ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཏང་ཙུའི་ཚོགས་འདུ་གཙོ་སྐྱོང་གནང་བ།
ཚེས་23ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཏང་ཙུའི་ཧྲུའུ་ཅི་དང་ཀྲུའུ་རེན་ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཏང་ཙུའི་ཚོགས་འདུ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་གལ་ཆེན་དང་། མཛུབ་སྟོན་གལ་ཆེན། ཀྲུང་དབྱང་གི་འབྲེལ་ཡོད་ཚོགས་འདུའི་དགོངས་དོན་བཅས་བརྒྱུད་བསྒྲགས་སློབ་སྦྱོང་དང་། རང་སྐྱོང་ལྗོངས་ཀྱི་ཚོགས་འདུ་གཉིས་དང་རང་སྐྱོང་ལྗོངས་སྒྲིག་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པའི་དགོངས་དོན་བརྒྱུད་བསྒྲགས་དང་སློབ་སྦྱོང་གནང་བ་མ་ཟད། ལག་བསྟར་དོན་འཁྱོལ་ལས་དོན་བཀོད་སྒྲིག་ཀྱང་གནང་བ་རེད།
ཚོགས་འདུའི་ཐོག་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་2025ལོའི་ལོ་འཁོར་གྱི་ལས་དོན་གཙོ་གནད་དང་། ལྟ་སྐུལ་ལས་དོན་གྱི་འཆར་གཞི། ཁྲིམས་འཛུགས་ལས་དོན་གྱི་འཆར་གཞི། འཐུས་མིའི་ལས་དོན་གྱི་འཆར་གཞི་སོགས་དོན་གནད་ལ་ཞིབ་འཇུག་བྱས་པ་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཏང་ཙུའི་2024ལོའི་ཏང་འཛུགས་སྐྱོང་དང་ཏང་སྲོལ་སྲིད་གཙང་འཛུགས་སྐྱོང་ལས་དོན་གྱི་ཕྱོགས་སྡོམ་དང་དེ་བཞིན་2025ལོའི་ལས་དོན་བཀོད་སྒྲིག་གསན་པ་རེད།
ཡན་ཅིན་ཧའེ་ཡིས་ནན་བཤད་གནང་དོན། བཀོད་སྒྲིག་ཇི་ཙམ་བྱས་པར། དོན་འཁྱོལ་ཞིབ་ཕྲ་བྱེད་དགོས་ཞེས་པ་ལྟར། འཕྲལ་མཁོ་སྔོན་ལ་ལག་བསྟར་དང་། སྐུལ་འདེད་གཟབ་ནན་གཏོང་བ། ཁྲིམས་འཛུགས་དང་དྲིལ་བསྒྲགས་ཟུང་འབྲེལ་བཅས་མཐའ་འཁྱོངས་བྱས་ཏེ“བརྟན་ལ་མགྱོགས་པའི་གོམ་སྟབས”ཀྱི་ཐོག་ནས་བོད་ཀྱི་ཁྱད་ཆོས་ལྡན་པའི་ས་གནས་རང་བཞིན་གྱི་ཁྲིམས་སྲོལ་མ་ལག་རིམ་བཞིན་བརྟན་དུ་བཏང་སྟེ་ཁྲིམས་ལྟར་བོད་སྐྱོང་གི་རྨང་གཞི་རྒྱུན་ཆད་མེད་པར་བརྟན་དུ་གཏོང་དགོས། ལྟ་སྐུལ་ཡང་དག་དང་། ལྟ་སྐུལ་ནུས་ལྡན། ཁྲིམས་ལྟར་ལྟ་སྐུལ་བཅས་མཐའ་འཁྱོངས་བྱས་ཏེ། ལྟེ་བར་དམིགས་པ་དང་། སྤྱི་ཡོངས་ལ་ཞབས་འདེགས་ཞུ་བ། གཙོ་གནད་མངོན་གསལ་དོད་པོ་བཅས་ཡོང་བར་བྱས་ནས་ལྟ་སྐུལ་བྱེད་སྟངས་སྣ་ཚོགས་ཕྱོགས་བསྡུས་ཐོག་སྤྱོད་པ་དང་ལས་ཀའི་ཕན་འབྲས་དངོས་དམ་འཛིན་ནན་པོ་བྱས་ཏེ། “མི་དམངས་འཐུས་ཚོགས་ཀྱི་སྟོབས་ཤུགས”ལ་བརྟེན་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རམ་འདེགས་བྱེད་དགོས། འཐུས་མིར་འབྲེལ་བ་བྱེད་པའི་ཐབས་ལམ་རྒྱུན་ཆད་མེད་པར་རྒྱ་སྐྱེད་དང་། སྣུར་སྲིང་། ཕུན་སུམ་ཚོགས་སུ་བཅས་བཏང་ནས་འཐུས་མིའི་ཞབས་ཞུ་འགན་ལེན་གྱི་ལས་དོན་ལ་ཤུགས་སྣོན་ཏན་ཏིག་རྒྱག་པ་དང་མི་དམངས་འཐུས་ཚོགས་ཀྱི་འཐུས་མིའི་སྦྲེལ་ཟམ་དང་སྒྲོག་ཐག་གི་ནུས་པ་འདོན་སྤེལ་ཡག་པོ་བྱས་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཆེད་འགལ་རྐྱེན་སེལ་བ་དང་། མཉམ་ཤུགས་གཅིག་སྒྲིལ། སྒུལ་ཤུགས་ཆེར་གཏོང་བཅས་བྱེད་དགོས། “ལས་ཁུངས་བཞི”འཛུགས་སྐྱོང་སྣེ་ཁྲིད་དུ་བྱས་ནས་ཆབ་སྲིད་ལ་སྣང་ཆེན་དང་སྤྱི་ཡོངས་ལ་ལྟ་རྟོག་བྱས་ཏེ། རང་སྐྱོང་ལྗོངས་སྒྲིག་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པའི་བཀོད་སྒྲིག་གཞིར་བཟུང་ཏང་ནན་པོས་སྐྱོང་བའི་ཆབ་སྲིད་ཀྱི་འགན་འཁྲི་ཕྱོགས་ཡོངས་ནས་དོན་འཁྱོལ་བྱེད་པ་དང་། རྩ་འཛུགས་སྟོབས་ཆེར་གཏོང་བ་དང་། བྱ་གཞག་སྒྲུབ་པ། འཇོན་ཐང་ལ་གཞིགས་ནས་ལས་བྱེད་པ་བཀོལ་སྤྱོད་དང་ལས་རྗེས་ལ་གཞིགས་ནས་གདེང་འཇོག་བྱེད་པའི་སྟོན་ཕྱོགས་གསལ་པོ་འཛུགས་པ། མཐའ་ཚད་སྲུང་བ་དང་སྤྱོད་ཚུལ་ལེགས་སུ་བཏང་སྟེ་སྤྱོད་ཚུལ་འཛུགས་སྐྱོང་དེ་རྒྱུན་དུ་དམ་འཛིན་བྱེད་པ་དང་། རྒྱུན་གཏན་དང་མཉམ་འདྲེས། རྒྱུན་དུ་སྒྲུབ་པ་བཅས་ཏན་ཏིག་བྱེད་དགོས།