2024ལོའི་ཀྲུང་གོའི་བོད་ལྗོངས་ཀྱི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་སྙེགས་འགྲན་བསྡུར་སྐབས་ལྔ་པའི་སྒྲིག་འཛུགས་ཨུ་ལྷན་གྱིས་ཚོགས་འདུ་འཚོགས་པ།
ཡན་ཅིན་ཧའེ་ཕེབས་ནས་གསུང་བཤད་གནང་བ།
ཚེས་11ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་ཀྲུའུ་ཞི། སྒྲིག་འཛུགས་ཨུ་ལྷན་གྱི་ཀྲུའུ་རེན་བཅས་ཡིན་པའི་ཡན་ཅིན་ཧའེ་ཡིས་2024ལོའི་ཀྲུང་གོའི་བོད་ལྗོངས་ཀྱི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་སྙེགས་འགྲན་བསྡུར་སྐབས་ལྔ་པའི་སྒྲིག་འཛུགས་ཨུ་ལྷན་གྱི་ཚོགས་འདུའི་ཐོག ལུས་རྩལ་རྒྱལ་ཁབ་སྟོབས་ཆེན་དང་བདེ་ཐང་ཀྲུང་གོ་འཛུགས་སྐྲུན་བྱ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་འཐབ་ཇུས་བཀོད་སྒྲིག་གལ་ཆེན་ལག་བསྟར་དོན་འཁྱོལ་གཏིང་ཟབ་བྱས་ཏེ། ལྗོངས་ཏང་ཨུད་ཀྱི་ལས་ཀའི་བླང་བྱ་གཞིར་བཟུང་། ཚད་མཐོའི་འགན་འཁུར་བའི་སྙིང་སྟོབས་དང་སྒམ་བརླིང་དངོས་སྒྲུབ་ཀྱི་རྣམ་འགྱུར་ལ་བརྟེན་ནས་རང་འགན་གཙང་སྒྲུབ་དང་མཉམ་ཤུགས་ཆགས་པར་བྱས་ཏེ། འཛམ་གླིང་ཡོངས་ཀྱི་མི་དམངས་ལ་བདེ་འཇགས་དང་བདེ་བླག་དང་། ཁྱད་ཆོས་མངོན་གསལ་དོད་པ། ལྟད་མོ་ཤིན་ཏུ་ཆེ་བ་བཅས་ཀྱི་ས་མཐོའི་ལུས་རྩལ་གྱི་འདུ་ཚོགས་རྩེར་སོན་ཞིག་གཉེར་དགོས་པའི་ནན་བཤད་གནང་བ་རེད།
དབང་ཧའེ་ཀྲོའུ་ཞུགས་པ་དང་ལྕགས་རྭ་བློ་བཟང་བསྟན་འཛིན་གྱིས་གཙོ་སྐྱོང་གནང་བ་རེད།
ཡན་ཅིན་ཧའེ་ཡིས་ནན་བཤད་གནང་དོན། ལུས་རྩལ་འགྲན་བསྡུར་གྱིས“འགྲན་ཚོགས་ཐེངས་གཅིག་ཡག་པོ་གཉེར་བ་དང་། འདུ་ཚོགས་ལ་མཉམ་དུ་ཞུགས་པ། གྲོང་ཁྱེར་གཅིག་ལ་བཀྲག་མདངས་སྣོན་པ། ས་ཆ་གཅིག་གི་མིང་བྱང་མངོན་གསལ་དོད་དུ་གཏོང་བ། ཕྱོགས་གཅིག་གི་འཕེལ་རྒྱས་ལ་སྐུལ་ཁྲིད་བྱེད་པ”བཅས་ཀྱི་ཕྱོགས་བསྡུས་ཕན་འབྲས་ཐོན་ཐུབ། ཚུགས་གནས་མཐོ་རུ་གཏོང་བ་དང་ངོ་མཚར་ཆེ་བའི་འགྲན་བསྡུར་གཉེར་ནས་ཆེད་ལས་ཅན་དང་། ཁྲོམ་ར་ཅན། རྒྱལ་སྤྱི་ཅན། ཚོང་རྟགས་ཅན་བཅས་ཀྱི་ངེས་གནས་མཐའ་འཁྱོངས་ཀྱིས“ཡག་ཐོག་ཡག་བརྩེགས”ཀྱི་རྒྱལ་ཁབ་ཆེན་པོའི་བཟོ་བོའི་སྙིང་སྟོབས་དང་ཁྱད་དུ་འཕགས་པའི་ལུས་རྩལ་རྩལ་འགྲན་གྱི་སྙིང་སྟོབས་ལ་བརྟེན་ནས་སྐབས་འདིའི་འགྲན་བསྡུར་གྱི་སྤུས་ཚད་དེ་བས་ལེགས་པ་དང་། ཤུགས་རྐྱེན་དེ་བས་ཆེ་བ། ཆུ་ཚད་དེ་བས་མཐོ་བ་བཅས་ཡོང་བར་འབད་བརྩོན་བྱེད་དགོས་པ་མ་ཟད། “འགྲན་བསྡུར་སྐར་ཁུང”ལ་བརྟེན་ནས“བོད་ཀྱི་གཏམ་རྒྱུད”ཡག་པོ་ཤོད་དགོས། ལས་སྟེགས་སྟོབས་ཆེར་གཏོང་བ་དང་མཉམ་འདྲེས་འགྲན་བསྡུར་གཉེར་ནས། “འགྲན་བསྡུར་དང་འཛད་སྤྱོད་ཟུང་དུ་འབྲེལ་བར”དམིགས་པ་དང་། ལུས་རྩལ་གྱི་ལས་སྟེགས་སྐྲུན་པ་དང་སྲིད་ཇུས་ལ་བརྟེན་ནས་འགྲན་བསྡུར་ལ་རོགས་སྐྱོར་བྱེད་པ། འགྲན་བསྡུར་ཞབས་ཞུའི་འགན་ལེན་དང་འཛད་སྤྱོད་དགོས་མཁོར་དམིགས་པ། འགྲན་བསྡུར་གྱི་སྔ་རྗེས་དང་འགྲན་བསྡུར་བྱེད་རིང་འཛད་སྤྱོད་ལ་སྐུལ་འདེད་གཏོང་བའི་ཆེད་དོན་སྲིད་ཇུས་ལ་ཞིབ་འཇུག་བཅས་བྱས་ནས་འགྲན་བསྡུར་གྱི“རྒྱུག་ཚད”དེ་འཛད་སྤྱོད་ཀྱི“ནུས་ཚད”ལ་ཧུར་ཐག་བསྒྱུར་བ་བྱེད་དགོས། “འགྲན་བསྡུར་དང་རིག་གནས་ཡུལ་སྐོར་ཟུང་དུ་འབྲེལ་བར”དམིགས་ཏེ། ལུས་རྩལ་གྱི་ལས་སྟེགས་སྐྲུན་པ་དང་རིག་གནས་ཡུལ་སྐོར་མཉམ་དུ་སྤེལ་བ། མང་ཚོགས་ཀྱིས་སྤྲོ་གསེང་རྐང་འཁོར་བཞོན་པ་དང་། “འགྲན་བསྡུར་དང་མཉམ་དུ་བོད་ལ་ཡུལ་སྐོར་བྱེད་པ”“མཛེས་ལྗོངས་ཁུལ་དུ་འགྲན་བསྡུར་བྱེད་པ”སོགས་སྣ་མང་ཅན་གྱི་རིག་གནས་ཡུལ་སྐོར་བྱེད་སྒོ་ཁག་གཅིག་ཇུས་འགོད་བྱས་ནས་བཟོ་བ། མང་ཚོགས་ལ་ཁྱད་ཆོས་ལྡན་པའི་དམངས་སྲོལ་གནས་ཚང་དང་བཟའ་བཏུང་སོགས་འགྲན་བསྡུར་དང་ཡུལ་སྐོར་ཞབས་ཞུའི་ནང་ཞུགས་པར་ཁྲིད་སྟོན་གྱིས“ཆུང་ཞིང་ལེགས་པའི”གསར་དར་ལས་རྣམ་ཁག་གཅིག་བཏོད་ནས་དམངས་ཕྱུག་འབབ་འཕར་ལ་སྐུལ་ཁྲིད་དེ་བས་ལེགས་པ་བྱེད་དགོས། ཉེན་ཁ་སྔོན་འགོག་ནན་པོ་བྱེད་པ་དང་བདེ་འཇགས་ལྡན་པའི་སྒོ་ནས་འགྲན་བསྡུར་གཉེར་ཏེ། འགྲན་རའི་བདེ་འཇགས་ལ་དམིགས་ནས་འགྲན་རའི་འགྲིམ་འགྲུལ་དང་། འཕྲིན་གཏོང་། གློག་ཤུགས། གནམ་གཤིས། སྨན་བཅོས་སོགས་ཕྱོགས་གང་ཅིའི་ཐད་ཀྱི་གྲ་སྒྲིག་ཡག་པོ་བྱས་ནས་འཕྱུག་པ་གཏན་ནས་མེད་པའི་འགན་ལེན་བྱེད་དགོས། སྤྱོད་ཚུལ་དང་སྒྲིག་ལམ་གྱི་བདེ་འཇགས་ལ་དམིགས་ཏེ། འགྲན་བསྡུར་གྱི་སྤྱོད་ཚུལ་དང་སྒྲིག་ལམ་གྱི་སློབ་གསོར་ཤུགས་སྣོན་བརྒྱབ་ནས་ཤེས་དཔལ་ལྡན་པའི་འགྲན་བསྡུར་དང་སྤྱོད་གཙང་གི་འགྲན་བསྡུར་ཞིག་གཉེར་རྒྱུའི་འགན་ལེན་བྱེད་དགོས། མི་ལུས་བདེ་འཇགས་ལ་དམིགས་ཏེ། རིགས་དབྱེ་ཇུས་འདོན་གྱིས་སྨན་བཅོས་འགན་ལེན་གྱི་ཞབས་འདེགས་ཡག་པོ་ཞུས་ནས་ལུས་རྩལ་པའི་གཟུགས་པོ་བདེ་ཐང་དང་ཚེ་སྲོག་བདེ་འཇགས་ལ་འགན་ལེན་བྱེད་དགོས། འགན་འཁྲི་ནན་དུ་གཏོང་བ་དང་འགྲན་བསྡུར་ཞིབ་ཚགས་གཉེར་ཏེ། ལས་འགན་གྱི་གསལ་ཐོ་ཞིབ་ཚགས་སུ་གཏོང་བ་དང་མཉམ་ཤུགས་ཆགས་པར་བྱས་ནས་དོན་དག་ཚང་མར་ལྟ་རྟོག་བྱེད་མཁན་ཡོད་པ་དང་། དམ་འཛིན་བྱེད་མཁན་ཡོད་པ། དོ་དམ་བྱེད་མཁན་ཡོད་པ། འགན་འཁུར་མཁན་ཡོད་པ་བཅས་འགན་ལེན་བྱས་ཏེ་འགྲན་བསྡུར་དུས་བཀག་ལྟར་བདེ་བླག་ངང་གཉེར་ཐུབ་པའི་འགན་ལེན་བྱེད་དགོས།