ཁྲེན་ཡུང་ཆིས་ཀྲུང་གོར་བཅའ་སྡོད་ཨོ་སི་ཁྲུ་ལི་ཡའི་གཞུང་ཚབ་ཆེ་མོ་བ་ཅི་སི་ཏེར་མཇལ་འཕྲད་གནང་བ།
ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ལྷ་སར་ཀྲུང་གོར་བཅའ་སྡོད་ཨོ་སི་ཁྲུ་ལི་ཡའི་གཞུང་ཚབ་ཆེ་མོ་བ་ཅི་སི་ཏེ་དང་བཅས་པར་མཇལ་འཕྲད་གནང་བ་རེད།
ཁྲེན་ཡུང་ཆིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡི་ཚབ་ཞུས་ནས་ཅི་སི་ཏེ་དང་བཅས་པ་བོད་དུ་འཚམས་འདྲིར་ཕེབས་པར་ལྷག་བསམ་ཟོལ་མེད་ཀྱི་དགའ་བསུ་ཞུས་པ་དང་འབྲེལ། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་མདོར་བསྡུས་ཀྱང་གནང་བ་རེད། ཁོང་གིས་ད་ལྟའི་བོད་འདི་ཉིད་ཆབ་སྲིད་བདེ་འཇགས་དང་། སྤྱི་ཚོགས་བརྟན་ལྷིང་། དཔལ་འབྱོར་འཕེལ་རྒྱས། མི་རིགས་མཐུན་སྒྲིལ། ཆོས་ལུགས་ཞི་མཐུན། སྐྱེ་ཁམས་བཟང་བ། མཐའ་སྲུང་སྲ་བརྟན། མི་དམངས་བདེ་སྡོད་ལས་བརྩོན་བཅས་ཡོད་པས་སྐྱེ་སྟོབས་ཀྱི་དཔལ་འབར་བའི་དར་རྒྱས་ཀྱི་རྣམ་པས་ཁེངས་ཡོད། གྲུབ་འབྲས་དེ་དག་ཐོབ་དོན་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁ་བསྒྱུར་ཕྱོགས་སྟོན་ལས་བྱུང་བ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་མཛུབ་ཁྲིད་ལས་བྱུང་བ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་མངོན་གསལ་དོད་པའི་ལེགས་ཆ་ལས་བྱུང་བ་བཅས་རེད། ཅི་སི་ཏེ་དང་བཅས་པས་བོད་དུ་མང་ཙམ་སྐྱོད་པ་དང་མང་ཙམ་གཟིགས་ཏེ་ཕྱོགས་ཡོངས་ནས་བོད་ཤེས་རྟོགས་གཏིང་ཟབ་དང་བོད་ཀྱི་འཕེལ་རྒྱས་དང་དར་རྒྱས་ཉམས་ལེན་བྱས་ནས་རང་ཉིད་ཀྱིས་གཟིགས་པ་དང་མཁྱེན་པའི་མཛེས་སྡུག་དང་། དར་རྒྱས། སྒོ་དབྱེ། ཡར་ཐོན་བཅས་ཀྱི་བོད་ལྗོངས་ཨོ་སི་ཁྲུ་ལི་ཡའི་རྒྱལ་ནང་གི་དམངས་ཚོགས་དང་རྒྱལ་སྤྱིའི་སྤྱི་ཚོགས་ལ་ཕྱོགས་ཡོངས་དང་། དྲང་གཞག གཞུང་དྲང་བཅས་ཀྱི་སྒོ་ནས་ངོ་སྤྲོད་བྱ་རྒྱུའི་རེ་བ་ཡོད་ཅེས་གསུངས་པ་རེད།
