ཟླ་6ཚེས་4ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་ནས། ས་ཁུལ་དང་གྲོང་ཁྱེར་བདུན་དང་མཉམ་དུ་མིག་སྔའི་དཔལ་འབྱོར་འཁོར་རྒྱུག་ཁྲོད་གནས་པའི་དཀའ་ངལ་དང་གནད་དོན་ཞིབ་འཇུག་ཐག་གཅོད་དང་། བོད་རང་སྐྱོང་ལྗོངས་ཀྱི་2024ལོའི“ཡིད་རྟོན་སྲིད་གཞུང་འཛུགས་སྐྱོང་ལོའི”ལག་བསྟར་ཇུས་གཞིར་ཞིབ་འཇུག་གནང་བ་དང་འབྲེལ་ཡོད་ལས་དོན་སྙན་སེང་གསན་པ་མ་ཟད། གོམ་སྟབས་རྗེས་མའི་ལས་དོན་བཀོད་སྒྲིག་ཀྱང་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་དང་། ལང་ཧྥུའུ་ཁོན། ཝུའེ་ཤིའུ་ཁྲང་། ཀུང་ཧུའེ་ཚའེ། བསྟན་པ། ཚེ་རིང་ཕུན་ཚོགས་བཅས་ཚོགས་འདུར་ཞུགས་ཡོད་པ་རེད།

ཁྲེན་ཡུང་ཆིས་བསྟན་དོན། སྤུས་ཚད་མཐོ་བའི་འཕེལ་རྒྱས་ནི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་སྐྲུན་པའི་ལས་འགན་ཨང་དང་པོ་ཡིན། ས་གནས་ཁག་དང་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་། དམིགས་ཚད་དང་ལས་འགན་ལ་དམ་པོར་དམིགས་པ། ལས་དོན་སྤེལ་ཤུགས་ཆེ་རུ་གཏོང་བ། རྣམ་གྲངས་འཛུགས་སྐྲུན་གྱི་མྱུར་ཚད་མགྱོགས་སུ་གཏོང་བ། མ་དངུལ་གཏོང་སྤྲོད་བྱེད་ཚད་མང་དུ་གཏོང་བ་བཅས་བྱས་ཏེ། དངོས་དངོས་རྗེན་རྗེན་གྱི་ལས་དོན་དེ་བས་མང་བ་བསྒྲུབས་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་གལ་ཆེན་མཁོ་འདོན་བྱེད་དགོས། ཆད་སྐྱོན་དང་ཞན་ཆར་དམ་པོར་དམིགས་པ་དང་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱས་ཏེ་བཅོས་སྒྲིག་བྱེད་ཤུགས་ཆེ་རུ་གཏོང་བ་དང་འབྲེལ་ཟུར་བསྟན་ལེབ་མཐོང་ཡོང་བར་བྱེད་དགོས།

