ཟླ་10ཚེས་9ཉིན་ནས་ཚེས་11ཉིན་བར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ཡིས་ཆབ་མདོ་གྲོང་ཁྱེར་དཔའ་ཤོད་རྫོང་དང་། བྲག་གཡབ་རྫོང་། ཁ་རུབ་ཆུས་བཅས་སུ་དཔལ་འབྱོར་འཕེལ་རྒྱས་ལས་དོན་ལ་བརྟག་ཞིབ་གནང་བ་མ་ཟད། ད་དུང་ར་འོག་གྲོང་རྡལ་གྱི་སྣམ་བུ་ལས་སྣོན་བཟོ་གྲྭ་དང་། དཔའ་ཤོད་དུང་དཀར་ཨར་འདམ་ཚད་ཡོད་ཀུང་སི། བོད་ལྗོངས་གསར་སྤེལ་མ་འཇོག་ཅི་ཡཱ་འོད་ཤུགས་ནུས་རྒྱུ་ཚད་ཡོད་ཀུང་སི་སོགས་ཁེ་ལས་དང་། རྒྱལ་ལམ་318ཀྱི་གཙོ་གནད་ལམ་དུམ་བཅོས་སྒྲིག་རྒྱས་སྐྲུན་ལས་གྲྭ་སོགས་རྣམ་གྲངས་ཀྱི་ལས་ཡུལ། ཏ་ཐང་ནུས་རྒྱུ་གཙང་མའི་རྟེན་གཞིའི་ཐོན་ལས་གླིང་སོགས་གླིང་ཁུལ། ཆབ་མདོའི་ཞིང་ཞོར་ཐོན་རྫས་དང་དེ་བཞིན་གྲང་ཕྲེང་མཛོད་ཉར་སྡེབ་ཚོང་སོགས་ཀྱི་ཁྲོམ་ར་བཅས་སུ་ཕེབས་ཏེ་ཁྱད་ལྡན་ཐོན་ལས་འཕེལ་རྒྱས་དང་། གཙོ་གནད་ལས་གྲྭ་དང་རྣམ་གྲངས་ལག་བསྟར། དམངས་འཚོ་འགན་ལེན་དང་ལེགས་གཏོང་སོགས་ཀྱི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་རེད།

ཁྲེན་ཡུང་ཆི་ཡིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱེད་པ་དང་། རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ། “དོན་ཆེན་བཞིར”དམིགས་ནས“འཛུགས་གཏོད་བཞིར”ཤུགས་སྣོན་རྒྱག་པ། ཐབས་མང་མཉམ་སྤྱོད་ཀྱིས་རྣམ་གྲངས་འཛུགས་སྐྲུན་ལ་དམ་འཛིན་བཅས་བྱས་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་བའི་ཐད་ཕན་འབྲས་གསར་པ་ཐོན་པ་བྱེད་དགོས། “གཙོ་གནད་གཉིས”ཀྱི་འཛུགས་སྐྲུན་ལ་སྐུལ་འདེད་གཏོང་རྒྱུ་གོ་སྐབས་སུ་བྱེད་པ་དང་། རྒྱལ་ཁབ་ཀྱི་ལས་གྲྭ་གལ་ཆེན་ལ་སྐུལ་འདེད་གཏོང་རྒྱུ་དང་ཟུང་འབྲེལ་བྱེད་པ། ལས་ཀའི་དོན་དངོས་དང་འཕེལ་རྒྱས་ཀྱི་དགོས་མཁོར་གཞི་ཚུགས་པ་བཅས་བྱས་ཏེ་རྨང་གཞི་འདིང་བ་དང་། ཕུགས་ལ་ཕན་པ། དམངས་འཚོར་ཕན་པ་བཅས་ཀྱི་རྣམ་གྲངས་ཡག་པོ་ཁག་གཅིག་ཇུས་འགོད་དང་གསོག་འཇོག་ཧུར་ཐག་བྱེད་པ་དང་། ཀྲུང་དབྱང་གི་སྔོན་རྩིས་ནང་གི་མ་འཇོག་དང་། དུས་ཡུན་ཧ་ཅང་རིང་བའི་དམིགས་བསལ་རྒྱལ་བུན། ས་གནས་སྲིད་གཞུང་གི་ཆེད་དོན་བུན་འཛིན་སོགས་མ་དངུལ་གྱི་རྒྱབ་སྐྱོར་བརྩོན་ལེན་གང་ཐུབ་བྱེད་པ། མ་འཇོག་སྐུལ་ཁྲིད་ཀྱི་འགག་རྩའི་ནུས་པ་འདོན་སྤེལ་ཡག་པོ་བཅས་བྱས་ནས་སྤུས་ཚད་མཐོ་བའི་འཕེལ་རྒྱས་ལ་འགུལ་ནུས་གསོག་འཇོག་བྱེད་དགོས།

