ཚེས་4ཉིན། རང་སྐྱོང་ལྗོངས་ཀྱི་ལས་ཚབ་ཀྲུའུ་ཞི་དང་རང་སྐྱོང་ལྗོངས་སྲིད་གཞུང་ཏང་ཙུའི་ཧྲུའུ་ཅི་ཀརྨ་ཚེ་བརྟན་གྱིས་སྲིད་གཞུང་ཏང་ཙུའི(རྒྱ་ཆེ)ཚོགས་འདུ་དང་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང(རྒྱ་ཆེ)གི་སློབ་སྦྱོང་ཚོགས་འདུ་གཙོ་སྐྱོང་གནང་བ་རེད།

ཚོགས་འདུའི་ཐོག ཀྲུང་གོ་སྲིད་ཁྲིམས་སློབ་ཆེན་ཁྲིམས་སྐྱོང་སྲིད་གཞུང་ཞིབ་འཇུག་ཁང་གི་ཡོན་ཀྲང་ཀྲའོ་ཕེང་གིས་ཁྲིམས་སྐྱོང་སྲིད་གཞུང་འཛུགས་སྐྱོང་ལ་སྐུལ་འདེད་གཏོང་བར་དམིགས་ནས་ཆེད་དོན་འཆད་ཁྲིད་གནང་བ་དང་སྲིད་གཞུང་ཏང་ཙུའི་ཚན་ཁག་གི་ཁོངས་མིས་སྤེལ་རེས་གཏམ་བཤད་གནང་བ་རེད།

ཀརྨ་ཚེ་བརྟན་གྱིས་བསྟན་དོན། སྲིད་གཞུང་སྡེ་ཚན་ནི་བཅའ་ཁྲིམས་དང་ཁྲིམས་སྲོལ་ལག་ལེན་བསྟར་མཁན་གྱི་བྱེད་པོ་གལ་ཆེན་ཞིག་ཡིན་ལ། མི་དམངས་མང་ཚོགས་དང་འབྲེལ་བ་བྱེད་མང་ཤོས་དང་དྲང་གཞག་དྲང་བདེན་ཐད་ཀར་ཚོར་བའི་རྒྱལ་ཁབ་ཀྱི་ལས་ཁུངས་ཤིག་ཀྱང་རེད། དེར་བརྟེན། ཞི་ཅིན་ཕིང་གི་ཁྲིམས་སྐྱོང་དགོངས་པ་སློབ་སྦྱོང་བྱས་ནས་གོ་བ་གཏིང་ཟབ་ལེན་པ་དང་། ཕྱོགས་ཡོངས་ནས་ཁྲིམས་ལྟར་རྒྱལ་སྐྱོང་དང་ཁྲིམས་སྐྱོང་སྲིད་གཞུང་འཛུགས་སྐྱོང་ལ་སྐུལ་འདེད་གཏོང་རྒྱུའི་སྐོར་གྱི་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་བཀོད་སྒྲིག་གལ་ཆེན་ལག་བསྟར་དོན་འཁྱོལ་གཏིང་ཟབ་བྱས་ཐོག་རྩ་ཁྲིམས་དེ་བྱ་སྤྱོད་ཀྱི་རྩ་བའི་ཚད་གཞིར་བརྩི་རྒྱུ་མཐའ་འཁྱོངས་བྱས་ནས། རྩ་ཁྲིམས་དང་བཅའ་ཁྲིམས་ལ་ནན་པོར་གཞིགས་ཏེ་དབང་ཆ་སྤྱོད་པ་དང་འགན་འཁྲི་བསྒྲུབས་ནས། མི་དམངས་བློ་ཡིད་ཚིམ་པའི་ཁྲིམས་སྐྱོང་སྲིད་གཞུང་འཛུགས་སྐྱོང་ཧུར་ཐག་བྱེད་དགོས། ཁྲིམས་སྐྱོང་སྲིད་གཞུང་འཛུགས་སྐྱོང་གི་ཡང་དག་པའི་ཁ་ཕྱོགས་སྟངས་འཛིན་ནན་པོ་བྱེད་པ་དང་།

