ལིའུ་ཅང་གིས་ལྷ་ས་གྲོང་ཁྱེར་ཁྲེང་ཀོན་ཆུས་བསྟན་རྒྱས་གླིང་སྡེ་ཁུལ་དུ་ཕེབས་ནས་རྗེས་ལུས་ཏང་ཀྲི་པུའུ་བཅོས་སྒྲིག་བྱ་རྒྱུར་མཛུབ་ཁྲིད་གནང་བ།
ཚེས་12ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གིས་ལྷ་ས་གྲོང་ཁྱེར་ཁྲེང་ཀོན་ཆུས་བསྟན་རྒྱས་གླིང་སྡེ་ཁུལ་དུ་ཕེབས་ནས་རྗེས་ལུས་ཏང་ཀྲི་པུའུ་བཅོས་སྒྲིག་ལས་དོན་ལ་མཛུབ་ཁྲིད་གནང་བ་དང་ཏང་འཛུགས་སྐྱོང་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་དང་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན། དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་སློབ་སྦྱོང་ལག་བསྟར་གཏིང་ཟབ་བྱེད་པ་དང་། གཞི་རིམ་ཏང་རྩ་འཛུགས་འཛུགས་སྐྱོང་ལ་ཤུགས་སྣོན་རྒྱག་རྒྱུའི་སྐོར་གྱི་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་བླང་བྱ་ལག་བསྟར་དོན་འཁྱོལ་ནན་ཏན་བྱེད་པ། སྡེ་ཁུལ་གྱི་གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་ནུས་པ་གང་ལེགས་འདོན་པ་བཅས་བྱས་ཏེ་སྡེ་ཁུལ་མང་ཚོགས་ཀྱི་སེམས་དབུས་སུ་ཏང་གི་དར་ཆ་མཐོན་པོར་གཡོ་བར་བྱེད་དགོས་ཞེས་ནན་བཤད་གནང་བ་རེད།
བསྟན་རྒྱས་གླིང་སྡེ་ཁུལ་གྱི་ལས་རེས་ཁང་དང་། ཉེན་དོན་ཁང་། དམངས་ཕན་ཞབས་ཞུའི་ཚོམས་ཆེན་བཅས་སུ་ལིའུ་ཅང་གིས་ཁོངས་གཏོགས་ཁུལ་གྱི་དྲ་མིག་ཅན་དོ་དམ་དང་། འགལ་ཟླ་དང་རྩོད་གཞི་འདུམ་འགྲིག
དམངས་བདེ་དམངས་ཕན་ཞབས་ཞུ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་འབྲེལ། ལས་སྒོ་སྒྲུབ་པར་ཡོང་མཁན་གྲོང་མི་མང་ཚོགས་དང་བྱམས་བརྩེའི་གླེང་མོལ་གནང་བ་མ་ཟད། ལས་དོན་ལེགས་གཏོང་དང་ཞབས་ཞུ་རིམ་སྤོར་བྱེད་པའི་ཐད་ཀྱི་ཁོང་ཚོའི་བསམ་འཆར་དང་གྲོས་འགོ་ནན་ཏན་ངང་གསན་པ་རེད། ལིའུ་ཅང་གིས་སྡེ་ཁུལ་གྱི་ལས་དོན་ནི་ཁྱིམ་ཚང་ཁྲི་སྟོང་མང་པོ་དང་འབྲེལ་བ་ཡོད་པས་སྡེ་ཁུལ་གྱི་ཏང་རྩ་འཛུགས་དང་ཏང་ཡོན་ལས་བྱེད་པས་མང་ཚོགས་ཀྱི་བདེ་སྡུག་སེམས་ནང་འཇོག་པ་དང་། གྲོང་མིའི་སྒོ་ཁར་བསྐྱོད་པ། མང་ཚོགས་ཀྱི་ཆེད་དུ་སྐད་ཆ་ཤོད་པ་བཅས་བྱས་ཏེ། གྲོང་མི་མང་ཚོགས་ལ་ཞབས་འདེགས་ཞུ་བ་དང་ཞི་མཐུན་བརྟན་ལྷིང་ལ་སྐུལ་འདེད་གཏོང་བའི་ཐད་ཕར་ཕྱིན་རྒྱག་པའི་སྙིང་རུས་བཏོན་སྟེ་བྱ་བ་བཟང་པོ་དང་དོན་དངོས་བསྒྲུབ་རྒྱུ་མང་ཚོགས་ཀྱི་སེམས་ལ་ཟུག་པར་བྱས་ཐོག སྡེ་ཁུལ་གྱི་ཞབས་ཞུའི་དྲོ་སྐྱིད་ཚོར་ཤུགས་དང་སྡེ་ཁུལ་བཅོས་སྐྱོང་བྱེད་ཤུགས་ཟམ་མི་ཆད་པར་གོང་མཐོར་གཏོང་དགོས་ཞེས་བསྟན་གནང་བ་རེད།
