རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་གཞིར་བཟུང་། 2024ལོའི་ཟླ་10ཚེས་28ཉིན་ནས་ཟླ་10ཚེས་30ཉིན་བར། སྐོར་གཟིགས་ཚོགས་ཆུང་ཁག་གིས་རེས་སྐོར་ལྔ་པའི་སྐོར་གཟིགས་བྱ་ཡུལ་ལྷོ་ཁ་གྲོང་ཁྱེར་དང་དེའི་ཁོངས་གཏོགས་རྫོང(གྲོང་ཁྱེར་དང་ཆུས)དང་། ལྗོངས་འཕེལ་སྒྱུར་ཨུ་ལྷན། ནོར་སྲིད་ཐིང་། སྡོད་ཁང་འཛུགས་སྐྲུན་ཐིང་། དཔལ་འབྱོར་དང་ཆ་འཕྲིན་ཅན་ཐིང་། ཁྲོམ་ར་ལྟ་འདོམས་ཅུས། སྨན་རྫས་ལྟ་འདོམས་ཅུས་སོགས་ཚན་པའི་ཏང་ཙུའུ་ལ“གཅིག་གཏད་གཅིག”གི་ཚུར་ལན་སྤྲད་པ་རེད། རང་སྐྱོང་ལྗོངས་ཏང་ཨུད་སྐོར་གཟིགས་ལས་དོན་འགོ་ཁྲིད་ཚོགས་ཆུང་གི་ཁོངས་མི་དང་། རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན། རང་སྐྱོང་ལྗོངས་ཏང་ཨུད་རྩ་འཛུགས་པུའི་ཚན་ཁག་གི་ཁོངས་མི། ལྗོངས་ཏང་ཨུད་སྐོར་གཟིགས་ཚོགས་ཆུང་ཁག་གི་ཙུའུ་ཀྲང་བཅས་ཀྱིས་རུ་སྣེ་ཁྲིད་དེ་སྐོར་གཟིགས་བྱ་ཡུལ་ལྷོ་ཁ་གྲོང་ཁྱེར་དང་དེའི་ཁོངས་གཏོགས་རྫོང(གྲོང་ཁྱེར་དང་ཆུས)དང་ལྗོངས་ཐད་གཏོགས་ཚན་པར་ས་གནས་ས་ཐོག་ཏུ་ཚུར་ལན་སྤྲད་པ་རེད། ཚུར་ལན་སྤྲོད་པའི་ཚོགས་འདུ་མ་འཚོག་གོང་། སྐོར་གཟིགས་བྱ་ཡུལ་ཏང་རྩ་འཛུགས་ཀྱི་འགན་འཁུར་བ་གཙོ་བོ་སོ་སོར་ཚུར་ལན་སྤྲད་པ་རེད།

ཚུར་ལན་ནང་བསྟན་དོན། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་འཚོགས་ཚུན། སྐོར་གཟིགས་བྱ་ཡུལ་ཏང་རྩ་འཛུགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གལ་ཆེན་དང་རང་སྐྱོང་ལྗོངས་ཏང་ཨུད་ཀྱི་ལས་ཀའི་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱེད་པ་དང་། བློ་བརྟན་འགྱུར་མེད་ངང“འཛུགས་གཏོད་བཞིར”སྐུལ་འདེད་གཏོང་བ། དུས་རབས་གསར་པའི་ཏང་འཛུགས་སྐྱོང་ལ་རྒྱུན་མཐུད་གཏིང་ཟབ་ངང་སྐུལ་འདེད་གཏོང་བ། དཔལ་འབྱོར་དང་སྤྱི་ཚོགས་འཕེལ་རྒྱས་བརྟན་ཐོག་ཡར་འཕེལ་ཡོང་བ་བཅས་བྱས་པས་ཆབ་སྲིད་ཀྱི་ཁོར་ཡུག་རྒྱུན་མཐུད་ལེགས་སུ་ཕྱིན་ཡོད།

