བོད་ཀྱི་ལོ་གསར་འཆར་ཉེའི་སྐབས་སུ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གཞི་རིམ་དུ་ཕེབས་ནས་ལས་བྱེད་པ་དང་མང་ཚོགས་དང་འཐབ་ས་དང་པོར་འཛུགས་སྐྲུན་བྱེད་མཁན་ལ་འཚམས་འདྲི་གནང་ཞིང་། འདི་ནི་ཝང་ཅུན་ཀྲེང་གིས་ལྷོ་ཁ་གྲོང་ཁྱེར་སྣེ་གདོང་ཆུས་སྤྱི་བདེ་ཅུས་སུ་འཐབ་ས་དང་པོའི་སྤྱི་བདེའི་ལས་བྱེད་ཉེན་རྟོག་པར་འཚམས་འདྲི་གནང་བཞིན་པ།

བོད་ཀྱི་ལོ་གསར་འཆར་ཉེའི་སྐབས་སུ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གཞི་རིམ་དུ་ཕེབས་ནས་ལས་བྱེད་པ་དང་མང་ཚོགས་དང་འཐབ་ས་དང་པོར་འཛུགས་སྐྲུན་བྱེད་མཁན་ལ་འཚམས་འདྲི་གནང་ཞིང་། འདི་ནི་ཝང་ཅུན་ཀྲེང་གིས་སྒྲོལ་དཀར་དང་གཡང་འཛོམས་གཅེན་གཅུང་གཉིས་དང་བྱམས་བརྩེའི་ངང་གླེང་མོལ་གནང་བཞིན་པ།

བོད་ཀྱི་ལོ་གསར་འཆར་ལ་ཉེ་བའི་སྐབས་སུ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གཞི་རིམ་དུ་ཕེབས་ནས་ལས་བྱེད་པ་དང་མང་ཚོགས་དང་འཐབ་ས་དང་པོར་འཛུགས་སྐྲུན་བྱེད་མཁན་ལ་འཚམས་འདྲི་གནང་སྟེ། རང་སྐྱོང་ལྗོངས་ཏང་ཨུད་དང་། མི་དམངས་འཐུས་ཚོགས། སྲིད་གཞུང་། སྲིད་གྲོས་བཅས་ཀྱི་ཚབ་ཞུས་ནས་ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་ལྷག་བསམ་ཟོལ་མེད་ཀྱི་དུས་ཆེན་གྱི་འཚམས་འདྲི་དང་སྨོན་འདུན་བཟང་པོ་ཞུས་པ་རེད།

གངས་ལྗོངས་ས་མཐོའི་གང་སར་སྤྲོ་སྣང་དང་། འཆམ་མཐུན། དགའ་སྤྲོ་བཅས་ཀྱི་དུས་ཆེན་གྱི་རྣམ་པས་ཁེངས་ཤིང་། ཝང་ཅུན་ཀྲེང་རླངས་འཁོར་ལ་བཞུགས་ཏེ་ལྷོ་ཁ་གྲོང་ཁྱེར་ལྷུན་རྩེ་རྫོང་དུ་ཕེབས་ནས་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ་འཚམས་འདྲི་གནང་བ་རེད། སྒོ་འགྲམ་དུ་ཝང་ཅུན་ཀྲེང་གིས་ཁོང་ཚོ་དང་ཕན་ཚུན་མཇལ་དར་སྒྲོན་རེས་དང་བཀྲ་ཤིས་བདེ་ལེགས་ཞུ་རེས་གནང་ཞིང་། ཝང་ཅུན་ཀྲེང་གིས་ཚོམས་ཆེན་དུ་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ“གཟུགས་པོ་གང་འདྲ་འདུག་གམ” “ཁྱིམ་དུ་དཀའ་ངལ་གང་འདུག་གམ”ཞེས་བྱམས་བརྩེའི་ངང་གླེང་མོལ་གནང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་འོག ལྷུན་རྩེ་རྫོང་དང་ཡུལ་སྨད་ཤང་གི་ཐོན་སྐྱེད་དང་འཚོ་བར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་མཁྱེན་རྗེས། ཝང་ཅུན་ཀྲེང་གིས་ཁྱེད་ཚོའི་བྱས་རྗེས་ལས་ཞིང་འབྲོག་མང་ཚོགས་ཁྲི་སྟོང་མང་པོ་མཐའ་སྲུང་མཐའ་བརྟན་དང་མཐའ་དར་མཐའ་སྟོབས་ཀྱི་དཔུང་ཁག་ནང་ཞུགས་པར་ལྕག་སྐུལ་ཐེབས་ཏེ་མཐའ་མཚམས་ས་ཁུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་ལེགས་སུ་གཏོང་བ་དང་མཐའ་མཚམས་མང་ཚོགས་ཀྱི་འཚོ་བའི་ཆུ་ཚད་མཐོ་རུ་གཏོང་ཆེད་ལེགས་སྐྱེས་ཧུར་ཐག་ཕུལ་ཡོད། ཁྱེད་ཚོ་དང་ཁྱེད་ཚོ་བརྒྱུད་མཐའ་མཚམས་ས་ཁུལ་གྱི་རྒྱ་ཆེའི་ཏང་ཡོན་ལས་བྱེད་པ་དང་། མི་རིགས་ཁག་གི་མང་ཚོགས། མཐའ་སྲུང་དཔོན་དམག་བཅས་ལ་ཐུགས་རྗེ་ཆེ་དང་གུས་འདུད་ཞུ་གི་ཡིན།

ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཐའ་མཚམས་ས་ཁུལ་གྱི་འཕེལ་རྒྱས་ལ་ཚད་མཐོའི་མཐོང་ཆེན་དང་མཐའ་མཚམས་ཀྱི་མི་རིགས་ཁག་གི་མི་དམངས་ལ་ཐུགས་ཁུར་ཟབ་མོ་གནང་གི་ཡོད། ཁྱེད་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་བཅངས་ནས་རྒྱལ་གཅེས་མཐའ་སྲུང་གི་སྙིང་སྟོབས་དར་སྤེལ་ཤུགས་ཆེན་གཏོང་བ་དང་། མི་རིགས་ཁག་གི་མང་ཚོགས་ཀྱིས་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ལ་ཁྲིད་སྟོན་བྱེད་པ། བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཧུར་ཐག་བྱས་ནས་མཐའ་མཚམས་ས་ཁུལ་དེ་བས་སྲ་བརྟན་དང་དེ་བས་དར་རྒྱས་ཡོང་བར་འབད་བརྩོན་བྱ་རྒྱུའི་རེ་བ་ཡོད། རིམ་ཁག་ཏང་ཨུད་དང་སྲིད་གཞུང་གིས་སྤྱི་ཚོགས་ལ་ལེགས་སྐྱེས་འབུལ་མཁན་དཔའ་བོ་དཔེ་བཟང་གི་མི་སྣར་སེམས་ཁུར་དང་གཅེས་སྐྱོང་གནང་བ་དང་ནུས་ཤུགས་ཡོད་རྒུས་ཞབས་ཞུ་འགན་སྲུང་ལས་དོན་ལེགས་པར་བསྒྲུབས་ནས། ཁོང་ཚོས་མིག་དཔེ་དང་སྣེ་ཁྲིད་ཀྱི་ནུས་པ་འདོན་སྤེལ་དང་ལེགས་སྐྱེས་དེ་བས་ཆེ་བ་འབུལ་རྒྱུར་ཆ་རྐྱེན་བཟང་པོ་སྐྲུན་དགོས་ཞེས་གསུངས་པ་རེད།

