ལིའུ་ཅང་གིས་བོད་ལྗོངས་ནང་བསྟན་སློབ་གླིང་དུ་བརྟག་ཞིབ་གནང་སྐབས།
ནང་བསྟན་སློབ་གླིང་གི་འཛུགས་སྐྲུན་དོ་དམ་ལ་ཤུགས་སྣོན་བརྒྱབ་ནས་བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་གཏོང་ཆེད་ཕུལ་བྱུང་གྲྭ་བཙུན་དེ་བས་མང་བ་གསོ་སྐྱོང་བྱེད་དགོས་པའི་ནན་བཤད་གནང་བ།
ཟླ་10ཚེས་31ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གིས་བོད་ལྗོངས་ནང་བསྟན་སློབ་གླིང་དུ་བརྟག་ཞིབ་གནང་བར་ཕེབས་ཏེ། སློབ་གྲྭ་ཡོངས་ཀྱི་ལས་བྱེད་པ་དང་ལས་བཟོ། དཔེ་ཆའི་དགེ་རྒན་དང་སློབ་མར་གཟིགས་པ་དང་འཚམས་འདྲི་གནང་བ་མ་ཟད། ནང་བསྟན་སློབ་གླིང་གི་སློབ་ཁྲིད་དོ་དམ་གནས་ཚུལ་ལ་བརྟག་ཞིབ་ཀྱང་གནང་བ་རེད།
སྒྲུབ་ཁང་ཐུབ་བསྟན་མཁས་གྲུབ་བརྟག་ཞིབ་གནང་བར་ལྷན་དུ་ཕེབས་ཡོད་པ་རེད།
བོད་ལྗོངས་ནང་བསྟན་སློབ་གླིང་དུ་སྐྱོད་སྐབས“རྒྱལ་གཅེས་ཆོས་གཅེས”ཞེས་པའི་ཡིག་འབྲུ་བཞི་པོ་ཤིན་ཏུ་མངོན་གསལ་དོད་ཅིང་། ལིའུ་ཅང་གིས་བཙུན་མའི་ཚན་ཁག་དང་། ཕྱོགས་བསྡུས་སློབ་ཁྲིད་ཐོག་ཁང་གི་སློབ་ཁང་། རྩིས་འཁོར་སློབ་ཁང་། སློབ་གཞི་བཤམས་སྟོན་ཁང་བཅས་སུ་ཕེབས་ནས་སློབ་ཁང་གི་སློབ་ཁྲིད་དང་། སློབ་ཚན་བཀོད་སྒྲིག སློབ་གཞི་བེད་སྤྱོད་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད། སློབ་མ་ཚོས་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་སྦྱོང་ནན་ཏན་བྱེད་བཞིན་པ་གཟིཌ་སྐབས། ལིའུ་ཅང་གིས་སྤྲོ་སྣང་ཆེན་པོས་སློབ་མའི་སློབ་སྦྱོང་ཟིན་བྲིས་ལ་གཟིགས་པ་དང་འབྲེལ་ཁོང་ཚོར་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་སྦྱོང་དང་བེད་སྤྱོད་ཡག་པོ་བྱས་ནས། མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྔར་བས་སྐུལ་འདེད་བཏང་སྟེ་ཀྲུང་ཧྭ་མི་རིགས་ཁྱིམ་ཚང་ཆེ་མོའི་བདེ་སྐྱིད་ཚོར་ཐུབ་པ་བྱེད་དགོས་པའི་ལྕག་སྐུལ་ཡང་གནང་བ་རེད།
