ཟླ་11ཚེས་19ཉིན། བོད་རང་སྐྱོང་ལྗོངས་ཀྱི་མཁོ་སྒྲུབ་མཉམ་ལས་ཁང་གི་འཐུས་མི་ཚོགས་ཆེན་ཐེངས་དང་པོ་ལྷ་སར་འཚོགས་པ་རེད། ཉིན་ཤས་བསྟུད་མར། རང་ལྗོངས་ཀྱི་ལས་བྱེད་པ་དང་མང་ཚོགས་ཀྱིས་རྣམ་པ་སྣ་ཚོགས་ཀྱི་ཐོག་ནས་ཚོགས་འདུའི་གསར་འགྱུར་ལྟ་ཉན་བྱས་ཏེ་ཚོགས་ཆེན་གྱི་དགོངས་དོན་སློབ་སྦྱོང་དང་གོ་བ་བླངས་པ་རེད། ཚང་མས་ཚོགས་ཆེན་འདི་ནི་དུས་ལ་འཁེལ་བ་ཞིག་འཚོགས་པ་དང་མི་སེམས་ལ་ལྕག་སྐུལ་ཐེབས་པ་ཞིག་ཡོད་པས། ཚོགས་ཆེན་གྱི་དགོངས་དོན་སློབ་སྦྱོང་ནན་ཏན་དང་གོ་བ་ལེན་པ་དང་ལག་བསྟར་དོན་འཁྱོལ་གཏིང་ཟབ་བྱས་ཏེ། རང་སྐྱོང་ལྗོངས་ཏང་ཨུད་ཀྱི་ལས་ཀའི་བཀོད་སྒྲིག་གཞིར་བཟུང་། ཞིང་འབྲོག་ལས་དང་ཞིང་འབྲོག་ཁུལ་གྱི་དེང་རབས་ཅན་ལ་སྐུལ་འདེད་མྱུར་པོ་གཏོང་བ་དང་། ཏང་གིས་ཞིང་འབྲོག་ཁུལ་དུ་སྲིད་སྐྱོང་བའི་རྨང་གཞི་བརྟན་དུ་གཏོང་བ། ཕྱོགས་ཁག་གི་སྟོབས་ཤུགས་སྤྱི་འདོམས་མཐུན་སྦྱོར་བྱེད་པ། ལས་དོན་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་བཅས་ལ་དམིགས་ཏེ། ལྗོངས་ཡོངས་ཀྱི་མཁོ་སྒྲུབ་མཉམ་ལས་བྱ་གཞག་སྤུས་ཚད་མཐོ་པོས་འཕེལ་རྒྱས་འགྲོ་བར་སྐུལ་འདེད་གཏོང་གི་ཡིན་ཞེས་གཅིག་རྗེས་གཉིས་མཐུད་ངང་བཤད་པ་རེད།

“ད་ཐེངས་ཀྱི་ཚོགས་ཆེན་འཚོགས་པ་ནི་རང་ལྗོངས་ཀྱི་མཁོ་སྒྲུབ་མཉམ་ལས་ཁང་གི་འཕེལ་རྒྱས་ལོ་རྒྱུས་ཁྲོད་ཀྱི་དོན་ཆེན་ཞིག་ཡིན་ལ་འཐུས་མི་ཡིན་པའི་ངོས་ནས་རང་སྐྱོང་ལྗོངས་མཁོ་སྒྲུབ་མཉམ་ལས་ཁང་གི་འཐུས་མི་ཚོགས་ཆེན་ཐེངས་དང་པོར་ཞུགས་རྒྱུ་བྱུང་བ་ནི་གཟི་བརྗིད་ཅིག་ཡིན”ཞེས་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་མཁོ་སྒྲུབ་མཉམ་ལས་མཉམ་འབྲེལ་ཁང་གི་ཀྲུའུ་རེན་ཕུར་བུ་རྡོ་རྗེས་བཤད་ཅིང་། ཁོང་གིས་འབྱུང་འགྱུར་ངས་མང་ཚོགས་ཀྱི་དགོས་མཁོར་ཤེས་རྟོགས་ཟབ་མོ་བྱས་ཏེ་ཁྲོམ་རའི་འགྱུར་ལྡོག་གཞིར་བཟུང་ཐོན་རྫས་སྡེབ་སྒྲིག་ལེགས་སྒྲིག་བྱས་ཏེ་དེ་བས་དམིགས་སའི་རང་བཞིན་ལྡན་པའི་ཞབས་འདེགས་ཞུ་གི་ཡིན་ཞེས་བཤད།