ལྷོ་ཁ་གྲོང་ཁྱེར་རྒྱ་ཚ་རྫོང་ཀུན་ཁམས་གྲོང་ཚོ་ནི་རྫོང་འགའི་མང་ཚོགས་གནས་སྤོ་བྱས་པ་ལས་གྲུབ་པ་ཞིག་རེད། མང་ཚོགས་ཀྱི་འཚོ་བ་གང་འདྲ་ཡོད་མེད་དང་འཚོ་བར་འགྱུར་ལྡོག་གང་འདྲ་བྱུང་མིན་ལ་ཝང་ཅུན་ཀྲེང་གིས་ཐོག་མཐའ་བར་གསུམ་དུ་ཐུགས་ཁུར་གནང་གི་ཡོད། ཀུན་ཁམས་གྲོང་ཚོར་བསྐྱོད་སྐབས་སྒོ་ར་གྲལ་སྟར་སྒྲིག་པ་དང་འགྲོ་ལམ་ཡངས་ཤིང་གཙང་སྦྲ་དོད། ཝང་ཅུན་ཀྲེང་གིས་ཕེབས་ཀྱིན་དུ་གཟིགས་ཞིབ་གནང་ནས་ལྷན་སྦྱར་སྒྲིག་བཀོད་དང་གནས་སྤོས་མང་ཚོགས་ཀྱི་འབབ་འཕར་སོགས་ཀྱི་གནས་ཚུལ་མཁྱེན་རྟོགས་གནང་བ་རེད། གྲོང་མི་ཕུར་བུའི་ཁྱིམ་གྱིས་བཀྲ་ཤིས་པའི་ཕྱེ་མར་དང་ཞིམ་མངར་ལྡན་པའི་མཆོད་ཆང་བཀྱག་སྟེ་དཀར་གཙང་མཇལ་དར་བསྒྲོན་ནས་ཝང་ཅུན་ཀྲེང་ལ་བོད་ཀྱི་ལོ་གསར་གྱི་ལྷག་བསམ་ཟོལ་མེད་ཀྱི་སྨོན་འདུན་ཞུས་པ་རེད། ཕུར་བུའི་ཁྱིམ་གྱི་སྒེའུ་ཁུང་དཀར་ཆ་དོད་ལ་དྲོ་སྐྱིད་ལྡན་པ་དང་ཁ་ཟས་དང་། ཚགས་ཤ་སྐམ་པོ། ཤིང་ཏོག་བཅས་ཅོག་ཙེའི་སྟེང་ལ་བསྒྲིགས་ཡོད། ཝང་ཅུན་ཀྲེང་གིས་ཐབ་ཚང་སོགས་ལ་ཞིབ་ཕྲ་གཟིགས་རྗེས་ཕུར་བུའི་ནང་མི་ཚོ་དང་མཉམ་དུ་བཞུགས་ཏེ་ཅི་འཕྲོས་མོལ་འཕྲོས་གནང་། “འདི་གར་ག་དུས་སྤོས་པ་ཡིན་ནམ” “ལོར་ཡོང་འབབ་ག་ཚོད་ཙམ་འདུག་གམ” “ལོ་གསར་གྱི་མཁོ་ཆས་གྲ་སྒྲིག་གང་འདྲ་བྱས་ཡོད་དམ” 2024ལོར་ཕུར་བུའི་ཁྱིམ་གྱི་མི་རེའི་ཆ་སྙོམས་ཡོང་འབབ་ཁེ་གཙང་སྒོར་ཁྲི་6.6ཟིན་ནས་ལྗོངས་ཡོངས་ཀྱི་ཆ་སྙོམས་ཆུ་ཚད་ལས་བརྒལ་བ་མཁྱེན་རྗེས་ཝང་ཅུན་ཀྲེང་དགྱེས་ཚོར་ཆེན་པོ་བྱུང་ཡོད། ཁོང་གིས་ཁྱེད་ཚོའི་འཚོ་བ་སྐྱིད་པོ་ཡོད་པ་མཐོང་བྱུང་ལ་འཕེལ་རྒྱས་འདི་ལྟ་བུ་བྱུང་བར་ང་སེམས་གཏིང་ནས་དགའ་ཚོར་སྐྱེ་གི་འདུག སླད་ཕྱིན་ཁྱེད་ཚོའི་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ཡག་ཏུ་འགྲོ་བའི་སྨོན་འདུན་ཞུ་གི་ཡིན་ཞེས་གསུངས་པ་རེད།