དེ་རྗེས་ལིའུ་ཅང་གིས་ནང་བསྟན་སློབ་གླིང་གི་ལས་བྱེད་ལས་བཟོ་དང་དཔེ་ཆའི་དགེ་རྒན་གྱི་འཐུས་མི་དང་བཞུགས་མོལ་སྤེལ་རེས་གནང་སྟེ། བསམ་འཆར་དང་གྲོས་འགོ་གསན་པ་དང་སློབ་ཁྲིད་ཀྱི་སྤུས་ཚད་མཐོ་རུ་གཏོང་བའི་ཐབས་ཤེས་དང་ཐབས་ལམ་སྐོར་ཐུན་མོང་ཐོག་གྲོས་བསྡུར་གནང་བ་རེད། ཁོང་གིས་ནན་བཤད་གནང་དོན། རྒྱ་ཆེའི་དགེ་རྒན་དང་ལས་བཟོ་ཚོས་བསམ་བློའི་ངོས་འཛིན་སྔར་བས་མཐོ་རུ་བཏང་ནས། ཆོས་ལུགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་། བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན། དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་ལ་སློབ་སྦྱོང་དང་གོ་བ་གཏིང་ཟབ་ལེན་པ་དང་ཏང་གི་ཆོས་ལུགས་ལས་དོན་གྱི་གཞི་རྩའི་བྱེད་ཕྱོགས་ལག་བསྟར་ནན་ཏན་བྱས་ཏེ། རྒྱ་ཆེའི་གྲྭ་བཙུན་ཚོས“གཏན་འཁེལ་གཉིས”ལ་བློ་བརྟན་འགྱུར་མེད་ངང་བརྩི་སྲུང་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་སློབ་གསོ་དང་ཁྲིད་སྟོན་བྱེད་དགོས། བོད་བརྒྱུད་ནང་བསྟན་ཀྲུང་གོ་ཅན་དུ་སྐུལ་འདེད་ཏན་ཏིག་གཏོང་བ་དང་། ནང་བསྟན་གྱི་ཤེས་རྒྱ་རྒྱུན་ཆད་མེད་པར་ཆེ་རུ་གཏོང་བ། ཆོས་ལུགས་ཀྱི་ཡོན་ཚད་མཐོ་རུ་གཏོང་བ། དུས་རབས་འཕེལ་རྒྱས་དང་སྤྱི་ཚོགས་ཡར་ཐོན་དང་རང་འགུལ་ངང་འཚམ་པར་བྱེད་པ། གོ་བདེ་ཤེས་སླ་དང་དུས་བསྟུན་འཕེལ་རྒྱས་དང་བསྟུན་ནས་འདུལ་ཁྲིམས་དང་བསྟན་དོན་ལ་འཆད་འགྲེལ་ཧུར་ཐག་བཅས་བྱས་ཏེ་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་བྱེད་དགོས། གཞན་ལ་མིག་དཔེ་འདོན་པ་དང་ལས་གཅེས་ལས་བརྩོན་བྱས་ཏེ་ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་ཡག་པོ་བྱས་ནས། བོད་བརྒྱུད་ནང་བསྟན་གྱི་སྒོ་གསུམ་ལེགས་སྡོམ་དང་ཁེ་གྲགས་མི་གཉེར་བའི་གཟུགས་བརྙན་བཟང་པོ་སྲུང་སྐྱོང་བྱེད་དགོས། རང་ངོས་འཛུགས་སྐྱོང་ལ་ཤུགས་སྣོན་རྒྱག་པ་དང་། དེང་རབས་ཀྱི་ཚན་རིག་རིག་གནས་ཤེས་བྱ་རྒྱ་ཁྱབ་ངང་སློབ་སྦྱོང་བྱེད་པ། མཐོང་རྒྱ་དང་ཤེས་རྒྱ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ནས“ཆབ་སྲིད་ཐད་བློས་འཁེལ་བ་དང་། ཆོས་ལུགས་ཐད་ཐོས་བསམ་ཟབ་པ། སྤྱོད་ལམ་ཐད་དམངས་མགུ་བ། འགག་རྩའི་དུས་ནུས་པ་ཐོན་པ”བཅས་ཀྱི་རྒྱལ་གཅེས་ཆོས་གཅེས་ཀྱི་གྲྭ་བཙུན་ཡག་པོ་ཞིག་བྱེད་དགོས།