ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བ་ནས་བཟུང་། ལྗོངས་ཡོངས་ཀྱི་རིམ་ཁག་ཏང་རྩ་འཛུགས་ཀྱིས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་རྒྱུན་གཏན་དང་མཉམ་འདྲེས་དང་རྒྱུན་གཏན་ནས་དམ་འཛིན་བྱེད་པར་སྣང་ཆེན་བྱེད་པ་དང་། “ཏང་ཡོན་ལས་བྱེད་པར་སྒྲིག་ཁྲིམས་སློབ་སྦྱོང་དང་། སྒྲིག་ཁྲིམས་ཤེས་པ། སྒྲིག་ཁྲིམས་རྟོགས་པ། སྒྲིག་ཁྲིམས་སྲུང་བ་བཅས་བྱེད་པར་ཁྲིད་སྟོན་བྱེད་པའི”སྤྱིའི་དམིགས་ཚད་ཀྱི་བླང་བྱར་དམ་པོར་དམིགས་པ། 《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》(གཤམ་དུ《སྲོལ་ཡིག》ཅེས་བསྡུ་རྒྱུ)སློབ་སྦྱོང་དང་ལག་བསྟར་བྱེད་པའི་ཐད་འབད་བརྩོན་དང་གྲུབ་འབྲས་ཐོབ་རྒྱུ་མཐའ་འཁྱོངས་བྱེད་པ། བྱེད་ཐབས་མང་པོ་དང་སྤུས་ཚད་མཐོ་པོས་ཏང་ཡོན་ལས་བྱེད་པར་སྒྲིག་ཁྲིམས་དང་སྒྲིག་ལམ་དེ་ཆབ་སྲིད་ཀྱི་རང་རྟོགས་དང་། བསམ་བློའི་རང་རྟོགས། བྱ་སྤྱོད་ཀྱི་རང་རྟོགས་བཅས་སུ་བསྒྱུར་བར་ཁྲིད་སྟོན་བཅས་བྱས་ཏེ། “སློབ་སྦྱོང་གཏིང་ཟབ”དང“གོ་བ་དངོས་ལེན་པའི”ཁྲོད་ཏང་གི་སྒྲིག་ཁྲིམས་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་སྤེལ་བར་སྐུལ་འདེད་བཏང་ཡོད།

ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བ་ནས་བཟུང་། གཞིས་རྩེ་གྲོང་ཁྱེར་གྱིས་ཞིང་འབྲོག་ཏང་ཡོན་གྱི་ལས་ཀ་དང་འཚོ་བའི་དོན་དངོས་དང་ཟུང་འབྲེལ་གྱིས“ཚོགས་འདུ་གསུམ་དང་སློབ་ཚན་གཅིག”དང་། བརྗོད་དོན་གཙོ་བོའི་ཏང་གི་ཉིན་མོ། སྒྲིག་ཁྲིམས་སྐོར་གྱི་ཏང་གི་སློབ་ཚན། “ཀྲི་པུའུ་ཧྲུའུ་ཅིའི་འཆད་སྟེགས”དྲ་ཐོག་དང་དྲ་ཕྱིའི་གསོ་སྦྱོང་སོགས་ཀྱི་བྱ་ཐབས་གང་ལེགས་སྤྱད་དེ《སྲོལ་ཡིག》གི་ས་བཅད་རེ་རེ་དང་དོན་ཚན་རེ་རེ་བཞིན་སློབ་སྦྱོང་བྱས་པ་དང་མཉམ་སྡེབ་སློབ་སྦྱོང་དང་མི་སྒེར་གྱི་རང་སྦྱོང་ལ་དམ་འཛིན་ཡག་པོ་བྱས་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་མི་སེམས་སུ་ཟུག་པ་དང་གཏིང་ཟབ་དང་ཏན་ཏིག་སྤེལ་བར་སྐུལ་འདེད་བཏང་ཡོད། ཉེན་བརྡའི་སློབ་གསོའི་གློག་བརྙན་ལྟ་བ་དང་སྲིད་གཙང་ཉེན་བརྡའི་སློབ་གསོའི་འགྲེམས་སྟོན་ལ་ལྟ་སྐོར་སྒྲིག་འཛུགས་བྱས་ཏེ་ཉེ་འགྲམ་གྱི་གནས་ཚུལ་དྲངས་ནས་ཉེ་འགྲམ་གྱི་མི་ལ་སློབ་གསོ་བཏང་བས། ཞིང་འབྲོག་ཏང་ཡོན་རྣམས་དེ་བས་ཐད་ཀར་དང་། དེ་བས་ཕྱོགས་ཡོངས། དེ་བས་གཏིང་ཟབ་བཅས་ཀྱི་སྒོ་ནས་ཉེན་བརྡའི་སློབ་གསོ་དང་ལེན་ཐུབ་པར་བྱས་ཡོད། ཏང་ལ་ལྷག་བསམ་རྣམ་དག་དང་གཞུང་དྲང་བྱེད་པ་དང་། མང་ཚོགས་ཀྱི་ཁེ་ཕན་ལ་གནོད་འཚེ་གཏོང་བ། གྲོང་སྲོལ་དམངས་ཆིངས་ལ་བརྩི་སྲུང་ཞུ་དགོས་པ་སོགས་ཀྱི་ནང་དོན་ལ་གཙོ་གནད་ཐོག་དམིགས་ནས། གྲོང་ཚོའི(སྡེ་ཁུལ)“ཨུ་ལྷན་གཉིས”ཀྱི་ཚན་ཁག་ལ་སྒྲིག་ཁྲིམས་ཀྱི་ཉེན་ཁ་གྲལ་བཤེར་བྱས་ཏེ། གཞི་རིམ་ཏང་རྩ་འཛུགས་ཀྱི་ཆབ་སྲིད་ནུས་པ་དང་རྩ་འཛུགས་ཀྱི་ནུས་པ་ཆེ་རུ་བཏང་ཡོད།

