ཟླ་7ཚེས་4ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ཉིང་ཁྲི་ཀླུ་ནང་དུ་གདན་ཞུས་ལྟར་ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་བཞི་པར་ཞུགས་མཁན་ནེ་པ་ལའི་གྲོས་ཁང་འོག་མའི་གྲོས་དཔོན་གཞོན་པ་དབྱིན་ཏི་ལ·ལ་ནཱ་བཅས་པ་དང་མཇལ་འཛོམས་གནང་བ་རེད།

ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་། སྲིད་གཞུང་། ཧྲུའུ་ཅི་ཝང་ཅུན་ཀྲེང་། ཀྲུའུ་ཞི་ཡན་ཅིན་ཧའེ་བཅས་ཀྱི་ཚབ་ཞུས་ནས་འཐུས་མི་ཚོགས་པ་དང་བཅས་པ་གདན་ཞུས་ལྟར་ཀྲུང་གོའི་བོད་ལྗོངས་སུ་འཚམས་འདྲིར་ཕེབས་པ་དང་ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་བཞི་པར་ཞུགས་པར་དགའ་བསུ་ཞུས་པ་དང་ཐུགས་རྗེ་ཆེའང་ཞུས་པ་རེད། ཁོང་གིས་ཀྲུང་གོ་དང་ནེ་པ་ལ་ནི་རི་ཆུ་འབྲེལ་བའི་ཁྱིམ་མཚེས་ཡག་པོ་དང་། ཕན་ཚུན་ལྟ་སྐྱོང་གི་གྲོགས་པོ་ཡག་པོ། ཐུན་མོང་ཐོག་འཕེལ་རྒྱས་དོན་གཉེར་བྱེད་པའི་རོགས་ཟླ་ཡག་པོ་བཅས་རེད། དུས་ཡུན་རིང་པོའི་ནང་། ཀྲུང་གོ་དང་ནེ་པ་ལའི་འབྲེལ་བ་ཐོག་མཐའ་བར་གསུམ་དུ་སྐྱོན་བྲལ་དང་བརྟན་པོའི་ངང་འཕེལ་རྒྱས་རྒྱུན་འཁྱོངས་ཐུབ་ནས་རྒྱལ་ཁབ་ཆེ་ཆུང་མི་འདྲ་བའི་དབར་འདྲ་མཉམ་གྱི་ལྟ་སྟངས་འཛིན་པ་དང་མཉམ་ལས་གཉིས་ཕན་གྱི་དཔེ་མཚོན་བཏོད་ཡོད་ཅེས་གསུངས་པ་རེད།

ཉེ་བའི་ལོ་ཤས་རིང་། བོད་རང་སྐྱོང་ལྗོངས་ཀྱིས་ཞི་ཅིན་ཕིང་གི་ཕྱི་འབྲེལ་གྱི་དགོངས་པ་ཕྱོགས་ཡོངས་ནས་ལག་བསྟར་དང་། ཕྱོགས་གཉིས་པོའི་དངོས་སྒྲུབ་སྤེལ་རེས་མཉམ་ལས་ལ་སྐུལ་འདེད་ཧུར་ཐག་གཏོང་བ། སྒོ་མོ་འབྱེད་རྒྱ་ཆེ་རུ་ནུས་ལྡན་གཏོང་བ། སྐྱིད་གྲོང་དང་། སྤུ་ཧྲེང་། འགྲམ། ལེགས་རྩེ་བཅས་ཀྱི་འགག་སྒོ་ནས་ཁྱོན་ཡོངས་ནས་འགྲུལ་ཟོག་ཤར་གཏོང་ཐུབ་པ། སྲོལ་རྒྱུན་གྱི་མཐའ་མཚམས་ཚོང་དོན་ས་ཚིགས་14སྒོ་དབྱེ་སླར་གསོ་ཐུབ་པ། ཕྱོགས་གཉིས་པོའི་མི་སྣ་འགྲོ་འོང་ཉིན་བཞིན་མང་དུ་ཕྱིན་པ་དང་མཐའ་མཚམས་ཚོང་དོན་འཕེལ་རྒྱས་མགྱོགས་པོ་ཕྱིན་པ་བཅས་བྱུང་ཡོད།

དེ་དང་ཆབས་ཅིག་བོད་ཀྱིས་ནེ་པ་ལར་རྨང་གཞིའི་སྒྲིག་བཀོད་འཛུགས་སྐྲུན་དང་། དམངས་འཚོ་ལེགས་གཏོང་། ཐོན་ལས་འཕེལ་རྒྱས་སོགས་ཐད་ནུས་པས་ལྕོགས་ཚོད་ཀྱིས་རྒྱབ་སྐྱོར་དང་རོགས་རམ་བྱེད་ཀྱི་ཡོད་ཅེས་གསུངས་པ་རེད།

དབྱིན་ཏི་ལ·ལ་ནཱ་ཡིས། ནེ་པ་ལ་ཕྱོགས་ཀྱིས་ཀྲུང་གོ་དང་དེ་བཞིན་བོད་རང་སྐྱོང་ལྗོངས་དབར་གྱི་སྤེལ་རེས་མཉམ་ལས་ལ་ཚད་མཐོའི་མཐོང་ཆེན་བྱེད་ཀྱི་ཡོད། བོད་དུ་ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་བཞི་པར་ཞུགས་རྒྱུ་བྱུང་བར་ཧ་ཅང་དགའ་པོ་བྱུང་། གླེང་སྟེགས་བདེ་བླག་ངང་གཉེར་བར་རྟེན་འབྲེལ་ཞུ་གི་ཡིན་ཞེས་གསུངས་པ་རེད། ཁོང་གིས། ད་ཐེངས་བོད་དུ་ཡོང་ནས་བོད་ཀྱི་དཔལ་འབྱོར་འཕེལ་རྒྱས་དང་དམངས་འཚོ་ལེགས་སུ་ཕྱིན་པ་དང་། ལྷག་པར་དུ་སྐྱེ་ཁམས་ཁོར་ཡུག་སྲུང་སྐྱོང་སོགས་ཀྱི་ཐད་ཐོབ་པའི་གྲུབ་འབྲས་མངོན་གསལ་དོད་པོ་དངོས་སུ་ཚོར་བྱུང་། ཀྲུང་གོའི་རྒྱལ་སྲིད་སྐྱོང་ལུགས་སྐོར་གྱི་ཉམས་མྱོང་མང་པོ་ཞིག་ནེ་པ་ལ་ཕྱོགས་ཀྱིས་སློབ་སྦྱོང་དང་དཔྱད་གཞིར་འཛིན་འོས་པ་ཞིག་འདུག ད་ཐེངས་ཀྱི་འཚམས་འདྲི་དེ་གོ་སྐབས་སུ་བྱེད་པ་དང་སྤེལ་རེས་མཉམ་ལས་སྔར་བས་གཏིང་ཟབ་ཏུ་བཏང་ནས་ཐུན་མོང་འཕེལ་རྒྱས་ལ་སྐུལ་འདེད་གཏོང་རྒྱུའི་རེ་བ་ཡོད་ཅེས་གསུངས་པ་རེད།