ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་དང་རང་སྐྱོང་ལྗོངས་ཏང་ཨུད་དྲ་འཕྲིན་ཨུ་ལྷན་གྱི་ཀྲུའུ་རེན་ཝང་ཅུན་ཀྲེང་གིས་2024ལོའི་རྒྱལ་ཁབ་དྲ་རྒྱའི་བདེ་འཇགས་དྲིལ་བསྒྲགས་གཟའ་འཁོར་གྱི་བོད་རང་སྐྱོང་ལྗོངས་ཀྱི་བྱེད་སྒོར་མཆན་བཀོད་མཛུབ་སྟོན་གནང་ཞིང་། 2024ལོ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དྲ་རྒྱའི་རྒྱལ་ཁབ་སྟོབས་ཆེན་གྱི་འཐབ་ཇུས་བཏོན་ནས་ལོ་10འཁོར་བའི་ལོ་ཞིག་རེད། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་དང་ལྷག་པར་དུ་དྲ་འཕྲིན་ཁོངས་གཏོགས་ཀྱིས་དྲ་རྒྱའི་རྒྱལ་ཁབ་སྟོབས་ཆེན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་ལ་བརྟེན་ནས་བོད་ཀྱི་དྲ་རྒྱའི་བདེ་འཇགས་ལས་དོན་གྱི་སྤྱི་ཡོངས་ལ་གཅིག་འདོམས་བྱ་རྒྱུ་མཐའ་འཁྱོངས་བྱེད་པ་དང་། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་ནན་ཏན་བྱེད་པ། སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོར་འཛུགས་པ། འཕེལ་རྒྱས་དང་བདེ་འཇགས་སྤྱི་འདོམས་བྱེད་པ། དྲ་རྒྱའི་བདེ་འཇགས་ཀྱི་འགན་འཁྲིའི་ལམ་ལུགས་དོན་འཁྱོལ་ནན་པོ་བྱེད་པ། དྲ་རྒྱའི་བདེ་འཇགས་འགན་ལེན་མ་ལག་དང་ནུས་པ་དེང་རབས་ཅན་དུ་འགྱུར་བར་སྐུལ་འདེད་ཧུར་ཐག་གཏོང་བ་བཅས་བྱས་ནས་དྲ་རྒྱའི་བདེ་འཇགས་ཀྱི་སྲུང་ཡོལ་བརྟན་པོ་ཞིག་སྐྲུན་དགོས་ཞེས་གསུངས་པ་རེད།

ཝང་ཅུན་ཀྲེང་གིས་ནན་བཤད་གནང་དོན། དྲ་ཐོག་གི་དྲང་ནུས་རྒྱུན་མཐུད་ངང་སྟོབས་ཆེར་བཏང་སྟེ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དྲིལ་བསྒྲགས་བྱེད་པར་ཤུགས་སྣོན་བརྒྱབ་ནས་མི་རིགས་ཁག་གི་མང་ཚོགས་ཀྱི་ཏང་གི་གསར་གཏོད་རིགས་པའི་གཞུང་ལུགས་ཀྱི་ཆབ་སྲིད་ཀྱི་མོས་སེམས་དང་། བསམ་བློའི་མོས་སེམས། རིགས་པའི་གཞུང་ལུགས་ཀྱི་མོས་སེམས། བརྩེ་དུང་གི་མོས་སེམས་བཅས་རྒྱུན་ཆད་མེད་པར་ཆེ་རུ་གཏོང་དགོས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་རྒྱུ་གཙོ་རྐང་དུ་བྱ་རྒྱུ་མཐའ་འཁྱོངས་ཀྱིས་དྲ་རྒྱའི་འདུ་ཤེས་འཛིན་སྟངས་ཀྱི་ལས་དོན་ལ་ཤུགས་སྣོན་རྒྱག་པ་དང་རྒྱལ་གཅེས་རིང་ལུགས་ཀྱི་སློབ་གསོ་དང་། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་སློབ་གསོ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བའི་སློབ་གསོ་བཅས་གཏིང་ཟབ་སྤེལ་ནས། ཀྲུང་ཧྭ་མི་རིགས་ལ་ཐུན་མོང་དུ་དབང་བའི་བསམ་པའི་རིག་གནས་ཀྱི་ཁྱིམ་གཞིས་སྐྲུན་དགོས།