ལམ་སྲོལ་འཐུས་ཚང་དུ་བཏང་ནས་རྣམ་གྲངས་དོ་དམ་ལ་ཤུགས་སྣོན་རྒྱག་པ་དང་། གཙོ་གནད་རྣམ་གྲངས་འགན་གཙང་ལེན་ལམ་སྲོལ་དོན་འཁྱོལ་ཡག་པོ་བྱེད་པ། བཀོད་གཏོང་དང་ལྟ་སྐུལ་མཛུབ་ཁྲིད་ལ་ཤུགས་སྣོན་རྒྱག་པ། ཨར་སྐྲུན་གྱི་དུས་ཚོད་ཡག་ཤོས་ལ་དམ་འཛིན་བཅས་བྱས་ནས། མིག་མཐོང་ལག་ཟིན་གྱི་ལས་འབོར་དེ་བས་མང་བ་ཐོན་པ་བྱེད་དགོས། རྣམ་གྲངས་ཀྱི་རྗེས་སུ་རྒྱུ་རྐྱེན་གཙོ་བོ་འབྲང་རྒྱུ་མཐའ་འཁྱོངས་བྱས་ཏེ་རྣམ་གྲངས་འཛུགས་སྐྲུན་ལ་བརྒྱུད་རིམ་ཧྲིལ་པོ་དང་དུས་འཁོར་ཧྲིལ་པོའི་ཞབས་འདེགས་ཞུས་ནས་རྣམ་གྲངས་འདྲེན་ཐུབ་པ་དང་། ཡག་པོ་བསྐྲུན་ཐུབ་པ། ཕན་འབྲས་ཐོན་པ་བཅས་ལ་འགན་ལེན་བྱེད་དགོས། ལས་གྲྭ་གལ་ཆེན་གྱི་ཞབས་ཞུ་འགན་སྲུང་ལ་དམིགས་ནས་ཨར་འདམ་དང་ལྕགས་སྒྲོམ་སོགས་བཟོ་སྐྲུན་ལས་རིགས་འཕེལ་རྒྱས་ལ་སྐུལ་འདེད་མགྱོགས་པོ་གཏོང་དགོས། “གསར་གཉིས”སྲིད་ཇུས་ལག་བསྟར་བྱེད་པ་གོ་སྐབས་སུ་བྱས་ཏེ་འཛད་སྤྱོད་བྱེད་མང་དུ་ཧུར་ཐག་གཏོང་བ་དང་། རྒྱལ་ཁབ་ཀྱི་བྱ་སྤྱོད་ཇུས་གཞི་དང་རང་ལྗོངས་ཀྱི་ལག་བསྟར་ཇུས་གཞི་ལག་བསྟར་དོན་འཁྱོལ་ཡག་པོ་བྱེད་པ། གསར་བརྗེའི་ཡུལ་སྐོར་དང་རྒྱལ་ལམ་318ཀྱི་རྫོགས་ལྡན་ཡུལ་སྐོར་ལམ་ཐིག་སོགས་ཐོན་ཁུངས་ཀྱི་ལེགས་ཆར་གཞི་ཚུགས་པ། རིག་གནས་ཡུལ་སྐོར་ཐོན་ལས་འཕེལ་རྒྱས་ཤུགས་ཆེན་གཏོང་བ། ཡུལ་སྐོར་གྱི་རྣམ་གྲངས་ཞིབ་ཚགས་པོས་ཇུས་འགོད་བྱེད་པ། ཡུལ་སྐོར་གྱི་སྒྲིག་བཀོད་ཆུ་ཚད་མཐོ་རུ་གཏོང་བ་བཅས་བྱས་ཏེ། ཡུལ་སྐོར་བ་དེ་བས་མང་བའི་ཡིད་དབང་འགུག་པ་དང་དཔལ་འབྱོར་འཕར་རྒྱུར་སྐུལ་འདེད་གཏོང་དགོས། དེ་དང་ཆབས་ཅིག་ཁེ་ཕན་སྦྲེལ་མཐུད་ལམ་སྲོལ་དོན་འཁྱོལ་ཡག་པོ་བྱས་ཏེ་མི་རིགས་ཁག་གི་མང་ཚོགས་ཀྱི་སྣེ་ཁྲིད་དེ་འབབ་འཕར་ཕྱུག་འགྱུར་ཡོང་བ་དང་། ཡོང་འབབ་ཀྱི་སྔོན་དཔག་ལེགས་སུ་གཏོང་བ། འཛད་སྤྱོད་ཀྱི་མི་མངོན་པའི་ནུས་ཤུགས་རྒྱུན་ཆད་མེད་པར་འཕེལ་བ་བཅས་བྱེད་དགོས། “ཤ་ཚལ་སྒོང་གསུམ”དང་། “འབྲུ་རིགས” “ཤིང་འབྲས”བཅས་ལ་དམ་འཛིན་ཡག་པོ་བྱེད་པ་དང་འབྲུ་རིགས་དང་། བཟའ་སྣུམ། ཤིང་འབྲས། སྔོ་ཚལ་སོགས་ཞིང་ལས་ཐོན་རྫས་མཁོ་སྤྲོད་བྱེད་ནུས་ཆེ་རུ་བཏང་ནས་མི་རིགས་ཁག་གི་མང་ཚོགས་ཀྱི་མཛེས་སྡུག་ལྡན་པའི་འཚོ་བའི་དགོས་མཁོ་རྒྱུན་མཐུད་སྐོང་དགོས་པའི་ནན་བཤད་གནང་བ་རེད།