ཚེས་21ཉིན། རང་སྐྱོང་ལྗོངས་ཡིག་འབུལ་ཞུ་བཅར་ལས་དོན་གྱི་མཉམ་འབྲེལ་ཚོགས་འདུས་ཚང་འཛོམས་ཚོགས་འདུ་འཚོགས་ཤིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་ཚོགས་འདུར་ཞུགས་ནས་གསུང་བཤད་གནང་ཞིང་། ཡིག་འབུལ་ཞུ་བཅར་ལས་དོན་ཁྲིམས་སྐྱོང་ཅན་ལ་ཕྱོགས་ཡོངས་ནས་སྐུལ་འདེད་བཏང་སྟེ། མང་ཚོགས་ཀྱི་ཁྲིམས་མཐུན་ཁེ་དབང་དང་སྤྱི་ཚོགས་བརྟན་ལྷིང་སྲུང་སྐྱོང་མཐའ་གཅིག་ཏུ་བྱེད་དགོས་པའི་ནན་བཤད་གནང་བ་རེད།

ཚོགས་འདུའི་ཐོག ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་ནན་ཏན་བྱས་པ་དང་། ཀྲུང་དབྱང་གི་ཡིག་འབུལ་ཞུ་བཅར་ལས་དོན་གྱི་མཉམ་འབྲེལ་ཚོགས་འདུའི་ཡིག་འབུལ་ཞུ་བཅར་ལས་དོན་ཁྲིམས་སྐྱོང་ཅན་ལ་སྐུལ་འདེད་གཏོང་བའི་ས་གནས་ས་ཐོག་གི་ཚོགས་འདུའི་དགོངས་དོན་དང་། བློ་མཐུན་ལི་ཝུན་ཀྲང་གིས་བོད་དུ་བརྟག་ཞིབ་གནང་སྐབས་ཀྱི་མཛུབ་སྟོན་བླང་བྱ་སློབ་སྦྱོང་བྱས་པ་དང་འབྲེལ། རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་གཞིར་བཟུང“དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་ནས་ཡིག་འབུལ་ཞུ་བཅར་ལས་དོན་ཁྲིམས་སྐྱོང་ཅན་ལ་སྐུལ་འདེད་གཏོང་རྒྱུ་བཀོད་སྒྲིག་བྱས་པ་རེད།

ལིའུ་ཅང་གིས། ཡིག་འབུལ་ཞུ་བཅར་ལས་དོན་ཁྲིམས་སྐྱོང་ཅན་ལ་སྐུལ་འདེད་གཏོང་བ་ནི་ཁྲིམས་བཞིན་བོད་སྐྱོང་མཐའ་འཁྱོངས་དང་མང་ཚོགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་བྱེད་པའི་ནང་གནས་ཀྱི་བླང་བྱ་ཞིག་ཡིན་པས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དོན་སྙིང་གལ་ཆེན་ལྡན་ཡོད། ཁྲིམས་བཞིན་སྔོན་འགོག་དང་ཚོད་འཛིན་ཐད་ཤུགས་རྒྱག་རྒྱུ་མཐའ་འཁྱོངས་བྱེད་དགོས། ཚན་རིག་དང་མཐུན་ཞིང་དམངས་གཙོ་ལྡན་པའི་ངང་ཁྲིམས་བཞིན་ཇུས་ཐག་གཅོད་པའི་འགག་སྒོ་འདི་ནན་པོ་སྲུང་བ་དང་། ཡུལ་བབ་དམངས་འདུན་འཚོལ་སྡུད་བྱེད་པའི་ལྷུ་ཚིགས་འདི་ཤར་བགྲོད་ཐུབ་པ། འགལ་ཟླ་དང་རྩོད་གཞི་གྲལ་བཤེར་དང་སེལ་བའི་ཐབས་ཤེས་འདི་ཡག་པོ་སྤྱོད་པ། འགོ་ཁྲིད་ལས་བྱེད་པས་ཞུ་བཅར་ལ་སྣེ་ལེན་དང་གཤམ་སྐྱོད་ཀྱི་ལས་དོན་འདི་ཡག་པོ་སྒྲུབ་པ་བཅས་བྱས་ཏེ་འགལ་ཟླ་དང་རྩོད་གཞི་འབྱུང་རྩ་ནས་སྔོན་འགོག་དང་ཉུང་དུ་གཏོང་དགོས། ཁྲིམས་ལྟར་བདག་སྤྲོད་བྱེད་པའི་ཐད་ཤུགས་རྒྱག་རྒྱུ་མཐའ་འཁྱོངས་བྱེད་དགོས། ཡིག་འབུལ་ཞུ་བཅར་ངེས་པར་དུ་ཐོ་འགོད་བྱེད་པའི་ལམ་ལུགས་ལག་བསྟར་ནན་པོ་དང་། ཡིག་འབུལ་ཞུ་བཅར་གྱི་འགན་འཁྲིའི་ལམ་ལུགས་དོན་འཁྱོལ་ནན་པོ། གསལ་བཤད་བྱེད་དགོས་པའི་ལས་ཀ་ཚད་ལྡན་ནན་པོ་བཅས་བྱས་ཏེ་མང་ཚོགས་ཚོས་བདག་སྤྲོད་དང་ཐག་གཅོད་བྱེད་རིམ་དང་། འཕེལ་རིམ། ཐག་གཅོད་བྱས་འབྲས། རྗེས་མཐུད་ཐབས་ལམ། དེ་བཞིན་རྒུད་སྐྱོབ་ཐབས་ལམ་སོགས་དུས་དང་རྣམ་པ་ཀུན་ཏུ་ཤེས་པར་བྱས་ནས་རང་འགན་གཞན་དཀྲི་སོགས་ཀྱི་སྣང་ཚུལ་གཏན་འགོག་མཐའ་གཅིག་ཏུ་བྱེད་དགོས། ཁྲིམས་བཞིན་སྒྲུབ་གཉེར་བྱེད་པའི་ཐད་ཤུགས་རྒྱག་རྒྱུ་མཐའ་འཁྱོངས་བྱེད་དགོས། ཡིག་འབུལ་ཞུ་བཅར་གྱི་ལས་དོན་ཐོག་མར་སྒྲུབ་པའི་སྤུས་ཚད་དང་ཕན་འབྲས་མི་ལེགས་པ་དང་། ཞུ་གཏུག་ལ་མཐོང་ཆེན་དང་འདུམ་འགྲིག་ལ་སྣང་ཆུང་། སྲིད་འཛིན་ལས་སྒྲུབ་དོན་དངོས་དང་མི་མཐུན་པ། ཡིག་འབུལ་ཞུ་བཅར་བྱེད་པ་ལས་བཅའ་ཁྲིམས་ལ་ཡིད་ཆེས་མི་བྱེད་པ་སོགས་ཀྱི་གནད་དོན་ཐག་གཅོད་ཡག་པོ་བྱས་ནས་ནུས་ཤུགས་ཡོད་རྒུས་ཐོག་མར་སྒྲུབ་པའི་ལྷུ་ཚིགས་སུ་གནད་དོན་ཐག་གཅོད་བྱེད་པ་དང་། ཡིག་འབུལ་ཞུ་བཅར་གྱི་གནད་དོན་དོན་དངོས་ཐོག་སེལ་བར་སྐུལ་འདེད་བཏང་སྟེ“དོན་དག་དང་སེམས་ཁྲལ་གཉིས་ཀ་ཐག་གཅོད”དང་གྱོད་ཐག་ཆོད་དུས་གནད་དོན་ཡང་ཐག་གཅོད་ཐུབ་པར་བྱེད་དགོས། ཁྲིམས་བཞིན་ལྟ་འདོམས་དང་འགན་འཁྲི་བདའ་འདེད