བསམ་བློ་དང་བྱ་སྤྱོད་ཁྲིམས་སྐྱོང་སྲིད་གཞུང་འཛུགས་སྐྱོང་བྱེད་པའི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་མཐའ་གཅིག་ཏུ་གཅིག་གྱུར་བྱས་ཐོག་ལྗོངས་ཏང་ཨུད་ཀྱི་འགོ་ཁྲིད་འོག་ཁྲིམས་སྐྱོང་སྲིད་གཞུང་འཛུགས་སྐྱོང་གི་བྱེད་པོའི་འགན་འཁྲི་ལག་བསྟར་ཏན་ཏིག་བྱེད་དགོས། ཁྲིམས་སྐྱོང་སྲིད་གཞུང་འཛུགས་སྐྱོང་གི་ལས་དོན་ཁག་དམ་འཛིན་ནན་པོ་བྱས་ནས་ཁྲིམས་ལྟར་ཐབས་ཇུས་འགོད་པ་དང་ཁྲིམས་ལྟར་སྲིད་འཛིན་པ་མཐའ་འཁྱོངས་བྱས་ཏེ་སྲིད་འཛིན་ཁྲིམས་སྒྱུར་གྱི་སྒྲིག་སྲོལ་དང་ལམ་སྲོལ་མུ་མཐུད་འཐུས་སྒོ་ཚང་དུ་གཏོང་བ་དང་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་དང་སྤྱི་ཚོགས་བཅོས་སྐྱོང་ཐད་ཀྱི་མངོན་གསལ་དོད་པའི་གནད་དོན་ལ་གཙོ་གནད་དུ་དམིགས་ནས་ཁྲིམས་འཛུགས་ལས་དོན་ལ་རང་འགུལ་ངང་ཞིབ་འཇུག་དང་སྐུལ་འདེད་གཏོང་བ་དང་། དུས་རབས་གསར་པའི“ཧྥེང་ཆའོ་ཉམས་མྱོང”མཐའ་འཁྱོངས་དང་འཕེལ་རྒྱས་བཏང་ནས་མང་ཚོགས་ལ་ཁྲིམས་ལུགས་ཤེས་པ་དང་། ཁྲིམས་ལུགས་སྦྱོང་བ། ཁྲིམས་ལུགས་རྟོགས་པ། ཁྲིམས་ལུགས་སྤྱོད་པ་བཅས་ཀྱི་ཁྲིད་སྟོན་ཧུར་ཐག་བྱེད་དགོས། ཁྲིམས་སྐྱོང་སྲིད་གཞུང་འཛུགས་སྐྱོང་ལ་འདེགས་སྐྱོར་དང་འགན་སྲུང་བྱེད་ཤུགས་ཆེ་རུ་བཏང་ནས་ཏང་སྲིད་ཀྱི་འགན་འཁུར་བ་གཙོ་བོས་ཁྲིམས་སྐྱོང་འཛུགས་སྐྱོང་ལ་སྐུལ་འདེད་གཏོང་བའི་འགན་འཁུར་བ་ཨང་དང་པོའི་འགན་འཁྲི་ལག་བསྟར་དོན་འཁྱོལ་ནན་པོ་བྱས་ཏེ་ཁྲིམས་སྐྱོང་གི་འདུ་ཤེས་བརྟན་པོར་འཛུགས་པ་དང་ཁྲིམས་སྐྱོང་གི་བྱང་ཚད་མཐོ་རུ་གཏོང་རྒྱུར་སྐུལ་འདེད་གཏོང་དགོས། རང་འགུལ་ངང་ལྟ་སྐུལ་དང་ལེན་བྱས་ནས་སྲིད་གཞུང་གི་ལྟ་སྐུལ་ཞིབ་བཤེར་ལས་ཀར་ཤུགས་སྣོན་དང་ཚད་ལྡན་དུ་བཏང་སྟེ་སྲིད་འཛིན་གྱི་ནུས་ཕྱོད་ཆེ་རུ་གཏོང་དགོས།

