ཉིན་ཤས་གོང་། 2024ལོའི་རང་སྐྱོང་ལྗོངས་ཀྱི“གཞི་རིམ་གྱི་སྒྲོག་འགྲེལ་པ་ཡག་ཤོས་བཅུའི”དཔྱད་བསྡུར་བྱེད་སྒོ་ལྷོ་ཁར་མཇུག་འགྲིལ་བ་དང་། ས་གནས་ཁག་གིས་འོས་སྦྱོར་དང་། རིགས་གཅིག་མཁས་ཅན་གྱིས་དཔྱད་ཞིབ། ས་གནས་ས་ཐོག་ཏུ་གཏམ་བཤད། ཕྱོགས་བསྡུས་སྐར་རྒྱག་སོགས་ཀྱི་ལྷུ་ཚིགས་བརྒྱུད་གཞི་རིམ་གྱི་སྒྲོག་འགྲེལ་པ་ཁྱོན་29མཐའ་བསྡུར་ནང་ཚུད་པ་ལས་བུ་ཆུང་སོགས་མི་10ལ་2024ལོ་འཁོར་གྱི“གཞི་རིམ་གྱི་སྒྲོག་འགྲེལ་པ་ཡག་ཤོས་བཅུའི”མཚན་སྙན་ཐོབ་ཡོད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་བྱ་དགའ་སྤྲོད་པའི་མཛད་སྒོར་ཞུགས་ནས་བྱ་དགའ་ཐོབ་མཁན་ལ་བྱ་དགའ་སྤྲད་པ་རེད།

ཚེས་13དང་14ཉིན་དབང་ཧའེ་ཀྲོའུ་དང་བཅས་པ་སྲིན་བུ་རིའི་གནས་སྤོ་ས་ཚིགས་དང་། དགའ་གདོང་མཐུན་སྒྲིལ་གྲོང་གསར་གྱི་དུས་རབས་གསར་པའི་ཤེས་དཔལ་ལག་ལེན་ས་ཚིགས། རྩེད་ཐེར་འཐག་ལས་ཆེད་ལས་མཉམ་ལས་ཁང་། ལྷོ་ཁ་གྲོང་ཁྱེར་དཔེ་མཛོད་ཁང་། ལྷོ་ཁ་རླུང་འཕྲིན་བརྙན་འཕྲིན་ལས་ཁུངས་སོགས་སུ་བརྟག་ཞིབ་གནང་བར་ཕེབས་ཏེ་ཚང་མར་དཀའ་སྤྱད་ལས་སྒྲུབ་དང་མཐུན་སྒྲིལ་འབད་འཐབ་བྱེད་དགོས་པའི་སྐུལ་ལྕག་གནང་ཞིང་། ཁོང་གིས། ས་བབ་ཀྱི་ལེགས་ཆ་འདོན་སྤེལ་གང་ལེགས་བྱས་ནས་རིག་གནས་ཡུལ་སྐོར་ཐོན་ལས་འཕེལ་རྒྱས་ཤུགས་ཆེན་བཏང་སྟེ་རྟ་རྒྱུག་དང་། རྟ་ཐོག་ལྗོངས་རྒྱུ། རིག་རྩལ་འཁྲབ་སྟོན། ཁྱད་ལྡན་བཟའ་བཏུང་སོགས་ཀྱི་རྣམ་པ་བརྒྱུད་མཉམ་འགུལ་རང་བཞིན་དང་མྱོང་རོལ་རང་བཞིན་ཆེ་རུ་བཏང་ནས། ཡུལ་སྐོར་བ་དེ་བས་མང་བའི་ཡིད་དབང་འགུག་པ་དང་འབྲེལ་ཡོད་ཐོན་ལས་འཕེལ་རྒྱས་ལ་སྐུལ་ཁྲིད་བྱས་ཏེ་མང་ཚོགས་ཀྱི་འབབ་འཕར་ཕྱུག་འགྱུར་གྱི་ཐབས་ལམ་རྒྱ་ཆེར་གཏོང་དགོས། མངོན་མིན་རིག་གནས་ཤུལ་བཞག་སྲུང་སྐྱོང་རྒྱུན་འཛིན་བྱ་རྒྱུ་དེ་རིག་གནས་ཡུལ་སྐོར་ཐོན་ལས་དང་གྲོང་གསེབ་དར་རྒྱས་དང་ཟུང་འབྲེལ་དམ་ཟབ་བྱེད་པར་ཤུགས་སྣོན་རྒྱག་པ་དང་། ཐོན་རྫས་གསར་སྤེལ་གསར་གཏོད་དང་ཐོན་རྫས་ཀྱི་སྤུས་ཚད་མཐོ་རུ་གཏོང་བ། ཁྲོམ་ར་ཅན་གྱི་རྣམ་པའི་ཐོག་ནས་སྤུས་རྟགས་ཀྱི་སྙན་གྲགས་ཆེ་རུ་གཏོང་བ་བཅས་བྱས་ཏེ། སྲོལ་རྒྱུན་རིག་གནས་ཀྱི་རྩལ་ནུས་འཕེལ་རྒྱས་ཀྱི་ལེགས་ཆར་འགྱུར་བར་བྱེད་དགོས། སྤྱི་པའི་རིག་གནས་ཞབས་ཞུའི་སྤུས་ཚད་དང་རིག་གནས་ཐོན་རྫས་མཁོ་སྤྲོད་ཀྱི་ཆུ་ཚད་མཐོ་རུ་བཏང་ནས་སྨྱན་སྦྱོར་གསར་པའི་ལས་སྟེགས་ལ་བརྟེན་ནས་ཐར་ཐོར་ཅན་དང་གཏམ་རྒྱུད་རང་བཞིན་གྱི་སྨྱན་སྦྱོར་མཉམ་འདྲེས་ཀྱི་ཐོན་རྫས་དེ་བས་མང་བ་འདོན་པ་དང་། མང་ཚོགས་ཀྱིས་ལྟ་འདོད་ཅིང་ཉན་སྤྲོ་བའི་རྣམ་པའི་ཐོག་ནས་རིག་གནས་དང་རིག་རྩལ་བྱེད་སྒོ་རྒྱ་ཁྱབ་ངང་སྤེལ་ཏེ་ཉིན་བཞིན་ཆེ་རུ་འགྲོ་བའི་མི་དམངས་ཀྱི་བསམ་པའི་རིག་གནས་ཀྱི་དགོས་མཁོ་དེ་བས་ལེགས་པའི་ངང་སྐོང་དགོས་ཞེས་གསུངས་པ་རེད།