ད་ལོའི་ཟླ་5པར། ལྷོ་ཁ་གྲོང་ཁྱེར་གྲ་ནང་རྫོང་དཀྱིལ་རུ་ཤང་སྒང་བལ་གྲོང་ཚོའི་གཞི་རིམ་མཁོ་སྒྲུབ་མཉམ་ལས་ཁང་སྒོ་བྱང་བཀལ་ནས་བཙུགས་ཤིང་། མཉམ་ལས་ཁང་གིས་མ་དངུལ་སྒོར་ཁྲི་22ལྷག་ཙམ་སྔ་རྗེས་སུ་བཏང་ནས་སྦྲང་ནོར་བུ་གསོ་ཚགས་དང་ཞིང་འཕྲུལ་ཉམས་བཟོ་སོགས་ཀྱི་ལས་སྒོ་གཉེར་བར་མིག་སྔར་དཔལ་འབྱོར་གྱི་ཕན་འབྲས་སྒོར་ཁྲི་20ལྷག་ཙམ་བྱུང་ཡོད་པ་རེད། གཞི་རིམ་མཁོ་སྒྲུབ་མཉམ་ལས་ཁང་གི་འགན་འཁུར་བ་ཞིག་གིས“ཧྲུའུ་ཅི་ཝང་ཅུན་ཀྲེང་གིས་ཚོགས་ཆེན་ཐོག་ཞིང་པར་ཞབས་འདེགས་ཞུ་བའི་རྩ་བའི་དམིགས་ཡུལ་མཐའ་འཁྱོངས་ཀྱིས་གཙོ་འགན་གཙོ་ལས་ལ་དམ་འཛིན་ཡག་པོ་བྱེད་པ་དང་། ཞབས་ཞུའི་གཡུལ་ས་ཟམ་མི་ཆད་པར་རྒྱ་ཆེར་གཏོང་བ། ཞབས་འདེགས་ཞུ་སྟངས་གསར་གཏོད་བྱེད་པ། ཞབས་འདེགས་ཞུ་ནུས་ཆེ་རུ་གཏོང་བ་བཅས་བྱས་ནས། ཞིང་འབྲོག་མང་ཚོགས་ལ་བདེ་འཇགས་ལྡན་པ་དང་། བློ་བདེ་བ། སྤུས་ཀ་ལེགས་པ་བཅས་ཀྱི་ཐོན་སྐྱེད་དང་འཚོ་བའི་ཞབས་འདེགས་ཧུར་ཐག་སྒྲུབ་དགོས་ཞེས་ནན་བཤད་གནང་ཡོད”ཅེས་བཤད།

ཚོགས་འདུའི་ཐོག གཞི་རྩའི་འགན་ནུས་འདོན་སྤེལ་བྱ་རྒྱུ་མཐའ་འཁྱོངས་ཀྱིས་དེང་རབས་ཀྱི་འཁོར་རྒྱུག་མ་ལག་མགྱོགས་མྱུར་འཛུགས་པ་དང་མང་ཚོགས་ལ་ཞབས་འདེགས་ཞུ་བའི“མཐའ་མའི་འགག་གནད”བསལ་ནས་ཁྱིམ་ཚང་ཁྲི་སྟོང་མང་པོའི་ཐོན་སྐྱེད་ཆུང་གྲས་དང་འགྱུར་ལྡོག་ཆེ་བའི་སྤྱི་ཚོགས་རིང་ལུགས་ཀྱི་ཁྲོམ་ར་ཆེན་པོ་འབྲེལ་མཐུད་བྱས་ཏེ་ཁྱད་ལྡན་ཐོན་ལས་མགྱོགས་མྱུར་འཕེལ་རྒྱས་འགྲོ་རྒྱུར་སྐུལ་འདེད་དང་ཞིང་འབྲོག་མང་ཚོགས་འབབ་འཕར་ཕྱུག་འགྱུར་ཡོང་རྒྱུར་སྐུལ་འདེད་གཏོང་དགོས་ཞེས་ནན་བཤད་བྱས་ཡོད། དེའི་ཐད་ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་མཁོ་སྒྲུབ་མཉམ་ལས་ཁང་གི་ཀྲུའུ་རེན་བྱམས་པ་དངོས་གྲུབ་ཀྱིས་ཀོང་པོ་རྒྱ་མདའ་རྫོང་གི་མཁོ་སྒྲུབ་མཉམ་ལས་ཁང་ནི་ཤང་གྲོང་གི་དམངས་ཕན་ཞབས་ཞུའི་ལྟེ་གནས་ཁྱོན་ཡོངས་ལ་ཁྱབ་པ་དང་མཁོ་སྒྲུབ་མཉམ་ལས་ཁང་གི་ཐད་ཚོང་ལྟེ་གནས་བཙུགས་པར་ཆེད་ལས་མཉམ་ལས་ཁང་དང་ཁེ་ལས་20ལྷག་ཙམ་བཅའ་སྡོད་བྱས་ཡོད་པ་དང་། མཉམ་ལས་ཁང་གི་ཐད་འཚོང་ལྟེ་གནས་ཀྱི་ཕྱིར་སཚོང་ཡོང་འབབ་སྒོར་ཁྲི་410ལྷག་ཙམ་ཟིན་གྱི་ཡོད་ཅེས་མྱོང་ཚོར་ཟབ་མོའི་སྒོ་ནས་བཤད།