ས་གནས་ཁག་དང་འབྲེལ་ཡོད་སྡེ་ཚན་ཁག་གིས་འགལ་ཟླ་གཙོ་བོར་དམ་འཛིན་བྱེད་པ་དང་། རང་ངོས་ཀྱི་དོན་དངོས་དང་ཟུང་འབྲེལ་བྱས་ནས་འཛད་སྤྱོད་སོགས་དཔལ་འབྱོར་གྱི་དམིགས་ཚད་ལ་ཞིབ་འཇུག་དང་དབྱེ་ཞིབ་གཏིང་ཟབ་བྱེད་པ། གཞི་ཁྱོན་ཆེ་བའི་སྒྲིག་ཆས་གསར་སྒྱུར་དང་འཛད་རྫས་གསར་རྙིང་བརྗེ་བར་སྐུལ་འདེད་གཏིང་ཟབ་གཏོང་བ། ཁྱབ་ཁོངས་ཁག་གི་ལེ་ལག་ཚང་བའི་བྱེད་ཐབས་ཞིབ་ཚགས་དང་འཐུས་སྒོ་ཚང་དུ་གཏོང་བ། འཛད་སྤྱོད་ཀྱི་མི་མངོན་པའི་སྟོབས་ཤུགས་རྒྱུན་ཆད་མེད་པར་འདོན་པ་བཅས་བྱས་ནས། དཔལ་འབྱོར་འཁོར་རྒྱུག་རྒྱུན་མཐུད་ལེགས་ཕྱོགས་སུ་འཕེལ་བར་སྐུལ་འདེད་གཏོང་དགོས། ས་གནས་དང་གྲོང་ཁྱེར་གྱིས་བཏོན་པའི་དཀའ་ངལ་དང་གནད་དོན་ལ་དམིགས་པ་དང་། རྣམ་གྲངས་རེ་རེ་བཞིན་ཞིབ་འཇུག་བྱེད་པ་དང་འབྲེལ་རྩིས་ཐོ་བཟོ་རྒྱུའི་བླང་བྱ་འདོན་པ། གསལ་ཐོ་ཅན་གྱི་དོ་དམ་དང་རྣམ་གྲངས་ཅན་གྱི་སྐུལ་འདེད་གཏོང་བ་བཅས་བྱས་ནས་གནད་དོན་ཐག་གཅོད་ནུས་ལྡན་ཐུབ་པར་བྱེད་དགོས། ས་གནས་ཁག་དང་སྡེ་ཚན་ཁག་གིས་རྟག་ཏུ་བློ་བཟོད་མི་བདེ་བ་དང་བྱ་བ་མཐའ་དག་སེམས་ལ་གདེང་ཚོད་ཡོད་པ་དང་རང་འགུལ་ངང་འགན་འཁྲི་ཏན་ཏིག་ཁུར་ནས་ལྗོངས་ཡོངས་བསམ་ཇུས་གཅིག་གིས་དོན་འཁྱོལ་ལ་དམ་འཛིན་དང་འཕེལ་རྒྱས་ལ་སྐུལ་འདེད་གཏོང་བའི་རྣམ་པ་བཟང་པོ་ཆགས་པར་བྱེད་དགོས། འབྲེལ་ཡོད་སྡེ་ཚན་གྱིས་དཔལ་འབྱོར་འཁོར་རྒྱུག་བཀོད་གཏོང་དབྱེ་ཞིབ་ལ་ཤུགས་སྣོན་རྒྱག་པ་དང་། རྗེས་སྙེག་ཕན་འདྲིར་ཤུགས་སྣོན་རྒྱག་པ། ལས་དོན་ཁག་དོན་ཐོག་ཏུ་འཁྱོལ་བར་དམ་འཛིན་ནན་པོ་བཅས་བྱས་ཏེ་དམིགས་ཚད་དང་ལས་འགན་ལེགས་གྲུབ་ཡོང་བའི་འགན་ལེན་བྱེད་དགོས།

ཁྲེན་ཡུང་ཆིས་ནན་བཤད་གནང་དོན། སྲིད་གཞུང་གི་ཡིད་རྟོན་འཛུགས་སྐྱོང་ལ་ཤུགས་སྣོན་རྒྱག་པ་ནི་སྲིད་གཞུང་གི་འགན་ནུས་འགྱུར་མགྱོགས་སུ་གཏོང་བ་དང་སྲིད་གཞུང་གི་ནུས་ཆོད་ཆེ་རུ་གཏོང་བའི་ལྡོག་མེད་ཀྱི་བླང་བྱ་ཞིག་རེད། ས་གནས་ཁག་དང་སྡེ་ཚན་ཁག་གིས་ཡིད་རྟོན་འཛུགས་སྐྱོང་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་གཏིང་ཟབ་དང་། ཡིད་རྟོན་སྲིད་གཞུང་འཛུགས་སྐྱོང་སྐོར་གྱི་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་ལག་བསྟར་དོན་འཁྱོལ། སྤྱི་ཚོགས་ཡིད་རྟོན་མ་ལག་འཛུགས་སྐྱོང་ཁྲོད་ཀྱི་སྲིད་གཞུང་གི་མིག་དཔེ་དང་ཁྲིད་སྟོན་གྱི་ནུས་པ་གང་ལེགས་འདོན་པ། སྲིད་གཞུང་གི་ཉོ་སྒྲུབ་དང་། ཚོང་འགུགས་མ་འདྲེན། འོས་སྐུལ་འོས་དཔོད་སོགས་གཙོ་གནད་ཁྱབ་ཁོངས་ཀྱི་ཡིད་རྟོན་འཛུགས་སྐྱོང་ལ་ཤུགས་སྣོན་རྒྱག་པ། ཁེ་ལས་ཀྱི་འགྱངས་ཆད་དངུལ་གཙང་བཤེར་གཏིང་ཟབ་བཅས་བྱས་ནས་ཕུགས་ཕན་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་དགོས། ཚོང་གཉེར་ཁོར་ཡུག་མུ་མཐུད་ལེགས་སུ་གཏོང་བ་དང་སྲིད་ཇུས་དྲིལ་བསྒྲགས་དང་གསལ་འགྲེལ་བྱེད་ཤུགས་ཆེ་རུ་བཏང་ནས་ལྗོངས་ཡོངས་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱེད་དགོས།