ལིའུ་ཅང་གིས་ནན་བཤད་གནང་དོན། གཞི་རིམ་ཏང་རྩ་འཛུགས་ནི་ཏང་གི་ལས་དོན་ཡོངས་དང་འཐབ་ནུས་ཀྱི་རྨང་གཞི་དང་སྡེ་ཁུལ་ནི་ཏང་གིས་མང་ཚོགས་ལ་འབྲེལ་གཏུག་བྱེད་པའི་སྦྲེལ་ཟམ་དང་སྦྲེལ་ཐག་ཡིན་པས་སྡེ་ཁུལ་གྱི་ཏང་རྩ་འཛུགས་ཡག་པོ་དང་སྟོབས་ཆེན་བཙུགས་ཏེ་གོང་བུ་འགྲིལ་ཤུགས་དང་། འབོད་སྐུལ་ནུས་པ། འཐབ་ནུས་བཅས་ལ་ཤུགས་སྣོན་ཏན་ཏིག་བརྒྱབ་ནས་གྲོང་མི་མང་ཚོགས་ཀྱིས་དུས་དང་རྣམ་པ་ཀུན་ཏུ་རྩ་འཛུགས་གམ་དུ་ཡོད་པ་དང་། གནད་དོན་འཕྲད་སྐབས་རྒྱབ་བརྟེན་བཅོལ་བ། ཞབས་ཞུ་དེ་བས་སྙིང་ཉེ་བ། ལས་དོན་སྒྲུབ་པར་དེ་བས་སེམས་ཁྲལ་མེད་པ་བཅས་ཡོང་བར་བྱེད་དགོས། སྡེ་ཁུལ་གྱི་ཏང་ཀྲི་པུའི་ཆབ་སྲིད་ནུས་པ་ཆེ་རུ་བཏང་ནས་ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ཏེ་བློ་སྒྲིལ་སེམས་སྐྱེད་མཐའ་འཁྱོངས་དང་བསམ་བློ་ཆབ་སྲིད་སློབ་གསོ་གཏིང་ཟབ་སྤེལ་ནས་རྒྱ་ཆེའི་ཏང་ཡོན་དང་གྲོང་མི་མང་ཚོགས་ཀྱིས“གཏན་འཁེལ་གཉིས”ལ་བརྩི་བཀུར་མཐའ་གཅིག་ཏུ་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པ་དང་། བློ་བརྟན་འགྱུར་མེད་ངང་ཏང་གི་བཀའ་དྲིན་དྲན་པ་དང་། ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་པ་བཅས་བྱེད་དགོས། སྡེ་ཁུལ་གྱི་ཏང་ཀྲི་པུའི་སྒྲིག་འཛུགས་ནུས་པ་ཆེ་རུ་བཏང་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་རྒྱུན་རྣམ་ཅན་གྱི་སྒོ་ནས་སྤེལ་བ་དང་སྙིང་གཏམ་ཤོད་པའི་ལམ་ལུགས་དོན་འཁྱོལ་ཡག་པོ་བྱེད་པ། ཏང་ཡོན་ལ་སློབ་གསོ་དང་། དོ་དམ། ལྟ་སྐུལ་བཅས་ནན་པོ་བྱེད་པ། སྡེ་ཁུལ་གྱི་ལས་དོན“ལས་ཁུངས་ཅན”གྱི་ཁ་ཕྱོགས་སུ་འགྱུར་རྒྱུར་བཀག་འགོག་མཐའ་གཅིག་ཏུ་བྱེད་པ། སྡེ་ཁུལ་གྱི་ཏང་ཡོན་དང་ལས་བྱེད་པས་རང་འཁྲིའི་ལས་འགན་ལ་གཞི་ཚུགས་ཏེ་སྔོན་གཏོད་ལེགས་བརྩོན་བྱས་ཐོག་གདོང་ལེན་དཔེ་བཟང་གི་ནུས་པ་དེ་བས་ལེགས་པའི་སྒོ་ནས་འདོན་དགོས་པ་བཅས་རེད།