ཡན་ཅིན་ཧའེ་ཡིས་རྒྱ་ཚ་རྫོང་དུ་སྒྲོག་འགྲེལ་དང་བརྟག་ཞིབ་གནང་བ།
ཚེས་20ཉིན། ལྗོངས་ཏུང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་ལྷོ་ཁ་གྲོང་ཁྱེར་རྒྱ་ཚ་རྫོང་དུ་བསྐྱོད་དེ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སྒྲོག་འགྲེལ་གནང་བ་མ་ཟད། གྲོང་གསེབ་དར་རྒྱས་དང་། ཐོན་ལས་འཕེལ་རྒྱས། སྐྱེ་ཁམས་སྲུང་སྐྱོང་བཅས་དང་། དེ་བཞིན“འདུ་ཤེས་གསུམ”གྱི་སློབ་གསོའི་ལས་དོན་སྐོར་ལ་བརྟག་ཞིབ་ཀྱང་གནང་བ་རེད།
ཚེ་ཆུ་ཤང་ཕུ་མེད་ནང་གྲོང་ཚོར། ཡན་ཅིན་ཧའེ་ཡིས་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་དང་གྲོང་གསེབ་དར་རྒྱས་རྣམ་གྲངས་ཀྱི་འབྲེལ་ཡོད་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཡན་ཅིན་ཧའེ་ཡིས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ནི་དུས་རབས་གསར་པ་དང་རྒྱང་ལམ་གསར་པའི་ཐོག་ཕྱོགས་ཡོངས་ནས་སྒྱུར་བཅོས་ཟབ་གཏོང་ལ་སྐུལ་འདེད་གཏོང་རྒྱུ་དེ་རྒྱ་ཆེ་རུ་དང་གཏིང་ཟབ་པའི་ཕྱོགས་སུ་དཔུང་སྐྱོད་བྱེད་པའི་སྤྱི་ཡོངས་ཀྱི་སྐུལ་སློང་དང་སྤྱི་ཡོངས་ཀྱི་བཀོད་སྒྲིག་ཅིག་རེད། ཚང་མས་དོན་དངོས་དང་ཟུང་འབྲེལ་དམ་ཟབ་བྱས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་ཟབ་སྦྱོང་མཐིལ་རྟོགས་དང་། ལྗོངས་ཏང་ཨུད་ཀྱི་ལས་དོན་གྱི་བཀོད་སྒྲིག་ལྟར་ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་རྒྱུ་སྒུལ་ཤུགས་སུ་བྱེད་པ། “ལས་གྲྭ་ཁྲི་སྟོང”གི་ཉམས་མྱོང་སློབ་སྦྱོང་དང་བཀོལ་སྤྱོད་ནན་ཏན་བྱེད་པ། གཟེར་འདེབས་སྙིང་སྟོབས་ཐོག་ནས་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་ལ་སྐུལ་འདེད་གཏོང་རྒྱུའི་རེ་བ་ཡོད། གལ་ཆེའི་ནང་གི་འགངས་ཆེན་ཡིན་པའི་ཐོན་ལས་དར་རྒྱས་ལ་དམ་འཛིན་ཡག་པོ་བྱས་ཏེ། ས་གནས་དེ་གའི་ཁྱད་ལྡན་ཐོན་ཁུངས་ལ་གཞི་ཚུགས་ནས་གྲོང་ཚོའི་མཉམ་སྡེབ་དཔལ་འབྱོར་རྒྱུན་ཆད་མེད་པར་སྟོབས་ཆེར་གཏོང་བ་དང་། ཁེ་དབང་མཉམ་སྦྲེལ་ལམ་སྲོལ་འཐུས་སྒོ་ཚང་དུ་གཏོང་བ། མང་ཚོགས་ཀྱི་འབབ་འཕར་ཕྱུག་འགྱུར་གྱི་ཐབས་ལམ་རྒྱ་སྐྱེད་གཏོང་བ། དབུལ་སྒྲོལ་འགག་སྒྲོལ་གྱི་གྲུབ་འབྲས་རྒྱུན་མཐུད་སྲ་བརྟན་དང་རྒྱ་སྐྱེད་གཏོང་བ། གྲོང་གསེབ་ཕྱོགས་ཡོངས་ནས་དར་རྒྱས་གཏོང་བར་སྐུལ་འདེད་ནུས་ལྡན་གཏོང་བ། མང་ཚོགས་ཀྱི་དངུལ་ཁུག་དེ་བས་ལྗིད་ཏིག་ཏིག་དང་། སྐེད་པ་དེ་