ཉེ་ཆར། ལྷ་སར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ལྷ་སར་བཅའ་སྡོད་ནེ་པ་ལའི་སྤྱི་ཁྱབ་ཁེ་སྐྱོང་ལས་ཤག་གི་ལས་འགན་འཁུར་ཡུན་ཐིམ་ཉེར་ཡོད་པའི་སྤྱི་ཁྱབ་ཁེ་སྐྱོང་བ་ནཱ་ཝ་ལ་ཅེ·ཏཱ་ཁར་བཅས་པ་དང་མཇལ་འཛོམས་གནང་བ་རེད།

ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ནཱ་ཝ་ལ་ཅེ·ཏཱ་ཁར་གྱིས་ལྷ་སར་བཅའ་སྡོད་ནེ་པ་ལའི་སྤྱི་ཁྱབ་ཁེ་སྐྱོང་བ་གནང་ཚུན། ཀྲུང་ནེའི་མི་རབས་ནས་མི་རབས་བར་གྱི་མཛའ་མཐུན་གྱི་སྲོལ་རྒྱུན་མཛའ་གྲོགས་ཟབ་ཏུ་གཏོང་བ་དང་། ཀྲུང་གོའི་བོད་རང་སྐྱོང་ལྗོངས་དང་ནེ་པ་ལ་དབར་གྱི་སྤེལ་རེས་མཉམ་ལས་ལ་སྐུལ་འདེད་གཏོང་ཆེད་འབད་བརྩོན་ཧུར་ཐག་གནང་བར་ཐུགས་རྗེ་ཆེ་ཞུས་པ་རེད།  

ཁོང་གིས། ཉེ་བའི་ལོ་ཤས་རིང་། ཀྲུང་གོའི་བོད་རང་སྐྱོང་ལྗོངས་དང་ནེ་པ་ལའི་མཐོ་རིམ་དབར་འགྲོ་འོང་སྔར་བས་ཟབ་ཏུ་ཕྱིན་ཞིང་། ནེ་པ་ལའི་སྐབས་དེ་དུས་ཀྱི་ཙུང་ལི་དང་། ཙུང་ལི་གཞོན་པ་དང་ཕྱི་འབྲེལ་པུའུ་ཀྲང་གཅིག་ལྕོགས། རྒྱལ་ཕྲན་མཉམ་འབྲེལ་ཁང་གི་ཀྲུའུ་ཞི། གྲོས་ཁང་འོག་མའི་གྲོས་དཔོན་གཞོན་པ་སོགས་ཀྱིས་བོད་ལྗོངས་སུ་ཁག་སོ་སོར་འཚམས་འདྲི་གནང་བ་དང་། ན་ནིང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་ནེ་པ་ལར་འཚམས་འདྲིར་ཕེབས་ནས་ཕྱོགས་གཉིས་པོའི་སྤེལ་རེས་མཉམ་ལས་ཀྱི་བར་མཐོངས་ཉིན་རེ་བཞིན་རྒྱ་ཆེ་རུ་གཏོང་བ་དང་གཡུར་ཟའི་གྲུབ་འབྲས་ཐོབ་པར་སྐུལ་འདེད་བཏང་གནང་ཡོད། ཕྱོགས་གཉིས་པོའི་དབར་ཀྲུང་ནེའི་མཐའ་མཚམས་ཚོང་དོན་དང་ལས་དོན་མཐུན་སྦྱོར་ལམ་སྲོལ་བཙུགས་པ་དང་འབྲེལ་ཚོགས་འདུ་ཐེངས་དང་པོ་འཚོགས་ནས་སྐྱིད་གྲོང་དང་། འགྲམ། སྤུ་ཧྲེང་བཅས་འགག་སྒོར་འགྲུལ་ཟོག་གཉིས་ཀ་ཤར་གཏོང་ཐུབ་པར་སྐུལ་འདེད་བཏང་བ་དང་། ལེགས་རྩེ་འགག་སྒོ་དངོས་སུ་འཁོར་སྐྱོད་བྱེད་འགོ་བཙུགས་ཏེ། ཀྲུང་ནེའི་མཐའ་མཚམས་ཀྱི་སྲོལ་རྒྱུན་མཐའ་མཚམས་ཚོང་དོན་ས་ཚིགས་སླར་ཡང་སྒོ་ཕྱེ་ཡོད། ནེ་པ་ལར་རོགས་སྐྱོར་གྱི་རྣམ་གྲངས་ལག་བསྟར་བརྟན་པོ་བྱེད་པར་སྐུལ་འདེད་བཏང་བ་དང་། ནེ་པ་ལར་རོགས་སྐྱོར་བྱེད་པའི་རྣམ་གྲངས་ཀྱི་བསམ་ཤེས་བརྗེད་ཐོའི་དོན་ཚན་རེ་རེ་བཞིན་ལ་སྐུལ་འདེད་བཏང་བ། ནེ་པ་ལའི་བྱང་རྒྱུད་རི་ཁུལ་དུ་འཕྲལ་མཁོ་ཆེ་ལ་ཁ་ཐང་བའི་དངོས་ཟོག་རོགས་སྐྱོར་བྱས་པ་མ་ཟད། བོད་ལུགས་གསོ་རིག་གི་རིགས་གཅིག་མཁས་ཅན་སྒྲིག་འཛུགས་བྱས་ཏེ་འོས་འགན་སྨན་བཅོས་ལས་དོན་གོ་རིམ་ལྡན་པའི་ངང་ལག་ལེན་བསྟར་བ། ནེ་པ་ལའི་ནུབ་རྒྱུད་ས་ཡོམ་གེགས་ཁུལ་དུ་གེགས་སེལ་དངོས་ཟོག་རོགས་སྐྱོར་བྱེད་པའི་ལས་དོན་དོན་འཁྱོལ་ཧུར་ཐག་བྱས་ཡོད། ཕོ་ཉ་དང་འབྲེལ་ཟམ་ལྟ་བུའི་སྤྱི་ཁྱབ་ཁེ་སྐྱོང་བ་ཏཱ་ཁར་གྱིས་ཀྲུང་གོའི་བོད་རང་སྐྱོང་ལྗོངས་དང་ནེ་པ་ལའི་དབར་གྱི་མཛའ་མཐུན་སྤེལ་རེས་མཉམ་ལས་ལས་དོན་ལ་སྐུལ་འདེད་གཏོང་རིང་དགེ་མཚན་ལྡན་པའི་ལེགས་སྐྱེས་ཕུལ་ཡོད། སྤྱི་ཁྱབ་ཁེ་སྐྱོང་བ་ནཱ་ཝ་ལ་ཅེ·ཏཱ་ཁར་ནེ་པ་ལར་ལོག་རྗེས་ཀྲུང་ནེའི་མཛའ་གྲོགས་སྤེལ་རེས་བྱ་གཞག་ལ་སྐུལ་འདེད་གཏོང་རྒྱུར་མུ་མཐུད་གཞོལ་ནས་ཀྲུང་གོའི་བོད་རང་སྐྱོང་ལྗོངས་དང་ནེ་པ་ལའི་དངོས་སྒྲུབ་མཉམ་ལས་ལ་ལེགས་སྐྱེས་གསར་པ་འབུལ་རྒྱུའི་རེ་བ་ཡོད་ཅེས་གསུངས་པ་རེད།

