ཉེ་ཆར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེ་ཡིས་རུ་སྣེ་ཁྲིད་དེ་བོད་ལྗོངས་རང་བྱུང་ཚན་རིག་རྟེན་མཛོད་ཁང་དུ་བརྟག་ཞིབ་གནང་བར་ཕེབས་ནས་ས་གནས་ས་ཐོག་ཏུ་རྟེན་མཛོད་ཁང་གི་དོ་དམ་འཁོར་སྐྱོད་དང་། ཚན་རིག་ཁྱབ་གདལ་གྱི་སློབ་གསོའི་ལས་དོན་སྤེལ་ཚུལ། གཙོ་གནད་རྣམ་གྲངས་ལ་སྐུལ་འདེད་གཏོང་ཚུལ་བཅས་ལ་མཁྱེན་རྟོགས་གནང་བ་མ་ཟད། ཏང་ཡོན་དཀྱུས་མའི་ངོས་ནས་མཉམ་འབྲེལ་ཏང་ཀྲི་པུའུ་དྲུག་པའི་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོར་ཡང་ཞུགས་གནང་བ་རེད།

བརྟག་ཞིབ་ཚོགས་ཆུང་གིས་བསྟན་དོན། བོད་ལྗོངས་རང་བྱུང་ཚན་རིག་རྟེན་མཛོད་ཁང་གིས་ལས་དོན་པ་གསོ་སྐྱོང་ལ་ཤུགས་སྣོན་རྒྱག་པ་དང་འཆད་འགྲེལ་པའི་ཕྱོགས་བསྡུས་བྱང་ཚད་རྒྱུན་ཆད་མེད་པར་མཐོ་རུ་བཏང་སྟེ་ལྟད་མོ་བའི་ལྟ་སྐོར་དང་མྱོང་རོལ་གྱི་ཚོར་སྣང་ཆེ་རུ་གཏོང་དགོས་པ་དང་། སྡེ་ཚན་མཉམ་འགུལ་ལ་ཤུགས་སྣོན་བརྒྱབ་ནས་སྤྱི་ཚོགས་ཐོན་ཁུངས་ཀྱི་ཐབས་ལམ་རྒྱ་ཆེར་གཏོང་བ་དང་གཙོ་གནད་ཁྱབ་ཁོངས་སུ་ཚན་རིག་ཁྱབ་གདལ་གཏོང་བའི་མཉམ་ལས་སྤེལ་རེས་ལ་དམིགས་ཏེ་ཕུལ་བྱུང་གི་ཚན་རྩལ་གྲུབ་འབྲས་ནང་འདྲེན་ཧུར་ཐག་བྱས་ནས་རང་ལྗོངས་ཀྱི་ཚན་རིག་ཁྱབ་གདལ་བྱ་གཞག་དེ་བས་ལེགས་པའི་སྒོ་ནས་འཕེལ་རྒྱས་ཡོང་བར་རམ་འདེགས་བྱེད་དགོས།