ལའེ་ཅའོ་ཡིས་ལྷོ་ཁ་གྲོང་ཁྱེར་དུ་བརྟག་ཞིབ་གནང་བ།
ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་དང་རྩ་འཛུགས་པུའི་པུའུ་ཀྲང་ལའེ་ཅའོ་ལྷོ་ཁ་གྲོང་ཁྱེར་དང་། སྣེ་གདོང་ཆུས། འཕྱོངས་རྒྱས་རྫོང་། གྲ་ནང་རྫོང་བཅས་སུ་ཕེབས་ནས། ཤང་དང་གྲོང་རྡལ(ཁྲོམ་གཞུང)གྱི་འགན་སྒྲུབ་དོན་ཚན་གྱི་རྩིས་ཐོ་བཟོ་འགོད་ལས་དོན་ལ་སྐུལ་འདེད་གཏོང་ཚུལ་ལ་བརྟག་ཞིབ་གནང་སྟེ་ཕྱོགས་ཡོངས་ནས་ཏང་ནན་པོས་སྐྱོང་བ་དང་། གཞི་རིམ་ཏང་འཛུགས་སྐྱོང་། ལས་བྱེད་པ་གྲོང་སྡོད། གྲོང་གསེབ་དར་རྒྱས་བཅས་ཀྱི་ལས་དོན་མཁྱེན་རྟོགས་གནང་བ་རེད།
ལྷོ་ཁ་གྲོང་ཁྱེར་དུ་ལའེ་ཅའོ་ཡིས་གྲོང་ཨུད་དང་། རྫོང་ཨུད་རྩ་འཛུགས་པུའི་པུའུ་ཀྲང་། སྒྲིག་ཁོངས་གཞུང་དོན་ཁང་གི་ཀྲུའུ་རེན། ཤང་དང་གྲོང་རྡལ(ཁྲོམ་གཞུང) ཏང(ལས་དོན)ཨུ་ལྷན་གྱི་ཧྲུའུ་ཅི་ཁག་གཅིག་བཅས་དང་བཞུགས་མོལ་སྤེལ་རེས་གནང་སྟེ་གནས་ཚུལ་སྙན་སེང་གསན་ཞིང་། ཁོང་གིས། ཤང་དང་གྲོང་རྡལ(ཁྲོམ་གཞུང)གྱི་འགན་སྒྲུབ་དོན་ཚན་གྱི་གསལ་ཐོ་བཟོ་བ་ནི་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་གཞི་རིམ་བཅོས་སྐྱོང་གི“རྟེའུ་ཡིས་ཐེར་གེ་ཆེན་པོ་འདྲུད་པའི”མངོན་གསལ་དོད་པའི་གནད་དོན་ཐག་གཅོད་བྱེད་པར་དམིགས་ནས་བཏོན་པའི་སྒྱུར་བཅོས་ཀྱི་བཀོད་སྒྲིག་གལ་ཆེན་ཞིག་རེད། ཏང་གི་ཕྱོགས་ཡོངས་ཀྱི་འགོ་ཁྲིད་མཐའ་འཁྱོངས་དང་དེར་ཤུགས་སྣོན་བརྒྱབ་སྟེ། ཏང་ནང་ཁུལ་གྱི་ཁྲིམས་སྲོལ་ནང་ཁ་གསལ་བཟོས་པའི་ཤང་དང་གྲོང་རྡལ(ཁྲོམ་གཞུང)ཏང་རྩ་འཛུགས་ཀྱི་འགན་འཁྲི་དང་ལས་འགན་གཙོ་བོ་དེ་གཞི་རྩའི་འགན་སྒྲུབ་དོན་ཚན་གྱི་གསལ་ཐོའི་ནང་འགྲེལ་བཤད་ཞིབ་ཕྲ་བརྒྱབ་ནས་ཕྱོགས་ཡོངས་ལ་ཁྱབ་པ་དང་ཆད་ལུས་མི་ཡོང་བར་འགན་ལེན་བྱེད་དགོས། བརྟག་དཔྱད་ཞིབ་འཇུག་ནན་ཏན་དང་འབྲེལ་མཐུད་གྲོས་མོལ་གང་ལེགས་བྱས་ནས། འོག་ནས་གོང་བར་དང་གོང་འོག་མཉམ་འགུལ་གྱིས་ཤང་དང་གྲོང་རྡལ(ཁྲོམ་གཞུང)གསལ་ཐོ་གཙོ་བོར་བཟོ་འགོད་བྱེད་པར་བརྩིས་ནས་དངོས་ཐོག་བདེན་འཚོལ་དང་དོན་དངོས་དང་མཐུན་པར་བྱེད་དགོས། འགན་སྒྲུབ་དོན་ཚན་གྱི་གསལ་ཐོ་བཟོ་བར་འགན་སྒྲུབ་ཀྱི་ཁྲིམས་བཀོད་མཐའ་འཁྱོངས་བྱས་ནས་ཁྲིམས་མཐུན་སྒྲིག་མཐུན་ལ་འགན་ལེན་བྱེད་དགོས། དབང་ཆ་དང་འགན་འཁྲི་གཅིག་གྱུར་མཐའ་འཁྱོངས་བྱས་ཏེ་བསྡུ་སྤྲོད་ཁུངས་ལུང་ཡོད་པར་འགན་ལེན་བྱེད་དགོས། ཡུལ་བབ་དང་བསྟུན་རྒྱུ་མཐའ་འཁྱོངས་ཀྱིས་གཅིག་དཔེ་བརྒྱ་འགེབས་བྱེད་མི་རུང་། གསལ་ཐོ་ཞིབ་བཤེར་དང་། ལམ་ལུགས་ཆ་སྒྲིག ལྟ་སྐུལ་ཚོད་སྐོར་བཅས་ལ་སྤྱི་འདོམས་ཡག་པོ་བྱས་ནས་ལག་བསྟར་ཐུབ་པ་དང་། དོན་འཁྱོལ་ཐུབ་པ། དངོས་གནས་གོ་ཆོད་པ་བཅས་ཡོང་བར་འགན་ལེན་བྱེད་དགོས། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། ལས་ཀའི་ལམ་ལུགས་ནན་དུ་གཏོང་བ། སྒྲིག་ཁྲིམས་སྒྲིག་ལམ་ནན་དུ་གཏོང་བ་བཅས་བྱས་ནས་གསལ་ཐོ་བཟོ་བའི་ལས་དོན་ལ་གོ་རིམ་ལྡན་པའི་ངང་སྐུལ་འདེད་བརྟན་པོ་གཏོང་དགོས་ཞེས་གསུངས་པ་རེད།
བརྟག་ཞིབ་གནང་རིང་། ལའེ་ཅའོ་འབྲེལ་གཏུག་ས་ཚིགས་འཕྱོངས་རྒྱས་རྫོང་དུ་ཕེབས་ནས་ནགས་ཚལ་སྐོར་ཞིབ་ཀྱི་ལས་དོན་སྤེལ་བ་དང་ཆབས་ཅིག ཏང་འཛུགས་སྐྱོང་ལ་དམ་འཛིན་བྱས་ཏེ་གཞི་རིམ་བཅོས་སྐྱོང་ལ་སྐུལ་འདེད་གཏོང་བ་དང་གྲོང་གསེབ་དར་རྒྱས་ལ་སྐུལ་འདེད་གཏོང་བའི་ལས་དོན་སྤེལ་ཚུལ་མཁྱེན་རྟོགས་གནང་བ་དང་ཞིང་འབྲོག་པའི་ཏང་ཡོན་ལ་འཚམས་འདྲི་གནང་བ་རེད།