ནཱ་ཝ་ལ་ཅེ·ཏཱ་ཁར་གྱིས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་རང་ཉིད་ཀྱི་ལས་འགན་འཁུར་ཡུན་ནང་རྒྱབ་སྐྱོར་ཤུགས་ཆེན་གནང་བར་སྙིང་དབུས་ནས་ཐུགས་རྗེ་ཆེ་ཞུས་པ་རེད། ཁོང་གིས། ནེ་པ་ལ་ཕྱོགས་ཀྱིས་ཀྲུང་གོ་གཅིག་གི་རྩ་དོན་བློ་བརྟན་འགྱུར་མེད་ངང་ལག་ལེན་བསྟར་ཏེ་ཕྱོགས་གཏོགས་གང་འདྲ་ཞིག་ཡིན་ཡང་ནེ་པ་ལའི་མངའ་ཁོངས་སྤྱད་དེ་ཀྲུང་གོར་ངོ་རྒོལ་གྱི་ཁ་ཕྲལ་བྱེད་སྤྱོད་སྤེལ་དུ་འཇུག་གི་མིན་ཞེས་བསྐྱར་བསྒྲགས་གནང་བ་དང་། ནེ་པ་ལ་ཕྱོགས་ཀྱིས་ཀྲུང་གོའི་བོད་རང་སྐྱོང་ལྗོངས་དང་ལག་གདང་སྦྲེལ་ནས་འབད་བརྩོན་བྱས་ཏེ་ཚོང་དོན་དང་། མ་འཇོག རིག་གནས། ཡུལ་སྐོར་སོགས་ཁྱབ་ཁོངས་སུ་སྤེལ་རེས་མཉམ་ལས་གཏིང་ཟབ་བྱེད་པར་མུ་མཐུད་ཤུགས་སྣོན་བརྒྱབ་ནས་ཀྲུང་ནེ་རྒྱལ་ཁབ་གཉིས་པོའི་སྲོལ་རྒྱུན་མཛའ་གཅུགས་ཟབ་ཏུ་གཏོང་བ་དང་དངོས་སྒྲུབ་མཉམ་ལས་ལ་ཤུགས་སྣོན་རྒྱག་པར་ལེགས་སྐྱེས་ཧུར་ཐག་འབུལ་འདོད་ཡོད་ཅེས་གསུངས་པ་རེད།