དབང་ཧའེ་ཀྲོའུ་ཡིས་མངའ་རིས་ས་ཁུལ་གྱི་དྲིལ་བསྒྲཌ་དང་བསམ་བློ་རིག་གནས་ལས་དོན་སྤེལ་ཚུལ་ལ་བརྟག་ཞིབ་གནང་བ།
ཉེ་ཆར“གླུ་ཞིག་བླངས་ནས་ཏང་ལ་ཕུལ”ཞེས་པའི་བོད་རང་སྐྱོང་ལྗོངས་ཀྱི་2024ལོའི“བདུན་གཅིག”གླུ་གཞས་འགྲན་བསྡུར་མངའ་རིས་ས་ཁུལ་དུ་གཟབ་རྒྱས་ངང་གཉེར་བ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་བྱེད་སྒོར་ཞུགས་པ་དང་འབྲེལ་བྱ་དགའ་ཐོབ་མཁན་ལ་བྱ་དགའ་གནང་བ་མ་ཟད། དེའི་རིང་མངའ་རིས་ས་ཁུལ་གྱི་དྲིལ་བསྒྲགས་དང་བསམ་བློ་རིག་གནས་ལས་དོན་སྤེལ་ཚུལ་ལ་བརྟག་ཞིབ་གནང་བ་རེད།
དབང་ཧའེ་ཀྲོའུ་དང་བཅས་པས་སྔ་རྗེས་སུ་མངའ་རིས་ཡན་ལག་ལས་དོན་ཨུ་ལྷན་གྱི་གནས་རྙིང་དྲན་གསོ་ཁང་དང་། ས་ཁུལ་རྟེན་མཛོད་ཁང་། སྒར་རྫོང་སེང་གེ་ཁ་འབབ་གྲོང་རྡལ་སེང་གེ་ཁ་འབབ་གྲོང་མི་ཨུ་ལྷན་གྱི་དུས་རབས་གསར་པའི་ཤེས་དཔལ་ལག་ལེན་ས་ཚིགས། ཞང་ཞུང་སྒྱུ་རྩལ་ཚོགས་པ་སོགས་སུ་བརྟག་ཞིབ་གནང་བ་རེད། ཁོང་གིས་གསར་བརྗེའི་ཐོན་ཁུངས་ཡག་པོ་སྤྱོད་པ་དང་གསར་བརྗེའི་སྙིང་སྟོབས་རྒྱུན་འཛིན་བྱེད་པ་དང་། གསར་བརྗེའི་གནའ་ཤུལ་དང་རྗེས་ཤུལ་ལ་སྲུང་སྐྱོང་ཡག་པོ་བྱེད་པ། ལོ་རྒྱུས་ཀྱི་དཔྱད་གཞིའི་ཡིག་རིགས་ལ་ཞིབ་འཇུག་བྱེད་ཤུགས་ཆེ་རུ་གཏོང་བ་བཅས་བྱས་ནས། ལོ་རྒྱུས་ཀྱི་དོན་དངོས་ཞིབ་གླེང་གནད་སྨིན་ཡོང་བའི་འགན་ལེན་བྱས་ཏེ་རྒྱལ་གཅེས་རིང་ལུགས་ཀྱི་ས་བོན་མང་ཚོགས་ཀྱི་སེམས་སུ་གཏིང་ཟབ་ཟུག་པར་བྱེད་དགོས་ཞེས་གསུངས་པ་རེད།
མངའ་རིས་ས་ཁུལ་གྱི་དྲིལ་བསྒྲགས་དང་བསམ་བློ་རིག་གནས་ཁོངས་གཏོགས་དང་བཞུཌ་མོལ་གནང་སྐབས། དབང་ཧའེ་ཀྲོའུ་ཡིས་རིག་གནས་ཀྱི་ལས་འགན་གསར་པ་ཏན་ཏིག་འཁུར་ཏེ་ཐོན་ཁུངས་ཀྱི་ལེགས་ཆ་འབུར་དུ་ཐོན་པ་དང་ཚན་རིག་དང་མཐུན་པའི་ཇུས་འགོད་བྱེད་པ་དང་། རིག་གནས་བྱ་གཞག་དང་རིག་གནས་ཐོན་ལས་དར་རྒྱས་གོང་འཕེལ་གཏོང་བ། རིག་གནས་དང་ཡུལ་སྐོར་གྱི་གསར་གཏོད་གསོན་ཤུགས་འཕེལ་བ་བཅས་བྱས་ནས་རིག་གནས་སྟོབས་ལྡན་ཁུལ་འཛུགས་སྐྲུན་ལ་སྐུལ་འདེད་གཏོང་བའི་ཐད་གོམ་སྟབས་བརྟན་པོ་སྤོ་དགོས། ཏང་གི་སྒྲིག་ཁྲིམས་སློབ་སྦྱོང་སློབ་གསོ་རྒྱུན་མཐུད་གཏིང་ཟབ་སྤེལ་བ་དང་ཏང་གི་དྲིལ་བསྒྲགས་ལས་དོན་གྱི་སྒྲིག་ཁྲིམས་ལག་བསྟར་ནན་པོ་བྱས་ཏེ། དྲིལ་བསྒྲགས་ལས་དོན་གྱི་ཆབ་སྲིད་ཀྱི་འགག་སྒོ་དང་། སྟོན་ཕྱོགས་ཀྱི་འགག་སྒོ། ཞིབ་དཔྱད་ཀྱི་འགག་སྒོ། སྤུས་ཚད་ཀྱི་འགག་སྒོ་བཅས་ཡག་པོ་བསྲུངས་ནས་འདུ་ཤེས་འཛིན་སྟངས་ཁྱབ་ཁོངས་རྦད་དེ་བདེ་འཇགས་ཡོང་བའི་འགན་ལེན་ཏན་ཏིག་བྱེད་དགོས་ཞེས་ནན་བཤད་གནང་བ་རེད།