ཉེ་ཆར། རང་སྐྱོང་ལྗོངས་ཁྲོམ་ར་ལྟ་འདོམས་ཅུས(ཤེས་བྱའི་བདག་དབང་ཅུས)ཀྱིས《བོད་རང་སྐྱོང་ལྗོངས་ཀྱི་ཆེད་ལས་ཁྲོམ་རའི་ཤེས་བྱའི་བདག་དབང་སྲུང་སྐྱོང་ལས་ཀའི་མཛུབ་ཁྲིད》(གཤམ་དུ《མཛུབ་ཁྲིད》ཅེས་བསྡུ་རྒྱུ)ཡོངས་བསྒྲགས་བྱས་པ་དང་། དེའི་དམིགས་ཡུལ་ནི་ཆེད་ལས་ཁྲོམ་རའི་ཤེས་བྱའི་བདག་དབང་སྲུང་སྐྱོང་ལས་དོན་ལ་ཤུགས་སྣོན་བརྒྱབ་ནས། ཆེད་ལས་ཁྲོམ་རའི་ཤེས་བྱའི་བདག་དབང་སྲུང་སྐྱོང་གི་མཉམ་ཤུགས་ཆགས་པར་སྐུལ་འདེད་དང་། ཆེད་ལས་ཁྲོམ་རའི་ཤེས་བྱའི་བདག་དབང་སྲུང་སྐྱོང་གི་ཕུགས་ཕན་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བ། ཆེད་ལས་ཁྲོམ་རའི་ཁེ་བེད་བདག་ཐོབ་དང་། ཚོང་རྟགས། ས་ཁམས་མཚོན་རྟགས་སོགས་ཀྱི་ཤེས་བྱའི་བདག་དབང་ལ་གནོད་པའི་ཁྲིམས་འགལ་བྱེད་སྤྱོད་བཀག་འགོག་ནུས་ལྡན་བཅས་བྱས་ནས། དྲང་གཞག་འགྲན་རྩོད་ཀྱི་ཉོ་ཚོང་ཁོར་ཡུག་དང་བདེ་འཇགས་བློ་བདེའི་འཛད་སྤྱོད་ཁོར་ཡུག་ལེགས་སུ་གཏོང་ཆེད་རེད།

ཤེས་རྟོགས་བྱུང་བར་གཞིགས་ན། 《མཛུབ་ཁྲིད》ནང་གཙོ་བོ་གཤམ་གསལ་ཕྱོགས་བཞིའི་ནང་དོན་ཚུད་ཡོད་དེ། ཁྲིམས་སྒྱུར་མཉམ་འགུལ་རོགས་ལས་ལམ་སྲོལ་འཐུས་སྒོ་ཚང་དུ་གཏོང་བ་དང་། རྒྱུན་གཏན་གྱི་ལྟ་འདོམས་དང་ཁྲིམས་སྒྱུར་ལ་ཤུགས་སྣོན་རྒྱག་པ། ཆེད་ལས་ཁྲོམ་རའི་ཤེས་བྱའི་བདག་དབང་ལ་སྲུང་སྐྱོང་བྱེད་ཤུགས་ཆེ་རུ་གཏོང་བ། སྤྱི་ཕན་རང་བཞིན་གྱི་ཁེ་དབང་ལ་སྲུང་སྐྱོང་དང་རོགས་སྐྱོར་ཞབས་འདེགས་ཞུ་བ་བཅས་རེད།

ཆེད་ལས་ཁྲོམ་ར་གཉེར་མཁན་ཕྱོགས་ཀྱི་ཤེས་བྱའི་བདག་དབང་ལ་སྲུང་སྐྱོང་བྱེད་ནུས་ཆེ་རུ་གཏོང་དགོས་པ་དང་། དེའི་ནང་ཁྲོམ་རའི་ནང་གི་ཚོང་ཟོག་དང་གཉེར་སྐྱོང་མཁན་ཞུགས་འཐུས་འགག་སྒོ་ཡག་པོ་སྲུང་བ་དང་། རྒྱུན་གཏན་གྱི་ནང་ཁུལ་ཞིབ་བཤེར་ལམ་སྲོལ་འཛུགས་པ། ཤེས་བྱའི་བདག་དབང་གི་རྩོད་གཞི་ཐག་གཅོད་གང་མགྱོགས་བྱེད་པའི་ལམ་སྲོལ་འཛུགས་པ། ཁྲོམ་རའི་ནང་ཁུལ་གྱི་ཤེས་བྱའི་བདག་དབང་སྲུང་སྐྱོང་གི་ཆ་འཕྲིན་བསྡུ་རུབ་དང་ཡོངས་བསྒྲགས་ལམ་སྲོལ་འཛུགས་པ། ཤེས་བྱའི་བདག་དབང་གི་ཡིད་རྟོན་དང་བྱ་དགའ་དང་ཆད་གཅོད་ལམ་ལུགས་འཛུགས་པ། ཤེས་བྱའི་བདག་དབང་སྲུང་སྐྱོང་ལས་དོན་ས་ཚིགས་འཛུགས་པ། ཤེས་བྱའི་བདག་དབང་ལ་སྲུང་སྐྱོང་དང་དྲིལ་བསྒྲགས་ཀྱི་ལས་དོན་ཡག་པོ་སྒྲུབ་པ་བཅས་ཚུད་ཡོད།

ཆེད་ལས་ཁྲོམ་རའི་ཤེས་བྱའི་བདག་དབང་སྲུང་སྐྱོང་ལས་རིགས་ཀྱི་ཚོང་ཚོགས་མཐུན་ཚོགས་ཀྱི་ཞབས་ཞུའི་འདེགས་སྐྱོར་མ་ལག་འཐུས་སྒོ་ཚང་དུ་གཏོང་བར། ལས་རིགས་རང་གཅུན་ཚད་ལྡན་འཛུགས་སྐྱོང་བྱེད་ཤུགས་ཆེ་རུ་གཏོང་བ་དང་། བཅའ་ཁྲིམས་ཀྱི་བློ་འདྲི་དང་དྲིལ་བསྒྲགས་གསོ་སྦྱོང་སོགས་ཀྱི་ཞབས་འདེགས་ཞུ་བ། ཆེད་ལས་ཁྲོམ་རའི་ཤེས་བྱའི་བདག་དབང་གི་ཡིད་རྟོན་རིམ་པ་གཏན་འཁེལ་བྱེད་པ་སོགས་ཀྱི་ལས་དོན་ཚུད་ཡོད།

འཛད་སྤྱོད་པ་ཆེད་ལས་ཁྲོམ་རའི་ཤེས་བྱའི་བདག་དབང་སྲུང་སྐྱོང་གི་བྱ་སྤྱོད་ལ་ཞུགས་པར་སྐུལ་ལྕག་གཏོང་བར། འཛད་སྤྱོད་པའི་ཤེས་བྱའི་བདག་དབང་སྲུང་སྐྱོང་གི་འདུ་ཤེས་ཟབ་ཏུ་གཏོང་བ་དང་། འཛད་སྤྱོད་པའི་ཤེས་བྱའི་བདག་དབང་སྲུང་སྐྱོང་བྱེད་ནུས་ཆེ་རུ་གཏོང་བ། ཁྲོམ་རའི་ཁོངས་ཀྱི་ཤེས་བྱའི་བདག་དབང་ལ་གནོད་པའི་ཁྲིམས་འགལ་བྱེད་སྤྱོད་ཞུ་གཏུག་དང་ཐེར་འདོན་གོང་ཞུའི་ལས་ཀར་ཤུགས་སྣོན་རྒྱག་པ་བཅས་ཚུད་ཡོད།