ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གིས་ཆེད་དོན་ཚོགས་འདུ་འཚོགས་ནས། ན་སོ་དར་ལ་མ་བབས་པའི་མིའི་ཉེས་གསོག་སྔོན་འགོག་དང་བཅོས་སྐྱོང་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་བློ་མཐུན་ཁྲེན་ཝུན་ཆིང་གི་མཛུབ་སྟོན་སློབ་སྦྱོང་ལག་བསྟར་དང་། འབྲེལ་ཡོད་ལས་དོན་ལ་ཞིབ་འཇུག་དང་བཀོད་སྒྲིག་བྱས་ཏེ། ན་སོ་དར་ལ་མ་བབས་པའི་མི་སྲུང་སྐྱོང་བྱེད་པར་ཤུགས་སྣོན་བརྒྱབ་ནས་ན་སོ་དར་ལ་མ་བབས་པའི་མི་བདེ་ཐང་ངང་འཚར་ལོངས་ཡོང་བར་སྲུང་སྐྱོང་བྱེད་དགོས་པའི་ནན་བཤད་གནང་བ་རེད།

ལིའུ་ཅང་གིས་བླང་བྱ་བཏོན་དོན། “སྔོན་འགོག”གཙོ་བོར་འཛིན་རྒྱུ་མཐའ་འཁྱོངས་ཀྱིས་ན་སོ་དར་ལ་མ་བབས་པའི་མིའི་སྲུང་སྐྱོང་དྲ་བ་བརྟན་པོ་འཛུགས་དགོས་ཤིང་། ཁྱིམ་ཚང་གིས་ལྟ་སྐྱོང་འགན་འཁྲི་ཡག་པོ་ཁུར་བར་ཁྲིད་སྟོན་བྱས་ནས་བུ་ཕྲུག་གི་ཀུན་སྤྱོད་དང་གོམས་གཤིས་བཟང་པོ་གསོ་སྐྱོང་བྱེད་པར་ཤུགས་སྣོན་རྒྱག་པ་དང་། སློབ་གྲྭས་སློབ་གྲྭའི་སློབ་གསོ་དོ་དམ་ལ་དམ་འཛིན་ཡག་པོ་བྱེད་པར་སྐུལ་འདེད་བཏང་ནས་ཀུན་སྤྱོད་དང་ཁྲིམས་སྐྱོང་སློབ་གསོར་ཤུགས་སྣོན་བརྒྱབ་སྟེ་ན་སོ་དར་ལ་མ་བབས་པའི་མི་ལོག་ལམ་དུ་མི་འགྲོ་བ་བྱེད་པ། འབྲེལ་ཡོད་སྡེ་ཚན་གྱིས་སྤྱི་ཚོགས་ཀྱི་གཅེས་སྐྱོང་ལ་ཤུགས་སྣོན་རྒྱག་པར་སྐུལ་འདེད་བཏང་ནས་ན་སོ་དར་ལ་མ་བབས་པའི་མི་སྲུང་སྐྱོང་བྱེད་པའི་ལས་དོན་ཏན་ཏིག་སྒྲུབ་དགོས། “བཅོས་སྒྲིག”གཙོ་བོར་འཛིན་རྒྱུ་མཐའ་འཁྱོངས་ཀྱིས་ཕྱོགས་བསྡུས་བཅོས་སྐྱོང་གཏིང་ཟབ་བྱེད་དགོས་ཤིང་། སློབ་གྲྭའི་མཐའ་འཁོར་གྱི་ཁོར་ཡུག་མུ་མཐུད་བཅོས་སྒྲིག་བྱས་ནས་ན་སོ་དར་ལ་མ་བབས་པའི་མིར་གནོད་འཚེ་མི་ཕོག་པ་དང་ཁྲིམས་འགལ་ཉེས་གསོག་གི་རིགས་མི་ཐོན་པའི“འགོག་སྲུང་གྱང”བསྐྲུན་པ་དང་། སྤྱི་ཚོགས་དང་རིག་གནས་ཀྱི་ཁོར་ཡུག་མུ་མཐུད་བཅོས་སྒྲིག་བྱས་ནས་ན་སོ་དར་ལ་མ་བབས་པའི་མིར་བསླད་སྐྱོན་འགོག་པའི“ལོགས་བཀར་ཁུལ”འཛུགས་པ། དྲ་རྒྱའི་སྐྱེ་ཁམས་བཅོས་སྐྱོང་ལ་མུ་མཐུད་ཤུགས་སྣོན་བརྒྱབ་ནས་གཞོན་ནུ་ལོ་ཆུང་ལ་སྐྱོན་བྲལ་ཡར་ཐོན་གྱི་དྲ་རྒྱའི་སྐྱེ་ཁམས་གཏོད་པ། ཉེས་གསོག་དང་ནོར་འཁྲུལ་ཡོད་པའི་ན་སོ་དར་ལ་མ་བབས་པའི་མིར་ཡོ་བསྲང་གི་སློབ་གསོ་རྒྱག་ཤུགས་ཆེ་རུ་བཏང་ནས་ན་སོ་དར་ལ་མ་བབས་པའི་མིས་ཁྲིམས་འགལ་ཉེས་གསོག་བྱེད་ཚད་དང་བྱས་ཉེས་བསྐྱར་གསོག་བྱེད་ཚད་གཉིས་ཀ་ཉུང་དུ་འགྲོ་གང་ཐུབ་བྱེད་དགོས།

ལིའུ་ཅང་གིས་གསུངས་དོན། ན་སོ་དར་ལ་མ་བབས་པའི་མིའི་ཁྲིམས་འགལ་ཉེས་གསོག་སྔོན་འགོག་དང་བཅོས་སྐྱོང་བྱེད་པར་སྤྱི་ཚོགས་ཡོངས་ལ་འགན་འཁྲི་ཡོད། རིམ་པ་ཁག་དང་འབྲེལ་ཡོད་སྡེ་ཚན་ཁག་གིས“བསམ་ཇུས་གཅིག”གི་བསམ་བློ་བརྟན་པོ་བཙུགས་ནས། ཕན་ཚུན་རྒྱབ་སྐྱོར་དང་ཕན་ཚུན་གཞོགས་འདེགས་བྱེད་པ་དང་། ན་སོ་དར་ལ་མ་བབས་པའི་མིའི་ཉེས་གསོག་སྔོན་འགོག་དང་བཅོས་སྐྱོང་གི་མཉམ་ཤུགས་ཆེན་པོ་ཆགས་པར་སྐུལ་འདེད་བཏང་སྟེ། ན་སོ་དར་ལ་མ་བབས་པའི་མི་བདེ་ཐང་ངང་འཚར་ལོངས་ཡོང་བར་ཁོར་ཡུག་གཙང་མ་ཞིག་སྐྲུན་དགོས།