་གཏོང་བའི་ཐད་ཤུགས་རྒྱག་རྒྱུ་མཐའ་འཁྱོངས་བྱེད་དགོས། ལྟ་འདོམས་བྱེད་ཤུགས་ཆེ་རུ་གཏོང་བ་དང་། “གྲོས་འགོ་གསུམ”ཡག་པོ་སྤྱོད་པ། སྒྲིག་ཁྲིམས་ལྟ་འདོམས་ལ་ཤུགས་སྣོན་རྒྱག་པ་བཅས་བྱས་ཏེ་བདག་སྤྲོད་བྱེད་དགོས་ཀྱང་བདག་སྤྲོད་མི་བྱེད་པ་དང་། སྒྲུབ་གཉེར་བྱེད་དགོས་ཀྱང་སྒྲུབ་གཉེར་མི་བྱེད་པ་དང་སྒྲུབ་གཉེར་དམིགས་སར་མི་འབྱོར་བ་སོགས་ཀྱི་མངོན་གསལ་དོད་པའི་གནད་དོན་ཡོ་བསྲང་མཐའ་གཅིག་ཏུ་བྱེད་དགོས། ཏང་གི་སྒྲིག་ཁྲིམས་དང་སྲིད་སྐྱོང་སྒྲིག་ཁྲིམས་ལས་འགལ་བ་དང་། མང་ཚོགས་ཀྱི་ཁྲིམས་མཐུན་ཁེ་དབང་ལ་གནོད་འཚེ་གཏོང་བ་དང་ཡིག་འབུལ་ཞུ་བཅར་གྱི་འགན་འཁྲི་སྒྲུབ་རྒྱུ་གནད་ལ་མི་འཁེལ་བའི་རྐྱེན་གྱིས་ཡིག་འབུལ་ཞུ་བཅར་གྱི་གནད་དོན་ཐོན་རིགས་ལ་འགན་འཁྲི་བདའ་འདེད་ནན་པོ་གཏོང་དགོས། ཁྲིམས་བཞིན་སྒྲིག་ལམ་སྲུང་སྐྱོང་བྱེད་པའི་ཐད་ཤུགས་རྒྱག་རྒྱུ་མཐའ་འཁྱོངས་བྱེད་དགོས། “ལོ་ལྔ་ཚན་བརྒྱད་པའི”ཁྲིམས་ལུགས་ཁྱབ་གདལ་གྱི་ལས་དོན་གཏིང་ཟབ་སྤེལ་ནས་ལས་དོན་སྒྲུབ་དུས་ཁྲིམས་གཞིར་བཟུང་བ་དང་། གནས་ཚུལ་འཕྲད་དུས་ཁྲིམས་ཁུངས་འཚོལ་བ། དོན་ཐག་གཅོད་དུས་ཁྲིམས་ལ་བསྟུན་པ། འགལ་ཟླ་ཐུག་དུས་ཁྲིམས་བཞིན་སེལ་བ་བཅས་ཀྱི་ཁྲིམས་སྐྱོང་ཁོར་ཡུག་ཡག་པོ་ཞིག་ཆགས་པར་སྐུལ་འདེད་གཏོང་དགོས། ཡིག་འབུལ་ཞུ་བཅར་ལས་དོན་གྱི་སྲོལ་ཡིག་དོན་འཁྱོལ་ནན་པོ་བྱས་ཏེ་ཡིག་འབུལ་ཞུ་བཅར་ལས་དོན་གྱི་ཚན་རིག་ཅན་དང་། ཚད་ལྡན་ཅན། ཁྲིམས་སྐྱོང་ཅན་བཅས་གྱི་ཆུ་ཚད་ཟམ་མི་ཆད་པར་མཐོ་རུ་གཏོང་དགོས། མང་ཚོགས་ཀྱི་ཡིག་འབུལ་ཞུ་བཅར་བྱ་སྤྱོད་ཚད་ལྡན་དུ་བཏང་ནས་ཡིག་འབུལ་ཞུ་བཅར་གྱི་སྒྲིག་ལམ་ཁྲིམས་བཞིན་སྲུང་སྐྱོང་བྱས་ཏེ། ལྗོངས་ཡོངས་ཀྱི་སྤྱི་ཚོགས་སྤྱི་ཡོངས་རྒྱུན་མཐུད་ཞི་མཐུན་བརྟན་ལྷིང་ཡོང་བར་སྐུལ་འདེད་གཏོང་དགོས་པའི་ནན་བཤད་གནང་བ་རེད།