ཚེས་23ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་རང་སྐྱོང་ལྗོངས་ཁྲོམ་ར་ལྟ་འདོམས་ཅུས་སུ་བརྟག་ཞིབ་གནང་བར་ཕེབས་ཤིང་། ཁོང་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་དང་ཁྲོམ་ར་ལྟ་འདོམས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ཟབ་སྦྱོང་མཐིལ་རྟོགས་བྱས་ནས། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་ཀྱི་ལས་ཀའི་བླང་བྱ་ལྟར། ཚད་གཞི་དང་ཡང་ཡང་བསྡུར་བ་དང་རང་འགན་ཐེག་པ་འཁུར་ལེན་བྱས་ཏེ། དུས་རབས་གསར་པའི་ཁྲོམ་ར་ལྟ་འདོམས་ལས་དོན་གྱི་འགན་འཁྲི་གསར་པ་ཕྲག་ཏུ་མཐའ་གཅིག་ཏུ་འཁུར་དགོས་པའི་ནན་བཤད་གནང་བ་རེད།

ལྕགས་རྭ་བློ་བཟང་བསྟན་འཛིན་བརྟག་ཞིབ་གནང་བར་ལྷན་དུ་ཕེབས་པ་རེད།

སྤུས་ཚད་འཕེལ་རྒྱས་དང་ཚད་ལྡན་ཅན་ཁྲུའུ་རུ། ཡན་ཅིན་ཧའེ་ཡིས་སྤུས་ཚད་ལ་བརྟེན་ནས་ས་ཁུལ་སྟོབས་ཆེར་གཏོང་བའི་ལས་དོན་སྤེལ་ཚུལ་ལ་བཀའ་འདྲི་ཞིབ་ཕྲ་གནང་ཞིང་། ཁོང་གིས་ཚད་ལྡན་ཅན་གྱི་འཛུགས་སྐྲུན་ལ་སྐུལ་འདེད་ཤུགས་ཆེན་བཏང་ནས“ཚད་གཞི་མཐོ་པོར”བརྟེན་ནས“སྤུས་ཚད་མཐོ་པོ”འགན་ལེན་བྱེད་པ་དང་། “མིང་བྱང་གྲགས་ཅན”གྱི་ནུས་པ་འདོན་སྤེལ་བྱས་ནས“འཕེལ་རྒྱས་ཆེན་པོར”སྐུལ་འདེད་གཏོང་དགོས་ཞེས་གསུངས་པ་རེད། 12315ཞུ་གཏུག་ཐེར་འདོན་བཀོད་འདོམས་ལྟེ་གནས་སུ། ཡན་ཅིན་ཧའེ་ཡིས་ཁྲོམ་ར་ལྟ་འདོམས་ཀྱི་གྲངས་གཞིའི་ནུས་སྐྱེད་དང་ཚོང་གཉེར་ཁོར་ཡུག་ལེགས་གཏོང་ལས་དོན་ཤེས་རྟོགས་ཞིབ་ཕྲ་གནང་ཞིང་། ཁོང་གིས་ཁྲོམ་རའི་ཆོས་ཉིད་ལ་བརྩི་སྲུང་བྱས་ཏེ་ཚོང་གཉེར་ཁོར་ཡུག་རྒྱུན་སྲིང་ལྷོད་མེད་ངང་ལེགས་སུ་གཏོང་དགོས་པ་དང་12315ཞུ་གཏུག་ཐེར་འདོན་ལས་སྟེགས་སོགས་ཀྱི་ནུས་པ་འདོན་སྤེལ་ཡག་པོ་བྱས་ནས་འཛད་སྤྱོད་པའི་ཁེ་དབང་སྲུང་སྐྱོང་བྱེད་ཤུགས་ཆེ་རུ་བཏང་སྟེ། བློ་བདེའི་འཛད་སྤྱོད་ཀྱི་གཟུགས་བརྙན་ཡག་པོ་གཏོད་དགོས་ཞེས་གསུངས་པ་རེད། བཟའ་བཅའི་བདེ་འཇགས་མཐུན་སྦྱོར་ཁྲུའུ་རུ་ཡན་ཅིན་ཧའེ་ཡིས་བཟའ་བཅའི་བདེ་འཇགས་ལྟ་འདོམས་ཀྱི་གནས་ཚུལ་སྙན་སེང་ནན་ཏན་ངང་གསན་ཞིང་། ཁོང་གིས“ནན་ཤོས་བཞིའི”བླང་བྱ་དོན་འཁྱོལ་མཐའ་གཅིག་ཏུ་བྱས་ཏེ་འགག་སྒོ་ཚང་མ་ཡག་པོ་སྲུང་བ་དང་འགག་སྒོ་ཚང་མ་བརྟན་པོ་བཙུགས་ནས། མི་དམངས་མང་ཚོགས་ཀྱི“ལྕེ་རྩེའི་བདེ་འཇགས”ལ་ནུས་ཤུགས་ཡོད་རྒུས་སྲུང་སྐྱོང་བྱེད་དགོས་ཞེས་གསུངས་པ་རེད།

