ཟླ་8ཚེས་22ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སར་ཀྲུང་གོ་ནུས་སྐྲུན་ཚོགས་པའི་ཏུང་ཧྲི་ཀྲང་སུང་ཧའེ་ལེང་གིས་སྣེ་ཁྲིད་གནང་བའི་བོད་སྐྱོད་རྟོག་ཞིབ་ཚོགས་པ་དང་བཞུགས་མོལ་གནང་ཞིང་། འདི་ནི་བཞུགས་མོལ་གནང་བཞིན་པ།

ཚེས་22ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སར་ཀྲུང་གོ་ནུས་སྐྲུན་ཚོགས་པའི་ཏུང་ཧྲི་ཀྲང་སུང་ཧའེ་ལེང་གིས་སྣེ་ཁྲིད་གནང་བའི་བོད་སྐྱོད་རྟོག་ཞིབ་ཚོགས་པ་དང་བཞུགས་མོལ་གནང་བ་རེད།

རང་སྐྱོང་ལྗོངས་ཀྱི་འགོ་ཁྲིད་རེན་ཝེ་དང་། ཀུང་ཧུའེ་ཚའེ། ལང་ཧྥུའུ་ཁོན་བཅས་ཞུགས་ཡོད་པ་རེད།

ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་སུང་ཧའེ་ལེང་དང་བཅས་པ་བོད་དུ་རྟོག་ཞིབ་གནང་བར་ཕེབས་པར་དགའ་བསུ་ཞུས་པ་རེད།

ཝང་ཅུན་ཀྲེང་གིས་བསྟན་དོན། བོད་ནི་རྒྱལ་ཁབ་ཀྱི་བདེ་འཇགས་སྲུང་བཅད་དང་སྐྱེ་ཁམས་བདེ་འཇགས་ཀྱི་སྲུང་བཅད་གལ་ཆེན་ཞིག་ཡིན་པས། ཐོན་ཁུངས་ཕུན་སུམ་ཚོགས་པ་དང་ནུས་རྒྱུ་གཙང་མའི་ཐོན་ལས་འཕེལ་རྒྱས་གཏོང་བའི་མི་མངོན་པའི་སྟོབས་ཤུགས་ཧ་ཅང་ཆེན་པོ་ལྡན་ཡོད། ཀྲུང་གོ་ནུས་སྐྲུན་ཚོགས་པ་ནི་ནུས་རྒྱུ་གློག་ཤུགས་དང་རྨང་གཞིའི་སྒྲིག་བཀོད་འཛུགས་སྐྲུན་ཁྱབ་ཁོངས་ཀྱི་གཙོ་ཤུགས་དམག་ཅིག་ཡིན་པས་ཕྱོགས་གཉིས་པོའི་མཉམ་ལས་ཟབ་ཏུ་གཏོང་བའི་རྨང་གཞི་བརྟན་ལ་མདུན་ལམ་ཆེན་པོ་ཡོད།

