དབུ་ཤོག>སྲིད་དོན།>འགོ་ཁྲིད་བྱེད་སྒོ།>ཡན་ཅིན་ཧའེ།
  • ཡན་ཅིན་ཧའེ་ཡིས་ཉིང་ཁྲི་གྲོང་ཁྱེར་དུ་བརྟག་ཞིབ་གནང་བ།

  • ཡོང་ཁུངས།  ཀྲུང་གོའི་བོད་ཀྱི་གསར་འགྱུར་དྲ་བ།   |     སྤེལ་དུས།  2024-10-10

    ཉིན་ཤས་གོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་ཉིང་ཁྲི་གྲོང་ཁྱེར་བྲག་ཡིབ་ཆུས་སུ་བརྟག་ཞིབ་གནང་བ་རེད། ཁོང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་དང་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་བཀོད་སྒྲིག་གཞིར་བཟུང་སྒྱུར་བཅོས་གསར་གཏོད་བྱེད་ཕོད་པ་དང་། འགན་འཁྲི་འཁུར་ཕོད་པ་དང་བྱ་སྤྱོད་གཏིང་ཟབ་སྤེལ་བ། མཉམ་སྡེབ་དཔལ་འབྱོར་རྒྱུན་མཐུད་ངང་འཕེལ་རྒྱས་དང་སྟོབས་ཆེར་གཏོང་བ། གྲོང་གསེབ་ཕྱོགས་ཡོངས་ནས་དར་རྒྱས་ཡོང་རྒྱུར་སྐུལ་འདེད་ཤུགས་ཆེན་གཏོང་བ་བཅས་བྱེད་དགོས་ཞེས་ནན་བཤད་གནང་བ་རེད།

    ཉེ་བའི་ལོ་ཤས་རིང་། བུ་ཆུ་ཤང་རྒྱལ་སྨད་གྲོང་ཚོའི་ཏང་ཀྲི་པུས“ཏང་འཛུགས་སྐྱོང་ལ་སྣེ་ཁྲིད་བྱ་རྒྱུ་དང་། གྲོང་ཚོའི་མཉམ་སྡེབ་གཉེར་སྐྱོང་བྱ་རྒྱུ། ཁེ་ལས་མཉམ་ལས་བྱ་རྒྱུ། ཡུག་ཁུལ་གྲོང་ཚོ་མཉམ་སྡེབ་ཐོག་མ་རྐང་ནང་ཞུགས་རྒྱུ”བཅས་ཟུང་དུ་འབྲེལ་བའི་བྱེད་སྟངས་ཐོག་ནས་དེང་རབས་ཞིང་ལས་དང་གྲོང་གསེབ་ཡུལ་སྐོར་སོགས་ཀྱི་གཞི་རྒྱུ་མང་པོ་གཞི་གཅིག་ཏུ་འདུས་པའི་གྲོང་གསེབ་དར་རྒྱས་ཀྱི་དཔེ་སྟོན་ས་ཚིགས་དང་ཞིང་ནང་སྤྲོ་གསེང་གི་ཕྱོགས་བསྡུས་སྒྲིག་གཞི་ཧུར་ཐག་བཏོད་པས་གྲོང་མི་ཚོ་རང་ཁྱིམ་གྱི་སྒོ་རྩ་ནས“ཡུལ་སྐོར་རླངས་འཁོར”སྡོད་ཐུབ་པ་དང“སྐྱེ་ཁམས་ཀྱི་ཡོང་འབབ”རག་གི་ཡོད། ཡན་ཅིན་ཧའེ་ཡིས་གཞི་རིམ་གྱི་ལས་བྱེད་པ་དང་གྲོང་ཚོའི་གནས་ཚུལ་གླེང་བ་དང་། ཡོང་འབབ་འདྲི་བ། རེ་འདོད་ཤོད་པ་བཅས་ཀྱི་ཐོག་ནས་མཉམ་སྡེབ་དཔལ་འབྱོར་འཕེལ་རྒྱས་སོགས་ཀྱི་གནས་ཚུལ་ནན་ཏན་ངང་གསན་པ་རེད། ཁོང་གིས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོཊ་ཐེངས་གསུམ་པའི་ཐོག་བཏོན་པའི་སྒྱུར་བཅོས་ཀྱི་བཀོད་སྒྲིག་རབ་དང་རིམ་པ་ཚང་མ་དམངས་ཀྱི་སེམས་ཁྲལ་ཏན་ཏིག་ངང་སེལ་བ་དང་དམངས་ཀྱི་ཁེ་ཕན་དོན་གཉེར་བྱེད་པ་ཞིག་རེད། ཚང་མས་དོན་དངོས་དང་ཟུང་འབྲེལ་དམ་ཟབ་དང་ལོ་རྒྱུས་ཀྱི་གོ་སྐབས་སྟངས་འཛིན་གྱིས་ཏང་ཀྲི་པུས་སྣེ་ཁྲིད་མུ་མཐུད་བྱེད་པ་དང་། ཡུལ་བབ་དང་བསྟུན་པ། དགེ་སྤེལ་སྐྱོན་སྤོང་། ཁྱད་ལྡན་ལམ་བུར་ཡག་པོ་སྐྱོད་པ། སྐྱེ་ཁམས་ཀྱི་ལས་དོན་ཡག་པོ་སྒྲུབ་པ་བཅས་བྱས་ནས། སྒྲིག་འཛུགས་ཅན་དང་། ཞིབ་ལས་ཅན། ཆེད་ལས་ཅན་བཅས་ཀྱི་ཕྱོགས་སུ་འཕེལ་རྒྱས་ཧུར་ཐག་གཏོང་བ་དང་མངགས་ཐོའི་རྣམ་པ་སོགས་ཀྱི་གཉེར་སྐྱོང་བྱེད་སྟངས་བརྒྱུད་གྲོང་ཚོའི་མཉམ་སྡེབ་དཔལ་འབྱོར་སྟོབས་ཆེར་རྒྱུན་མཐུད་གཏོང་བ་དང་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྣེ་ཁྲིད་བྱས་ཏེ། མི་སེར་རྣམས་འཚོ་བ་དེ་བས་ལེགས་པ་ཞིག་སྐྱེལ་ཐུབ་པར་བྱེད་དགོས་ཞེས་གསུངས་པ་རེད།

