ཡན་ཅིན་ཧའེ་ཡིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་བ།
ཚེས་26ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འབྲུབ་འགོག་ཐན་འགོག་ལས་དོན་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་དང་འབྲེལ་འབྲུབ་འགོག་ཐན་འགོག་ལས་དོན་བཀོད་སྒྲིག་གནང་བ་དང་། བཟོ་ལས་ཅན་གསར་པ་དང་རིག་གནས་དང་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་སོགས་ཀྱི་ལས་དོན་ལ་ཞིབ་འཇུག་གནང་བ་རེད།
ཚོགས་འདུའི་ཐོག་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ཏེ་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་གཞིར་བཟུང་། འབྲུབ་ཆུ་ཆེན་པོ་སྔོན་འགོག་དང་། ཉེན་ཁ་ཆེན་པོ་མྱུར་སེལ། གནོད་འཚེ་ཆེན་པོ་འགོག་པ་བཅས་ལ་གཞི་ཚུགས་ནས་མངའ་ཁོངས་སྲུང་བའི་འགན་འཁྲི་ཡོད་པ་དང་། མངའ་ཁོངས་སྲུང་བའི་འགན་འཁྲི་འཁུར་བ། མངའ་ཁོངས་སྲུང་བའི་འགན་འཁྲི་གཙང་སྒྲུབ་བཅས་མཐའ་འཁྱོངས་བྱས་ནས་འབྲུབ་འགོག་ཐན་འགོག་གི་ལས་དོན་ཁག་ནུས་ཤུགས་ཡོད་རྒུས་ཡག་པོ་སྒྲུབ་དགོས།
ཚོགས་འདུའི་ཐོག་བསྟན་དོན། བཟོ་ལས་ཅན་གསར་པར་རང་འགུལ་ངང་ཇུས་འགོད་དང་སྐུལ་འདེད་བཏང་ནས་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་རྒྱུན་ཆད་མེད་པར་འགུལ་ནུས་གསར་པ་སྐྱེད་སྲིང་དང་སྒུལ་ཤུགས་གསར་པ་སྣོན་དགོས། གོ་སྐབས་ལ་དམ་འཛིན་གྱིས་རྒྱལ་ཁབ་ཀྱི་ལས་གྲྭ་གལ་ཆེན་འགན་སྲུང་ལ་ཞབས་འདེགས་ཞུ་བའི་ལོ་རྒྱུས་ཀྱི་གོ་སྐབས་གལ་ཆེན་ལ་གཞི་ཚུགས་ནས་ཆུ་གློག་སོགས་ནུས་རྒྱུ་གཙང་མའི་སྒྲིག་ཆས་བཟོ་སྐྲུན་ལས་རིགས་དང་། ས་མཐོའི་ལྗང་མདོག་ཆིང་དབྱང་ཐོན་ལས། ས་མཐོའི་ལྗང་མདོག་འཛུགས་སྐྲུན་རྒྱུ་ཆའི་ལས་རིགས་སོགས་ཀྱི་ལས་རྣམ་གསར་པ་དམིགས་སུ་བཀར་ནས་འཕེལ་རྒྱས་ཤུགས་ཆེན་གཏོང་དགོས། ཡུལ་བབ་དང་བསྟུན་ནས་དམིགས་བསལ་གྱི་ལྗོངས་བབ་དང་ཁྱད་ལྡན་ཐོན་ཁུངས་ལ་དམ་པོར་དམིགས་ཏེ་དགེ་མཚན་ཆེ་རིགས་དང་རྗེས་ཐོན་གྱི་ཁྱད་ཡོན་གང་ལེགས་བཏོན་ཏེ་ས་མཐོའི་སྤྱི་སྤྱོད་མཁའ་འགྲུལ་སྒྲིག་ཆས་དང་། ས་མཐོའི་ཐབ་ཆས་སོགས་ཁྱད་ལྡན་ཡང་བའི་བཟོ་ལས། ས་མཐོའི་སྐྱེ་དངོས་ལག་རྩལ། ས་མཐོའི་ཁྱད་ལྡན་གསོ་རིག་སྨན་རྫས་སོགས་གཙོ་གནད་ཐོན་ལས་འཕེལ་རྒྱས་ཤུགས་ཆེན་གཏོང་དགོས། སྐུལ་འདེད་མགྱོགས་མྱུར་བཏང་ནས་སྐྱེ་ཁམས་བདེ་འཇགས་དང་ཐོན་སྐྱེད་