རྒྱལ་ཁབ་ཀྱི་སྒྲིག་བཤེར་ལྟ་ཞིབ་སྒྲིག་གཞི་སྒྱུར་བཅོས་མུ་མཐུད་གཏིང་ཟབ་ཏུ་གཏོང་བ་དང་ཆེད་བསྐོས་ལྟ་ཞིབ་པའི་ལམ་ལུགས་དོན་འཁྱོལ་བྱ་ཆེད། ཉེ་ཆར་རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་གྱི་ལྟ་སྐུལ་ཞིབ་བཤེར་ཁང་དྲུག་པས་རང་སྐྱོང་ལྗོངས་ལྟ་ཞིབ་ཨུ་ལྷན་གྱི་སྐབས་གཉིས་པའི་ཆེད་བསྐོས་ལྟ་ཞིབ་པ་བསྟན་འཛིན་ནོར་བུ་ཆེད་དོན་སློབ་ཁྲིད་བྱེད་པར་གདན་དྲངས་ནས་སྒྲིག་བཤེར་ལྟ་ཞིབ་ལས་བྱེད་པར་དེའི་སྐོར་གྱི་ཤེས་བྱ་སློབ་ཁྲིད་བྱས་ཡོད།

སློབ་ཁྲིད་བྱེད་རིང་བསྟན་འཛིན་ནོར་བུས་རིགས་པའི་གཞུང་ལུགས་ཀྱི་ལེགས་ཆ་དང་། ཆེད་ལས་ཀྱི་ལེགས་ཆ། མང་ཚོགས་དང་འབྲེལ་བ་བྱེད་པའི་ལེགས་ཆ་བཅས་འདོན་སྤེལ་གང་ལེགས་བྱས་ནས། 《དམངས་དོན་ཁྲིམས་གཞུང་གི་ཟུར་ཚད་འོག་གི་དམངས་ཁྲོད་ཀྱི་དངུལ་བུན་གཏོང་ལེན་དང་འཛུགས་སྐྲུན་ལས་གྲྭའི་གན་རྒྱའི་རྩོད་གཞིའི་གྱོད་གཞིའི་འབྲེལ་ཡོད་གནད་དོན》འགོ་བརྗོད་དུ་བྱས་ནས་ཚང་མར་དམངས་དོན་ཁྲིམས་གཞུང་དང་། 《དམངས་ཁྲོད་ཀྱི་དངུལ་བུན་གཏོང་ལེན་སྐོར་གྱི་ཁྲིམས་འཛིན་འགྲེལ་བཤད》《འཛུགས་སྐྲུན་ལས་གྲྭའི་ཨར་ལས་འགན་གཙང་སྤྲོད་པ་དང་འགན་གཙང་ལེན་གྱི་ཁྲིམས་འགལ་བྱེད་སྤྱོད་ངོས་འཛིན་དང་ཞིབ་བཤེར་ཐག་གཅོད་དོ་དམ་བྱ་ཐབས》སོགས་བཅའ་ཁྲིམས་དང་ཁྲིམས་སྲོལ་གྱི་ནང་དོན་གསལ་འགྲེལ་ཞིབ་ཕྲ་བྱས་པ་མ་ཟད། ཁྲིམས་འཛིན་གྱི་ལག་ལེན་དང་མང་ཚོགས་ཀྱི་ལྟ་སྐུལ་གྱི་ཟུར་ཚད་ཐོག་ནས་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ཀྱི་དུས་བབ་དང་ལས་འགན་དང་ཟུང་འབྲེལ་གྱིས་མང་ཚོགས་ཀྱི་ཉེ་འགྲམ་དུ་ཐོན་པའི་དཔེ་མཚོན་གྱོད་དཔེ་འབོར་ཆེན་སྤྱད་དེ། དམངས་ཁྲོད་ཀྱི་དངུལ་བུན་གཏོང་ལེན་དང་འཛུགས་སྐྲུན་ལས་གྲྭའི་གན་རྒྱའི་ཐད་གནས་པའི་འབྲེལ་ཡོད་གནད་དོན་གཏིང་ཟབ་ལ་གོ་བདེ་བའི་ངང་འགྲེལ་བཤད་བརྒྱབ་པ་རེད།