ཟླ་11ཚེས་27ཉིན་ནས་ཚེས་30ཉིན་བར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ཡིས་ཚོགས་སྣེ་ཁྲིད་དེ་ནེ་པ་ལའི་ཀ་ཏ་མན་རྡུ་རུ་ཀྲུང་ནེའི་མཐའ་མཚམས་ཚོང་དོན་དང་མཉམ་ལས་ལས་དོན་མཐུན་སྦྱོར་ལམ་སྲོལ་གྱི་ཚོགས་འདུ་ཐེངས་གཉིས་པར་ཞུཌ་ཤིང་། ནེ་པ་ལའི་བཟོ་ལས་དང་། ཚོང་ལས། མཁོ་སྤྲོད་པུའི་དྲུང་ཡིག་ཁར་ཅི་དང་ཕྱོགས་གཉིས་པོའི་ཚོང་དོན་སྟབས་བདེ་ཅན་མངོན་འགྱུར་ཡོང་བ་དང་། ཚོང་དོན་གྱི་རྨང་གཞིའི་སྒྲིག་བཀོད་ཆ་རྐྱེན་ལེགས་སུ་གཏོང་བ། ཕན་ཚུན་སྦྲེལ་མཐུད་ཀྱི་མཉམ་ལས་ལ་ཤུགས་སྣོན་རྒྱག་པ་སོགས་ཀྱི་དོན་གནད་ཐད་བསམ་འཆར་བརྗེ་རེས་གནང་ནས་ཐུན་མོང་གི་ངོས་འཛིན་གལ་ཆེན་བྱུང་བ་མ་ཟད། ཚོགས་འདུའི་ཟིན་བྲིས་གནད་བསྡུས་ལ་མཉམ་དུ་མཚན་རྟགས་ཀྱང་བཀོད་པ་རེད།

ནེ་པ་ལར་བཞུགས་རིང་། ཁྲེན་ཡུང་ཆི་ཡིས་ད་དུང་ནེ་པ་ལའི་ཙུང་ལི་གཞོན་པ་དང་ནོར་སྲིད་པུའི་པུའུ་ཀྲང་གཅིག་ལྕོགས་ཡིན་པའི་པའོ་ཏེར་དང་རྒྱལ་ཕྲན་མཉམ་འབྲེལ་ལས་དོན་དང་སྤྱི་ཁྱབ་སྲིད་འཛིན་པུའི་པུའུ་ཀྲང་ཀུའུ་ཕུའུ་ཐཱ་དང་མཇལ་འཛོམས་གནང་བ་དང་། ནེ་པ་ལར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཁྲེན་སུང་དང་ཐུག་འཕྲད་གནང་བ་རེད། དེ་དང་ཆབས་ཅིག་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་དེ་བཞིན་དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་དྲིལ་བསྒྲགས་དང་ངོ་སྤྲོད་གནང་ཞིང་། བོད་ཞི་བས་བཅིངས་འགྲོལ་བཏང་ཚུན་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་བྱ་གཞག་ཁག་ལ་ཐོབ་པའི་ཕྱོགས་ཡོངས་ཀྱི་ཡར་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་ལ་རྒྱས་བཤད་གནང་བ་མ་ཟད། སྤྱི་ཁྱབ་ཧྲུའུ་ཅི་ཞི་ཅིན་ཕིང་ནེ་པ་ལར་འཚམས་འདྲིར་ཕེབས་པའི་གྲུབ་འབྲས་གལ་ཆེན་ལག་བསྟར་དོན་འཁྱོལ་གཏིང་ཟབ་དང་ཧྲུའུ་ཅི་ཝང་ཅུན་ཀྲེང་ནེ་པ་ལར་འཚམས་འདྲིར་ཕེབས་པའི་འབྲེལ་ཡོད་བླང་བྱ་དོན་འཁྱོལ་བྱས་ཏེ། ཀྲུང་གོའི་བོད་རང་སྐྱོང་ལྗོངས་དང་ནེ་པ་ལའི་དབར་གྱི་མཛའ་གྲོགས་མཉམ་ལས་ལ་སྔར་བས་སྐུལ་འདེད་གཏོང་བའི་ཐད་སྤེལ་རེས་གཏིང་ཟབ་ཀྱང་གནང་བ་རེད།