བས་འདྲོང་བ། འཛུམ་མདངས་དེ་བས་འཕྱུར་ཐུབ་པ་བཅས་བྱེད་དགོས། ནང་དོན་གལ་ཆེན་ཡིན་པའི་ཁོར་ཡུག་བཅོས་སྒྲིག་ལ་དམ་འཛིན་ཡག་པོ་བྱས་ཏེ། རྒྱ་ཆེའི་མང་ཚོགས་ཀྱི་ཧུར་སེམས་གང་ལེགས་སྐུལ་སློང་དང་། གསང་སྤྱོད་གསར་བརྗེ་དང་མི་ཕྱུགས་ལོགས་དབྱེ་སོགས་ཀྱི་དམིགས་ཚད་ལས་འགན་ལ་དམ་པོར་དམིགས་ནས་མི་སྡོད་ཁོར་ཡུག་བཅོས་སྒྲིག་ལེགས་གཏོང་དང་ཞིང་འབྲོག་པའི་ཉམས་འགྱུར་གསར་པ་གཏོད་པའི་བྱ་སྤྱོད་ལ་དམ་འཛིན་ཡག་པོ། གཙང་སྦྲ་དོད་པ་དང་། གྲལ་འགྲིག་པ། མཛེས་སྡུག་ལྡན་པ་བཅས་ཀྱི་མི་སྡོད་ཁོར་ཡུག་སྐྲུན་དགོས་ཞེས་གསུངས་པ་རེད།
ཆོས་འཁོར་རྒྱལ་དགོན་དུ་ཡན་ཅིན་ཧའེ་ཡིས“འདུ་ཤེས་གསུམ”གྱི་སློབ་གསོ་སྤེལ་ཚུལ་དང་དགོན་སྡེ་དོ་དམ་དང་། རིག་དངོས་སྲུང་སྐྱོང་། མེ་ཟོན་བདེ་འཇགས་སོགས་ལ་ཤུགས་སྣོན་དང་གསར་གཏོད་བྱས་ཚུལ་གྱི་ངོ་སྤྲོད་གསན་པ་རེད། ཁོང་གིས་སྤྱི་དམངས་ཀྱི་གྲས་ཤིག་ཡིན་པའི་རྒྱ་ཆེའི་དགེ་འདུན་པ་ཚོས་དྲིན་ཚོར་གྱི་བསམ་པ་སྙིང་དབུས་སུ་བཅངས་ནས་སློབ་སྦྱོང་ལ་མུ་མཐུད་ཤུགས་རྒྱག་པ་དང་། རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས་ཟབ་ཏུ་གཏོང་བ། “མོས་སེམས་ལྔ”ཟམ་མི་ཆད་པར་ཟབ་ཏུ་གཏོང་བ་བཅས་བྱས་ཏེ། “འདུ་ཤེས་གསུམ”གྱི་སློབ་གསོའི་ཕན་འབྲས་དེ་བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་ཧུར་ཐག་གཏོང་བའི་རང་རྟོགས་ཀྱི་བྱ་སྤྱོད་དུ་འགྱུར་བ་དང་ཐོག་མཐའ་བར་གསུམ་དུ་ཏང་དང་སྲིད་གཞུང་དང་བློ་སེམས་གཅིག་མཐུན། བློ་ཁ་གཅིག་མཐུན། བསམ་སྦྱོར་གཅིག་མཐུན་བཅས་ཡོང་བར་བྱེད་དགོས། རིག་དངོས་སྲུང་སྐྱོང་དང་བདེ་འཇགས་ཀྱི་འདུ་ཤེས་ཟབ་ཏུ་གཏོང་བ་དང་དགོན་པའི་རིག་དངོས་སྲུང་སྐྱོང་དང་མེ་ཟོན་བདེ་འཇགས་སོགས་ཀྱི་འཛུགས་སྐྲུན་ལ་ཤུགས་བརྒྱབ་ནས། རིག་དངོས་མི་རྣམས་ཀྱི་འཚོ་བའི་ནང་མཉམ་འདྲེས་ཐུབ་པ་དང་མི་རིགས་ཁག་གི་མང་ཚོགས་ཀྱི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་འགྲོ་བར་དེ་བས་ལེགས་པའི་སྒོ་ནས་སློབ་གསོ་དང་ཁྲིད་སྟོན་བྱེད་དགོས་པའི་ནན་བཤད་གནང་བ་རེད།
ཡན་ཅིན་ཧའེ་ཡིས་སྐྱེ་ཁམས་ཁོར་ཡུག་སྲུང་སྐྱོང་སོགས་ཀྱི་ལས་དོན་ལ་བརྟག་ཞིབ་གནང་བ་རེད།
ཡན་ཅིན་ཧའེ་ཡིས་ད་དུང་གཞི་རིམ་གྱི་མངགས་གཏོང་ཁང་གི་མི་དམངས་ཉེན་རྟོག་པར་བྱམས་བརྩེའི་ངང་གཟིགས་པ་དང་ས་ཆ་དངོས་སུ་དངོས་ཡོད་གནད་དོན་མཐུན་སྦྱོར་དང་ཐག་གཅོད་གནང་བ་རེད།