དབང་ཧའེ་ཀྲོའུ《བོད་རང་སྐྱོང་ལྗོངས་ཀྱི་རིག་གནས་དང་ཡུལ་སྐོར་ཐོན་ལས་འཕེལ་རྒྱས་ཀྱི་འཆར་འགོད》ཀྱི་ཞིབ་བསྡུར་བཞུགས་མོལ་ཚོགས་འདུར་ཞུགས་པ།
ཚེས་22ཉིན་གྱི་ཕྱི་དྲོར། 《བོད་རང་སྐྱོང་ལྗོངས་ཀྱི་རིག་གནས་དང་ཡུལ་སྐོར་ཐོན་ལས་འཕེལ་རྒྱས་ཀྱི་འཆར་འགོད》(གཤམ་དུ《འཆར་འགོད》ཅེས་བསྡུ་རྒྱུ)ཀྱི་ཞིབ་བསྡུར་བཞུགས་མོལ་ཚོགས་འདུ་ལྷ་སར་འཚོགས་ཤིང་། རང་སྐྱོང་ལྗོངས་ཀྱི་རིག་གནས་དང་ཡུལ་སྐོར་ཐོན་ལས་འཕེལ་རྒྱས་ཚོགས་ཆེན་གྱི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཏེ《འཆར་འགོད》རྩོམ་བཟོའི་ཁ་ཕྱོགས་དང་། དམིགས་ཚད། ལས་འགན་བཅས་ལ་གཙོ་གནད་དུ་ཞིབ་འཇུག་དང་གྲོས་བསྡུར་བྱས་པ་དང་། ས་གནས་ཁག་གི་འབྲེལ་ཡོད་ཚན་པ་ཁག་གི་འགན་འཁུར་བ་དང་། རིགས་གཅིག་མཁས་ཅན་དང་མཁས་དབང་ཞུགས་ནས་བསམ་འཆར་དང་གྲོས་འགོ་བཏོན་པ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཞུས་ཀྲེ་ཐའོ་ཡིས་ཚོགས་འདུ་གཙོ་སྐྱོང་གནང་བ་རེད།
དབང་ཧའེ་ཀྲོའུ་ཡིས། ས་གནས་ཁག་དང་སྡེ་ཚན་ཁག་གིས《འཆར་འགོད》རྩོམ་བཟོའི་གལ་ཆེའི་རང་བཞིན་དང་དོན་སྙིང་གལ་ཆེན་ལ་ངོས་འཛིན་གང་ལེགས་བྱས་ཏེ“གཏན་འཁེལ་གཉིས”ལ་བློ་བརྟན་འགྱུར་མེད་ཀྱིས་བརྩི་སྲུང་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པའི་ཆབ་སྲིད་ཀྱི་མཐོ་ཚད་ནས《འཆར་འགོད》ཀྱི་ངེས་གནས་དང་ནུས་པ་ཁོང་དུ་ཡང་དག་ཆུད་པ་དང《འཆར་འགོད》རྩོམ་བཟོའི་སྲིད་ཇུས་ཀྱི་ཁ་ཕྱོགས་དང་དམིགས་ཚད་ཀྱི་བླང་བྱ་ཁོང་དུ་བརྟན་པོ་ཆུད་པར་བྱེད་པ་དང་།《འཆར་འགོད》ཀྱི་སྲིད་ཇུས་ཀྱི་མཛུབ་ཁྲིད་རང་བཞིན་དང་། འཐབ་ཇུས་ཀྱི་རྒྱང་ལྟའི་རང་བཞིན། ལག་ལེན་གྱི་བཀོལ་སྤྱོད་རང་བཞིན་བཅས་གང་ལེགས་མངོན་པར་བྱས་ཏེ་འདུ་ཤེས་ལ་འགྱུར་ལྡོག་གཏོང་བ་དང་གསར་གཏོད་བྱེད་ཕོད་པ་བྱས་ཐོག《འཆར་འགོད》རྩོམ་བཟོའི་ལས་དོན་ཡག་པོ་སྒྲུབ་པའི་ཆབ་སྲིད་ཀྱི་འགན་འཁྲི་འཁུར་སེམས་དང་ལོ་རྒྱུས་ཀྱི་ལས་འགན་སྒྲུབ་སེམས་རྒྱུན་ཆད་མེད་པར་ཆེ་རུ་གཏོང་དགོས་ཞེས་གསུངས་པ་རེད།
དབང་ཧའེ་ཀྲོའུ་ཡིས། 《འཆར་འགོད》ནང་འདུ་ཤེས་འཛིན་སྟངས་ཀྱི་བདེ་འཇགས་དང་། སྲུང་སྐྱོབ་དང་རྒྱུན་འཛིན་འཕེལ་རྒྱས། དམངས་ཆེད་དང་དམངས་བདེ་དམངས་ཕན། གསར་གཏོད་དང་གསར་འཛུགས་ཀྱི་གསོན་ཤུགས་འཕེལ་བ་སོགས་ཀྱི་ཟུར་ཚད་ནས་ཇུས་འགོད་བྱས་ཏེ་ཐོན་ཁུངས་ཀྱི་སྟོབས་ཤུགས་བསྡུ་སྒྲིལ་གང་ལེགས་བྱེད་པ་དང་ཕྱོགས་ཁག་གི་ཧུར་སེམས་དང་རང་འགུལ་རང་བཞིན་སྐོང་འཐེན་བྱས་ཏེ《འཆར་འགོད》ཀྱི་བྱ་ཐབས་དང་རྣམ་གྲངས་སྔར་བས་ཁ་གསལ་བཟོས་ནས《འཆར་འགོད》ལག་བསྟར་ཐུབ་པར་འགན་ལེན་བྱེད་དགོས་པ་དང་། 《འཆར་འགོད》རྩོམ་བཟོ་གོ་སྐབས་སུ་བྱས་ཏེ་རིག་གནས་དང་ཡུལ་སྐོར་ཁྱབ་ཁོངས་ཀྱི་ཕྱོགས་ཡོངས་ནས་སྒྱུར་བཅོས་ཟབ་ཏུ་གཏོང་བའི་དུས་བབ་གསར་པ་དང་ལས་འགན་གསར་པར་དམིགས་པ་དང་། བོད་ཀྱི་དོན་དངོས་ལ་གཞི་ཚུགས་པ། རིག་གནས་དང་ཡུལ་སྐོར་ཐོན་ལས་འཕེལ་རྒྱས་ཀྱི་སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ཏེ། རིག་གནས་དང་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་ཚན་རིག་དང་མཐུན་པའི་འཆར་འགོད་དང་སྐུལ་འདེད་གཏོང་དགོས་པའི་ནན་བཤད་གནང་བ་རེད།