ཚེས་20ཉིན། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་རང་སྐྱོང་ལྗོངས་ཏང་ཨུད་དྲིལ་བསྒྲགས་པུའི་2024ལོའི་པུའུ་དོན་ཚོགས་འདུ་ཐེངས་18པ་གཙོ་སྐྱོང་གནང་ནས། ཉེ་དུས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་དང་། དེ་བཞིན་རང་སྐྱོང་ལྗོངས་ཏང་ཨུད་ཀྱི་འབྲེལ་ཡོད་ཚོགས་འདུ་དང་ཧྲུའུ་ཅི་ཝང་ཅུན་ཀྲེང་གི་གསུང་བཤད་གལ་ཆེན་གྱི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་རེད།

དབང་ཧའེ་ཀྲོའུ་ཡིས་ནན་བཤད་གནང་དོན། ཏང་གི་གསར་གཏོད་རིགས་པའི་གཞུང་ལུགས་སྤྱི་དམངས་ཅན་གྱི་སྒོ་ནས་བརྒྱུད་སྤེལ་དང་ཁྱབ་གདལ་ཡག་པོ་གཏོང་རྒྱུ་ནི་དྲིལ་བསྒྲགས་དང་བསམ་བློ་རིག་གནས་ཀྱི་འཐབ་སའི་འགན་འཁྲི་གལ་ཆེན་ཞིག་ཡིན་པས། ཁོངས་གཏོགས་ཡོངས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྲང་ཧའེ་གྲོང་ཁྱེར་དབྱང་ཕུའུ་ཆུས་ཀྱི“རྒན་གྲས་སྒྲོག་འགྲེལ་ཚོགས་པའི”བློ་མཐུན་ཡོངས་ལ་སྤྲིངས་པའི་འཕྲིན་ལན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ནས། ཏང་གི་གསར་གཏོད་རིགས་པའི་གཞུང་ལུགས་ཀྱིས་ཏང་ཡོངས་ལ་དྲག་ཆས་སྤྲོས་པ་དང་མི་དམངས་ལ་སློབ་གསོ་རྒྱག་པའི་ཆབ་སྲིད་ཀྱི་ལས་འགན་ཨང་དང་པོར་དམིགས་ཏེ་ཏང་གི་གསར་གཏོད་རིགས་པའི་གཞུང་ལུགས་ཀྱིས་ལས་དོན་ལ་དྲག་ཆས་སྤྲོས་རྒྱུར་སྐུལ་འདེད་གཏིང་ཟབ་དང་ཏན་ཏིག་གཏོང་དགོས། དམངས་ཡོངས་རང་བཞིན་གྱི་དྲིལ་བསྒྲགས་སློབ་གསོའི་མ་ལག་གི་ནུས་པ་ཡག་པོ་འདོན་པ་དང་དྲིལ་བསྒྲགས་དང་སྒྲོག་འགྲེལ་ལས་དོན་སྤེལ་ཤུགས་ཆེ་རུ་བཏང་ནས་ཏང་གི་སྲིད་ཇུས་ཀྱི་འདོད་ཚུལ་དང་ཏང་གི་གསུང་སྒྲ་དུད་ཁྱིམ་ཁྲི་སྟོང་མང་པོར་བརྒྱུད་སྤྲོད་བྱེད་དགོས། ཏང་གི་གསར་གཏོད་རིགས་པའི་གཞུང་ལུགས་སྤྱི་དམངས་ཅན་དང་གོ་བདེ་ཅན་གྱི་སྒོ་ནས་བརྒྱུད་སྤེལ་དང་ཁྱབ་གདལ་གཏོང་བར་རྒྱུན་མཐུད་སྐུལ་འདེད་གཏོང་བ་དང་། སློབ་སྦྱོང་ཞིབ་འཇུག་དང་དྲིལ་བསྒྲགས་འཆད་འགྲེལ་གཏིང་ཟབ་བྱེད་པ། “སྒྲོག་འགྲེལ་དང་རིག་རྩལ་ཟུང་དུ་འབྲེལ་བ”དང“སྒྲོག་འགྲེལ་དང་སྒྲ་བརྙན་ཟུང་དུ་འབྲེལ་བ”སོགས་རྣམ་པ་སྣ་ཚོགས་སྤྱོད་པ། ཡིད་དབང་འགུགས་ཤུགས་དང་སེམས་འགུལ་ཐེབས་ཤུགས་ཆེ་རུ་གཏོང་བ་བཅས་བྱས་ཏེ་མང་ཚོགས་ཀྱིས་ཉན་འདོད་དེ་བས་ཆེ་བ་ཡོང་བ་དང་དང་ལེན་དེ་བས་ཐུབ་པར་བྱེད་དགོས། “སློབ་བརྩོན་རྒྱལ་ཁབ་སྟོབས་ཆེན”གྱི་བོད་ཀྱི་སློབ་སྦྱོང་ལས་སྟེགས་ཀྱི་ནུས་པ་ཡག་པོ་བཏོན་ནས། གྲངས་འཛིན་ཅན་གྱི་ལག་རྩལ་གསར་པ་དང་། སྤྱོད་སྟངས་གསར་པ། ལས་སྟེགས་གསར་པ་བཅས་རྒྱ་ཁྱབ་ངང་སྤྱོད་པ་དང་། མང་ཚོགས་ཀྱི་ཧུར་བརྩོན་རང་བཞིན་དང་དེའི་ནང་ཞུགས་པའི་སྤྲོ་སེམས་སྐོང་འཐེན་གང་ལེགས་བྱེད་པ། རིགས་པའི་གཞུང་ལུགས་ཀྱི་སྒྲོག་འགྲེལ་དང་། རིག་གནས་ཁྱབ་སྤེལ། བསམ་པའི་དཔལ་ཡོན་སྲོལ་གཏོད་སོགས་ཀྱི་ལས་དོན་ཁག་མང་ཚོགས་དང་དེ་བས་འབྲེལ་འདྲིས་དང་། དགའ་མོས་གཅིག་འདུས། དམངས་ཀྱི་འདོད་བློ་དང་མཐུན་པ་བཅས་ཡོང་བར་བྱས་ཏེ་དྲིལ་བསྒྲགས་དང་བསམ་བློ་རིག་གནས་ལས་དོན་དེ་མང་ཚོགས་ཀྱི་སེམས་ལ་དངོས་འབྲེལ་ཟུག་ཐུབ་པར་བྱེད་དགོས།