ཁྲེན་ཡུང་ཆིས། ཉེ་བའི་ལོ་ཤས་རིང་རྒྱལ་ཁབ་གཉིས་པོའི་འགོ་ཁྲིད་པའི་འཐབ་ཇུས་སྣེ་ཁྲིད་འོག་ཀྲུང་གོ་དང་ཨོ་སི་ཁྲུ་ལི་ཡའི་འབྲེལ་བ་རྒྱུན་མཐུད་ངང་ལེགས་སུ་དང་འཕེལ་རྒྱས་འགྲོ་བའི་རྣམ་པ་མངོན་ཡོད། འདི་ལོ་ནི་ཀྲུའུ་ཞི་ཞི་ཅིན་ཕིང་གིས་ཨོ་སི་ཁྲུ་ལི་ཡར་རྒྱལ་དོན་འཚམས་འདྲི་གནང་བ་དང་ཀྲུང་ཨོའི་དབར་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་ལོ་10འཁོར་བའི་ལོ་ཞིག་ཡིན་པ་དང་། ཙུང་ལི་ལི་ཆང་གིས་འདི་ལོའི་ཟླ་6པར་ཨོ་སི་ཁྲུ་ལི་ཡར་གྲུབ་འབྲས་ཐོབ་པའི་ངང་འཚམས་འདྲི་གནང་ནས་ཀྲུང་ཨོའི་འབྲེལ་བ་ལེགས་སུ་དང་འཕེལ་རྒྱས་ཕྱོགས་སུ་འགྲོ་རྒྱུར་སྔར་བས་སྒུལ་ཤུགས་ཆེན་པོ་བསྣན་ཡོད། ཀྲུང་གོའི་བོད་རང་སྐྱོང་ལྗོངས་ཀྱིས་ཀྲུང་དབྱང་གི་ཕྱི་ཕྱོགས་བྱེད་ཕྱོགས་སྲིད་ཇུས་ལག་བསྟར་ནན་ཏན་བྱེད་པ་དང་། རྒྱལ་ཁབ་གཉིས་པོའི་འགོ་ཁྲིད་དབར་བཞག་པའི་མཉམ་ལས་ཀྱི་ཐུན་མོང་ངོས་འཛིན་དོན་འཁྱོལ་ཡག་པོ་བྱེད་པ། ཨོ་སི་ཁྲུ་ལི་ཡ་ཕྱོགས་དང་མཛའ་གྲོགས་འགྲོ་འོང་དང་གཉིས་ཕན་མཉམ་ལས་བྱ་རྒྱུར་མུ་མཐུད་སྐུལ་འདེད་གཏོང་བ་བཅས་བྱས་ཏེ། དེ་བས་གནད་སྨིན་བརྟན་ལྷིང་དང་དེ་བས་གྲུབ་འབྲས་ཕུན་སུམ་ཚོགས་པའི་ཀྲུང་ཨོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་འཛུགས་རྒྱུར་སྐུལ་འདེད་གཏོང་ཆེད་བོད་ཀྱིས་འབུལ་འོས་པའི་ལེགས་སྐྱེས་འབུལ་རྒྱུ་ཡིན་ཞེས་གསུངས་པ་རེད།
ཅི་སི་ཏེས་ཀྲུང་གོའི་བོད་རང་སྐྱོང་ལྗོངས་ཀྱིས་སྤྲོ་སེམས་འཁོལ་པོས་སྣེ་ལེན་ཞུས་པར་ཐུགས་རྗེ་ཆེ་ཞུས་པ་མ་ཟད། ཨོ་ཀྲུང་འབྲེལ་བའི་སྐོར་གྱི་ཨོ་སི་ཁྲུ་ལི་ཡའི་སྲིད་གཞུང་གི་སྲིད་ཇུས་ངོ་སྤྲོད་ཀྱང་གནང་ཞིང་། ཁོང་གིས་ད་ཐེངས་ཀྱི་འཚམས་འདྲི་བརྒྱུད་ཨོ་སི་ཁྲུ་ལི་ཡ་ཕྱོགས་ཀྱིས་བོད་ཀྱི་ས་ཁུལ་ཁག་གི་འཕེལ་རྒྱས་གནས་ཚུལ་ཤེས་རྟོགས་ཐུབ་པར་ཕན་ཐོགས་ཡོད། སླད་ཕྱིན་བོད་དུ་འཚམས་འདྲིར་ཡོང་བའི་གོ་སྐབས་དེ་བས་མང་བ་ཐོབ་རྒྱུའི་རེ་བ་ཡོད་ཅེས་གསུངས་པ་རེད།