ཚོགས་འདུའི་ཐོག ཏང་གི་འགོ་ཁྲིད་འོག་ཞིང་པར་ཞབས་འདེགས་ཞུ་བའི་ཕྱོགས་བསྡུས་རང་བཞིན་གྱི་མཉམ་ལས་དཔལ་འབྱོར་རྩ་འཛུགས་ཤིག་ཡིན་པའི་མཁོ་སྒྲུབ་མཉམ་ལས་ཁང་ནི་ཏང་དང་སྲིད་གཞུང་གིས“ཞིང་གསུམ”ལས་དོན་ཡག་པོ་སྒྲུབ་པའི་གཞི་རྟེན་གལ་ཆེན་ཞིག་ཡིན་པས། ཞིང་འབྲོག་ལས་དང་ཞིང་འབྲོག་ཁུལ་གྱི་དེང་རབས་ཅན་ལ་སྐུལ་འདེད་མྱུར་པོ་གཏོང་བ་དང་། ཏང་གིས་ཞིང་འབྲོག་ཁུལ་དུ་སྲིད་འཛིན་པའི་རྨང་གཞི་བརྟན་དུ་གཏོང་བའི་ཁྲོད་དམིགས་བསལ་གྱི་ལེགས་ཆ་ལྡན་པ་དང་ནུས་པ་གལ་ཆེན་འདོན་བཞིན་ཡོད་ཅེས་བསྟན་ཡོད།

2016ལོར་ལྷ་ས་གྲོང་ཁྱེར་སྙེ་མོ་རྫོང་ཐོན་པ་ཤང་ཐོན་མདའ་གྲོང་ཚོས་སྙེ་མོའི་ཐོན་པའི་གཟིམ་སྤོས་ས་གཙང་ཐོན་ལས་ཚད་ཡོད་ཀུང་སི་བཙུགས་ཤིང་། ཉེ་བའི་ལོ་ཤས་རིང་ཀུང་སིས་ཏང་འཛུགས་སྐྱོང་གིས་ཁྲིད་སྟོན་བྱ་རྒྱུ་མཐའ་འཁྱོངས་ཀྱིས“ཏང་ཀྲི་པུའུ་དང་། ཀུང་སི། མཉམ་ལས་ཁང་། ཞིང་དུད་བཅས་ཟུང་འབྲེལ”གྱི་བྱེད་ཐབས་བརྒྱུད་གཟིམ་སྤོས་བཟོ་བའི་ནང་མང་ཚོགས་ཞུགས་རྒྱུར་ཁྲིད་སྟོན་དང་ལྕག་སྐུལ་ཧུར་ཐག་བྱས་ཡོད། ད་ཆ། སྙེ་མོའི་གཟིམ་སྤོས་ཀྱི་མིང་གྲགས་ཆེ་རུ་ཕྱིན་ནས་ཡུལ་སྐོར་བ་མང་པོ་ཞིག་གི་ལག་རྟགས་ཡག་ཤོས་སུ་གྱུར་པ་མ་ཟད། པེ་ཅིང་དང་། ཐེན་ཅིན། ཁྲུང་ཆིང་སོགས་སུའང་འཚོང་གི་ཡོད་པ་རེད།

ཐོན་མདའ་གྲོང་ཚོའི་ཏང་ཀྲི་པུའི་ཧྲུའུ་ཅི་ཕུར་བུ་ཚེ་རིང་གིས“མཁོ་སྒྲུབ་མཉམ་ལས་ཁང་ནི་རང་རྒྱལ་གྱི་གྲོང་གསེབ་མཉམ་ལས་དཔལ་འབྱོར་གྱི་གྲུབ་ཆ་གལ་ཆེན་ཞིག་ཡིན་ལ། ཞིང་ལས་དང་གྲོང་གསེབ་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཀྱང་ཡིན། ང་ཚོས་ད་རེས་ཀྱི་ཚོགས་ཆེན་གྱི་དགོངས་དོན་སློབ་སྦྱོང་དང་ལག་བསྟར་ཡག་པོ་བྱེད་པ་དང་། རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དོན་འཁྱོལ་ནན་ཏན་བྱེད་པ། མཁོ་སྒྲུབ་མཉམ་ལས་ཁང་གི་ཁོངས་གཏོགས་དང་མཉམ་དུ་རྣམ་པ་སྣ་ཚོགས་ཀྱི་མཉམ་ལས་བྱེད་པ་བཅས་བྱས་ཏེ། སྙེ་མོའི་གཟིམ་སྤོས་ཀྱི་ཁྱད་ལྡན་ཐོན་ལས་མགྱོགས་མྱུར་འཕེལ་རྒྱས་འགྲོ་བར་སྐུལ་འདེད་དང་ཞིང་འབྲོག་མང་ཚོགས་འབབ་འཕར་ཕྱུག་འགྱུར་ཡོང་བར་སྐུལ་མ་གཏོང་རྒྱུ་ཡིན”ཞེས་བརྗོད་པ་རེད།