ཁྲེན་ཡུང་ཆི་ཡིས་ཀྲུང་ནེའི་འབྲེལ་བ་དང་ལྷག་པར་དུ་ཀྲུང་གོའི་བོད་རང་སྐྱོང་ལྗོངས་དང་ནེ་པ་ལའི་དབར་གྱི་མཉམ་ལས་སྤེལ་རེས་གནས་ཚུལ་ཕྱིར་དྲན་གནང་བ་དང་འབྲེལ་གསུངས་དོན། སང་ལོ་ནི་ཀྲུང་ནེའི་དབར་ཕྱི་འབྲེལ་བཙུགས་ནས་ལོ་70འཁོར་བའི་ལོ་རེད། རྒྱལ་ཁབ་གཉིས་པོའི་གཙོ་བདག་གི་འཐབ་ཇུས་སྣེ་ཁྲིད་འོག་དང་ཀྲུང་གོའི་ཕྱི་འབྲེལ་པུའུ་སོགས་རྒྱལ་ཁབ་པུའུ་ཨུད་དང་ནེ་པ་ལར་བཅའ་སྡོད་རང་རྒྱལ་གྱི་གཞུང་ཚབ་ཁང་གི་མཛུབ་ཁྲིད་འོག བོད་རང་སྐྱོང་ལྗོངས་ཀྱིས་མུ་མཐུད་བློ་བརྟན་འགྱུར་མེད་ངང་ཀྲུང་ནེའི་མཐའ་མཚམས་ཚོང་དོན་དང་མཉམ་ལས་ལས་དོན་མཐུན་སྦྱོར་ལམ་སྲོལ་གྱི་ནུས་པ་འདོན་སྤེལ་གང་ལེགས་བྱས་ཏེ། ནེ་པ་ལ་ཕྱོགས་དང་ཁྱབ་ཁོངས་ཁག་དབར་མཛའ་གྲོགས་འགྲོ་འོང་ཟབ་མོ་བྱེད་པར་སྔར་བས་ཤུགས་སྣོན་རྒྱག་པ་དང་། བོད་རང་སྐྱོང་ལྗོངས་མི་དམངས་སྲིད་གཞུང་དང་ནེ་པ་ལའི་ནོར་སྲིད་པུའི་དབར་གྱི་ནེ་པ་ལར་རོགས་སྐྱོར་བྱེད་པའི་རྣམ་གྲངས་ཀྱི་བསམ་ཤེས་ཚིག་ཐོ་དོན་འཁྱོལ་ཡག་པོ་བྱེད་པ། རྨང་གཞིའི་སྒྲིག་བཀོད་ཕན་ཚུན་སྦྲེལ་མཐུད་དང་དེ་བཞིན་ཚོང་དོན་དང་། ཡུལ་སྐོར། མ་འཇོག་སོགས་ཁྱབ་ཁོངས་ཀྱི་དངོས་སྒྲུབ་མཉམ་ལས་ལ་ཤུགས་སྣོན་རྒྱག་པ་བཅས་བྱ་རྒྱུ་མ་ཟད། ཕྱོགས་གཉིས་པོས“རྒྱུད་གཅིག་ལམ་གཅིག”མཉམ་སྐྲུན་གྱི་མཉམ་ལས་གཏིང་ཟབ་དང་ཏན་ཏིག་ཡོང་བར་སྐུལ་འདེད་གཏོང་བ་དང་རྒྱལ་ཁབ་གཉིས་པོའི་མི་དམངས་ལ་དེ་བས་བདེ་སྐྱིད་བསྐྲུན་ཏེ་ཀྲུང་ནེ་རྒྱལ་ཁབ་གཉིས་པོས་འཕེལ་རྒྱས་དང་དར་རྒྱས་ལ་ཕྱོགས་པའི་མི་རབས་ནས་མི་རབས་བར་གྱི་མཛའ་གྲོགས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་སྐུལ་འདེད་གཏོང་ཆེད་འབུལ་འོས་པའི་ལེགས་སྐྱེས་འབུལ་རྒྱུ་ཡིན།

ནེ་པ་ལ་ཕྱོགས་ཀྱིས་ཀྲུང་ནེའི་མི་རབས་ནས་མི་རབས་བར་གྱི་མཛའ་གྲོགས་འབྲེལ་བར་ཚད་མཐོའི་གདེང་འཇོག་བྱས་པ་མ་ཟད། ཀྲུང་གོ་གཅིག་གི་རྩ་དོན་བློ་བརྟན་འགྱུར་མེད་ངང་ལག་ལེན་བསྟར་རྒྱུ་དང་། ཀྲུང་ནེའི་མཐའ་མཚམས་ཚོང་དོན་དང་མཉམ་ལས་ལས་དོན་མཐུན་སྦྱོར་ལམ་སྲོལ་གྱི་ཚོགས་འདུ་ཐེངས་དང་པོ་འཚོགས་ཚུན། ཀྲུང་གོའི་བོད་རང་སྐྱོང་ལྗོངས་དང་ནེ་པ་ལའི་མཉམ་ལས་སྤེལ་རེས་ལ་གྲུབ་འབྲས་གསར་པ་ཐོབ་པར་ཁས་ལེན་གང་ལེགས་བྱེད་ཀྱི་ཡོད་ལ། ཀྲུང་གོའི་བོད་རང་སྐྱོང་ལྗོངས་ཀྱིས་ནེ་པ་ལར་རྒྱབ་སྐྱོར་ཤུགས་ཆེན་གནང་བར་ལྷག་བསམ་ཟོལ་མེད་ངང་ཐུགས་རྗེ་ཆེ་ཞུ་རྒྱུ་ཡིན། ཀྲུང་གོའི་བོད་རང་སྐྱོང་ལྗོངས་དང་སྤེལ་རེས་མཉམ་ལས་ལ་སྔར་བས་ཤུགས་སྣོན་བརྒྱབ་སྟེ་ཕྱོགས་གཉིས་པོས་ཐུན་མོང་ཐོག་དར་རྒྱས་གོང་འཕེལ་ཡོང་བར་སྐུལ་འདེད་གཏོང་རྒྱུའི་རེ་བ་ཡོད་ཅེས་མགྲིན་གཅིག་ཏུ་བརྗོད་པ་རེད།