ཡན་ཅིན་ཧའེ་ཡིས་འགོ་ཁྲིད་རྒན་གྲས་དང་། ལས་བྱེད་པ་རྒན་གྲས། འཐབ་འཛིང་པ་རྒན་གྲས་བཅས་ལ་འཚམས་འདྲི་གནང་བ།
བོད་ཀྱི་ལོ་གསར་གྱི་སྔ་ནུབ་ཏུ། རང་སྐྱོང་ལྗོངས་ཏང་ཨུད་ཀྱི་གཅིག་གྱུར་བཀོད་སྒྲིག་གཞིར་བཟུང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཡན་ཅིན་ཧའེ་ཡིས་ལྷ་སར་འགོ་ཁྲིད་རྒན་གྲས་དང་། ལས་བྱེད་པ་རྒན་གྲས། འཐབ་འཛིང་པ་རྒན་གྲས་བཅས་ལ་འཚམས་འདྲི་གནང་བ་དང་འབྲེལ། རང་སྐྱོང་ལྗོངས་ཏང་ཨུད་དང་། མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་། སྲིད་གཞུང་། སྲིད་གྲོས་བཅས་དང་། ཧྲུའུ་ཅི་ཝང་ཅུན་ཀྲེང་གི་ཚབ་ཞུས་ནས་ཁོང་ཚོར་དུས་ཆེན་གྱི་འཚམས་འདྲི་དང་ལོ་གསར་གྱི་སྨོན་འདུན་བཟང་པོ་ཞུས་གནང་བ་རེད།
རང་སྐྱོང་ལྗོངས་ཞིང་ཆེན་རིམ་པའི་འགོ་ཁྲིད་རྒན་གྲས་ཤིང་རྩ་བསྟན་འཛིན་ཆོས་གྲགས་དང་ཆོས་འཕེལ་གྱི་ཁྱིམ་དུ་ཡན་ཅིན་ཧའེ་ཡིས“བཀྲ་ཤིས་བདེ་ལེགས”ཞེས་ཕན་ཚུན་མཇལ་དར་སྒྲོན་རེས་དང་སྨོན་འདུན་ཞུ་རེས་གནང་བ་དང་། འཚོ་བའི་གནས་ཚུལ་སྐོར་བཀའ་འདྲི་ཞིབ་ཕྲ་གནང་བ་མ་ཟད། ཁོང་ཚོར་སྐུ་གཟུགས་གསལ་ཐང་དང་བསམ་འདུན་ལྷུན་གྱི་གྲུབ་པའི་སྨོན་འདུན་ཡང་ཞུས་ཤིང་། ཁོང་གིས། ལས་བྱེད་པ་རྒན་གྲས་ནི་ཏང་དང་རྒྱལ་ཁབ་ཀྱི་རྩ་ཆེའི་རྒྱུ་ནོར་ཡིན་པས། ལས་བྱེད་པ་རྒན་གྲས་ལ་ཐུགས་ཁུར་དང་གཅེས་སྐྱོང་བྱེད་པ་ནི་སྔར་ནས་བཟུང་རང་རེའི་ཏང་གི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་ཞིག་རེད། ཀྲུང་གོའི་ལུགས་ཀྱི་དེང་རབས་ཅན་གྱི་རྒྱང་ལམ་གསར་པར་ང་ཚོས་དུས་རབས་གསར་པའི་ལས་བྱེད་པ་རྒན་གྲས་ཀྱི་སྙིང་སྟོབས་དར་སྤེལ་ཤུགས་ཆེན་གཏོང་བ་དང་། ལས་བྱེད་པ་རྒན་གྲས་ཀྱི་གསར་འབྱེད་གསར་གཏོད་ཀྱི་སྙིང་སྟོབས་དང་དཀའ་སྤྱད་འབད་འཐབ་ཀྱི་སྤྱོད་བཟང་སློབ་སྦྱོང་དང་དར་སྤེལ་བཏང་སྟེ། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་