ཚེས་13ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་དུ་བརྟག་ཞིབ་གནང་བ་རེད།

རེན་ཝེ་བརྟག་ཞིབ་གནང་སྐབས་ལྷན་དུ་ཕེབས་ཡོད་པ་རེད།

ཡན་ཅིན་ཧའེ་ཡིས་གྲོང་གསེབ་གཞུང་ལམ་ཁྲུའུ་དང་། འཛུགས་སྐྲུན་དོ་དམ་ཁྲུའུ། ཕྱོགས་བསྡུས་འཆར་འགོད་ཁྲུའུ་བཅས་ལ་སྔ་རྗེས་སུ་ཕེབས་ནས་ཞིང་འབྲོག་ཁུལ་གྱི་གཞུང་ལམ་འཛུགས་སྐྲུན་དང་། གཙོ་གནད་གཞུང་ལམ་རྣམ་གྲངས། “ལོ་ལྔ་ཚན་བཅུ་བཞི་པའི”གཞུང་ལམ་འཆར་འགོད་འཛུགས་སྐྲུན་བཅས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་སྦྲགས་ལས་བྱེད་པ་དང་ལས་བཟོར་བྱམས་བརྩེའི་འཚམས་འདྲི་ཡང་གནང་བ་རེད།

ཡན་ཅིན་ཧའེ་ཡིས་ནན་བཤད་གནང་དོན། འགྲིམ་འགྲུལ་ནི་དེང་རབས་ཅན་གྱི་ལམ་འབྱེད་གདོང་ལེན་པ་ཡིན་པས། “འཕར་རྩ་གཙོ་བོ”ཐོགས་མེད་ཤར་བགྲོད་ཐུབ་པར་བྱེད་དགོས་པ་སྟེ། 《བོད་རང་སྐྱོང་ལྗོངས་ཀྱི་ཕྱོགས་བསྡུས་འགྲིམ་འགྲུལ་དྲ་བའི་འཆར་འགོད་རྩ་གནད(2023ལོ་ནས་2035ལོ་བར)》ལག་བསྟར་དོན་འཁྱོལ་དང་རྒྱལ་ཁབ་ཀྱི“འཐབ་ཇུས་ཆེན་པོར”དམ་པོར་དམིགས་ནས། གཙོ་གནད་རྣམ་གྲངས་དོན་འཁྱོལ་འཛུགས་སྐྲུན་ལ་སྐུལ་འདེད་བཏང་སྟེ། འགྲིམ་འགྲུལ་གྱི་རྨང་གཞིའི་འདེགས་སྐྱོར་ནུས་པ་འདོན་སྤེལ་ཡག་པོ་བྱེད་དགོས། དེང་ཚད་ལས་བརྒལ་ནས“ཇུས་འགོད་ཆེན་པོ”ཡག་པོ་བྱེད་དགོས་པ་སྟེ། “ལོ་ལྔ་ཚན་བཅུ་བཞི་པར”གཞི་ཚུགས་པ་དང་། “ལོ་ལྔ་ཚན་བཅོ་ལྔ་པར”དམིགས་ནས་དོན་སྙིང་གལ་ཆེན་ལྡན་པ་དང་། ཤུགས་རྐྱེན་ཟབ་མོ་ཐེབས་པ། ལག་རྩལ་སྔོན་ཐོན་བཅས་ཀྱི་གཙོ་ཆེའི་འགྲིམ་འགྲུལ་རྣམ་གྲངས་ཁག་མང་པོ་ཇུས་འགོད་བྱས་ཏེ། ནུས་ལྡན་མ་འཇོག་ཁྱབ་ཁོངས་རྒྱུན་མཐུད་ཆེ་རུ་བཏང་ནས་གཏིང་ཤུགས་ཆེར་གཏོང་གིས་ཁག་ཅིག་སྐྲུན་བཞིན་པ་དང་། ཁག་ཅིག་སྐྲུན་འགོ་ཚུགས་པ། ཁག་ཅིག་གྲ་སྒྲིག་བྱེད་པ་བཅས་ཀྱི་འཁོར་རྒྱུག་བཟང་པོ་ཆགས་པར་བྱེད་དགོས། བྱེད་ཤུགས་མུ་མཐུད་ཆེ་རུ་གཏོང་བ་དང་མཐའ་ཚད་ཡག་པོར་བསྲུངས་ནས་གཙོ་གནད་རྣམ་གྲངས་ཀྱི་མ་རྩ་འཕར་ཚད་སྔོན་གཏན་འཁེལ་བའི་དམིགས་ཚད་དུ་བསླེབ་པའི་འགན་ལེན་བྱེད་དགོས། “འཁོར་རྒྱུག་ཆུང་ངུ”ཐོགས་མེད་ཤར་གཏོང་ཡོང་བར་བྱེད་དགོས་པ་སྟེ། ལྷ་གཞིས་རིམ་མཐོའི་གཞུང་ལམ་སོགས་རྣམ་གྲངས་མགྱོགས་མྱུར་སྐྲུན་པ་དང་། རིག་ལྡན་འགྲིམ་འགྲུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་རྒྱག་པ། ས་ཁུལ་དང་གྲོང་ཁྱེར་དབར་གྱི་མྱུར་བགྲོད་གཞུང་ལམ་གྱི་མཉམ་སྦྲེལ་འགྲིམ་འགྲུལ་དྲ་ཆེན་འཐུས་སྒོ་ཚང་དུ་གཏོང་བ་བཅས་བྱས་ཏེ“འགྲིམ་འགྲུལ་དྲ་བར”བརྟེན་ནས“དཔལ་འབྱོར་འཁོར་རྒྱར”སྣེ་ཁྲིད་བྱེད་དགོས། “རྐང་འཛིན་ལམ་དྲ་ལེགས་གཏོང་ལས་གྲྭ་དང་། རྨང་གཞིའི་ལམ་དྲ་སྣུར་སྲིང་འཐུས་ཚང་ལས་གྲྭ། བདེ་འཇགས་འགན་སྲུང་ནུས་པ་ཆེར་གཏོང་ལས་གྲྭ། ཐོན་ལས་མཉམ་འདྲེས་འཕེལ་རྒྱས་ལས་གྲྭ། ཞབས་ཞུའི་ཆུ་ཚད་མཐོར་གཏོང་ལས་གྲྭ”བཅས་གཙོ་གནད་དུ་བྱས་ནས“ཡག་པོ་བཞིའི་གྲོང་གསེབ་ཀྱི་ལམ་བུའི”སྤུས་ཚད་མཐོ་བའི་འཕེལ་རྒྱས་ལ་རྒྱུན་མཐུད་སྐུལ་འདེད་གཏོང་བ་དང་། སྟབས་བདེ་ལ་ནུས་ཕྱོད་ཆེ་བ་དང་ཀུན་ཕན་དྲང་གཞག་གི་གྲོང་གསེབ་གཞུང་ལམ་དྲ་བའི་མ་ལག་མགྱོགས་མྱུར་འཐུས་སྒོ་ཚང་དུ་གཏོང་བ། གྲོང་གསེབ་བགྲོད་ལམ་ཤར་གཏོང་ཐུབ་ཚད་སྔར་བས་མཐོ་རུ་གཏོང་བ། རྫོང་དང་ཤང་གི་འགྲུལ་སྐྱེལ་མ་ལག་འཐུས་སྒོ་ཚང་དུ་གཏོང་བ་བཅས་བྱས་ཏེ་ཞིང་འབྲོག་ཁུལ་ལམ་བུར་བརྟེན་ནས་དར་རྒྱས་ཡོང་བ་དང་ཞིང་འབྲོག་པ་ལམ་བུར་བརྟེན་ནས་ཕྱུག་པོ་ཆགས་པར་བྱེད་དགོས། “འགན་སྲུང་འཛིང་རགས”བརྟན་པོ་བཟོ་དགོས་པ་སྟེ། ཟོག་འགྲེམས་ཤར་གཏོང་འགན་ལེན་ལས་དོན་རྒྱུན་མཐུད་དམ་འཛིན་བྱས་ཐོག་ཞིང་ཆེན་དབར་གྱི་ཟོག་འགྲེམས་ཤར་གཏོང་འགན་ལེན་གྱི་རོགས་ལས་མཉམ་འགུལ་ལམ་སྲོལ་ཞིབ་འཇུག་བྱས་ནས་བཙུགས་ཏེ་འབྲུ་རིགས་དང་ནུས་རྒྱུ་སོགས་དམངས་འཚོའི་དངོས་ཟོག་སྐྱེལ་འདྲེན་གཙོ་གནད་ཐོག་འགན་ལེན་བྱེད་དགོས། “འགོག་སྲུང་དྲ་བ”དམ་ཚགས་བཟོ་དགོས་པ་སྟེ། གཞུང་ལམ་འགྲིམ་འགྲུལ་གྱི་འཕྲལ་སྡོམ་ནུས་པ་འཛུགས་སྐྱོང་ལས་དོན་དམ་འཛིན་ཡག་པོ་བྱས་ནས་ཟམ་པ་དང་ཕུག་ལམ་གཙོ་བོ་དང་། ལས་འཛོལ་ཐོན་མང་བའི་ཁུལ་སོགས་གཙོ་གནད་ལམ་དུམ་ལ་ལྟ་ཞིབ་ཚད་ལེན་དང་འཕྲལ་སྡོམ་འགན་སྲུང་བྱེད་ཤུགས་ཆེ་རུ་གཏོང་བ་དང་། ལམ་ལུགས་ཅན་དང་། ཚད་ལྡན་ཅན། ཆ་འཕྲིན་ཅན། རིག་ནུས་ཅན་བཅས་ཀྱི་བྱེད་ཐབས་གསར་པ་ཡག་པོ་སྤྱད་དེ་བདེ་འཇགས་འགག་སྒོ་བརྟན་པོ་སྲུང་དགོས། “རོགས་ལས་འཁོར་འབྲེལ”འཛུགས་དགོས་པ་སྟེ། “འགྲིམ་འགྲུལ་ཆེ་མོའི”ཐིང་ཅུས་དབར་གྱི་མཉམ་འབྲེལ་གྲོས་ཚོགས་ལམ་སྲོལ་སྔར་བས་ནན་དུ་བཏང་ནས་ལས་ཀའི་མཉམ་ཤུགས་གཅིག་ཏུ་སྒྲིལ་དགོས། “སྤྱོད་གཙང་གི་འགག་སྒོ”ཡག་པོར་སྲུང་དགོས་པ་སྟེ། ཏང་གི་སྒྲིག་ཁྲིམས་སློབ་སྦྱོང་སློབ་གསོ་གོ་སྐབས་སུ་བཟུང་སྟེ་ཕྱོགས་ཡོངས་ནས་ཏང་ནན་པོས་སྐྱོང་བའི་ཆབ་སྲིད་ཀྱི་འགན་འཁྲི་ནན་དུ་བཏང་སྟེ། སྒྲིག་ཁྲིམས་ནན་གཏོང་དང་སྤྱོད་ཚུལ་ལེགས་སྒྱུར་བྱས་ནས་དུས་དང་རྣམ་པ་ཀུན་ཏུ་ལྷག་བསམ་དང་། སྤྱོད་གཙང་། འགན་འཁྲི་འཁུར་ཕོད་པ་བཅས་བྱེད་དགོས།