ཀྲུང་གོ་ནུས་སྐྲུན་ཚོགས་པས་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་ནན་ཏན་བྱེད་པ་དང་། གཞུང་ཁོངས་ཁེ་ལས་ཆེ་གྲས་ཀྱི་སྤྱི་ཚོགས་ཀྱི་འགན་འཁྲི་གང་ལེགས་སྒྲུབ་པ། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་ནང་ཧུར་ཐག་ཞུགས་པ་བཅས་བྱས་ཏེ། ལེགས་ཆ་གསབ་རེས་དང་། དགེ་སྤེལ་སྐྱོན་སྤང་། ཐུན་མོང་འཕེལ་རྒྱས་བཅས་ཡོང་བའི་རེ་བ་ཡོད། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་ཐོག་འཐབ་ཇུས་རང་བཞིན་གྱི་གསར་དར་ཐོན་ལས་སྐྱེད་སྲིང་བྱེད་པར། བོད་ཀྱི་དོན་དངོས་དང་ཟུང་འབྲེལ་དང་། རང་ངོས་ཀྱི་ལེགས་ཆ་འདོན་པ། གསར་དར་ཐོན་ལས་འཕེལ་རྒྱས་དང་རྒྱ་སྟོབས་ཆེ་རུ་གཏོང་བར་དམིགས་པ། ལས་དོན་སྤེལ་ཤུགས་ཆེ་རུ་གཏོང་བ། སྤྱོད་གོ་ཆོད་པའི་མ་འཇོག་རྒྱ་ཆེར་གཏོང་བ་བཅས་བྱས་ཏེ། བོད་ཀྱི་ཐོན་ཁུངས་ཀྱི་ལེགས་ཆ་དེ་བས་ལེགས་པའི་སྒོ་ནས་དཔལ་འབྱོར་གྱི་ལེགས་ཆ་དང་འཕེལ་རྒྱས་ཀྱི་ལེགས་ཆར་སྒྱུར་དགོས་པ་གསལ་པོ་བཏོན་ཡོད། ཁ་གཏད་བོད་སྐྱོར་ལས་དོན་མུ་མཐུད་ཡག་པོ་བསྒྲུབས་ནས་བོད་སྐྱོར་བྱེད་སྟངས་གསར་གཏོད་དང་། བོད་སྐྱོར་ཁྱབ་ཁོངས་རྒྱ་ཆེར་གཏོང་བ། ཐོན་ལས་རོགས་སྐྱོར་ཏན་ཏིག་བྱེད་པ། མང་ཚོགས་ཀྱི་ལས་ཞུགས་འབབ་འཕར་ལ་སྣེ་ཁྲིད་བཅས་བྱས་ཏེ་བོད་ཀྱིས་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དེ་གྲོང་གསེབ་དར་རྒྱས་གཏོང་བ་དང་འབྲེལ་མཐུད་ནུས་ལྡན་བྱེད་པར་སྐུལ་འདེད་གཏོང་དགོས། མཐའ་མཚམས་མི་རིགས་ས་ཁུལ་སྐྲུན་པར་ཕུལ་བྱུང་ཤེས་ལྡན་པ་མང་པོ་མཁོ་བས། རིག་སྟོབས་འདེགས་སྐྱོར་ལ་ཤུགས་སྣོན་རྒྱག་པ་དང་། ཤེས་ལྡན་པ་གཅིག་སྡུད་ཀྱི་ལེགས་ཆ་འདོན་པ། ཤེས་ལྡན་པ་སྤེལ་རེས་བྱེད་ཤུགས་ཆེ་རུ་གཏོང་བ། ཕུལ་བྱུང་ཤེས་ལྡན་པ་གསོ་སྐྱོང་དང་འདེམས་པའི་ལམ་སྲོལ་འཛུགས་པ་བཅས་བྱས་ཏེ། བོད་ཀྱིས་རིག་གནས་དང་། ཤེས་བྱ། རྩལ་ནུས་བཅས་ལྡན་པའི་ཚན་རྩལ་ཤེས་ལྡན་པ་དང་ཐོན་ལས་ཤེས་ལྡན་པ་དེ་བས་མང་བ་གསོ་སྐྱོང་བྱེད་པར་རོགས་རམ་བྱེད་དགོས། བོད་ཀྱི་བྱ་གཞག་ཁག་འཕེལ་རྒྱས་འགྲོ་རྒྱུར་དེ་བས་དོ་ཁུར་བྱེད་པ་དང་། རིག་སྟོབས་ཀྱི་ནུས་པ་ཡག་པོ་འདོན་པ། ཐུན་མོང་ཐོག་གནས་ཚུལ་གསར་པར་ཞིབ་འཇུག་དང་། གནད་དོན་གསར་པ་ཐག་གཅོད། ལམ་སྲོལ་གསར་པ་འཚོལ་ཞིབ་བཅས་བྱེད་པ། དམ་པ་དོན་གཉེར་གྱི་སྙིང་སྟོབས་ལ་བརྟེན་ནས་ལས་འགན་ཁག་དོན་ཐོག་ཏུ་འཁྱོལ་བར་སྐུལ་འདེད་གཏོང་བ་བཅས་བྱས་ཏེ། སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱ་ཆེད་ལེགས་སྐྱེས་དེ་བས་ཆེ་བ་འབུལ་དགོས།

སུང་ཧའེ་ལེང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དུས་ཡུན་རིང་པོའི་ནང་ཀྲུང་གོ་ནུས་སྐྲུན་ཚོགས་པར་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་ཀྲུང་གོ་ནུས་སྐྲུན་ཚོགས་པས་ནུས་རྒྱུ་གསར་པ་དང་། རྨང་གཞིའི་འཛུགས་སྐྲུན་གསར་པ། ཐོན་ལས་གསར་པ་བཅས་ཀྱི་ཁྱབ་ཁོངས་ཀྱི་ལེགས་ཆ་བཏོན་ནས“བོད་ལ་དགོས་མཁོ་ཡོད་པ་དང་། ནུས་སྐྲུན་ལ་ལེགས་ཆ་ལྡན་པ། ཕྱོགས་གཉིས་ཀར་ཐུན་མོང་གི་ངོས་འཛིན་ལྡན་པ། མཉམ་ལས་ཐད་གཉིས་ཕན་ཡོད་པ”བཅས་ཀྱི་བསམ་ཕྱོགས་གཞིར་བཟུང་ནུས་རྒྱུ་གཙང་མ་དང་། ནུས་གསོག་གསར་པ། སྐྱེ་ཁམས་ཤེས་དཔལ་འཛུགས་སྐྱོང་། ཁ་གཏད་བོད་སྐྱོར་སོགས་གཙོ་གནད་ཁྱབ་ཁོངས་སུ་ལས་དོན་སྤེལ་ཤུགས་ཆེ་རུ་བཏང་ནས། བོད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་རོགས་རམ་བྱེད་ཀྱི་ཡིན་ཞེས་གསུངས་པ་རེད།