ཚུར་ལན་ནང་ཏང་རྩ་འཛུགས་ལ་ལྷག་པའི་མངོན་གསལ་དོད་པའི་གནད་དོན་གཟབ་ནན་ངང་བསྟན་ཞིང་། ཏང་རྩ་འཛུགས་ལ་ལས་ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་བསམ་བློར་དྲག་ཆས་སྤྲོས་པ་དང་ལག་ལེན་ལ་མཛུབ་ཁྲིད་བྱ་རྒྱུ་མི་འདང་བ་དང་། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་དོན་འཁྱོལ་རྗེས་མ་ཟིན་པའམ་ཡང་ན་ཅུང་འགོར་བ། ལ་ལས་རང་སྐྱོང་ལྗོངས་ཏང་ཨུད་ཀྱི“འཛུགས་གཏོད་བཞི”དང“མདུན་གྲལ་དུ་སླེབས་པ་བཞིའི”བཀོད་སྒྲིག་རབ་དང་རིམ་པ་དོན་འཁྱོལ་བྱེད་པར་ཧེ་བག་ཡོད་པ་དང་འཕེལ་རྒྱས་ལ་འགོ་ཁྲིད་དང་ཇུས་འགོད་བྱེད་ནུས་མི་འདང་བ། ལ་ལར་ཏང་ལ་དོ་དམ་དང་ཏང་བཅོས་སྐྱོང་གི་འགན་འཁྲི་ལག་བསྟར་གནད་འཁེལ་མ་བྱུང་བ་དང་། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་ཀྱི་གནད་དོན་དག་ཐེར་བཅོས་སྐྱོང་བྱེད་ཤུགས་ད་དུང་མི་འདང་བ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱ་རྒྱུ་ད་དུང་སྔར་བས་གཏིང་ཟབ་ཏུ་གཏོང་དགོས་པ། ལ་ལར་དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་ལག་བསྟར་དོན་འཁྱོལ་ནན་པོ་མེད་པ་དང་། འཇོན་ཐང་ལ་གཞིགས་ནས་ལས་བྱེད་པ་བཀོལ་སྤྱོད་དང་། ལས་རྗེས་ལ་གཞིགས་ནས་གདེང་འཇོག་བྱེད་པའི་མི་སྤྱོད་སྟོན་ཕྱོགས་ད་དུང་མངོན་གསལ་དེ་ཙམ་དོད་པོ་མེད་པ། ལ་ལར་སྐོར་གཟིགས་དག་ཐེར་ལ་ཡུན་རིང་དམ་འཛིན་དང་རྟག་ཏུ་དམ་འཛིན་བྱ་རྒྱུ་མི་འདང་བ་དང་སྐོར་གཟིགས་དག་ཐེར་གྱི་ཕན་འབྲས་མངོན་གསལ་དོད་པོ་ཐོན་མེད་པ་སོགས་ཀྱི་གནད་དོན་ཡོད་པ་བཅས་རེད།

ཚུར་ལན་ནང་བླང་བྱ་བཏོན་དོན། སྐོར་གཟིགས་བྱེད་ཡུལ་ཏང་རྩ་འཛུགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་ནན་ཏན། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ། རང་སྐྱོང་ལྗོངས་ཀྱི་ཏང་གི་འཐུས་མི་ཚོགས་ཆེན་ཐེངས་བཅུ་པ་དང་རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་རིམ་བྱུང་གི་དགོངས་དོན་ལག་བསྟར་དོན་འཁྱོལ་གཏིང་ཟབ་བཅས་བྱས་ཏེ་ཧྲུའུ་ཅི་ཝང་ཅུན་ཀྲེང་གིས་རེས་སྐོར་ལྔ་པའི་སྐོར་གཟིགས་གནས་ཚུལ་གྱི་སྙན་སེང་གསན་སྐབས་གནང་བའི་གསུང་བཤད་ཀྱི་བླང་བྱ་གཞིར་བཟུང་། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་དང་འགན་འཁྲི་ཁུར་ཤུགས་ཆེ་རུ་བཏང་ནས་སྐོར་གཟིགས་དག་ཐེར་དེ་སྒྱུར་བཅོས་ཟབ་གཏོང་དང་འབྲེལ་མཐུད་བྱེད་དགོས། ཕྱོགས་ཡོངས་ནས་ཏང་ནན་པོས་སྐྱོང་བའི་འགན་འཁྲི་ཏན་ཏིག་ཁུར་ཏེ་ནན་པའི་རྩ་བའི་དགོངས་གཞིར་བརྟེན་ནས་