རྒྱག་པ། དངོས་ཐོག་བདེན་འཚོལ་དང་འགག་སྒྲོལ་དཀའ་སེལ་གྱིས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་བཏང་ནས། མི་རིགས་ཁག་གི་མང་ཚོགས་རྣམས་དེ་བས་མཛེས་སྡུག་ལྡན་པའི་འཚོ་བ་སྐྱེལ་ཐུབ་པའི་འབད་བརྩོན་བྱེད་དགོས་ཞེས་གསུངས་པ་རེད།
“འདི་ལོ་ཁྱེད་རང་དགུང་ལོ་ག་ཚོད་ཡིན་ནམ” “ནང་མི་ག་ཚོད་ཡོད་དམ” “ཕྲུ་གུ་ཚོ་ལས་ཀ་གང་བྱེད་ཀྱི་ཡོད་དམ”ཞེས་ཡན་ཅིན་ཧའེ་མཐུན་སྒྲིལ་གྲོང་གསར་ཁུལ་ཆུང་དུ་གནས་པའི་རྒན་ཡོལ་ཞུས་པའི་ལས་བྱེད་པ་རྒན་གྲས་ཡོན་ཏན་བཀྲ་ཤིས་ཀྱི་ཁྱིམ་དུ་ཕེབས་ནས་བཀའ་འདྲི་དེ་ལྟར་གནང་བ་དང་འབྲེལ། ཁྱིམ་ཚང་དང་འཚོ་བའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད། རྒན་རྒོན་དགུང་ལོ་བགྲེས་ཀྱང་སྐུ་གཟུགས་ཐང་པོ་ཡོད་པ་གཟིགས་སྐབས་ཡན་ཅིན་ཧའེ་ཐུགས་བློ་བདེ་པོ་བྱུང་ཞིང་། ཁོང་གིས་རྒན་རྒོན་ནད་མེད་ཚེ་རིང་དང་འཚོ་བ་བདེ་སྐྱིད་ཡོང་བའི་སྨོན་འདུན་ཞུས་པ་རེད།
ཁྲེང་ཀོན་ཆུས་ཀརྨ་དགོན་གསར་སྡེ་ཁུལ་གྱི་ཚོགས་ཆུང་12པའི་སྒོ་ར་ཞིག་གི་ནང་། ཡན་ཅིན་ཧའེ་ཡིས་དམག་སྡེ་བཅོ་བརྒྱད་པའི་འཐབ་འཛིང་པ་རྒན་གྲས་ཚེ་རིང་གི་ནང་མི་ཚོ་དང་སྤེལ་རེས་གནང་ནས་སྤྱིར་བཏང་མིན་པའི་ལོ་ཟླར་རྗེས་དྲན་དང་མཛེས་སྡུག་ལྡན་པའི་འཚོ་བའི་སྐོར་ལྷུག་གླེང་གནང་བ་རེད། ཡན་ཅིན་ཧའེ་ཡིས། བོད་ཞི་བས་བཅིངས་འགྲོལ་བཏང་བའི་བྱ་གཞག་ནི་འཐབ་འཛིང་པ་རྒན་གྲས་དང་བོད་སྐྱོད་མི་སྣས་ཚེ་སྲོག་དང་ཁྲག་དྲོན་ལ་བརྟེན་ནས་བཏོད་པ་ཞིག་ཡིན་པ་ཏང་དང་མི་དམངས་ཀྱིས་ནམ་ཡང་བརྗེད་མི་སྲིད། ང་ཚོས་རྟག་ཏུ་བརྩི་བཀུར་གྱི་བསམ་བློ་དང་གཅེས་སེམས་བཅངས་ནས་བྱ་ཐབས་ནུས་ལྡན་ཧུར་ཐག་སྤྱད་དེ། ཏང་གི་ཐུགས་ཁུར་དང་དྲོ་སྐྱིད་འཐབ་འཛིང་པ་རྒན་གྲས་ཀྱི་སེམས་ལ་ཏན་ཏིག་ཚོར་བར་བྱས་ནས། ཁོང་ཚོའི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་གཏོང་དགོས་ཞེས་གསུངས་པ་རེད།