ཟླ་11ཚེས་26ནས་29ཉིན་བར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གཞིས་རྩེ་གྲོང་ཁྱེར་གྱི་རྫོང་དང་། ཤང་། གྲོང་ཚོ་བཅས་ཁག་གཅིག་དང་། མཐའ་མཚམས་འགག་སྒོ། སློབ་གྲྭ་འབྲིང་ཆུང་། ཆོས་ལུགས་བྱེད་སྒོ་སྤེལ་ཡུལ་བཅས་སུ་ཕེབས་ནས་བརྟག་ཞིབ་གནང་བ་དང་སྦྲགས། གཞི་རིམ་གྱི་ལས་བྱེད་མང་ཚོགས་ལ་གཟིགས་པ་དང་འཚམས་འདྲི་ཡང་གནང་ཞིང་། ཁོང་གིས་ནན་བཤད་གནང་དོན། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་སློབ་སྦྱོང་དང་ལག་བསྟར་གཏིང་ཟབ་བྱས་ནས་དམངས་འཚོ་ལེགས་གཏོང་དང་མི་སེམས་གཅིག་སྒྲིལ་དེ་ལས་དོན་ཐམས་ཅད་ཀྱི་འགོ་འཛུགས་ས་དང་དོན་ལ་བབས་སར་བརྩིས་ཐོག་གཟེར་འདེབས་ཀྱི་སྙིང་སྟོབས་ལ་བརྟེན་ནས་དོན་འཁྱོལ་དམ་འཛིན་དང་དངོས་ཕན་དོན་གཉེར་བྱས་ཏེ་མི་རིཌ་ཁག་གི་མང་ཚོཌ་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཟབ་ཏུ་གཏོང་དགོས།  

ལོ་ལོ་མཐའ་མཚམས་ཞིབ་བཤེར་ས་ཚིགས་དང་། འགྲམ་འགག་སྒོས་སྐྱ་རྫོང་སྤྱི་བདེ་ཅུས། རྨ་བྱ་ཤང་མངགས་གཏོང་ཁང་སོགས་སུ་ལིའུ་ཅང་གིས་གཞི་རིམ་བཅོས་སྐྱོང་དང་དམངས་ཕན་ཞབས་ཞུ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ས་གནས་ས་ཐོག་ཏུ་གྲོང་གསེབ་ཀྱི་དྲ་མིག་ལས་དོན་པར་འབྲེལ་བ་གནང་ནས་ཕྱོགས་བསྡུས་བཅོས་སྐྱོང་གི་APPབཀོལ་སྤྱོད་གནས་ཚུལ་ལ་ཞིབ་བཤེར་གནང་བ་དང་འབྲེལ། ཚན་རྩལ་ལ་བརྟེན་ནས་ཉེན་རྟོག་པའི་སྟོབས་ཤུགས་དང་། དམག་འཐབ་ནུས་པ། ཞབས་ཞུའི་ནུས་པ་བཅས་ཆེ་རུ་གཏོང་རྒྱུ་མཐའ་འཁྱོངས་བྱས་ཐོག་ཉེན་ཁ་དང་མངོན་མེད་རྐྱེན་ངན་སྣ་ཚོགས་དུས་ཐོག་ཏུ་ཤེས་རྟོགས་དང་བསལ་ནས། “འཛུགས་གཏོད་བཞིར”སྐུལ་འདེད་གཏོང་བར་བདེ་འཇགས་དང་བརྟན་ལྷིང་གི་སྤྱི་ཚོགས་ཁོར་ཡུག་གཏོད་དགོས་པའི་ནན་བཤད་ཀྱང་གནང་བ་རེད།

ལྷ་རྩེ་རྫོང་གཞིས་ཆེན་ཤང་སློབ་ཆུང་དང་གཉའ་ནང་རྫོང་སློབ་འབྲིང་དུ་ལིའུ་ཅང་གིས་ནན་བཤད་གནང་དོན། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་རྩ་བའི་ལས་འགན་དོན་འཁྱོལ་ཡག་པོ་དང་ཞིབ་ཚགས་བྱས་ཐོག ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་རྒྱུ་དེ་སློབ་གྲྭའི་སློབ་གསོའི་ཁྲོད་དོན་འཁྱོལ་དེ་བས་ཡག་པ་བྱས་ནས་སློབ་གྲྭའི་བདེ་འཇགས་དང་བརྟན་ལྷིང་མཐའ་གཅིག་ཏུ་སྲུང་སྐྱོང་དང་མི་དམངས་བློ་ཡིད་ཚིམ་པའི་སློབ་གསོ་ཡག་པོ་གཉེར་ཏེ། ཚད་གཞི་ལོན་པའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་ཧུར་ཐག་བྱེད་དགོས།