བརྟག་ཞིབ་གནང་རིང་ཡན་ཅིན་ཧའེ་ཡིས་ཁྲོམ་ར་ལྟ་འདོམས་ཕྱོགས་གཅིག་ནས་གཉེར་སྐྱོང་བྱེད་པོ་དང་འབྲེལ་བ་དང་ཕྱོགས་གཞན་ཞིག་ནས་མི་སེར་གྱི་དམངས་འཚོ་དང་འབྲེལ་ཡོད། དེ་ནི་མི་དམངས་ཀྱི་འཚོ་བ“སྲུང་མཁན”དང་སྤུས་ཚད་གོང་འཕེལ་གཏོང་བའི“འགན་ལེན་པ”རེད། “སྲོག་ཐིག”ཡག་པོ་བསྲུངས་ནས་བཟའ་བཅའ་དང་སྨན་རྫས་དང་། སོལ་རླངས་ཐབ། གློག་ཆས་སོགས་ལ་དམིགས་ཏེ་དམ་འཛིན་ནན་པོ་དང་ཞིབ་བཤེར་ཞིབ་ཚགས་བྱེད་པ་དང་ལྡོག་ཕྱོགས་ཀྱི་དཔེ་མཚོན་ལ་ཆད་པ་ནན་པོ་བཅད་ནས་ཉེན་ཟོན་གྱི་ཟིལ་ཤུགས་ཆེན་པོ་ཞིག་ཆགས་པ་བྱེད་དགོས་པ་དང་། གློག་རྡུལ་ལས་གཉེར་ལག་ཁྱེར་ས་ཁོངས་དང་། ལས་རིགས། ཁྱབ་ཁོངས་བཅས་ཀྱི་ཚད་འགག་མེད་པའི་སྒོ་ནས་སྤྱོད་རྒྱུར་མགྱོགས་མྱུར་སྐུལ་འདེད་བཏང་སྟེ། བྱ་བ་དེ་བས་མང་པོ“དྲ་ཐོག་ནས་སྒྲུབ་པ”དང་། “ཐེངས་གཅིག་ལ་སྒྲུབ་པ”“འཕྲལ་མར་སྒྲུབ་པ”“ཐག་ཉེ་སར་སྒྲུབ་པ”བཅས་མངོན་འགྱུར་ཡོང་བར་བྱེད་དགོས། “སྤུས་ཚད་ཀྱི་འགག་སྒོ”ཡག་པོ་བསྲུངས་ཏེ་ཁྱད་ལྡན་ཞིང་ལས་ཐོན་རྫས་དང་། མི་རིགས་ལག་ཤེས་བཟོ་ལས། བོད་ལུགས་གསོ་རིག་སོགས་གཙོ་གནད་ཁྱབ་ཁོངས་ལ་དམིགས་ནས་སྤུས་ཚད་ཀྱི་ཞན་ཆ་དང་ཚད་གཞིའི་ཞན་ཆ་མགྱོགས་མྱུར་བསལ་ཏེ་འབྱུང་རྩ་ནས་སྔོན་འགོག་ནན་པོ་བྱེད་པ་དང་། བརྒྱུད་རིམ་ནང་དོ་དམ་ནན་པོ་བྱེད་པ། ཉེན་ཁར་ཚོད་འཛིན་ནན་པོ་བྱེད་པ། ཁྲིམས་འགལ་བར་ཆད་པ་ནན་པོ་གཅོད་པ་བཅས་ཏན་ཏིག་བྱས་ནས་བོད་ཀྱི་ཐོན་རྫས་ཀྱི་གཟུགས་བརྙན་ལ་སྲུང་སྐྱོང་ཡག་པོ་བྱེད་དགོས། “ཤན་འབྱེད་པ”ཡག་པོ་བྱས་ཏེ་ཡིད་རྟོན་ལྟ་འདོམས་དང་། ཁྲོམ་རའི་ཞིབ་བཤེར། སྒེར་སྡེམ་ལ་ངོ་རྒོལ་དང་ཚུལ་མིན་འགྲན་རྩོད་ལ་ངོ་རྒོལ་སོགས་ཀྱི་གཙོ་གནད་ལས་དོན་ལ་དམིགས་ནས་ཁྲིམས་སྐྱོང་ལྟ་འདོམས་དང་། ཡིད་རྟོན་ལྟ་འདོམས། བློ་རིག་ལྟ་འདོམས་བཅས་ལ་སྤྱི་འདོམས་སྐུལ་འདེད་གཏོང་བ་དང་། ཕྱོགས་བསྡུས་ཁྲིམས་སྒྱུར་ཞིབ་བཤེར་ལ་ཤུགས་སྣོན་རྒྱག་པ། ཤེས་བྱའི་བདག་དབང་སྲུང་སྐྱོང་ལ་ཤུགས་སྣོན་རྒྱག་པ་བཅས་བྱེད་དགོས་པའི་ནན་བཤད་གནང་བ་རེད།

ཡན་ཅིན་ཧའེ་ཡིས་རིམ་པ་ཁག་དང་སྡེ་ཚན་ཁག་གིས“ལྟ་འདོམས་ཆེན་པོའི”འདུ་ཤེས་ཟབ་ཏུ་གཏོང་བ་དང་། “ལྟ་འདོམས་ཆེན་པོའི”ལམ་སྲོལ་ལ་ཤུགས་སྣོན་རྒྱག་པ། “ལྟ་འདོམས་ཆེན་པོའི”མཉམ་ཤུགས་གཅིག་སྡུད་བཅས་བྱས་ཏེ། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཆེད་མཉམ་ཤུགས་ཆེན་པོ་གཅིག་ཏུ་བསྡུ་དགོས་པའི་བླང་བྱ་བཏོན་གནང་བ་རེད།