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་སྐུལ་འདེད་གཏིང་ཟབ་གཏོང་བ་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་དང་དེའི་ལག་བསྟར་ཞིབ་སྲོལ་གྱི་དགོངས་དོན་དང་རང་སྐྱོང་ལྗོངས་ཏང་ཨུད་ཀྱི་ལག་བསྟར་བྱ་ཐབས་སྙིང་རུས་ཆེན་པོས་དོན་འཁྱོལ། སྤྱོད་ཚུལ་སྔར་བས་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ། ཕྱི་ཚུལ་རིང་ལུགས་བཅོས་སྒྲིག་བཅས་བྱས་ཏེ་གཞི་རིམ་གྱི་ཁུར་པོ་ཡང་དུ་ཏན་ཏིག་གཏོང་དགོས། དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་ལག་བསྟར་གཏིང་ཟབ་བྱས་ཏེ། ཏང་གི་རྩ་འཛུགས་འཛུགས་སྐྱོང་གི་ལམ་ལུགས་དང་གཏན་འབེབས་ཁག་ལག་བསྟར་ནན་ཏན་བྱེད་པ་དང་། འཇོན་ཐང་ལ་གཞིགས་ནས་ལས་བྱེད་པ་བཀོལ་སྤྱོད་དང་། ལས་རྗེས་ལ་གཞིགས་ནས་གདེང་འཇོག་བྱེད་པའི་མི་སྤྱོད་སྟོན་ཕྱོགས་མཐའ་འཁྱོངས་བྱེད་པ། ཆབ་སྲིད་ཐད་ཉམས་སད་ཐེག་ཐུབ་པ་དང་། འགན་འཁྲི་ཁུར་ཕོད་པ། བློ་རྩ་བརྟན་པོས་སྒྱུར་བཅོས་བྱེད་པ། བྱས་རྗེས་མངོན་གསལ་དོད་པ། གཞུང་དྲང་སྤྱོད་གཙང་བཅས་ཀྱི་ལས་བྱེད་པ་འདེམས་སྒྲུག་ཤུགས་ཆེན་བྱས་ནས། དགོས་པའི་ལས་མི་བྱེད་པ་དང་། མི་དགོས་ལས་རྙོག་བཟོ་བ། ལས་དོན་སྒྲུབ་མི་ཕོད་པ། ལས་དོན་སྒྲུབ་མཁས་པོ་མེད་པ་བཅས་ཀྱི་གནད་དོན་ནུས་ཤུགས་ཡོད་རྒུས་ཐག་གཅོད་བྱེད་དགོས།

ཚུར་ལན་ནང་ནན་བཤད་བྱས་དོན། སྐོར་གཟིགས་བྱེད་ཡུལ་ཏང་རྩ་འཛུགས་ཀྱིས་སྐོར་གཟིགས་དག་ཐེར་གྱི་ལས་དོན་ལ་དམ་འཛིན་ནན་པོ་དང་། དམ་འཛིན་ཏན་ཏིག དམ་འཛིན་ཡག་པོ་བཅས་བྱས་ཏེ། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། དག་ཐེར་ལམ་སྲོལ་འཐུས་སྒོ་ཚང་དུ་གཏོང་བ། འགན་འཁུར་བློ་མཐུན་གཙོ་བོས་དག་ཐེར་གྱི་འགན་འཁྲི་བ་ཨང་དང་པོའི་འགན་འཁྲི་དོན་འཁྱོལ་ནན་ཏན་བྱེད་པ། གཙོ་གནད་དང་དཀའ་གནད་ཀྱི་གནད་དོན་སྣེ་ཁྲིད་ཐག་གཅོད་བྱས་ནས་གོང་དཔེ་འོག་སྟོན་གྱིས་དག་ཐེར་ལ་དམ་འཛིན་ཡག་པོ་བྱེད་དགོས། ཚན་ཁག་གི་ཁོངས་མི་གཞན་དག་གིས“ལས་གནས་གཅིག་ལ་འགན་འཁྲི་གཉིས”ལག་བསྟར་ནན་ཏན་བྱས་ནས། འགན་འཁྲིའི་ཁྱབ་ཁོངས་ཀྱི་ཚུར་ལན་གནད་དོན་དག་ཐེར་ལ་དམ་འཛིན་ཡག་པོ་བྱེད་པ་དང་། རྒྱུན་རྣམ་ཕུགས་ཕན་དང་རྩ་ལག་མཉམ་བཅོས་ཐད་ཤུགས་སྣོན་རྒྱག་རྒྱུར་དོ་སྣང་བྱས་ཏེ། དག་ཐེར་གྱི་བྱ་སྤྱོད་དངོས་དང་དག་ཐེར་གྱི་གྲུབ་འབྲས་མངོན་གསལ་དོད་པོར་བརྟེན་ནས“སྲུང་སྐྱོང་གཉིས”ལག་བསྟར་བྱེད་དགོས།