གྲ་ཚང་དགོན་དང་། ས་སྐྱ་དགོན། གངས་ཅན་དགོན། ངོར་དགོན་བཅས་སུ་ལིའུ་ཅང་གིས་དགེ་འདུན་པ་ཚོའི་ཐོས་བསམ་སྒོམ་གསུམ་དང་། དགོན་སྡེའི་རིག་དངོས་སྲུང་སྐྱོང་། ནང་བསྟན་ཡན་ལག་སློབ་གླིང་གི་སློབ་ཁྲིད་དང་དོ་དམ་སོགས་གནས་ཚུལ་བཀའ་འདྲི་ཞིབ་ཕྲ་གནང་ཞིང་། ཁོང་གིས་དགེ་འདུན་པ་ཚོར་རྒྱལ་གཅེས་ཆོས་གཅེས་དང་། སྒྲིག་བཀུར་ཁྲིམས་སྲུང་། བློ་བརྟན་འགྱུར་མེད་ཀྱིས་མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་། བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་ཧུར་ཐག་གཏོང་བ་བཅས་བྱེད་དགོས་པའི་ལྕག་སྐུལ་གནང་བ་དང་འབྲེལ། དགོན་སྡེར་བཅའ་སྡོད་ལས་བྱེད་པས་ཏང་གི་ཆོས་ལུགས་ལས་དོན་གྱི་གཞི་རྩའི་བྱེད་ཕྱོགས་སློབ་སྦྱོང་དང་ལག་བསྟར་ནན་ཏན་བྱས་ནས་རང་འགུལ་ངང་དགེ་འདུན་པ་དང་གྲོགས་པོ་བསྒྲིགས་ཐོག་ལྷག་བསམ་ཟོལ་མེད་ཀྱིས་ཁོང་ཚོའི་དཀའ་གནད་བསལ་ཏེ་ཆོས་ལུགས་ལས་དོན་ཡག་པོ་སྒྲུབ་པའི་འཇོན་ཐང་ཆེ་རུ་དང་ཆུ་ཚད་མཐོ་རུ་གཏོང་དགོས་པའི་བླང་བྱའང་བཏོན་གནང་བ་རེད།

ལིའུ་ཅང་གིས་བརྟག་ཞིབ་གནང་རིང་བླང་བྱ་བཏོན་དོན། ཏང་འཛུགས་སྐྱོང་གིས་གཞི་རིམ་བཅོས་སྐྱོང་ལ་སྣེ་ཁྲིད་བྱེད་པའི་ནུས་པ་འདོན་སྤེལ་བྱས་ཐོག་དྲ་མིག་ཅན་གྱི་ཞབས་ཞུ་དང་དོ་དམ་ལེགས་སུ་བཏང་ནས། ཇུས་ཤུགས་མཉམ་འདོན་གྱིས་སྤྱི་ཚོགས་ཀྱི་ཞི་མཐུན་དང་བརྟན་ལྷིང་ལ་སྲུང་སྐྱོང་བྱེད་དགོས། དུས་དང་རྣམ་པ་ཀུན་ཏུ་མང་ཚོགས་ཀྱི་བདེ་སྡུག་སེམས་ལ་བཞག་ནས་རང་འགུལ་ངང་ཞབས་འདེགས་ཞུ་བའི་འདུ་ཤེས་ཟབ་ཏུ་བཏང་ཐོག་གཞི་རིམ་གྱི་ཁུར་པོ་ཡང་དུ་མུ་མཐུད་བཏང་སྟེ། གྲུབ་འབྲས་དང་ཕན་འབྲས་དངོས་ལ་བརྟེན་ནས་མི་དམངས་མང་ཚོགས་ཀྱི་ཞིབ་བཤེར་དང་ལེན་བྱེད་དགོས། ཡུལ་བབ་དང་བསྟུན་ནས་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་ཤུགས་ཆེན་བཏང་སྟེ་གྲོང་གསེབ་ཕྱོགས་ཡོངས་ནས་དར་རྒྱས་འགྲོ་བར་སྐུལ་འདེད་དང་མང་ཚོགས་ལ་རྒྱུན་མཐུད་འབབ་འཕར་ཡོང་བར་སྐུལ་ཁྲིད་བྱས་ཏེ། མི་སེར་རྣམས་ཀྱིས་འཚོ་བ་དེ་བས་ཡག་པ་སྐྱེལ་ཐུབ་པར་བྱེད་དགོས། “འདུ་ཤེས་གསུམ”གྱི་སློབ་གསོ་གཏིང་ཟབ་སྤེལ་ནས་ཆོས་ལུགས་ལས་དོན་བཅོས་སྐྱོང་ཁྲིམས་སྐྱོང་ཅན་དུ་འགྱུར་རྒྱུར་ཤུགས་སྣོན་བརྒྱབ་སྟེ། བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་བྱེད་དགོས།