    མིག་སྔར་བུ་ཆུ་ཤང་གིས་ཀུ་ཤུ་དང་། འདྲེ་ཚེར་མ། སེའུ་སྔོན་པོ་བཅས་བཏབ་པ་མ་ཟད་ད་དུང་སྤོས་བཟོ་ཡི་ཡོད། ཡན་ཅིན་ཧའེ་ཡིས་ཐོན་རྫས་ལ་གཟིགས་པ་དང་ཁྲོམ་ར་དང་འཕེལ་རྒྱས་སྐོར་གླེང་གནང་ཞིང་། མཉམ་སྦྲེལ་དྲ་རྒྱའི་ལས་སྟེགས་བརྒྱུད་སྤོས་བྲིན་ཁ་རྒྱུག་པ་དང་ས་གནས་དེ་གའི་ཀུ་ཤུ་ཡང་ཕྱི་རྒྱལ་དུ་འཚོང་གི་ཡོད་པ་མཁྱེན་སྐབས་ཡན་ཅིན་ཧའེ་ཡིས་དགྱེས་ཚོར་ཆེན་པོས་ཉིང་ཁྲི་གྲོང་ཁྱེར་ལ་དམིགས་བསལ་གྱི་ས་བབ་དང་གནམ་གཤིས་ཀྱི་ཆ་རྐྱེན་ཡོད་པས། ཐོན་རྫས་ཕུན་སུམ་ཚོགས་པོ་འདུག་ཅེས་གསུངས་པ་རེད།

    “ཞབས་ཞུ་དང་ཁོར་ཡུག་ལ་བློ་ཡིད་ཚིམ་གྱི་འདུག་གམ” “འཛད་སྤྱོད་པས་ཐོན་རྫས་གང་དག་ལ་དགའ་པོ་བྱེད་ཀྱི་འདུག་གམ”ཞེས་ཡན་ཅིན་ཧའེ་ཡིས་ཡུལ་སྐོར་བ་དང་ཉེ་འགྲམ་དུ་ལས་ཀ་བྱེད་མཁན་གྱི་གྲོང་མི་དང་བྱམས་བརྩེའི་གླེང་མོལ་གནང་ནས་གྲོང་གསེབ་ཡུལ་སྐོར་དང་བདེ་འཇགས་དོགས་ཟོན་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས། ཡུལ་སྐོར་བདེ་འཇགས་ཀྱི་བྱེད་པོའི་འགན་འཁྲི་དོན་འཁྱོལ་ནན་ཏན་བྱས་ཏེ་གླིང་ཁུལ་དོ་དམ་ལ་ཤུགས་སྣོན་རྒྱག་པ་དང་ཞབས་ཞུའི་སྤུས་ཚད་མཐོ་རུ་བཏང་ནས་ཡུལ་སྐོར་བར་དེ་བས་བདེ་འཇགས་དང་། སྐྱིད་པ། སྟབས་བདེ་བཅས་ཀྱི་ཡུལ་སྐོར་ཉམས་ལེན་མཁོ་འདོན་བྱེད་དགོས། རིག་གནས་དང་ཡུལ་སྐོར་གྱི་ལས་རྣམ་གསར་པ་ཕུན་སུམ་ཚོགས་སུ་རྒྱུན་མཐུད་བཏང་ནས་མང་ཚོགས་ཀྱི་སྣ་མང་ཅན་དང་རིམ་པ་མང་བའི་འཛད་སྤྱོད་ཀྱི་དགོས་མཁོ་བསྐངས་ཏེ“ཞབས་ཞུ་ཡག་པོར”བརྟེན་ནས“གདེང་འཇོག་ཡག་པོ”ཐོབ་པ་དང“སྤུས་རྟགས་ཡག་པོ”བཏོད་དེ་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བའི་ཡིད་དབང་བཀུག་ནས་འགྲོ་འོང་དང་སྤེལ་རེས་ལ་སྐུལ་འདེད་གཏོང་དགོས་ཞེས་གསུངས་པ་རེད།

    འགན་འཁུར་རྩོམ་སྒྲིག་པ། བསོད་ནམས་དབང་འདུས།

མཉམ་སྤྱོད།

འབྲེལ་ཡོད་གསར་འགྱུར།