བདེ་འཇགས་སོགས་ཀྱི་མཐའ་ཚད་ཡག་པོ་སྲུང་བའི་སྔོན་འགྲོའི་ཆ་རྐྱེན་འོག་སྲིད་ཇུས་དང་། མ་དངུལ། རྣམ་གྲངས་སོགས་ཀྱི་འདེགས་སྐྱོར་བྱེད་ཤུགས་ཕྱོགས་ཡོངས་ནས་ཆེ་རུ་བཏང་སྟེ་ལས་ཀར་དམ་འཛིན་བྱེད་གཞི་དང་གཞི་རྟེན་ཡོད་པ་དང་དོན་འཁྱོལ་ལ་ཕན་འབྲས་ཐོན་པར་བྱས་ནས་ས་མཐོའི་ཁྱད་ཆོས་དང་བོད་ཀྱི་ཁྱད་ཆོས་ལྡན་པའི་བཟོ་ལས་ཅན་གསར་པའི་ལམ་བུ་གསར་པར་གང་མགྱོགས་སྐྱོད་དགོས།
ཚོགས་འདུའི་ཐོག་བསྟན་དོན། རིག་གནས་དང་ཡུལ་སྐོར་ལས་རིགས་ནི་གསར་དར་གྱི་འཐབ་ཇུས་རང་བཞིན་གྱི་ཀ་རྟེན་ཐོན་ལས་ཤིག་ཡིན་ལ། དུས་རབས་ཀྱི་ཁྱད་ཆོས་མངོན་གསལ་དོད་པའི་དམངས་འཚོའི་ཐོན་ལས་དང་བདེ་སྐྱིད་ཀྱི་ཐོན་ལས་ཤིག་ཀྱང་རེད། ཚུགས་གནས་མཐོ་རུ་བཏང་སྟེ་རིག་གནས་ཡུལ་སྐོར་འཕེལ་རྒྱས་གཏོང་བ་ནི་ཆབ་སྲིད་ཀྱི་ལས་དོན་དང་། དཔལ་འབྱོར་གྱི་ལས་དོན། སྤྱི་ཚོགས་ཀྱི་ལས་དོན། དམངས་འཚོའི་ལས་དོན་བཅས་ཀྱི་རྩོད་སྒྲུབ་གཅིག་གྱུར་ཡིན་པ་ཁོང་དུ་གཏིང་ཟབ་ཆུད་པ་དང་། རིག་གནས་ཡུལ་སྐོར་ཐོན་ལས་ཀྱིས་འགྲོ་འོང་སྤེལ་རེས་དང་མཉམ་འདྲེས་ལ་སྐུལ་འདེད་གཏོང་བ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ནུས་པ་གལ་ཆེན་ཁོང་དུ་གཏིང་ཟབ་ཆུད་པ། བོད་སྐྱོང་དང་། བོད་བརྟན། བོད་དར། བོད་ཕྱུག་བཅས་ཀྱི་རིག་གནས་ཡུལ་སྐོར་ཐོན་ལས་ཀྱི་འཐབ་ཇུས་ཀྱི་གནས་བབ་གལ་ཆེན་ཁོང་དུ་གཏིང་ཟབ་ཆུད་པ་བཅས་བྱས་ཏེ། ཆབ་སྲིད་ཀྱི་འགན་འཁྲི་འཁུར་སེམས་དང་ལོ་རྒྱུས་ཀྱི་ལས་འགན་སྒྲུབ་སེམས་ཆེན་པོར་བརྟེན་ནས་རིག་གནས་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས། མཉམ་ཤུགས་གཅིག་སྒྲིལ་གྱིས་མཐོང་ཐུབ་པ་དང་། རེག་ཐུབ་པ། རིམ་པ་མཐོ་བ་བཅས་ཀྱི་ཡུལ་སྐོར་སྤུས་རྟགས་སྤྱད་དེ་རིག་གནས་ཡུལ་སྐོར་ཐོན་ལས་རིམ་སྤོར་ལ་ཕྱོགས་ཡོངས་ནས་སྐུལ་འདེད་གཏོང་དགོས།
ཚོགས་འདུའི་ཐོག་བསྟན་དོན། བྱེ་འགོག་བྱེ་བཅོས་ལས་དོན་གྱི་ཡུན་རིང་རང་བཞིན་དང་། དཀའ་ཚེགས་རང་བཞིན། ཡང་བསྐྱར་རང་བཞིན། གཏན་འཁེལ་མེད་པའི་རང་བཞིན་བཅས་ལ་ངོས་འཛིན་གང་ལེགས་བྱས་ཏེ། བརྒྱུད་རིམ་གྱི་ལྟ་བ་དང་། ཚན་རིག་དང་མཐུན་པའི་རིགས་དབྱེ་སྐུལ་འདེད། ལས་ཀའི་ལམ་སྲོལ་ལ་ཤུགས་སྣོན་བཅས་མཐའ་འཁྱོངས་བྱས་ནས་མཐའ་གཅིག་ཏུ་བྱེ་བཅོས་དང་། རང་འགུལ་ངང་བྱེ་བཅོས། ཚན་རིག་དང་མཐུན་པའི་བྱེ་བཅོས། ནུས་ལྡན་བྱེ་བཅོས་བཅས་བྱེད་དགོས།