ཟླ་8ཚེས་5དང་6ཉིན། ལྗོངས་ཡོངས་ཀྱི་ས་མཐོའི་མཛེས་མཐུན་གྲོང་གསེབ་འཛུགས་སྐྲུན་གྱི་ས་གནས་ས་ཐོག་གི་ཚོགས་འདུ་ཉིང་ཁྲིར་འཚོགས་པ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དང་ལྗོངས་ཏང་ཨུད་གྲོང་གསེབ་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་གཞོན་པ་ཚེ་རིང་ཕུན་ཚོགས་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།

ཚེ་རིང་ཕུན་ཚོགས་ཀྱིས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“ཞིང་གསུམ”ལས་དོན་སྐོར་གྱི་རྣམ་བཤད་གལ་ཆེན་སློབ་སྦྱོང་ལག་བསྟར་བྱེད་པ། ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་དོན་འཁྱོལ་བྱེད་པ། “ཞིང་གསུམ”སྒྱུར་བཅོས་ཀྱི་འཕེལ་རྒྱས་རང་བཞིན་དང་། བརྒྱུད་རིམ་རང་བཞིན། རྒྱང་ལྟའི་རང་བཞིན། མི་དམངས་རང་བཞིན་ཁོང་དུ་ཆུད་པ། ས་མཐོའི་མཛེས་མཐུན་གྲོང་གསེབ་འཛུགས་སྐྲུན་གཏིང་ཟབ་བྱེད་པར་སྐུལ་འདེད་གཏོང་བ་བཅས་བྱས་ཏེ་ཕྱོགས་ཡོངས་ནས་གྲོང་གསེབ་དར་རྒྱས་གཏོང་བར་རྨང་གཞི་བརྟན་པོ་འདིང་དགོས། བརྒྱུད་རིམ་གྱི་འདུ་ཤེས་མཐའ་འཁྱོངས་ཀྱིས་གྲོང་གསེབ་འཕེལ་རྒྱས་དང་། འཛུགས་སྐྲུན། བཅོས་སྐྱོང་བཅས་ཕན་ཚུན་སྤྱི་འདོམས་དང་། འཆར་འགོད་དང་ཐོན་ཁུངས། གྲོང་ཁྱེར་དང་གྲོང་གསེབ་ཕན་ཚུན་འབྲེལ་མཐུད་ལ་སྐུལ་འདེད་བཏང་ནས་སྤྱི་འདོམས་ཡག་པོ་ཡོང་བའི་འགན་ལེན་བྱེད་དགོས། སྤུས་ཚད་དང་ཕན་འབྲས་གལ་ཆེ་མཉམ་འཛིན་མཐའ་འཁྱོངས་ཀྱིས་གནས་གཅིག་གིས་ཁྱོན་ཡོངས་ལ་སྣེ་ཁྲིད་དང་། རྣམ་གྲངས་གནད་འཁེལ་འདེམས་པ། སྤུས་ཚད་འགན་ལེན་བཅས་བྱས་ནས་ལས་ཀར་གྲུབ་འབྲས་ཐོབ་པའི་འགན་ལེན་བྱེད་དགོས། ཡོང་འབབ་འཕར་སྣོན་གཙོ་བོར་འཛིན་རྒྱུ་མཐའ་འཁྱོངས་ཀྱིས་ཐོན་ལས་དང་། ལས་ཞུགས། སྲིད་ཇུས་བཅས་ལ་བརྟེན་ནས་ཡོང་འབབ་འཕར་བར་སྐུལ་འདེད་བཏང་སྟེ་མང་ཚོགས་ཕྱུག་པོ་ཆགས་པར་ཐབས་ལམ་ཡོད་པའི་འགན་ལེན་བྱེད་དགོས། ཕྱི་ནང་མཉམ་བཅོས་མཐའ་འཁྱོངས་ཀྱིས་རྨང་གཞི་བརྟན་དུ་གཏོང་བ་དང་། ཁོར་ཡུག་ལེགས་སུ་གཏོང་བ། བཅོས་སྐྱོང་བྱེད་ཤུགས་ཆེ་རུ་གཏོང་བ་བཅས་བྱས་ནས་སྡོད་མལ་ཡག་པོ་ཡོང་བའི་འགན་ལེན་བྱེད་དགོས་པའི་ནན་བཤད་གནང་བ་རེད། (པ་ཚེས་བསྒྱུར)