ཚེས་14ཉིན་གྱི་ཕྱི་དྲོར། བོད་རང་སྐྱོང་ལྗོངས་ཀྱི་2025ལོའི་བོད་ཀྱི་ལོ་གསར་གྱི་མཉམ་སྤྲོའི་མཚན་ཚོགས་འགོ་ཁྲིད་ཚོགས་ཆུང་གི་ཚོགས་འདུ་ཐེངས་དང་པོ་འཚོགས་པ་རེད། ཚོགས་འདུར་མཚན་ཚོགས་གྲ་སྒྲིག་བྱས་ཚུལ་གྱི་སྙན་སེང་ཉན་པ་དང་། མཚན་ཚོགས་ཇུས་འགོད་ཀྱི་འཆར་གཞི་དང་ལེ་ཚན་གྱི་གསལ་ཐོར་ཞིབ་འཇུག་དང་གྲོས་ཞིབ་བྱས་པ་མ་ཟད། གོམ་སྟབས་རྗེས་མའི་གཙོ་གནད་ལས་དོན་བཀོད་སྒྲིག་བྱས་པ་རེད།

རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་ཚོཌ་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལང་ཧྥུའུ་ཁོན་དང་། ཞུས་ཀྲི་ཐའོ། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་བཀྲ་ཤིས་ཟླ་བ་བཅས་ཚོགས་འདུར་ཞུགས་པ་རེད།

དབང་ཧའེ་ཀྲོའུ་ཡིས་མཚན་ཚོགས་ཀྱི་གྲ་སྒྲིག་ལས་དོན་དང་ཚོཌ་འདུར་ཞུགས་མཁན་བློ་མཐུན་གྱིས་བཏོན་པའི་བསམ་འཆར་དང་གྲོས་འགོར་ཁས་ལེན་གང་ལེགས་གནང་བ་རེད།

དབང་ཧའེ་ཀྲོའུ་ཡིས། ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་བསམ་བློའི་ངོས་འཛིན་གཅིག་གྱུར་ཡོང་བ་བྱས་ཏེ། ཚད་མཐོའི་འགན་འཁུར་བའི་རྣམ་འགྱུར་ཐོག་ནས་མཚན་ཚོགས་གྲ་སྒྲིག་གི་ལས་དོན་ཁག་ལ་དམ་འཛིན་ཡག་པོ་བྱས་ཏེ་མཚན་ཚོགས་འདི་ཉིད་མི་སེམས་གཅིག་སྒྲིལ་དང་འབད་འཐབ་མདུན་སྐྱོད་ལ་སྐུལ་མ་ཐེབས་པའི་སྤུས་ཚད་མཐོ་བའི་རིག་གནས་ཀྱི་སྟོན་མོ་གཟབ་རྒྱས་ཤིག་ཏུ་གཉེར་དགོས་པ་དང་། སྤྲོ་སྣང་དང་འཆམ་མཐུན་གྱི་དུས་ཆེན་གྱི་རྣམ་པ་ཟབ་མོ་ཞིག་གཏོད་དགོས་པ་དང་། ལེ་ཚན་གྱི་སྤུས་ཚད་ལ་མཐོང་ཆེན་བྱས་ནས་ཏང་ཀྲུང་དབྱང་གིས་ཐུགས་ཁུར་གཟབ་བཞེས་གནང་ལུགས་དང་། “དོན་ཆེན་བཞིར”དམིགས་པ་དང་། “འཛུགས་གཏོད་བཞིར”ཤུགས་བརྒྱབ་པའི་མངོན་གསལ་དོད་པའི་གྲུབ་འབྲས། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྱོང་བྱས་ཚུལ། རང་སྐྱོང་ལྗོངས་དབུ་བརྙེས་ནས་ལོ་60འཁོར་བར་རྟེན་འབྲེལ་ཞུ་བ། དམངས་སེམས་གཅིག་སྒྲིལ་གྱིས་ཡོམ་འགོག་གེགས་སེལ་བྱས་པ། དགུན་དུས་བོད་དུ་ཡུལ་སྐོར་བྱེད་པ་སོགས་ཀྱི་ནང་དོན་གཙོ་གནད་ཐོག་འབུར་དུ་ཐོན་པར་བྱེད་པ་དང་། མཚོན་སྟངས་རྣམ་པ་ཕུན་སུམ་ཚོགས་སུ་བཏང་ནས་དེང་རབས་ཚན་རྩལ་གྱི་བྱ་ཐབས་སྤྱད་དེ་རིག་རྩལ་བརྩམས་ཆོས་རྩེ་གྲ་ནུས་ཤུགས་ཡོད་རྒུས་གཏོད་དགོས། སྤྱི་འདོམས་མཐུན་སྦྱོར་ལ་ཤུགས་སྣོན་རྒྱག་པ་དང་། ཚན་རིག་དང་མཐུན་པའི་ངང་སྟོབས་ཤུགས་སྙོམས་སྒྲིག ལས་འགན་ཁག་བགོས་ཁ་གསལ་བཟོ་བ། འགན་འཁྲི་དོན་འཁྱོལ་ནན་པོ་བཅས་བྱས་ཏེ་ལས་ཀའི་མཉམ་ཤུགས་ཤིག་ཆགས་པར་བྱེད་པ་དང་། ལས་ཀའི་འཕེལ་རིམ་ལ་སྟངས་འཛིན་ཡག་པོ་བྱས་ཏེ་མཚན་ཚོགས་གྲ་སྒྲིག་གི་ལས་དོན་ཁག་ལ་གོ་རིམ་ལྡན་པའི་ངང་སྐུལ་འདེད་གཏོང་རྒྱུའི་འགན་ལེན་ཏན་ཏིག་བྱེད་དགོས་པའི་ནན་བཤད་གནང་བ་རེད།