ལྗོངས་ཡོངས་ཀྱི་དུས་ཚིགས་བཞི་པའི་གྲོང་གསེབ་དར་རྒྱས་ཀྱི་གཙོ་གནད་ལས་དོན་གྱི་བཀོད་གཏོང་སྐུལ་སྤེལ་ཚོགས་འདུ་འཚོགས་པ།
ལིའུ་ཅང་ཚོགས་འདུར་ཕེབས་ནས་གསུང་བཤད་གནང་བ།
རང་སྐྱོང་ལྗོངས་ཏང་ཨུད་ཀྱི་ཆོག་མཆན་ཐོབ་པ་བརྒྱུད། ཚེས་13ཉིན། ལྗོངས་ཡོངས་ཀྱི་དུས་ཚིགས་བཞི་པའི་གྲོང་གསེབ་དར་རྒྱས་ཀྱི་གཙོ་གནད་ལས་དོན་གྱི་བཀོད་གཏོང་སྐུལ་སྤེལ་ཚོགས་འདུ་འཚོགས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོའི་ཆེད་དོན་བགྲོ་གླེང་འཛིན་གྲྭ་སློབ་འགོ་པའི་མཛད་སྒོར་གནང་བའི་གསུང་བཤད་གལ་ཆེན་གྱི་དགོངས་དོན་དང་འབྲེལ་ཡོད་ཚོགས་འདུའི་ཡིག་ཆའི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་དང་། དུས་ཚིགས་དང་པོ་ནས་གསུམ་པ་བར་གྱི་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་བཏང་ཚུལ་ལ་ཕྱོགས་སྡོམ་བྱས་པ་མ་ཟད། དུས་མཚམས་རྗེས་མའི་གཙོ་གནད་ལས་འགན་བཀོད་སྒྲིག་ཀྱང་བྱས་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། སྲིད་ཁྲིམས་ཨུ་ལྷན་གྱི་ཧྲུའུ་ཅི། རང་སྐྱོང་ལྗོངས་ཏང་ཨུད་གྲོང་གསེབ་ལས་དོན་འགོ་ཁྲིད་ཚོགས་ཆུང་གི་རྒྱུན་ལས་ཙུའུ་ཀྲང་གཞོན་པ་བཅས་ཡིན་པའི་ལིའུ་ཅང་ཚོགས་འདུར་ཕེབས་ནས་གསུང་བཤད་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཚེ་རིང་ཕུན་ཚོགས་ཀྱིས་ཚོགས་འདུ་གཙོ་སྐྱོང་གནང་བ་རེད།
ལིའུ་ཅང་གིས། འདི་ལོ་ནས་བཟུང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག རང་སྐྱོང་ལྗོངས་ཏང་ཨུད་ཀྱིས་སྔ་བར་ཕྱི་གསུམ་དུ“ཞིང་གསུམ”ལས་དོན་དེ་མངོན་གསལ་དོད་པོར་བཞག་སྟེ། ཞིང་དར་ཞིང་ཕན་ཞིང་ཕྱུག་གི་བྱ་ཐབས་རབ་དང་རིམ་པ་སྤྱད་ནས་ཞིང་ལས་འཕེལ་རྒྱས་དང་། ཞིང་འབྲོག་པར་འབབ་འཕར། ཞིང་འབྲོག་ཁུལ་བརྟན་ལྷིང་བཅས་ཀྱི་རྣམ་པ་བཟང་པོ་རྒྱུན་འཁྱོངས་བྱས་པས། ལྗོངས་ཡོངས་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ཡོང་བར་འདེགས་སྐྱོར་ནུས་ལྡན་ཐུབ་ཡོད་ཅེས་བརྗོད་པ་རེད།
ལིའུ་ཅང་གིས། གཙོ་གནད་མངོན་གསལ་དོད་པོ་ཡོང་བ་དང་། འགག་རྩར་དམ་འཛིན་བྱེད་པ། དམིགས་གཏད་ཇུས་འདོན་བཅས་བྱས་ཏེ་ཕྱོགས་ཡོངས་ནས་ལོ་འཁོར་གྱི་དམིགས་ཚད་ལས་འགན་ཁག་མཐའ་གཅིག་ཏུ་སྒྲུབ་དགོས་པ་དང་། འབབ་འཕར་ཡོང་བར་དམ་འཛིན་བྱས་ནས་ལས་ཞུགས་དང་། རྣམ་གྲངས། འཛད་སྤྱོད། ཡུལ་སྐོར་སོགས་ནས་འབབ་འཕར་ཡོང་བའི་མི་མངོན་པའི་སྟོབས་ཤུགས་སྔོག་འདོན་ལ་ཤུགས་སྣོན་དང་གྲོང་གསེབ་ཀྱི་ཡུལ་མིའི་ཡོང་འབབ་འཕར་ཚད་དཔལ་འབྱོར་འཕར་ཚད་ལས་མགྱོགས་པ་ཡོང་བར་བྱས་ཏེ་དབུལ་པོ་བསྐྱར་ལོག་འགོག་པའི་མཐའ་ཚད་བརྟན་པོ་སྲུང་དགོས། ཐོན་ལས་ལ་དམ་འཛིན་བྱས་ཏེ་ས་ཁོངས་ཀྱི་ཐོན་ལས་ལེགས་བསྡུས་ཞིབ་གཉེར་དང་ཞིང་འབྲོག་ལས་ཀྱི་ཁེ་ལས་ལེགས་བསྡུས་ཞིབ་གཉེར་འཕེལ་རྒྱས་ལ་སྐུལ་འདེད་གཏོང་རྒྱུར་ཤུགས་བརྒྱབ་ནས་ཁྱད་ལྡན་ཞིང་འབྲོག་ལས་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་སྤེལ་གཏོང་དགོས། འདེགས་སྐྱོར་ལ་དམ་འཛིན་བྱས་ནས་ཞིང་འབྲོག་ལས་ཀྱི་ཚན་རྩལ་གསར་གཏོད་ཀྱི་ལས་སྟེགས་ཧུར་ཐག་བཏོད་དེ་སྒྱུར་བཅོས་ཀྱི་སྲིད་ཇུས་ཁེ་ཕན་རྒྱུན་ཆད་མེད་པར་འདོན་སྤྲོད་དང་ཞིང་ལས་དང་གྲོང་གསེབ་དེང་རབས་ཅན་དུ་འགྱུར་བར་ནུས་པ་སྦྱིན་དགོས། མཐའ་ཚད་ལ་དམ་འཛིན་བྱས་ཏེ་ནས་ཀྱི་བདེ་འཇགས་དང་། རྨོ་ཞིང་གི་བདེ་འཇགས། ཕྱུགས་ལས་ཐོན་རྫས་མཁོ་སྤྲོད་ཀྱི་བདེ་འཇགས་བཅས་འགན་ལེན་མཐའ་གཅིག་ཏུ་བྱེད་དགོས། འཛུགས་སྐྲུན་ལ་དམ་འཛིན་བྱས་ནས་གྲོང་གསེབ་ཏུ་མི་རིགས་མཐུན་སྒྲིལ་འཛུགས་གཏོད་ལ་སྐུལ་འདེད་གཏོང་རྒྱུར་ཤུགས་བརྒྱབ་སྟེ། ས་མཐོའི་ཞི་མཐུན་གྲོང་གསེབ་འཛུགས་སྐྲུན་མགྱོགས་མྱུར་བྱས་ནས་ཏང་འཛུགས་སྐྱོང་གིས་གྲོང་གསེབ་བཅོས་སྐྱོང་ལ་སྣེ་ཁྲིད་བྱེད་ཤུགས་ཆེ་རུ་བཏང་སྟེ་གྲོང་གསེབ་འཛུགས་སྐྲུན་དང་བཅོས་སྐྱོང་གི་ཆུ་ཚད་མཐོ་རུ་ཧུར་ཐག་གཏོང་དགོས་པའི་ནན་བཤད་གནང་བ་རེད།
ལིའུ་ཅང་གིས། ཏང་གིས“ཞིང་གསུམ”ལས་དོན་ལ་ཕྱོགས་ཡོངས་ནས་འགོ་ཁྲིད་མཐའ་འཁྱོངས་བྱས་ཏེ་ངར་ཤུགས་ཆེན་པོ་འདོན་པ་དང་དུས་མཚམས་ལ་དམ་འཛིན་གྱིས་དོན་འཁྱོལ་ཡོང་བར་དམ་འཛིན་ནན་པོ་བྱེད་དགོས་པ་དང་། ལས་ཀའི་འགན་འཁྲི་དོན་འཁྱོལ་བྱས་ཏེ་དཔལ་འབྱོར་གྱི་དམིགས་ཚད་གཙོ་བོར་དམིགས་ཏེ་ཧེ་བག་འཚོལ་བ་དང་། ཞན་ཆ་གསབ་པ། ཞན་ཆ་ལེགས་གཏོང་བཅས་བྱས་ནས་ལྗོངས་ཡོངས་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཡོང་བར“ཞིང་གསུམ”གྱི་སྟོབས་ཤུགས་དེ་བས་མང་བ་འབུལ་དགོས། “གཞི་རིམ་དུ་སྤེལ་བ་བཞིའི”ལམ་ལུགས་དང་གཞི་རིམ་གྱི་ཁུར་པོ་ཡང་དུ་གཏོང་བའི་བླང་བྱ་དོན་འཁྱོལ་བྱས་ནས་དགོངས་གཞི་ནན་པོས་ཚུར་ལན་བསམ་འཆར་གྱི་གནད་དོན་བཅོས་སྒྲིག་ལ་དཔྱད་ཞིབ་དང་། ལྟ་ཞིབ། རྩིས་བཤེར་བཅས་ཡག་པོ་བྱས་ཏེ། སྤྱོད་ཚུལ་ཏན་ཏིག་གི་སྒོ་ནས་རྒྱལ་ཁབ་ཀྱི་དཔྱད་ཞིབ་ལ་བསུ་བ་ཞུ་རྒྱུར་གྲ་སྒྲིག་ཡག་པོ་བྱེད་དགོས། “ལོ་ལྔ་ཚན་བཅོ་ལྔ་པའི”ཞིང་ལས་དང་གྲོང་གསེབ་དེང་རབས་ཅན་དུ་འགྱུར་བའི་འཆར་གཞི་སྔ་སྣུར་དུ་བཀོད་དེ་རང་ལྗོངས་ཀྱི་ཞིང་ལས་དང་གྲོང་གསེབ་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་ཆེད་རྨང་གཞི་བརྟན་པོ་ཞིག་འདིང་དགོས་པའི་བླང་བྱ་བཏོན་གནང་བ་རེད།