ཀརྨ་ཚེ་བརྟན་གྱིས་ནན་བཤད་གནང་དོན། བདེ་འཇགས་ཐོན་སྐྱེད་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་ལག་བསྟར་གཏིང་ཟབ་བྱས་ནས་བདེ་འཇགས་ཐོན་སྐྱེད་ཀྱི་འགན་འཁྲི་ནན་དུ་གཏོང་བ་དང་། ཉེན་ཁའི་འབྱུང་རྩ་སྔོན་འགོག་དང་ཚོད་འཛིན་ལ་ཤུགས་སྣོན་རྒྱག་པ། གཙོ་གནད་ཁྱབ་ཁོངས་ལ་བཅོས་སྒྲིག་བྱེད་ཟབ་ཏུ་གཏོང་བ། ནགས་ཚལ་དང་རྩྭ་ཐང་གི་མེ་འགོག་མེ་གསོད་ལས་དོན་ཡག་པོར་སྒྲུབ་པ། རང་བྱུང་གནོད་འཚེ་སྣ་ཚོགས་ཐོན་རྒྱུར་དོགས་ཟོན་བཅས་བྱས་ཏེ་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་མཐའ་གཅིག་ཏུ་འགན་ལེན་བྱེད་དགོས།

ཀརྨ་ཚེ་བརྟན་གྱིས་ནན་བཤད་གནང་དོན། ལྗོངས་ཏང་ཨུད་ཀྱི་བཀོད་སྒྲིག་ལྟར་སྟོབས་ཤུགས་གཅིག་སྒྲིལ་གྱིས་སྒྱུར་བཅོས་གསར་གཏོད་བྱས་ནས་འཕེལ་རྒྱས་ལ་སྐུལ་འདེད་གཏོང་བ་དང་། སྟོབས་ཤུགས་གཅིག་སྒྲིལ་གྱིས་སྒོ་དབྱེ་མཉམ་ལས་བྱས་ནས་གསོན་ཤུགས་འཕེལ་བར་བྱེད་པ། སྟོབས་ཤུགས་གཅིག་སྒྲིལ་གྱིས་གྲོང་ཁྱེར་བཅོས་སྐྱོང་བྱས་ནས་སྤུས་ཚད་མཐོ་རུ་གཏོང་བ། སྟོབས་ཤུགས་གཅིག་སྒྲིལ་གྱིས་སློབ་གསོ་འཕེལ་རྒྱས་བཏང་ནས་རྨང་གཞི་བརྟན་དུ་གཏོང་བ། སྟོབས་ཤུགས་གཅིག་སྒྲིལ་གྱིས“འདུ་འགོད་ཆེན་པོ་དགུ”སྤེལ་ནས་མཐུན་སྒྲིལ་ལ་སྐུལ་འདེད་གཏོང་བ། སྟོབས་ཤུགས་གཅིག་སྒྲིལ་གྱིས་ཉེན་ཁར་དོགས་ཟོན་བྱས་ནས་བདེ་འཇགས་འགན་ལེན་བཅས་བྱས་ཐོག“འཕྲལ་མར་སྒྲུབ་པ་དང་དངོས་འཛིན་དངོས་སྒྲུབ”ཀྱི་ལས་ཀའི་སྤྱོད་ཚུལ་དར་སྤེལ་ཤུགས་ཆེན་བཏང་ནས་ལས་དོན་ཁག་སླར་ཡང་སྐས་རིམ་གསར་པ་ཞིག་ཏུ་བསླེབ་རྒྱུར་སྐུལ་འདེད་གཏོང་དགོས།