ལྗོངས་ཡོངས་ཀྱི་སོལ་རླངས་ཀྱི་བདེ་འཇགས་དང་དྲོད་རླངས་དང་གསོ་རླུང་མཁོ་འདོན་ལས་དོན་གྱི་ཆེད་དོན་ཚོགས་འདུ་འཚོགས་པ།
ཚེས་21ཉིན་གྱི་སྔ་དྲོར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཀྲང་ལིས་ལྗོངས་ཡོངས་ཀྱི་སོལ་རླངས་ཀྱི་བདེ་འཇགས་དང་དྲོད་རླངས་དང་གསོ་རླུང་མཁོ་འདོན་ལས་དོན་གྱི་ཆེད་དོན་ཚོགས་འདུ་གཙོ་སྐྱོང་གནང་ནས་འབྲེལ་ཡོད་གནས་ཚུལ་གྱི་སྙན་ཞུ་གསན་པ་དང་གོམ་སྟབས་རྗེས་མའི་ལས་དོན་ལ་ཞིབ་འཇུག་དང་བཀོད་སྒྲིག་གནང་བ་རེད།
ཚོགས་འདུའི་ཐོག་ས་གནས་ཁག་དང་སྡེ་ཚན་ཁག་གིས་སོལ་རླངས་ཀྱི་བདེ་འཇགས་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་མཆན་བཀོད་མཛུབ་སྟོན་གྱི་དགོངས་དོན་དོན་འཁྱོལ་ནན་ཏན་བྱས་ཏེ། ཉེ་བའི་ལོ་ཤས་རིང་ཐོན་པའི་བདེ་འཇགས་ལས་འཛོལ་གྱི་ཡིད་སྐྱོ་བའི་བསླབ་བྱ་དང་ལེན་གཏིང་ཟབ་བྱས་ནས་བསམ་བློའི་ངོས་འཛིན་མཐོ་རུ་གཏོང་བ་དང་། ལམ་ལུགས་འཛུགས་སྐྱོང་ལ་ཤུགས་སྣོན་རྒྱག་པ། ཆེད་དོན་བཅོས་སྒྲིག་ལ་མུ་མཐུད་སྐུལ་འདེད་གཏོང་བ། ཡུལ་བབ་དང་བསྟུན་ནས་དབུགས་རིལ་སྦུ་གུར་སྒྱུར་བ་དང་སོལ་རླངས་གློག་ལ་སྒྱུར་བའི་ལས་དོན་ལ་སྐུལ་འདེད་གཏོང་བ། དྲིལ་བསྒྲགས་གསོ་སྦྱོང་བཅས་བྱས་ཏེ་བདེ་འཇགས་ཀྱི་མཐའ་ཚད་མཐའ་གཅིག་ཏུ་སྲུང་བ་དང་མི་དམངས་མང་ཚོགས་ཀྱི་རྒྱུ་ནོར་དང་བདེ་འཇགས་ལ་འགན་ལེན་ཏན་ཏིག་བྱེད་དགོས་པའི་ནན་བཤད་བྱས་པ་རེད།