ཁྲིམས་ལྟར་དྲ་རྒྱ་གཉེར་རྒྱུ་མཐའ་འཁྱོངས་ཀྱིས་དྲ་རྒྱའི་དོ་དམ་སྒྲིག་སྲོལ་སྒྱུར་བཅོས་གཏིང་ཟབ་ཏུ་གཏོང་བ་དང་། འགག་རྩའི་ཆ་འཕྲིན་གྱི་རྨང་གཞིའི་སྒྲིག་བཀོད་ཀྱི་བདེ་འཇགས་སྲུང་སྐྱོང་ལ་ཤུགས་སྣོན་རྒྱག་པ། གྲངས་གཞིའི་བདེ་འཇགས་དོ་དམ་དང་འགོག་སྲུང་ལ་ཤུགས་སྣོན་རྒྱག་པ། དྲ་རྒྱའི་བདེ་འཇགས་ཁྲིམས་སྒྱུར་ལ་ཤུགས་སྣོན་རྒྱག་པ་བཅས་བྱས་ནས་དྲ་རྒྱའི་ཁོར་ཡུག་གཙང་མ་ཞིག་ཧུར་ཐག་གཏོད་དགོས། དྲ་རྒྱའི་བདེ་འཇགས་དམངས་ཀྱི་ཆེད་དུ་ཡིན་པའི་འདུ་ཤེས་ལག་ལེན་བསྟར་བ་དང་དྲ་རྒྱའི་བདེ་འཇགས་ཀྱི་ཤེས་བྱའི་དྲིལ་བསྒྲགས་སློབ་གསོ་གཏིང་ཟབ་སྤེལ་ཏེ་མི་རིགས་ཁག་གི་མང་ཚོགས་ལ་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་སྔར་བས་ཚོར་བར་བྱེད་དགོས། འཇོན་ཐང་ལ་གཞིགས་ནས་ལས་བྱེད་བཀོལ་སྤྱོད་དང་ལས་རྗེས་ལ་གཞིགས་ནས་གདེང་འཇོག་མཐའ་འཁྱོངས་ཀྱིས་དྲ་རྒྱའི་བདེ་འཇགས་ཀྱི་ཤེས་ལྡན་པའི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་སྟེ་དྲ་རྒྱའི་བདེ་འཇགས་ལས་དོན་ལ་འགན་ལེན་ནུས་ལྡན་བྱེད་དགོས།

ཝང་ཅུན་ཀྲེང་གིས་ནན་བཤད་གནང་དོན། རིམ་ཁག་འགོ་ཁྲིད་ལས་བྱེད་པས་རང་རྟོགས་ངང་དྲ་རྒྱ་སྦྱོང་བ་དང་། དྲ་རྒྱ་ཤེས་པ། དྲ་རྒྱ་བེད་སྤྱོད་བཅས་བྱས་ནས་དྲ་སྦྲེལ་གྱི་བསམ་གཞིག་ལ་ཤུགས་སྣོན་རྒྱག་པ་དང་། དྲ་སྦྲེལ་གྱི་ཆོས་ཉིད་ཁོང་དུ་ཆུད་པ། དྲ་སྦྲེལ་གྱི་བྱ་ཐབས་སྤྱོད་པ། དྲ་ཐོག་གི་མང་ཚོགས་ལམ་ཕྱོགས་སུ་ཡག་པོ་སྐྱོད་པ། དྲ་ཐོག་དང་དྲ་ཕྱི་གཅིག་མཐུན་ཡོང་བ་བཅས་བྱས་ཏེ། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱེད་པའི་སྟོབས་ཤུགས་ཆེན་པོ་གཅིག་ཏུ་བསྒྲིལ་དགོས།

