ཚེས་10ཉིན་ལྗོངས་ཡོངས་ཀྱི་ལས་བྱེད་པ་རྒན་གྲས་ཀྱི་ལས་དོན་བཞུགས་མོལ་ཚོགས་འདུ་ལྷ་སར་འཚོགས་ཤིང་། ཚོགས་འདུའི་ཐོག་ཏང་གི་ཚོགས་ཆེན་ཉི་ཤུ་པ་དང་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་པ་དང་། རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་ལག་བསྟར་བྱས་པ། གྲུབ་འབྲས་ལ་ཕྱོགས་སྡོམ་དང་། གནད་དོན་ལ་དབྱེ་ཞིབ། གོམ་སྟབས་རྗེས་མའི་ལས་དོན་བཀོད་སྒྲིག་བཅས་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་དང་རྩ་འཛུགས་པུའི་པུའུ་ཀྲང་ལའེ་ཅའོ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།

ལའེ་ཅའོ་ཡིས་གསུངས་དོན། ལྗོངས་ཡོངས་ཀྱི་ལས་བྱེད་པ་རྒན་གྲས་ཀྱི་ལས་དོན་སྡེ་ཚན་དང་རྒྱ་ཆེའི་ལས་བྱེད་པ་རྒན་གྲས་ཀྱི་ལས་དོན་སྒྲུབ་མཁན་ལ་རིགས་པའི་གཞུང་ལུགས་ཀྱི་དྲག་ཆས་སྤྲོས་ཤུགས་ཆེ་རུ་གཏོང་བ་དང་། ཕུགས་བསམ་དང་དད་སེམས་བརྟན་དུ་གཏོང་བ། ལས་ཀའི་འགན་འཁྲི་འཁུར་བ་བཅས་བྱས་ཏེ་ཐོག་མཐའ་བར་གསུམ་དུ་བསམ་བློ་དང་། ཆབ་སྲིད། བྱ་སྤྱོད་བཅས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ་བྱེད་དགོས།

ལའེ་ཅའོ་ཡིས་ནན་བཤད་གནང་དོན། “དོན་ཆེན་བཞིར”དམིགས་ནས“འཛུགས་གཏོད་བཞིར”ཤུགས་སྣོན་རྒྱག་པ་དང་ཏང་རྩ་འཛུགས་ཀྱི་བཀོད་སྒྲིག་ཚད་ལྡན་དུ་གཏོང་བ་དང་། རྩ་འཛུགས་ཀྱི་འཚོ་བ་ནན་དུ་གཏོང་བ། ཏང་ཡོན་དོ་དམ་ལ་ཤུགས་སྣོན་རྒྱག་པ་བཅས་བྱས་ཏེ་ལས་བྲལ་དང་རྒན་ཡོལ་ཞུས་པའི་མི་སྣའི་ཏང་རྩ་འཛུགས་ཀྱི་ཆབ་སྲིད་ནུས་པ་དང་རྩ་འཛུགས་ཀྱི་བྱེད་ནུས་རྒྱུན་ཆད་མེད་པར་ཆེ་རུ་གཏོང་བ་དང་། “དབུ་དཀར་ཤེས་ལྡན་པའི”ཐོན་ཁུངས་ཡག་པོ་སྤྱད་དེ་ཁོང་ཚོས་ནུས་པ་ལྷག་མ་ཧུར་ཐག་འདོན་རྒྱུར་སྐུལ་འདེད་གཏོང་བ། ཞབས་ཞུ་འགན་སྲུང་གི་ལས་དོན་ཡག་པོ་བསྒྲུབས་ནས་ལས་བྱེད་པ་རྒན་གྲས་དང་བློ་མཐུན་རྒན་གྲས་ཚོས་སྒྱུར་བཅོས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་དང་ཚེ་མཇུག་སྐྱིད་པོ་ཞིག་སྐྱེལ་ཐུབ་པ། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་བརྒྱབ་སྟེ་ལས་བྱེད་པ་རྒན་གྲས་ཀྱི་ལས་དོན་འགོ་ཁྲིད་ཚོགས་ཆུང་དང་རྩ་འཛུགས་མི་དོན་སྡེ་ཚན་གྱི་ཇུས་འགོད་མཛུབ་ཁྲིད་དང་གཅིག་གྱུར་མཐུན་སྦྱོར་གྱི་ནུས་པ་འདོན་སྤེལ་ཡག་པོ་བྱེད་པ། ལས་བྱེད་པ་རྒན་གྲས་ཀྱི་ལས་དོན་སྡེ་ཚན་གྱིས་རང་ངོས་འཛུགས་སྐྱོང་ལ་ཤུགས་སྣོན་རྒྱག་པ་དང་ལས་ཀའི་འཇོན་ཐང་ཆེ་རུ་བཏང་སྟེ་ཏང་ཐུགས་བློ་བདེ་པོ་དང་ལས་བྱེད་པ་རྒན་གྲས་བློ་ཡིད་ཚིམ་པའི་དཔེ་སྟོན་སྡེ་ཚན་འཛུགས་སྐྱོང་ཧུར་ཐག་བཅས་བྱེད་དགོས།