་ཞུ་བ་དང་གཟེངས་བསྟོད་ཀྱི་ཚོགས་ཆེན་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་ཚོགས་འདུར་ཞུགས་ནས་གསུང་བཤད་གནང་ཞིང་། ཁོང་གིས་རང་སྐྱོང་ལྗོངས་ཏང་ཨུད་དང་ཧྲུའུ་ཅི་ཝང་ཅུན་ཀྲེང་གི་ཚབ་ཞུས་ཏེ། ལྗོངས་ཡོངས་ཀྱི་རྒྱ་ཆེའི་བུད་མེད་སྤུན་ཟླ་དང་བུད་མེད་ལས་དོན་པ་ཚོར་དུས་ཆེན་གྱི་འཚམས་འདྲི་གནང་བ་དང་། གཟེངས་བསྟོད་ཐོབ་པའི་སྔོན་ཐོན་མཉམ་སྡེབ་དང་མི་སྒེར་ལ་རྟེན་འབྲེལ་ཞུས་པ། དུས་ཡུན་རིང་པོའི་ནང་། བོད་ཀྱི་བུད་མེད་དང་བྱིས་པའི་བྱ་གཞག་ལ་ཐུགས་ཁུར་དང་རྒྱབ་སྐྱོར་གནང་མཁན་སྤྱི་ཚོགས་ལས་རིགས་ཁག་གི་མི་སྣར་ཐུགས་རྗེ་ཆེ་ཞུས་པ་རེད།

ཚོགས་འདུའི་ཐོག་2024ལོའི་ལོ་འཁོར་གྱི་རང་སྐྱོང་ལྗོངས་ཀྱི་གསུམ་བརྒྱད་དར་དམར་བའི་དཔེ་དམག་10དང་། རང་སྐྱོང་ལྗོངས་ཀྱི་གསུམ་བརྒྱད་དར་དམར་བ་30 རང་སྐྱོང་ལྗོངས་ཀྱི་གསུམ་བརྒྱད་དར་དམར་མཉམ་སྡེབ་20 རང་སྐྱོང་ལྗོངས་ཀྱི་བུད་མེད་ཀྱི་ཤེས་དཔལ་ལས་གནས་ཁག་30བཅས་ལ་གཟེངས་བསྟོད་བྱས་པ་རེད། བསྟན་འཛིན་ནོར་སྐྱིད་སོགས་གཟེངས་བསྟོད་ཐོབ་པའི་འཐུས་མི་6གིས་སྤེལ་རེས་གཏམ་བཤད་བྱས་པ་རེད།

ལིའུ་ཅང་གིས་ལྗོངས་ཡོངས་ཀྱི་རྒྱ་ཆེའི་བུད་མེད་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བུད་མེད་དང་བྱིས་པ་དང་བུད་མེད་མཉམ་འབྲེལ་ལྷན་ཚོགས་ཀྱི་ལས་དོན་སྐོར་གྱི་རྣམ་བཤད་གལ་ཆེན་དང་། བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན། དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་ལག་བསྟར་གཏིང་ཟབ་བྱས་ཏེ། རང་སྐྱོང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་གཞིར་བཟུང“གནམ་ཕྱེད་ཀ་འདེགས་པའི”གཟི་བརྗིད་གསར་པ་བརྩོན་ལེན་ཧུར་ཐག་བྱེད་དགོས་པའི་བླང་བྱ་བཏོན་གནང་བ་སྟེ། བུད་མེད་ཀྱི་འདོད་འདུན་རྒྱུན་དུ་བཅངས་ནས་ཕུགས་བསམ་དང་དད་སེམས་ལ་དད་མོས་བྱེད་མཁན་ཞིག་ཧུར་ཐག་བྱེད་དགོས་ཤིང་། རྒྱུན་འཁྱོངས་ལྷོད་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བློ་སྒྲིལ་སེམས་སྐྱེད་བྱེད་པ་དང་། བྱ་སྤྱོད་དངོས་ཀྱི་ཐོག་ནས“གཏན་འཁེལ་གཉིས”ལ་བརྩི་བཀུར་མཐའ་གཅིག་ཏུ་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པ། ཐོག་མཐའ་བར་གསུམ་དུ་ཏང་དང་བློ་སེམས་གཅིག་མཐུན་དང་ཏང་གི་རྗེས་སུ་འབྲངས་ནས་འབད་འཐབ་བཅས་བྱེད་དགོས་པ་དང་། བུད་མེད་ཀྱི་ཐེག་པ་ཁུར་ལེན་མངོན་པར་བྱས་ཏེ་རླབས་ཆེན་བྱ་གཞག་འཛུགས་སྐྲུན་བྱེད་མཁན་ཞིག་བརྩོན་ལེན་བྱེད་དགོས་ཤིང་། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་རྒྱག་པ་དང་། རང་རྟོགས་ངང་མེས་རྒྱལ་གཅིག་གྱུར་ལ་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་འགན་འཁྲི་ཨང་དང་པོར་བརྩིས་ཏེ། རང་སོ་སོའི་ཁྱབ་ཁོངས་དང་རང་ཉིད་ཀྱི་ལས་གནས་ཐོག་ལེགས་སྐྱེས་གསར་པ་ཧུར་ཐག་ཕུལ་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱེད་ཆེད“གནམ་ཕྱེད་ཀ་འདེགས་པའི”སྟོབས་ཤུགས་ལེགས་སྐྱེས་འབུལ་དགོས་པ། བུད་མེད་ཀྱི་ལེགས་ཆ་འདོན་སྤེལ་བྱས་ནས་ཤེས་དཔལ་སྲོལ་བཟང་དར་སྤེལ་གཏོང་མཁན་ཞིག་བརྩོན་ལེན་བྱེད་དགོས་ཤིང་། རིག་གནས་ཀྱི་གདེང་ཚོད་བརྟན་དུ་གཏོང་བ་དང་། ཁྱིམ་ཚང་དང་། ཁྱིམ་ཚང་སློབ་གསོ། ཁྱིམ་སྲོལ་བཟང་པོ་བཅས་འཛུགས་སྐྱོང་ལ་ཤུགས་སྣོན་རྒྱག་པ། མི་རབས་རྗེས་མ་སྐྱོན་བྲལ་ངང་འཚར་ལོངས་ཡོང་བར་མཐོང་ཆེན་བྱེད་པ། ཁྲིམས་སྐྱོང་གི་སྙིང་སྟོབས་དར་སྤེལ་ཧུར་ཐག་གཏོང་བ་བཅས་བྱེད་དགོས། བུད་མེད་ཀྱི་ཉམས་འགྱུར་མངོན་པར་བྱས་ནས་ཕུགས་འདུན་དོན་གཉེར་བྱེད་ཕོད་པའི་འབད་འཐབ་པ་ཞིག་བརྩོན་ལེན་བྱེད་དགོས་ཤིང་། རང་རྟོགས་ངང་ནུས་པ་དང་བྱང་ཚད་མཐོ་རུ་གཏོང་བ་དང་། ཉམས་སད་ཐེག་པའི་འཇོན་ཐང་ཞུན་བརྡར་བཏང་སྟེ། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱེད་པའི་གསོན་ཉམས་དོད་པའི་ལག་ལེན་ནང་དུ་ངོ་མཚར་ཆེ་བའི་མི་ཚེའི་ལེའུ་རྩོམ་དགོས་པ་བཅས་རེད།