ཚེས་9ཉིན་གྱི་སྔ་དྲོ། 2024ལོའི་རྒྱལ་ཁབ་དྲ་རྒྱའི་བདེ་འཇགས་དྲིལ་བསྒྲགས་གཟའ་འཁོར་གྱི་བོད་རང་སྐྱོང་ལྗོངས་ཀྱི་བྱེད་སྒོའི་འགོ་ཚུགས་མཛད་སྒོ་ལྷ་སར་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་ཧྲུའུ་ཅི་ཝང་ཅུན་ཀྲེང་གི་མཆན་བཀོད་མཛུབ་སྟོན་སྒྲོག་སྦྱངས་གནང་བ་མ་ཟད་ཤིས་ཚིག་ཀྱང་སྒྲོན་གནང་བ་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཀྲང་ཡན་ཆིང་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཚེ་རིང་ཕུན་ཚོགས། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་སྒྲོལ་དཀར་བཅས་ཕེབས་པ་རེད།

དབང་ཧའེ་ཀྲོའུ་ཡིས་ཤིས་ཚིག་སྒྲོན་སྐབས། རྒྱལ་ཁབ་དྲ་རྒྱའི་བདེ་འཇགས་དྲིལ་བསྒྲགས་གཟའ་འཁོར་གྱི་བོད་རང་སྐྱོང་ལྗོངས་ཀྱི་བྱེད་སྒོ་སྤེལ་བ་དེ་ནི་རང་སྐྱོང་ལྗོངས་ཏང་ཨུད་ཀྱིས་བཏོན་པའི་ཐབས་ཇུས་བཀོད་སྒྲིག་གལ་ཆེན་ཞིག་ཡིན་པ་དང་། དྲ་རྒྱའི་བདེ་འཇགས་ལས་དོན་ཡག་པོ་སྒྲུབ་པའི་ནང་དོན་གལ་ཆེན་ཞིག་ཀྱང་ཡིན། དེའི་དམིགས་ཡུལ་ནི་སྤྱི་ཚོགས་ཡོངས་དྲ་རྒྱའི་བདེ་འཇགས་མཉམ་སྐྲུན་དང་དྲ་རྒྱའི་ཤེས་དཔལ་མཉམ་སྤྱོད་ནང་ཧུར་ཐག་ཞུགས་རྒྱུར་ཁྲིད་སྟོན་བྱེད་པ་དང་། དྲ་རྒྱའི་བདེ་འཇགས་དྲིལ་བསྒྲགས་སློབ་གསོའི་ལས་སྟེགས་གསར་པ་དང་གཞི་རྟེན་གསར་པ་གཏོད་པ། དྲིལ་བསྒྲགས་བྱེད་སྒོའི་ཁྱབ་རྒྱ་ཆེ་རུ་གཏོང་བ་དང་མི་རིགས་ཁག་གི་མང་ཚོགས་དེའི་ཁྲོད་ཞུགས་པའི་ཧུར་བརྩོན་རང་བཞིན་སྐོང་འཐེན་བཅས་བྱས་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱ་ཆེད་སྤྱི་ཚོགས་ཀྱི་ཁོར་ཡུག་བཟང་པོ་ཞིག་གཏོད་རྒྱུ་དེ་རེད་ཅེས་གསུངས་པ་རེད།

