རང་སྐྱོང་ལྗོངས་སྲིད་གཞུང་གིས་ཆེད་དོན་ཚོགས་འདུ་འཚོགས་པ།
ཡན་ཅིན་ཧའེ་ཕེབས་ནས་གསུང་བཤད་གནང་བ།
ཚེས་14ཉིན། རང་སྐྱོང་ལྗོངས་སྲིད་གཞུང་གིས་ཆེད་དོན་ཚོགས་འདུ་འཚོགས་ཏེ་བསྡོམས་རྩིས་ལས་དོན་ལ་སྐུལ་འདེད་གཏོང་བར་ཞིབ་འཇུག་བྱས་པ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྡོམས་རྩིས་ལས་དོན་ལ་གནང་བའི་གསུང་བཤད་གལ་ཆེན་དང་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ནས་བསྡོམས་རྩིས་ལས་དོན་གྱི་སྤུས་འབྲས་ལེགས་གཉེར་སྔར་བས་ཡོང་བར་སྐུལ་འདེད་བཏང་སྟེ། དངོས་ཐོག་བདེན་འཚོལ་དང་དྲང་པོ་དྲང་གཞག་གི་སྒོ་ནས་ལྗོངས་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་མངོན་པར་བྱེད་དགོས་པའི་ནན་བཤད་གནང་བ་རེད།
ཁྲེན་ཡུང་ཆི་དང་། རེན་ཝེ། ཀརྨ་ཚེ་བརྟན། ལྕགས་རྭ་བློ་བཟང་བསྟན་འཛིན། ལང་ཧྥུའུ་ཁོན། བསྟན་པ། ཚེ་རིང་ཕུན་ཚོགས་བཅས་ཕེབས་ཡོད་པ་རེད།
ཡན་ཅིན་ཧའེ་ཡིས། བསྡོམས་རྩིས་གྲངས་གཞི་ནི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི“ཆར་བརྟག་ཡོ་བྱད”ཅིག་ཡིན་ལ། ཏང་དང་སྲིད་གཞུང་གི་མཛད་ཇུས་ཀྱི“རླུང་ཕྱོགས་སྟོན་རྟགས”ཤིག་ཀྱང་ཡིན་པས། “བསྡོམས་རྩིས་བྱེད་དགོས་དོན”ལ་དམིགས་ཏེ་བསམ་བློའི་ངོས་འཛིན་གཅིག་གྱུར་གྱིས“གཏན་འཁེལ་གཉིས”སྲུང་སྐྱོང་མཐའ་གཅིག་ཏུ་བྱེད་པ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱེད་པའི་མཐོ་ཚད་དང“དོན་ཆེན་བཞིར”དམིགས་པ་དང“འཛུགས་གཏོད་བཞིར”སྐུལ་འདེད་གཏོང་བའི་སྤྱི་ཡོངས་ནས་འགོ་བརྩམས་ཏེ། དུས་བསྟུན་འཕེལ་རྒྱས་ཀྱིས་བསྡོམས་རྩིས་མ་ལག་དང་། བརྟག་དཔྱད་ཀྱི་ཁ་ཕྱོགས། ལྟ་སྐུལ་ལམ་སྲོལ་བཅས་འཐུས་སྒོ་ཚང་དུ་བཏང་ནས་བསྡོམས་རྩིས་ཆ་འཕྲིན་དེ་བས་དྲང་གཞག་དང་བློས་འགེལ་ཆོག་པ་དང་། བསྡོམས་རྩིས་ལ་ལྟ་ཞིབ་ཚད་ལེན་དེ་བས་དུས་ཐོག་དང་ནུས་ཆེ། བསྡོམས་རྩིས་ལ་དབྱེ་ཞིབ་དེ་བས་གནད་འཁེལ་དང་དངོས་སྒྲུབ། བསྡོམས་རྩིས་ཀྱི་གྲོས་འགོ་དེ་བས་ཚན་རིག་དང་མཐུན་ཞིང་ནུས་ལྡན་བཅས་ཡོང་བར་སྐུལ་འདེད་བཏང་ནས། ཏང་དང་སྲིད་གཞུང་གི་ཐབས་ཇུས་ལ་ཞབས་འདེགས་དེ་བས་ཡག་པོ་ཞུ་བ་དང་། བརྡ་རྟགས་མི་འཕྱུགས་པར་བརྒྱུད་སྤྲོད། ཁྲོམ་རར་སྔོན་དཔག་བརྟན་པོ། སྙིང་སྟོབས་དང་ངར་ཤུགས་འཕེལ་བར་ལྕག་སྐུལ་བཅས་བྱེད་དགོས་པ་དང་། “བསྡོམས་རྩིས་གང་བྱེད་དགོས་པར”དམིགས་ཏེ། ལས་ཀའི་གཙོ་གནད་མངོན་གསལ་དོད་པོ་ཡོང་བར་བྱས་ནས“ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་ཀྱིས་རང་ལྗོངས་ཀྱི་མིག་སྔའི་མ་འཇོག་ནི་སྤུས་ཚད་མཐོ་བའི་འཕེལ་རྒྱས་ཀྱི་སྒུལ་ཤུགས་ཆེན་པོ་ཞིག་དང་། འཛད་སྤྱོད་ནི་སྤུས་ཚད་མཐོ་བའི་འཕེལ་རྒྱས་ཀྱི་འདེགས་སྐྱོར་གལ་ཆེན་ཞིག ཕྱིར་གཏོང་ནང་འདྲེན་གྱི་ཚོང་དོན་ནི་སྤུས་ཚད་མཐོ་བའི་འཕེལ་རྒྱས་ཀྱི་མི་མངོན་པའི་སྟོབས་ཤུགས་གལ་ཆེན་ཞིག་བཅས་ཡིན་པའི་དོན་དངོས་ལ་དམིགས་ཏེ། མ་འཇོག་དང་། ཐོན་སྐྱེད། འཛད་སྤྱོད། ཕྱིར་གཏོང་ནང་འདྲེན་གྱི་ཚོང་དོན། གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སོགས་ཀྱི་གྲངས་གཞིའི་བསྡོམས་རྩིས་ཀྱི་ལྟ་སྐུལ་ཚད་ལེན་ལ་དམ་འཛིན་ཡག་པོ་བྱས་ནས། དཔལ་འབྱོར་གྱི་དམིགས་ཚད་གཙོ་བོའི་ཁྲོད་ནས་དཔལ་འབྱོར་འཁོར་སྐྱོད་ཀྱི་འཕེལ་ཕྱོགས་ཀྱི་འགྱུར་ལྡོག་ལ་སྟངས་འཛིན་མཁས་པོ་དང་དཔལ་འབྱོར་ལས་དོན་གྱི་འགག་གནད་འཚོལ་མཁས་པོ་བྱེད་དགོས། “བསྡོམས་རྩིས་ཇི་ལྟར་བྱེད་དགོས་པར”དམིགས་ཏེ། ལམ་སྲོལ་དང་བྱ་ཐབས་ལེགས་སུ་བཏང་ནས“ཚད་ལྡན་དང་། གནད་འཁེལ། དུས་ཐོག ཕྱོགས་ཡོངས”བཅས་ཀྱི་སྤྱིའི་བླང་བྱར་དམིགས་ཏེ། བསྡོམས་རྩིས་ཀྱི་དམིགས་ཚད་བཀོད་སྒྲིག་འོས་འཚམ་དང་བསྡོམས་རྩིས་ཀྱི་བྱ་ཐབས་གསར་གཏོད་ཟམ་མི་ཆད་པར་བྱས་ཏེ། བསྡོམས་རྩིས་ཀྱི་ཚད་གཞི་རིམ་བཞིན་འཐུས་སྒོ་ཚང་དུ་དང་བསྡོམས་རྩིས་ཀྱི་འཇུག་ལམ་ཚན་རིག་དང་མཐུན་ཞིང་དྲང་གཞག་ཡོང་བར་འགན་ལེན་བྱེད་དགོས། “སུས་བསྡོམས་རྩིས་བྱེད་པར”དམིགས་ཏེ། མཉམ་ལས་ཀྱི་མཉམ་ཤུགས་གཅིག་ཏུ་བསྒྲིལ་ནས“བསམ་ཇུས་གཅིག”གི་བསམ་བློ་བརྟན་པོར་བཙུགས་ཏེ“ལས་རིགས་ལ་དོ་དམ་བྱས་ཚེ་བསྡོམས་རྩིས་ལ་དོ་དམ་བྱ་རྒྱུ”མཐའ་འཁྱོངས་ཀྱིས་བསྡོམས་རྩིས་ནང་འཇུག་རྒྱུ་དེ་སྡེ་ཚན་དེ་གའི“འགོ་ཁྲིད་ཨང་དང་པོའི”ལས་གྲྭར་བརྩིས་ནས་སྡེ་ཚན་གྱི་དུས་བཀག་མཉམ་འབྲེལ་གྲོས་ཚོགས་ལམ་ལུགས་བཟོས་ཏེ“བསྡོམས་རྩིས་འཐུས་སྒོ་ཚང་པོ་མེད་པ”དང“བསྡོམས་རྩིས་གནད་ལ་མི་འཁེལ་བ”སོགས་ཀྱི་གནད་དོན་ཐག་གཅོད་ནུས་ལྡན་བྱས་ནས། རང་ལྗོངས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་བསྡོམས་རྩིས་ཀྱི་ལྟ་སྐུལ་འགན་སྲུང་ནུས་ལྡན་བྱེད་དགོས་པ་བཅས་ཀྱི་ནན་བཤད་གནང་བ་རེད།