ལྷུན་རྩེ་རྫོང་གཉལ་གཞུང་ཁུལ་ཆུང་དུ་ཝང་ཅུན་ཀྲེང་མི་རིགས་མཐུན་སྒྲིལ་གྱི་ཁྱིམ་ཚང་པན་ལི་ཧྥུང་དང་དབྱངས་ལགས་ཀྱི་ཁྱིམ་དུ་ཕེབས་ནས་ཉེ་དུས་ཀྱི་གནས་ཚུལ་སྐོར་གླེང་མོལ་གནང་བ་དང་གྲོས་འགོ་གསན་ཞིང་། ཁོང་ཚོའི་ལས་ཞུགས་དང་། ཡོང་འབབ། ཕྲུ་གུ་སློབ་གྲྭར་འགྲོ་བ་སོགས་ཀྱི་གནས་ཚུལ་མཁྱེན་རྟོགས་གནང་རྗེས་ཁོང་ཚོའི་བདེ་སྐྱིད་ལྡན་པའི་འཚོ་བར་བསྔགས་བརྗོད་གནང་བ་མ་ཟད་ཕྲུ་གུ་ཚོ་ཀུན་སྤྱོད་དང་། ཤེས་རིག ལུས་རྩལ། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་ལྕག་གནང་བ་རེད། པན་ལི་ཧྥུང་གིས་ས་གནས་དེ་གའི་ཏང་ཨུད་དང་སྲིད་གཞུང་གིས་མི་རིགས་ཁག་གི་མང་ཚོགས་ཀྱི་ཐོན་སྐྱེད་དང་འཚོ་བར་ཐུགས་ཁུར་ཧ་ཅང་ཆེན་པོ་གནང་བ་དང་། ཁུལ་ཆུང་རྙིང་པ་སྒྱུར་བཀོད་དང་། གསར་གཏོད་ལས་གཏོད་ལ་རྒྱབ་སྐྱོར། མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་སོགས་ཀྱི་ཐད་དོན་དངོས་མང་པོ་བསྒྲུབས་ཡོད་ལ་མི་རིགས་ཁག་གི་མང་ཚོགས་འཆམ་མཐུན་མཉམ་གནས་ངང་འཚོ་བ་སྐྱིད་པོ་སྐྱེལ་བཞིན་ཡོད་ཅེས་བཤད། ཝང་ཅུན་ཀྲེང་གིས་ཏང་དང་སྲིད་གཞུང་གི་འབད་འཐབ་དམིགས་ཚད་ནི་མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་ཟམ་མི་ཆད་པར་སྐོང་རྒྱུ་དེ་ཡིན། རེ་བར་ཁྱེད་ཚོས་རང་ཉིད་ཀྱི་ཉམས་མྱོང་བརྒྱུད་མི་རིགས་མཐུན་སྒྲིལ་གྱི་གཏམ་རྒྱུད་ཡག་པོ་བཤད་ནས་མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྟོབས་ཤུགས་སྐྱེས་སུ་འབུལ་དགོས་པ་མ་ཟད་ཁྱེད་ཚོའི་ཁྱིམ་ཚང་བདེ་སྐྱིད་དང་འཚོ་བ་ཉིན་བཞིན་ལེགས་སུ་འགྲོ་བའི་སྨོན་འདུན་ཞུ་གི་ཡིན་ཞེས་གསུངས་པ་རེད།

“ཚང་མ་སྐུ་ལས་ཁག་སོང་། སྔོན་ཚུད་ནས་ཁྱེད་ཚོར་བོད་ཀྱི་ལོ་གསར་སྤྲོ་པོ་དང་ཁྱིམ་ཚང་བདེ་སྐྱིད་ཡོང་བའི་སྨོན་འདུན་ཞུ་གི་ཡིན”ཞེས་ཝང་ཅུན་ཀྲེང་ལྷོ་ཁ་གྲོང་ཁྱེར་སྣེ་གདོང་ཆུས་སྤྱི་བདེ་ཅུས་སུ་ཕེབས་ནས་བདེ་འཇགས་སྔོན་འགོག་ཚོད་འཛིན་དང་མང་ཚོགས་ལ་ཞབས་འདེགས་ཞུ་བ་སོགས་ཀྱི་ལས་དོན་ལ་ཞིབ་བཤེར་གནང་བ་དང་ལས་རེས་ལས་གནས་བརྟན་སྲུང་བྱེད་མཁན་འཐབ་ས་དང་པོའི་སྤྱི་བདེའི་ལས་བྱེད་ཉེན་རྟོག་པར་དུས་ཆེན་གྱི་འཚམས་འདྲི་གནང་བ་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ལྗོངས་ཡོངས་ཀྱི་སྤྱི་བདེ་ལས་བྱེད་ཉེན་རྟོག་པས་དཀའ་སྤྱད་འབད་བརྩོན་དང་སྒེར་སེམས་མེད་པར་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་པ་རེད།

ལྷོ་ཁ་གྲོང་ཁྱེར་གྱི་བཙོག་ཆུ་གཙང་གསིང་བཟོ་གྲྭའི་དུས་ཐེངས་གཉིས་པའི་འཛུགས་སྐྲུན་རྣམ་གྲངས་དེ་ཟླ་3པའི་ཟླ་མཇུག་ཏུ་ཚོད་ལྟའི་འཁོར་རྒྱུག་བྱེད་རྩིས་ཡོད་པ་དང་རྣམ་གྲངས་འཛུགས་སྐྲུན་བྱ་ཡུལ་དུ་ཝང་ཅུན་ཀྲེང་གིས་ཨར་སྐྲུན་པའི་ལས་ཀ་དང་འཚོ་བའི་གནས་ཚུལ་དང་ཁོང་ཚོའི་གླ་ཕོགས་དུས་ཐོག་ཏུ་སྤྲོད་མིན་ལ་ཐུགས་ཁུར་ཆེན་པོ་གནང་ཞིང་། ཝང་ཅུན་ཀྲེང་གིས་འབྲེལ་ཡོད་སྡེ་ཚན་གྱིས་འགན་འཁྲི་ཏན་ཏིག་བསྒྲུབས་ནས་ཨར་སྐྲུན་པའི་འཚོ་བ་འགན་ལེན་ཡག་པོ་བྱེད་པ་དང་བདེ་འཇགས་ཨང་དང་པོ་དང་སྤུས་ཚད་གོང་དུ་འཇོག་རྒྱུ་མཐའ་འཁྱོངས་བྱས་ནས་རྣམ་གྲངས་སྤུས་འབོར་གཉིས་ལྡན་གྱི་སྒོ་ནས་དུས་ཐོག་ཏུ་ལེགས་གྲུབ་ཐུབ་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།

ལྷོ་ཁ་གྲོང་ཁྱེར་སྣེ་གདོང་ཆུས་བྱ་ས་ཁྲོམ་གཞུང་སྐར་དམར་སྡེ་ཁུལ་གྱི་དམར“གསར”ས་ཚུགས་སུ་ཝང་ཅུན་ཀྲེང་གིས་ཉོ་སྐྱེལ་བ་དང་། མྱུར་སྐྱེལ་བ། དྲ་འབོད་རླངས་འཁོར་གྱི་ཁ་ལོ་བ་སོགས་ལས་ཞུགས་ཚོགས་སྤྱི་གསར་པའི་འཐུས་མིར་འཚམས་འདྲི་གནང་ནས་ཁོང་ཚོས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལེགས་སྐྱེས་ཧུར་ཐག་ཕུལ་བར་ཐུགས་རྗེ་ཆེ་ཞུས་པ་རེད། ཁོང་གིས་ལས་ཞུགས་ཚོགས་སྤྱི་གསར་པ་ནི་མཛེས་སྡུག་ལྡན་པའི་འཚོ་བ་གསར་པ་གཏོད་མཁན་དང་སྲུང་སྐྱོང་མཁན་ཡིན་པས། རིམ་ཁག་སྡེ་ཚན་ཁག་གིས་གཅེས་སྐྱོང་ཞབས་ཞུར་ཤུགས་སྣོན་བརྒྱབ་ནས་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་བྱེད་རོགས་དང་ཁྲིམས་མཐུན་ཁེ་དབང་སྲུང་སྐྱོང་ཏན་ཏིག་བྱས་ཏེ་ལས་ཞུགས་ཚོགས་སྤྱི་གསར་པར་སེམས་ཁུར་དང་གཅེས་སྐྱོང་བྱེད་པའི་ཁོར་ཡུག་བཟང་པོ་ཧུར་ཐག་གཏོད་དགོས་ཞེས་གསུངས་པ་རེད།