འགོ་ཚུགས་མཛད་སྒོའི་ཐོག་གཙོ་གཉེར་ཚན་པས་བོད་རང་སྐྱོང་ལྗོངས་དྲ་རྒྱ་དང་གྲངས་གཞིའི་བདེ་འཇགས་ལག་རྩལ་འདེགས་སྐྱོར་ཚན་པར་བྱང་བུ་སྤྲད་པ་དང་འབྲེལ“2024ལོའི་ངོ་མཚར་ལྡན་པའི་ཕུབ། ཇོ་མོ་གླང་མའི་དྲ་རྒྱའི་བདེ་འཇགས་རྩལ་ནུས་འགྲན་བསྡུར་ཆེན་པོའི”ཐོག་བྱ་དགའ་ཐོབ་མཁན་ལ་ལག་ཁྱེར་སྤྲད་པ་དང་། རིགས་གཅིག་མཁས་ཅན་དང་། མཁས་དབང་། ཁེ་ལས་ཀྱི་འགན་འཁུར་བ་བཅས་ཁག་གཅིག་གིས་གཙོ་དོན་གཏམ་བཤད་སྤེལ་བ་རེད། འགོ་ཚུགས་མཛད་སྒོ་མཇུག་འགྲིལ་རྗེས་ཚོགས་ཞུགས་འགོ་ཁྲིད་དང་སྐུ་མགྲོན་ཡོངས་ཀྱིས་འགྲེམས་སྟོན་ནང་ཞུགས་མཁན་ཚན་པ་དང་ཁེ་ལས་ཁག་ལ་ལྟ་སྐོར་དང་འཚམས་འདྲི་བྱས་པ་རེད། རང་སྐྱོང་ལྗོངས་ཏང་ཨུད་དྲ་འཕྲིན་ཨུ་ལྷན་གྱི་ཁོངས་མིའི་ཚན་པ་ཁག་དང་། མི་དམངས་ཚོགས་པ་ཁག ལྷ་ས་གྲོང་ཁྱེར་སོགས་འབྲེལ་ཡོད་ཚན་པའི་འགན་འཁུར་བ་དང་དེ་བཞིན་ལྗོངས་ཕྱི་ནང་གི་དྲ་རྒྱའི་ཁེ་ལས་དང་། སྤྱི་ཚོགས་རྩ་འཛུགས། མཐོ་སློབ་སོགས་ཁྱོན་མི་400ལྷག་ཙམ་གོང་གསལ་གྱི་བྱེད་སྒོར་ཞུགས་པ་རེད།

ད་ཐེངས་ཀྱི་བྱེད་སྒོ་ཟླ་9ཚེས་9ནས་15ཉིན་བར་རྒྱུན་མཐུད་རྒྱུ་དང“དྲ་རྒྱའི་བདེ་འཇགས་དམངས་ཀྱི་ཆེད། དྲ་རྒྱའི་བདེ་འཇགས་དམངས་ལ་བརྟེན”ཞེས་པ་བརྗོད་དོན་གཙོ་བོར་བྱས་ཏེ་དྲ་རྒྱའི་བདེ་འཇགས་ལག་རྩལ་གྱི་མཐོ་རིམ་གླེང་སྟེགས་དང་། དངོས་མང་སྟོན་ཚོགས་དང་དྲ་རྒྱའི་བདེ་འཇགས་ཐོན་རྫས་དང་ཞབས་ཞུའི་མཁོ་སྤྲོད་ངོ་འཕྲད་གྲོས་མོལ་ཚོགས་འདུ། ཤེས་ལྡན་པ་གདན་ཞུ། གསར་གཏོད་ལས་གཏོད་མ་འཇོག དྲ་རྒྱའི་བདེ་འཇགས་གཞི་རིམ་དུ་ཁྱབ། དྲ་ཐོག་ཤེས་བྱ་འགྲན་བསྡུར། བརྙན་ཐུང་འཚོལ་བསྡུ་སོགས་བྱེད་སྒོ་10ལྷག་ཙམ་གཉེར་རྒྱུ་དང་གྲོང་ཁྱེར་དང་ས་ཁུལ་ཁག་ཏུ་ཡན་ལག་ཚོགས་ར་འཛུགས་རྒྱུ་རེད།