ལིའུ་ཅང་གིས་ལྷ་ས་གྲོང་ཁྱེར་གྱི་གཞི་རིམ་སྤྱི་ཚོགས་བཅོས་སྐྱོང་ལས་དོན་ལ་བརྟག་ཞིབ་གནང་བ།
ཚེས་10ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གིས“མི་བྱེད་པ་བཞི་དང་ཐད་སྐྱོད་གཉིས”ཀྱི་བྱ་ཐབས་ལ་བརྟེན་ནས་ལྷ་ས་གྲོང་ཁྱེར་གྱི་ཁྲོམ་གཞུང་དང་སྡེ་ཁུལ་དུ་ཕེབས་ཏེ། ས་གནས་ས་ཐོག་ཏུ་གཞི་རིམ་སྤྱི་ཚོགས་བཅོས་སྐྱོང་གི་ལས་དོན་བསྒྲུབས་ཚུལ་ལ་བརྟག་ཞིབ་གནང་ཞིང་། ཁོང་གིས་གཞི་རིམ་བཅོས་སྐྱོང་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་ཕྱོགས་རྒྱུན་འཁྱོངས་ཀྱིས་ལྷག་བསམ་རྣམ་དག་དང་བརྩེ་བ་ཟབ་མོས་གཞི་རིམ་གྱི་ལས་དོན་ཏན་ཏིག་དང་ཞིབ་ཚགས་ངང་བསྒྲུབས་ནས་མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟམ་མི་ཆད་པར་ཆེ་རུ་གཏོང་དགོས་པའི་ནན་བཤད་གནང་བ་རེད།
“ད་ཆ་མི་སྣ་བཀོད་སྒྲིག་བྱས་ཚུལ་གང་འདྲ་ཡོད་དམ” “ལས་དོན་གང་འདྲ་བསྒྲུབས་ཡོད་དམ”ཞེས་སྣེའུ་ཁུལ་གསར་ར་མ་སྒང་ཁྲོམ་གཞུང་གྲུ་ཁ་གྲོང་མི་ཨུ་ལྷན་དུ་ཕེབས་སྐབས་ལིའུ་ཅང་གིས་ལས་དོན་པར་ངོ་ཐུག་གདོང་འཕྲད་ཀྱིས་སྤེལ་རེས་གནང་ཞིང་། ཁོང་གིས་སྡེ་ཁུལ་གྱིས་མང་ཚོགས་ལ་ཞབས་འདེགས་ཞུ་བ་དང་གཞི་རིམ་བཅོས་སྐྱོང་ལ་སྐུལ་འདེད་གཏོང་བ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། ལས་དོན་ཁྲོད་གནས་པའི་དཀའ་ངལ་དང་མི་འདང་བའི་ཆར་ས་གནས་ས་ཐོག་ཏུ་གཞུང་ལས་གནང་སྟེ་ཐག་གཅོད་བྱ་ཐབས་ལ་ཞིབ་འཇུག་ཀྱང་གནང་བ་རེད།
ལིའུ་ཅང་གིས་གཞི་རིམ་ནི་རྒྱལ་ཁབ་བཅོས་སྐྱོང་བྱ་ཡུལ་མཇུག་ཤོས་དེ་ཡིན་ལ། མང་ཚོགས་ལ་ཞབས་འདེགས་ཞུ་བའི་གཡུལ་ས་མདུན་མ་དེའང་ཡིན། མི་དམངས་གོང་དུ་བཀུར་རྒྱུ་མཐའ་འཁྱོངས་བྱས་ནས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་ཕྱོགས་ལག་ལེན་གཏིང་ཟབ་བསྟར་ཏེ། མི་དམངས་ལ་ཞབས་འདེགས་ཞུ་སྟངས་རྒྱུན་མཐུད་ལེགས་སུ་བཏང་ནས་མང་ཚོགས་ཀྱི་བདེ་སྡུག་མང་ཙམ་གླེང་བ་དང་། མང་ཚོགས་ཀྱི་ཁྱིམ་དུ་མང་ཙམ་བསྐྱོད་དེ་མང་ཚོགས་ཀྱི་ཐོན་སྐྱེད་དང་འཚོ་བའི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་ཡག་པོ་བྱེད་པར་ཤུགས་བརྒྱབ་སྟེ། དམངས་འཚོར་ཕན་འདོགས་པ་དང་། དམངས་སེམས་ལ་དྲོ་སྐྱིད་སྦྱིན་པ། དམངས་ཀྱི་འདོད་ཚུལ་དང་མཐུན་པའི་ཉེ་འགྲམ་གྱི་བྱ་བ་དང་ཞིབ་ཕྲའི་བྱ་བ་ཡག་པོ་བསྒྲུབས་ཏེ་ཞི་མཐུན་གྱི་གཞི་རྒྱུ་མང་དུ་གཏོང་གང་ཐུབ་བྱེད་དགོས་པ་དང་། ཏང་འཛུགས་སྐྱོང་གིས་སྣེ་འཁྲིད་རྒྱུ་མཐའ་འཁྱོངས་བྱས་ནས་གཞི་རིམ་ཏང་རྩ་འཛུགས་ཀྱི་ནུས་པ་གང་ལེགས་འདོན་པ་དང་གཞི་རིམ་གྱི་སྤྱི་ཚོགས་བཅོས་སྐྱོང་ནུས་པ་བསྡུ་སྒྲིལ་དང་། དྲ་མིག་པ་དང་དུད་སྦྲེལ་སྤྱི་མིའི་དཔུང་ཁག་དྲག་འདེམས་ཧྲག་སྒྲུག་བྱས་ཏེ་དྲ་མིག་དོ་དམ་གནད་འཁེལ་ཅན་དང་ཞིབ་ཚགས་ཅན་གྱི་ཆུ་ཚད་ཟམ་མི་ཆད་པར་ཆེ་རུ་བཏང་ནས་མཉམ་སྐྲུན་དང་། མཉམ་བཅོས། མཉམ་སྤྱོད་བཅས་ཀྱི་སྤྱི་ཚོགས་བཅོས་སྐྱོང་གི་རྣམ་པ་བཟང་པོ་ཞིག་ཧུར་ཐག་གཏོད་དགོས། སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་མཐའ་འཁྱོངས་བྱས་ཏེ་ལས་ཀའི་འགན་འཁྲི་སྔར་བས་ནན་དུ་གཏོང་བ་དང་ལས་ཀའི་བྱ་ཐབས་གསར་གཏོད་བྱས་ཏེ་རྟག་ཏུ་ཟུར་བལྟས་ལེབ་མཐོང་ཐུབ་པ་བྱས་ནས་གནད་དོན་གཅིག་ཐག་གཅོད་བྱེད་རིམ་བཞིན་གནད་དོན་དེ་རིགས་ཚང་མ་ཐག་གཅོད་ཡོང་བར་སྐུལ་འདེད་གཏོང་བ་བརྒྱུད་གཞི་རིམ་བཅོས་སྐྱོང་གི་ཆུ་ཚད་ཕྱོགས་ཡོངས་ནས་མཐོ་རུ་བཏང་སྟེ་སྤྱི་ཚོགས་ཞི་མཐུན་བརྟན་ལྷིང་ཡོང་བའི་རྨང་གཞི་ཟམ་མི་ཆད་པར་བརྟན་དུ་གཏོང་དགོས་པའི་ནན་བཤད་གནང་བ་རེད།