རང་ལྗོངས་ཀྱི་གྲོང་གསེབ་ཀྱི་གོ་ཆོད་ཤེས་ལྡན་སྣེ་ཁྲིད་པའི་གསོ་སྦྱོང་འཛིན་གྲྭ་འགོ་ཚུགས་པ།
ཉེ་ཆར། རང་སྐྱོང་ལྗོངས་ཏང་ཨུད་རྩ་འཛུགས་པུའུ་དང་རང་སྐྱོང་ལྗོངས་ཞིང་ལས་གྲོང་གསེབ་ཐིང་གིས་གཙོ་གཉེར་བྱས་པའི་2024ལོའི་གྲོང་གསེབ་ཀྱི་གོ་ཆོད་ཤེས་ལྡན་སྣེ་ཁྲིད་པ་དང་། གྲོང་ཚོར་ལས་གནས་འཁུར་བ་དང་སློབ་ཆེན་ཐོན་པའི་གྲོང་དཔོན་ལྟར་དོ་དམ་བྱེད་པའི་འདེམས་གཏོང་སློབ་མའི་གསོ་སྦྱོང་འཛིན་གྲྭ་ལྷ་སར་འགོ་ཚུགས་པ་རེད།
ད་ཐེངས་ཀྱི་གསོ་སྦྱོང་ནང་གྲོང་གསེབ་བཅོས་སྐྱོང་བརྗོད་དོན་གཙོ་བོར་བྱེད་པ་དང་གྲོང་ཚོའི་ཏང་རྩ་འཛུགས་ཀྱི་ཧྲུའུ་ཅི་དང་གྲོང་ཚོར་ལས་འགན་འཁུར་བའི་འདེམས་གཏོང་སློབ་མ་སོགས་གཙོ་གནད་དུ་བྱས་ཏེ། འབྲེལ་ཡོད་ཁྱབ་ཁོངས་ཀྱི་རིགས་གཅིག་མཁས་ཅན་དང་མཁས་དབང་དང་། ལས་གཏོད་གྲུབ་འབྲས་ཐོབ་པའི་མི་སྣ། གཞི་རིམ་གྱི་ཕུལ་བྱུང་ཏང་རྩ་འཛུགས་ཀྱི་འཐུས་མི་བཅས་གདན་དྲངས་ནས་སློབ་ཁྲིད་དང་ཉམས་མྱོང་མཉམ་སྤྱོད་བྱས་པ་དང་། “གྲོང་གསེབ་འཕེལ་རྒྱས་དང་། འཛུགས་སྐྲུན། བཅོས་སྐྱོང་བཅས་ཐད་ཀྱི་ཉམས་མྱོང་སྤེལ་རེས”དང་། “གྲོང་གསེབ་ཀྱི་མཉམ་སྡེབ་དཔལ་འབྱོར་འཕེལ་རྒྱས་དང་གསར་དར་གཉེར་སྐྱོང་བྱེད་པོ་གསོ་སྐྱོང” “ཕུལ་བྱུང་ཏང་རྩ་འཛུགས་ཀྱི་ཧྲུའུ་ཅིའི་ཉམས་མྱོང་ངོ་སྤྲོད”སོགས་ཀྱི་ཁྱད་ལྡན་སློབ་ཚན་གཉེར་ཞིང་། དེའི་དམིགས་ཡུལ་ནི་སེམས་གནས་ཐུབ་པ་དང་། གཞིས་ཆགས་ཐུབ་པ། གོ་ཆོད་པ་བཅས་ཀྱི་གྲོང་གསེབ་ཀྱི་ཤེས་ལྡན་པའི་དཔུང་ཁག་ཅིག་བཏོད་དེ་ཞིང་ལས་དང་། གྲོང་གསེབ། གཉེར་སྐྱོང་བཅས་ལ་མཁས་པའི་གོ་ཆོད་ཤེས་ལྡན་པ་ཁག་གཅིག་གསོ་སྐྱོང་བྱེད་པ་དང་གྲོང་གསེབ་ཀྱི་གཞི་རིམ་བཅོས་སྐྱོང་དང་ཞབས་ཞུའི་ནུས་པ་ཆེ་རུ་བཏང་སྟེ་གྲོང་གསེབ་དར་རྒྱས་ཡོང་ཆེད་རིག་སྟོབས་ཀྱི་རྒྱབ་སྐྱོར་དང་ཤེས་ལྡན་པའི་འདེགས་སྐྱོར་བྱ་ཆེད་རེད།