ཚུར་ལན་ནང་བླང་བྱ་བཏོན་དོན། ལྟ་སྐུལ་ནུས་ལྡན་ལ་བརྟེན་ནས་ཕྱོགས་ཁག་གི་འགན་འཁྲི་དག་ཐེར་ཡོ་བསྲང་ཏན་ཏིག་བྱེད་དགོས། སྒྲིག་བཤེར་ལྟ་ཞིབ་ལས་ཁུངས་ཀྱིས་དག་ཐེར་གྱི་རྒྱུན་གཏན་ལྟ་སྐུལ་ལ་ཤུགས་སྣོན་བརྒྱབ་ནས་སྒྲིག་སྲོལ་དང་། སྒྲིག་ཁྲིམས། བཅའ་ཁྲིམས་བཅས་ལྟར་སྐོར་གཟིགས་རྩིས་སྤྲོད་བྱས་པའི་གནད་དོན་གྱི་ཁུངས་སྣེར་རིགས་དབྱེ་ཐག་གཅོད་བྱེད་དགོས། རྩ་འཛུགས་སྡེ་ཚན་གྱིས་དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་ཐད་ཀྱི་གནད་དོན་དང་མི་འདེམས་མི་སྤྱོད་ཀྱི་ཆེད་དོན་ཞིབ་བཤེར་གྱི་ཚུར་ལན་གནད་དོན་དག་ཐེར་དོན་འཁྱོལ་ལ་སྐུལ་འདེད་དང་དམ་འཛིན་ཡག་པོ་བྱས་ཏེ། སྐོར་གཟིགས་དག་ཐེར་དོན་འཁྱོལ་བྱས་ཚུལ་དེ་འབྲེལ་ཡོད་སྡེ་ཚན་ཁག་གི་འགོ་ཁྲིད་ཚན་ཁག་དང་འགོ་ཁྲིད་ལས་བྱེད་པའི་ལོ་འཁོར་མོའི་དཔྱད་ཞིབ་ནང་དོན་ནང་འཇུག་དགོས་པ་དང་། སྐོར་གཟིགས་བྱས་ནས་ཤེས་རྟོགས་བྱུང་བའི་གནད་དོན་དག་འགོ་ཁྲིད་ཚན་ཁག་འཛུགས་སྐྱོང་དང་ལས་བྱེད་པར་དཔྱད་ཞིབ་གདེང་འཇོག་དང་། འདེམས་བསྐོ་བསྐོ་སྤྱོད། ལྟ་སྐུལ་དོ་དམ་བཅས་ཀྱི་དཔྱད་གཞི་གལ་ཆེན་དུ་བརྩི་དགོས། འབྲེལ་ཡོད་འགན་ནུས་སྡེ་ཚན་གྱིས་སྐོར་གཟིགས་ཀྱི་གྲུབ་འབྲས་ཕྱོགས་བསྡུས་བེད་སྤྱོད་ཡག་པོ་བྱས་ཏེ་ཁྱབ་ཁོངས་གལ་ཆེན་སྒྱུར་བཅོས་གཏིང་ཟབ་ཏུ་གཏོང་བ་དང་། སྲིད་ཇུས་ཀྱི་མཁོ་སྤྲོད་ལེགས་སུ་གཏོང་བ། སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱེད་དགོས། སྐོར་གཟིགས་ལས་ཁུངས་ཀྱིས་སྤྱི་འདོམས་ལྟ་སྐུལ་ལ་ཤུགས་སྣོན་བརྒྱབ་ནས་སྐོར་གཟིགས་དག་ཐེར་གྱི་ལས་ཀའི་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་དགོས།

ཤེས་རྟོགས་བྱུང་བར་གཞིགས་ན། སྐོར་གཟིགས་ཚོགས་ཆུང་ལ་ད་དུང་འགོ་ཁྲིད་ལས་བྱེད་པ་ཁག་གཅིག་གི་གནད་དོན་གྱི་ཁུངས་སྣེ་འབྱོར་བ་དག་གཏན་འབེབས་གཞིར་བཟུང་རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་དང་རང་སྐྱོང་ལྗོངས་ཏང་ཨུད་རྩ་འཛུགས་པུའུ་སོགས་འབྲེལ་ཡོད་ཕྱོགས་ལ་ཐག་གཅོད་བྱ་རྒྱུར་རྩིས་སྤྲད་པ་རེད།