ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་སྲིད་གཞུང་ཏང་ཙུའུ（རྒྱ་ཆེ）ཡི་ཚོགས་འདུ་གཙོ་སྐྱོང་གནང་བ།
ཚེས་24ཉིན། རང་སྐྱོང་ལྗོངས་ཀྱི་ཀྲུའུ་ཞི་དང་རང་སྐྱོང་ལྗོངས་སྲིད་གཞུང་ཏང་ཙུའུ་ཡི་ཧྲུའུ་ཅི་ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་སྲིད་གཞུང་ཏང་ཙུའུ(རྒྱ་ཆེ)ཡི་ཚོགས་འདུ་གཙོ་སྐྱོང་གནང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉེ་དུས་གནང་བའི་གསུང་བཤད་གལ་ཆེན་སོགས་ཀྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་ཤིང་། ལྗོངས་ཏང་ཨུད་ཀྱི་ལས་ཀའི་བླང་བྱ་ལྟར་སྲིད་གཞུང་ཁོངས་གཏོགས་ཀྱི་ལག་བསྟར་དོན་འཁྱོལ་ལས་དོན་ལ་ཞིབ་འཇུག་བྱས་པ་རེད།
ཡན་ཅིན་ཧའེ་ཡིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉེ་དུས་གནང་བའི་གསུང་བཤད་གལ་ཆེན་དང་། མཛུབ་སྟོན་གལ་ཆེན། འཕྲིན་ལན་གལ་ཆེན། རྟེན་འབྲེལ་འཕྲིན་ཡིག་གལ་ཆེན་བཅས་རབ་དང་རིམ་པ་དེ་དག་གི་དགོངས་པ་གཏིང་ཟབ་པ་དང་། མཁྱེན་རྒྱ་ཡངས་པ། ནང་དོན་ཕུན་སུམ་ཚོགས་པ་བཅས་ཡོད་པས། ལས་དོན་ཁག་ཡག་པོ་བསྒྲུབ་པར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་བྱས་ཡོད། སློབ་སྦྱོང་དང་གོ་བ་གཏིང་ཟབ་ལེན་པ་དང་། ཚད་གཞི་དང་ཡང་ཡང་བསྡུར་བ། རང་འགན་རང་འཁུར་བཅས་བྱས་ཏེ་ནུས་ཤུགས་ཡོད་རྒུས་ལོ་ཧྲིལ་པོའི་དམིགས་ཚད་མངོན་འགྱུར་ཡོང་བར་འབད་བརྩོན་བྱེད་པ་དང་། མི་རིགས་མཐུན་སྒྲིལ་ལ་རྒྱུན་མཐུད་ཤུགས་སྣོན་རྒྱག་པ། མི་དམངས་དམངས་གཙོར་སྲུང་སྐྱོང་མཐའ་གཅིག་ཏུ་བྱེད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་གཏོང་བ། བཅོས་སྐྱོང་ཆུ་ཚད་སྲ་བརྟན་དང་མཐོ་རུ་གཏོང་བ། དམངས་འཚོ་ལེགས་གཏོང་ལ་འགན་སྲུང་ནུས་ལྡན་བྱེད་པ། དཔུང་ཁག་འཛུགས་སྐྱོང་ལ་རྒྱུན་ཆད་མེད་པར་ཤུགས་སྣོན་རྒྱག་པ་བཅས་བྱས་ཏེ། དམ་པ་དོན་གཉེར་གྱི་གྲུབ་འབྲས་དངོས་ལ་བརྟེན་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གངས་ལྗོངས་ས་མཐོར་རྩ་བ་ཚུགས་ཏེ་འབྲས་བུ་སྨིན་པའི་འགན་ལེན་བྱེད་པ་དང་། ལྗོངས་ཡོངས་ཀྱི་བཟོ་ལས་ཅན་གསར་པའི་སྐུལ་སྤེལ་ཚོགས་ཆེན་དང་། རིག་གནས་ཡུལ་སྐོར་ཐོན་ལས་ཀྱི་འཕེལ་རྒྱས་ཚོགས་ཆེན། རང་སྐྱོང་ལྗོངས་ཀྱི་ཐོན་ལས་འཕེལ་རྒྱས་འགོ་ཁྲིད་ཚོགས་ཆུང་གི་ཚོགས་འདུ་བཅས་ཀྱི་དགོངས་དོན་དོན་འཁྱོལ་ཞིབ་ཚགས་བྱེད་དགོས།
ཚོགས་འདུའི་ཐོག་སྲིད་གཞུང་ཏང་ཙུའུ་ཡི་སྤྱོད་གཙང་རིག་གནས་འཛུགས་སྐྱོང་གི“དོན་ཚན་བཅུ་གཉིས”ལ་གྲོས་ཞིབ་བྱས་ནས་གྲོས་འཆམ་བྱུང་ཞིང་། ཡན་ཅིན་ཧའེ་ཡིས། སྤྱོད་གཙང་གཞུང་དྲང་ནི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་། སྲོལ་རྒྱུན་ཀུན་སྤྱོད། རིན་ཐང་ལྟ་བ་བཅས་ཀྱི་གཞི་རྩའི་ཚད་གཞི་རེད། སྲིད་གཞུང་ཁོངས་གཏོགས་ཀྱི་རྒྱ་ཆེའི་ཏང་ཡོན་ལས་བྱེད་པ་དང་ལྷག་པར་དུ་འགོ་ཁྲིད་ལས་བྱེད་པས་སྤྱོད་གཙང་རྩ་བར་འཛིན་པ་དང་ལྐོག་ཟ་སྤང་བྱར་འཛིན་རྒྱུ་མཐའ་འཁྱོངས་བྱས་ཏེ། སྲིད་གཙང་རིག་གནས་སེམས་ལ་འཇགས་པར་བྱས་ནས་སྤྱོད་གཙང་གཟི་བརྗིད་དུ་བརྩི་བ་དང་ལྐོག་ཟ་ཞེ་ཁྲེལ་དུ་བརྩི་བ་མཐའ་འཁྱོངས་ཀྱིས་སྲིད་གཙང་རིག་གནས་དོན་འཁྱོལ་དང་དེར་ཕན་འབྲས་ཡོང་བར་བྱེད་པ། བྱ་སྤྱོད་དངོས་ཀྱི་ཐོག་ནས“གཏན་འཁེལ་གཉིས”བློ་བརྟན་འགྱུར་མེད་ངང་སྲུང་སྐྱོང་བྱེད་པ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པའི་ཆབ་སྲིད་ཀྱི་རང་རྟོགས་དང་། བསམ་བློའི་རང་རྟོགས། བྱ་སྤྱོད་ཀྱི་རང་རྟོགས་བཅས་མངོན་པར་བྱེད་དགོས། སྲིད་གཞུང་ཏང་ཙུའུ་ཡི་ཁོངས་མིས་ཚད་གཞི་ནན་སྲུང་དང་སྣེ་ཁྲིད་དོན་འཁྱོལ་གྱིས་རང་འགུལ་ངང་ལྟ་སྐུལ་དང་ལེན་དང་། སྤྱོད་གཙང་གི་སྲོལ་བཟང་དར་སྤེལ་གཏོང་བ་བཅས་བྱས་ཏེ། ཐོག་མཐའ་བར་གསུམ་དུ་རང་གཅུན་ནན་པོ་དང་། འགན་འཁྲི་ནན་འཁུར། ཁོངས་གཏོགས་ནན་འདོམས་བཅས་བྱས་ནས། སྤྱོད་གཙང་དར་སྤེལ་དང་རུལ་སུངས་ལ་ངོ་རྒོལ་བྱེད་པའི་སྤྱི་ཚོགས་ཀྱི་ཁོར་ཡུག་བཟང་པོ་ཧུར་ཐག་གཏོད་དགོས་ཞེས་གསུངས་པ་རེད།