རང་སྐྱོང་ལྗོངས་ཀྱི་འགོ་ཁྲིད་ཀྱིས་ལྷ་ས་གྲོང་ཁྱེར་དུ་གཞུང་ཁོངས་རྒྱུ་ནོར་དང་གཞུང་ཁོངས་ཁེ་ལས་ཀྱི་སྒྱུར་བཅོས་ལས་དོན་ལ་བརྟག་ཞིབ་གནང་བ།
ཉེ་ཆར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཝེ་ཤིའུ་ཁྲང་དང་བཅས་པས་ལྷ་ས་གྲོང་ཁྱེར་གྱི་འབྲེལ་ཡོད་གཞུང་ཁོངས་ཁེ་ལས་དང་རྣམ་གྲངས་འཛུགས་སྐྲུན་གྱི་འཐབ་ས་དང་པོར་བརྟག་ཞིབ་གནང་བར་ཕེབས་པ་དང་འབྲེལ་བཞུགས་མོལ་ཚོགས་འདུའང་འཚོགས་ནས། ལྷ་ས་གྲོང་ཁྱེར་གྱི་གཞུང་ཁོངས་རྒྱུ་ནོར་དང་གཞུང་ཁོངས་ཁེ་ལས་ཀྱི་སྒྱུར་བཅོས་ལས་དོན་གྱི་འཕེལ་རིམ་གནས་ཚུལ་ལ་མཁྱེན་རྟོགས་ཞིབ་ཕྲ་དང་གོམ་སྟབས་རྗེས་མའི་ལས་འགན་ལ་བཀོད་སྒྲིག་གནང་བ་རེད།
བརྟག་ཞིབ་ཚོགས་ཆུང་དང་བཅས་པས་ལྷ་ས་གྲོང་ཁྱེར་གྱི་གཞུང་ཁོངས་རྒྱུ་ནོར་དང་གཞུང་ཁོངས་ཁེ་ལས་ཀྱི་སྒྱུར་བཅོས་ལ་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་དང་དངོས་ཐོག་བདེན་འཚོལ་གྱི་སྒོ་ནས་སྒྱུར་བཅོས་ཁྲོད་གནས་པའི་ཞན་ཆ་བཏོན་པ་རེད། ཝེ་ཤིའུ་ཁྲང་གིས། གཞུང་ཁོངས་ཁེ་ལས་ནི་རང་རེའི་ཏང་གིས་སྲིད་སྐྱོང་བའི“དཔུང་པ་གཡས་གཡོན”རེད་ལ། ཆབ་སྲིད་ཀྱི་རྨང་གཞི་དང་དངོས་པོའི་རྨང་གཞི་གལ་ཆེན་ཞིག་ཀྱང་རེད། རིམ་ཁག་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་སྔར་བས་མཐོ་རུ་གཏོང་བ་དང་ཡང་དག་པའི་སྒྱུར་བཅོས་ཀྱི་ཁ་ཕྱོགས་ལ་སྟངས་འཛིན་བྱས་ཏེ། ཀྲུང་དབྱང་དང་རང་སྐྱོང་ལྗོངས་ཀྱི་གཞུང་ཁོངས་ཁེ་ལས་སྒྱུར་བཅོས་ཀྱི་ཐབས་ཇུས་བཀོད་སྒྲིག་ལག་བསྟར་གཏིང་ཟབ་བྱས་ནས“བདག་དབང་ཁ་གསལ་བཟོ་བ་དང་། གཉེར་སྐྱོང་དབང་ཆ་ལྷུག་ཏུ་གཏོང་བ། དོ་དམ་དབང་ཆ་ཤུགས་ཆེར་གཏོང་བ། ལྟ་སྐུལ་དབང་ཆ་དོན་འཁྱོལ་བྱེད་པ། ཐག་གཅོད་དབང་ཆ་ཚད་ལྡན་དུ་གཏོང་བ”བཅས་ལ་དམིགས་ཏེ་འགན་འཁྲི་ཏན་ཏིག་འཁུར་བ་དང་། གནད་སྨིན་ཤུགས་འདོན། བྱ་ཐབས་ལ་ཤུགས་སྣོན་རྒྱག་པ་བཅས་བྱས་ནས་གཞུང་ཁོངས་ཁེ་ལས་ཀྱི་ལྟེ་བའི་འགྲན་རྩོད་ནུས་པ་རྒྱུན་ཆད་མེད་པར་ཆེ་རུ་གཏོང་དགོས་པའི་ནན་བཤད་གནང་བ་རེད།
ཝེ་ཤིའུ་ཁྲང་གིས། ཏང་གི་འགོ་ཁྲིད་ལ་ཤུགས་སྣོན་རྒྱག་པ་དང་། གཞུང་ཁོངས་དཔལ་འབྱོར་གྱི་བཀོད་པ་ལེགས་སུ་གཏོང་བ། ཁུ་བསྡུ་ལེགས་གཏོང་ལ་སྐུལ་འདེད་གཏོང་བ། འཐབ་ཇུས་རང་བཞིན་གྱི་བསྐྱར་སྒྲིག་དང་ཆེད་ལས་ཅན་གྱི་བསྡུ་སྒྲིལ་བྱེད་ཤུགས་ཆེ་རུ་གཏོང་བ། ཀུང་སི་བཅོས་སྐྱོང་སྔར་བས་འཐུས་སྒོ་ཚང་དུ་གཏོང་བ། “ཕྱོགས་གསུམ་གཞི་གཅིག”གི་ལྟ་སྐུལ་མ་ལག་ཧུར་ཐག་འཛུགས་པ་བཅས་བྱས་ནས་གཞུང་ཁོངས་རྒྱུ་ནོར་གྱི་ལྟ་སྐུལ་དོ་དམ་གྱི་ཕན་ནུས་ཆེ་རུ་ནུས་ལྡན་གཏོང་དགོས། མ་དངུལ་མཉམ་བསྡུས་དང་མཉམ་ལས་བྱེད་སྟངས་གསར་པ་འཚོལ་ཞིབ་དང་དེར་སྐུལ་འདེད་ཧུར་ཐག་གཏོང་བ་དང་། བོད་སྐྱོར་ཐོན་ཁུངས་གང་ལེགས་སྤྱོད་པ། རང་འགུལ་ངང་སྦྲེལ་མཐུད་བཅས་བྱས་ཏེ་བོད་སྐྱོར་ཞིང་ཆེན་དང་གྲོང་ཁྱེར་གྱི་གཞུང་ཁོངས་ཁེ་ལས་དང་། རང་སྐྱོང་ལྗོངས་ཀྱི་གཞུང་ཁོངས་ཁེ་ལས། ཀྲུང་དབྱང་ཁེ་ལས་སོགས་དང་མཉམ་ལས་སྤེལ་རེས་དང་མཉམ་འདྲེས་འཕེལ་རྒྱས་ལ་ཤུགས་སྣོན་རྒྱག་དགོས། ལྷ་ས་གྲོང་ཁྱེར་གྱིས་བོད་ཀྱི་གཞུང་ཁོངས་རྒྱུ་ནོར་དང་གཞུང་ཁོངས་ཁེ་ལས་ཀྱི་སྒྱུར་བཅོས་ལས་དོན་ཐུན་མོང་ཐོག་ཡག་པོ་བསྒྲུབ་རྒྱུར་ནུས་ཤུགས་ཡོད་རྒུས་རྒྱབ་སྐྱོར་དང་གཞོགས་འདེགས་ཧུར་ཐག་བྱས་ནས། ལྗོངས་ཡོངས་ཀྱི་གདོང་དམག་ཡག་པོ་ཞིག་བྱེད་དགོས་པའི་ནན་བཤད་གནང་བ་རེད།