དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ལ་ཉེ་བའི་མཚམས་ཏེ་ཚེས་23ཉིན་གྱི་སྔ་དྲོར། ཀྲུང་དབྱང་དྲིལ་བསྒྲགས་པུའུ་ཤེས་དཔལ་སྲོལ་གཏོད་ཅུས་ཀྱི་འབྲེལ་ཡོད་འགན་འཁུར་བློ་མཐུན་ལྷ་ས་གྲོང་ཁྱེར་ཁྲེང་ཀོན་ཆུས་སུ་ཕེབས་ནས་རྒྱལ་ཡོངས་ཀྱི་ཀུན་སྤྱོད་དཔེ་བཟང་བ་བཀྲ་ཤིས་དཔལ་སྒྲོན་ལ་འཚམས་འདྲི་བྱས་པ་རེད།

བཀྲ་ཤིས་དཔལ་སྒྲོན། འདི་ལོ་ལོ་86ལ་སླེབས་ཀྱི་ཡོད། ཁོང་གིས་དེ་སྔོན་ནད་གཞི་ཕོག་པའི་བཟའ་ཟླར་ལོ་བཅུ་བདུན་རིང་ལྟ་སྐྱོང་བྱས་པས། རྒྱལ་ཡོངས་སྐབས་གཉིས་པའི་རྒན་སྐྱོང་གཉེན་བྱམས་ཀྱི་ཀུན་སྤྱོད་དཔེ་བཟང་བར་བདམས་པ་རེད། ཁོང་གི་བཟའ་ཟླ་ཀེང་མིང་ཤང་ནི་ཀུའེ་ཀྲོའུ་ནས་ཡིན་པ་དང་། ནན་ཅིང་གི་དམག་ཞབས་ཐིམ་པའི་དམག་མི་ཞིག་ཡིན་ལ་སྔོན་ཆད་ཨ་འགོག་ཁྲའོ་རོགས་ནང་ཞུགས་མྱོང་ཞིང་། 2009ལོར་ནད་གཞིས་རྐྱེན་པས་གྲོངས་པ་རེད། ད་ཆ། བཀྲ་ཤིས་དཔལ་སྒྲོན་ལ་མིག་ནད་ཕོག་རྐྱེན་མིག་གཉིས་ཀ་ལོང་བར་གྱུར་པས་ཁོང་གི་བུ་ཀེང་དབན་ཁྲུན་གྱིས་ལྟ་སྐྱོང་བྱེད་ཀྱི་ཡོད། བཀྲ་ཤིས་དཔལ་སྒྲོན་ལ་བོད་རང་སྐྱོང་ལྗོངས་ཀྱི་ཀུན་སྤྱོད་དཔེ་བཟང་བ་དང་བོད་ཀྱི་སེམས་འགུལ་ཐེབས་པའི་མི་སྣ་སོགས་ཀྱི་གཟི་བརྗིད་མཚན་སྙན་ཐོབ་མྱོང་ཡོད་པ་རེད།

འཚམས་འདྲིར་ཕེབས་མཁན་གྱིས་བཀྲ་ཤིས་དཔལ་སྒྲོན་དང་ཁོང་གི་ནང་མི་དང་བྱམས་བརྩེའི་ངང་གླེང་མོལ་གནང་ནས་ཁོང་ཚོའི་འཚོ་བའི་གནས་ཚུལ་དང་དཀའ་ངལ་ཤེས་རྟོགས་ཞིབ་ཕྲ་གནང་བ་མ་ཟད། བཀྲ་ཤིས་དཔལ་སྒྲོན་གྱི་རྒན་སྐྱོང་གཉེན་བྱམས་བྱ་སྤྱོད་ལ་བླ་ན་མེད་པའི་གུས་འདུད་ཀྱང་ཞུས་ཤིང་། ད་དུང་འཚམས་འདྲིའི་དངུལ་སྒོར་ཁྲི་3གནང་བ་དང་། རྒན་རྒོན་དང་ཁོང་གི་ནང་མིས་ཀྲུང་དབྱང་དྲིལ་བསྒྲགས་པུས(ཀྲུང་དབྱང་ཤེས་དཔལ་སྲོལ་གཏོད་གཞུང་དོན་ཁང)ཐུགས་ཁུར་གནང་བར་སྙིང་དབུས་ནས་ཐུགས་རྗེ་ཆེ་ཞུས་པ་རེད།