ཚེས་24ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ཏང་ཙུའི་ཧྲུའུ་ཅི་དང་ཀྲུའུ་རེན་ཡན་ཅིན་ཧའེ་ཡིས“1·07”དིང་རི་སོགས་ས་ཡོམ་གེགས་ཁུལ་གྱི་གེགས་རྗེས་སླར་གསོ་བསྐྱར་སྐྲུན་ལས་དོན་འགོ་ཁྲིད་ཚོགས་ཆུང་གི་ཚོགས་འདུ་ཐེངས་གཉིས་པ་གཙོ་སྐྱོང་གནང་ནས། གེགས་རྗེས་སླར་གསོ་བསྐྱར་སྐྲུན་ལས་དོན་ལ་སྐུལ་འདེད་གཏོང་བ་དང་། ཁེ་ལས་ཀྱིས་ཞལ་འདེབས་བརྒྱབ་ནས་གྲོང་ཚོ་ཧྲིལ་པོ་བསྐྱར་སྐྲུན་བྱེད་པ། རྒྱལ་ཁབ་ཀྱི་འབྲེལ་ཡོད་པུའུ་ཨུད་ཀྱིས་བརྟག་ཞིབ་བྱས་ཏེ་གེགས་རྗེས་བསྐྱར་སྐྲུན་ལས་དོན་གྱི་འཆར་འགོད་བཟོ་བ། དེ་བཞིན་གྲོང་ཚོ་ཧྲིལ་པོ་བསྐྱར་སྐྲུན་འཆར་འགོད་ཇུས་འགོད་ལས་དོན་གྱི་འཕེལ་རིམ་དང་མ་དངུལ་གྲབས་གསོག་བཀོལ་སྤྱོད་དང་གེགས་ཁུལ་གྱི་ནོར་ཁྲལ་གཟིགས་སྐྱོང་སྲིད་ཇུས་བཟོ་བ་སོགས་ཀྱི་གནས་ཚུལ་སྙན་སེང་གསན་པ་དང་འབྲེལ་གོམ་སྟབས་རྗེས་མའི་ལས་དོན་བཀོད་སྒྲིག་ཀྱང་གནང་བ་རེད།

ཡན་ཅིན་ཧའེ་ཡིས་ནན་བཤད་གནང་དོན། ངར་ཤུགས་གཅིག་སྒྲིལ་དང་ཡང་འབད་བསྐྱར་འབད་བྱས་ཏེ་སྤྱི་ཡོངས་ཀྱི་འདུ་ཤེས་བརྟན་པོ་འཛུགས་པ་དང་། འགན་འཁྲི་འཁུར་སེམས་ཆེ་རུ་གཏོང་བ། “དུས་དང་རྣམ་པ་ཀུན་ཏུ་ལྷོད་གཡེང་མི་གཏོང་བའི”འགན་འཁྲི་འཁུར་སེམས་དང“ལས་ཀ་ཚང་མར་གདེང་ཚོད་ཡོད་པའི”བྱ་སྤྱོད་སྤེལ་ཤུགས་ལ་བརྟེན་ནས་གེགས་རྗེས་སླར་གསོ་བསྐྱར་སྐྲུན་གྱི་མྱུར་ཚད་མགྱོགས་སུ་བཏང་སྟེ། དུས་བཀག་ལྟར་སྤུས་ཚད་མཐོན་པོས་གཏན་འཁེལ་གྱི་དམིགས་ཚད་ལེགས་འགྲུབ་ཡོང་བར་འགན་ལེན་བྱེད་དགོས། དངོས་ཐོག་བདེན་འཚོལ་དང་གནོད་འཚེའི་གནས་ཚུལ་ལ་དམིགས་ཏེ་ཚན་རིག་དང་མཐུན་པའི་སྒོ་ནས་གནོད་འཚེ་ཕོག་པའི་ས་ཁོངས་དབྱེ་འབྱེད་དང་གནོད་འཚེ་ཚབས་ཆེ་ཆུང་ཁུལ་དབྱེ་འབྱེད་བྱ་རྒྱུར་མཐོང་ཆེན་བྱེད་པ་དང་། སྙན་སེང་ཞུ་རྒྱུ་ཆད་ལུས་དང་ཞུ་མང་བ་སྔོན་འགོག་བྱེད་པ། གནོད་འཚེ་ཕོག་པའི་གནས་ཚུལ་ལ་ཞིབ་དཔྱད་གནད་སྨིན་བྱེད་པ། གནོད་འཚེ་ཕོག་ཚུལ་སྙན་སེང་གི་འགག་སྒོ་ནན་པོ་སྲུང་བ་བཅས་བྱེད་དགོས། སྲིད་ཇུས་གཏན་འཁེལ་དང་ཚད་གཞི་གཅིག་གྱུར་བཟོ་བ་དང་། ས་གནས་དེ་གའི་འཚོ་བའི་གོམས་གཤིས་དང་ཟུང་འབྲེལ་བྱེད་པ། མང་ཚོགས་ཀྱི་འདོད་བློར་བརྩི་འཇོག་བྱེད་པ། མི་རིགས་ཀྱི་ཁྱད་ཆོས་མངོན་གསལ་དོད་པོ་ཡོང་བ། གཅིག་གྱུར་འཆར་འགོད་དང་གཅིག་གྱུར་འཛུགས་སྐྲུན་དང་རང་སྐྲུན་གྱི་ཁང་པའི་རྣམ་པ་ཇུས་འགོད་ལུགས་མཐུན་བྱེད་པ། མི་ཕྱུགས་ལོགས་དབྱེ་དང་ཐབ་ཚང་དང་གསང་སྤྱོད་སྒྱུར་བཀོད་གཙོ་གནད་དུ་བྱེད་པའི“ཞིང་འབྲོག་པའི་རྣམ་པ་གསར་པ་འཛུགས་པའི་བྱ་སྤྱོད”དང་ཉལ་ཁང་དང་། མགྲོན་ཁང་། ཐབ་ཚང་བཅས་ཀྱི་བྱེད་ནུས་ཁུལ་དབྱེ་རྒྱུར་སྐུལ་འདེད་གཏོང་དགོས་པ་དང་། རྗེས་སུ་ཁྱིམ་ཚང་གི་མི་འབོར་འཕར་བ་སོགས་ཀྱི་རྒྱུ་རྐྱེན་ལ་བསམ་གཞིག་གང་ལེགས་བཅས་བྱས་ཏེ་རྒྱས་སྐྲུན་དང་གསར་སྐྲུན་གྱི་བར་སྟོང་དང་ཞིང་ལས་ཐོན་སྐྱེད་ཀྱི་ས་ཆ་སྔོན་ཉར་འོས་འཚམ་བྱེད་དགོས། དུས་ཚོད་སྐར་ཆ་ཙམ་ཡང་བརྩོན་ལེན་གྱིས་མྱུར་ཚད་མགྱོགས་སུ་བཏང་ནས་གེགས་རྗེས་སླར་གསོ་བསྐྱར་སྐྲུན་གྱི་ཇུས་གཞི་དང་འཆར་འགོད་བཟོ་རྒྱུར་དམ་འཛིན་བྱས་ཏེ། རང་སྐྱོང་ལྗོངས་ཏང་ཨུད་ཀྱིས་ཁ་གསལ་བཟོས་པའི་སྲིད་ཇུས་ཀྱི་ཚད་གཞི་དང་དུས་ཚོད་ཀྱི་མཚམས་ཚིགས་གཞིར་བཟུང་རྒྱལ་ཁབ་ཀྱི་འབྲེལ་ཡོད་པུའུ་ཨུད་དང་འབྲེལ་གཏུག་ཧུར་ཐག་བྱས་ཁར་ཚད་གཞི་མཐོ་ཤོས་ཀྱི་ཐོག་ནས་རྒྱལ་ཁབ་ཀྱི་རྒྱབ་སྐྱོར་གང་ཐུབ་ཅི་ཐུབ་ཀྱིས་བརྩོན་ལེན་བྱེད་དགོས་པ་དང་། ཆེད་ལས་ལག་རྩལ་མཐོ་བ་དང་། ཨར་ལས་ཉམས་མྱོང་ཕུན་སུམ་ཚོགས་པ། མ་དངུལ་སྟོབས་ཤུགས་ཆེ་བ་བཅས་ཀྱི་ཁེ་ལས་གྲོང་ཚོ་ཧྲིལ་པོ་བསྐྱར་སྐྲུན་ནང་ཞུགས་རྒྱུར་སྐུལ་སློང་བྱས་ནས་རྣམ་གྲངས་འཛུགས་སྐྲུན་གྱི་མྱུར་ཚད་དང་སྤུས་ཚད་ལ་འགན་ལེན་བྱེད་དགོས།