ཚེས་26ཉིན། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་2024ལོའི་རང་སྐྱོང་ལྗོངས་ཀྱི་རིག་གནས་སྒྲིག་གཞི་སྒྱུར་བཅོས་ཀྱི་ཆེད་དོན་ཚོགས་ཆུང་ཚོགས་འདུ་གཙོ་སྐྱོང་གནང་ནས། རིག་གནས་སྒྲིག་སྲོལ་ལམ་སྲོལ་སྒྱུར་བཅོས་བྱ་རྒྱུའི་སྐོར་གྱི་ཏང་ཀྲུང་དབྱང་དང་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་བླང་བྱ་སློབ་སྦྱོང་ལག་བསྟར་གནང་བ་དང་འབྲེལ་ཡོད་སྡེ་ཚན་གྱི་སྙན་སེང་གསན་པ་མ་ཟད། 《རང་སྐྱོང་ལྗོངས་ཀྱི་རིག་གནས་སྒྲིག་སྲོལ་སྒྱུར་བཅོས་ཆེད་དོན་ཚོགས་ཆུང་གིས〈རང་སྐྱོང་ལྗོངས་ཏང་ཨུད་ཀྱི་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི（ལག་བསྟར་བསམ་འཆར）སྒྱུར་བཅོས་ཀྱི་ལས་འགན་གལ་ཆེན་གྱི་ལས་བགོས་ཇུས་གཞི〉ལག་བསྟར་དོན་འཁྱོལ་བྱེད་པའི་ལས་འགན་གསལ་ཐོར》ཞིབ་འཇུག་དང་གྲོས་ཞིབ་གནང་བ་དང་འབྲེལ། ལས་དོན་ཕྱོགས་བསྡོམས་དང་དུས་བབ་ལ་དབྱེ་ཞིབ་དང་གོམ་སྟབས་རྗེས་མའི་གཙོ་གནད་ལས་དོན་བཀོད་སྒྲིག་ཀྱང་གནང་བ་རེད།

རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་མོང་ཞའོ་ལིན་ཚོགས་འདུར་ཞུགས་ཡོད་པ་རེད།

ཚོགས་འདུར་2024ལོའི་ལྗོངས་ཡོངས་ཀྱི་རིག་གནས་སྒྱུར་བཅོས་འཕེལ་རྒྱས་ལས་དོན་ལ་ཐོབ་པའི་གྲུབ་འབྲས་ཕྱོགས་ཡོངས་ནས་ཕྱོགས་སྡོམ་བྱས་ཤིང་། ཚོགས་འདུར་འབྲེལ་ཡོད་སྡེ་ཚན་ཁག་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་དེ་བཞིན་རང་སྐྱོང་ལྗོངས་ཏང་ཨུད་ཀྱི་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་ལག་བསྟར་དོན་འཁྱོལ་ནན་ཏན་བྱེད་པ་དང་། རིག་གནས་སྒྱུར་བཅོས་དང་འཕེལ་རྒྱས་ལ་འཕྲད་པའི་དུས་བབ་གསར་པ་དང་ལས་འགན་གསར་པར་ཤེས་རྟོགས་གང་ལེགས་བྱེད་པ། རིག་གནས་སྟོབས་ཆེའི་ཁུལ་སྐྲུན་པའི་དམིགས་ཚད་ལ་གཞིགས་པ་བཅས་བྱས་ཏེ། རིག་གནས་སྒྲིག་སྲོལ་ལམ་སྲོལ་སྒྱུར་བཅོས་ཕྱོགས་ཡོངས་ནས་ཟབ་ཏུ་གཏོང་བ་དོན་ཐོག་ཏུ་འཁྱོལ་བ་དང་ཕན་འབྲས་ཐོབ་པར་སྐུལ་འདེད་གཏོང་དགོས་ཞེས་བསྟན་ཡོད།

ཚོགས་འདུར་ནན་བཤད་བྱས་དོན། འབྲེལ་ཡོད་སྡེ་ཚན་ཁག་གིས་བསམ་བློའི་ངོས་འཛིན་མཐོ་རུ་གཏོང་བ་དང་། འགན་འཁྲི་འཁུར་སེམས་ཆེ་རུ་གཏོང་བ། སྒྱུར་བཅོས་ཀྱི་ལས་འགན་དང་བྱ་ཐབས་གལ་ཆེན་ལ་དམིགས་པ་བཅས་བྱས་ནས་རིག་གནས་སྒྱུར་བཅོས་དང་འཕེལ་རྒྱས་ལ་སྔར་བས་སྐུལ་འདེད་གཏོང་བའི་འགན་འཁྲིའི་བསམ་པ་དང་འོས་འགན་སྒྲུབ་སེམས་རྒྱུན་ཆད་མེད་པར་ཆེ་རུ་གཏོང་དགོས། གཙོ་གནད་དང་དཀའ་གནད་ཀྱི་གནད་དོན་ཚད་བརྒལ་དུ་བྱས་ནས་འདུ་ཤེས་འཛིན་སྟངས་ཀྱི་ལས་ཀའི་འགན་འཁྲིའི་ལམ་ལུགས་འཐུས་སྒོ་ཚང་དུ་གཏོང་བ་དང་། རིག་གནས་ཞབས་ཞུ་དང་རིག་གནས་བརྩམས་ཆོས་འདོན་པའི་ལམ་སྲོལ་ལེགས་སུ་གཏོང་བ། དེང་རབས་རིག་གནས་ཐོན་ལས་དང་རིག་གནས་ཁྲོམ་རའི་མ་ལག་འཐུས་སྒོ་ཚང་དུ་གཏོང་བ། དྲ་སྦྲེལ་ཕྱོགས་བསྡུས་བཅོས་སྐྱོང་ལམ་སྲོལ་འཐུས་སྒོ་ཚང་དུ་གཏོང་བ། དེ་བས་ནུས་ལྡན་གྱི་རྒྱལ་སྤྱིའི་ཁྱབ་སྤེལ་མ་ལག་འཛུགས་པ་བཅས་བྱས་ནས་སྒྱུར་བཅོས་ཀྱི་ལས་འགན་ཁག་དོན་ཐོག་ཏུ་འཁྱོལ་བར་སྐུལ་འདེད་གཏོང་དགོས། སྤྱི་འདོམས་མཐུན་སྦྱོར་དང་སྤྱི་ཡོངས་ལ་སྐུལ་འདེད་གཏོང་བ་མཐའ་འཁྱོངས་དང་། སྒྲིག་འཛུགས་འགོ་ཁྲིད་ལ་ཤུགས་སྣོན་རྒྱག་པ། སྒྱུར་བཅོས་གསར་གཏོད་འཕེལ་རྒྱས་གཏོང་བ། ནུས་ཤུགས་ཡོད་རྒུས་དོན་འཁྱོལ་ལ་དམ་འཛིན་བཅས་བྱས་ཏེ་རིག་གནས་སྟོབས་ཆེའི་ཁུལ་སྐྲུན་པར་སྐུལ་འདེད་གཏོང་ཆེད་གོམ་སྟབས་གསར་པ་སྤོ་དགོས།