ཏང་གི་སྒྲིག་ཁྲིམས་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་སྤེལ་བར་སྐུལ་འདེད་གཏོང་ཆེད། ནག་ཆུ་གྲོང་ཁྱེར་གྱི་རིམ་ཁག་ཏང་རྩ་འཛུགས་ཀྱིས་དོན་དངོས་དང་ཟུང་འབྲེལ་བྱས་ཏེ་ཏང་ཡོན་སྒྲིག་འཛུགས་བྱས་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་དང་དེ་བཞིན་ཏང་གི་སྒྲིག་ཁྲིམས་འཛུགས་སྐྱོང་ལ་ཤུགས་སྣོན་རྒྱག་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ《སྲོལ་ཡིག》གི་ལེའུ་རེ་རེ་བཞིན་སློབ་སྦྱོང་བྱས་ཡོད། མིག་སྔའི་བར་གྲོང་ཁྱེར་ཡོངས་ཀྱི་རིམ་ཁག་ཏང་རྩ་འཛུགས་ཀྱིས་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་ཆེད་དོན་དཔེ་ཀློག་འཛིན་གྲྭ་346གཉེར་བར་ཏང་ཡོན་དང་ལས་བྱེད་པ་4015ཞུགས་པ་དང་། བགྲོ་གླེང་སྤེལ་རེས་ཐེངས་470གཉེར་བར་མི་ཐེངས་1228ཞུགས་པ། གནད་དོན་106བཏོན་པ། ཁ་གཏད་གཅོག་ཐབས་ཀྱི་གྲོས་འགོ་134བཟོས་པ་བཅས་རེད། ནག་ཆུ་གྲོང་ཁྱེར་གྱིས《གྲོང་ཁྱེར་ཡོངས་ཀྱི་གཞི་རིམ་ཏང་རྩ་འཛུགས་ཀྱིས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བར་སྐུལ་འདེད་གཏོང་བའི་འབྲེལ་ཡོད་ལས་དོན་སྐོར་གྱི་བརྡ་ཐོ》བཀྲམ་ནས་གཞི་རིམ་ཏང་རྩ་འཛུགས་ཀྱིས་ཇི་ལྟར་བྱས་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བའི་ཐད་ཞིབ་ཕྲའི་བླང་བྱ་བཏོན་ཏེ་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་ལས་འགན་ཁག་གཞི་རིམ་དུ་དོན་འཁྱོལ་ཡོང་བར་སྐུལ་འདེད་བཏང་ཡོད།

མངའ་རིས་ས་ཨུད་ཀྱིས་ས་ཨུད་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་དཔེ་ཀློག་འཛིན་གྲྭ་ཇུས་འགོད་དང་བཀོད་སྒྲིག་ཞིབ་ཚགས་བྱས་ཏེ་རིམ་ཁག་ཏང་རྩ་འཛུགས་ཀྱིས《སྲོལ་ཡིག》སློབ་སྦྱོང་བྱ་རྒྱུར་དམིགས་ནས་དཔེ་ཀློག་འཛིན་གྲྭ་ཐེངས་61གཉེར་བ་མ་ཟད། རང་སོ་སོའི་འགན་ནུས་འགན་འཁྲི་དང་ལས་ཀའི་དོན་དངོས་དང་ཟུང་འབྲེལ་གྱིས་བགྲོ་གླེང་སྤེལ་རེས་བྱས་ཏེ་ཏང་ཡོན་དང་ལས་བྱེད་པར་བློ་དཀར་སེམས་དཀར་དང་། སྤྱོད་གཙང་གཞུང་དྲང་འགན་འཁྲི་འཁུར་བ་བཅས་ཀྱི་མིག་དཔེ་འདོན་པར་སློབ་གསོ་ཁྲིད་སྟོན་བྱས་ཡོད། མིག་སྔའི་བར་གཞི་རིམ་ཏང་རྩ་འཛུགས་ཁག་གིས་གཅིག་སྡུད་སློབ་སྦྱོང་ཐེངས་768བྱས་པ་རེད། ཤང(གྲོང་རྡལ)ཁག་གི་ཏང་ཨུད་དང་གྲོང་ཚོ(སྡེ་ཁུལ)ཁག་གི་ཏང་རྩ་འཛུགས་ཀྱིས་སྦྲ་གུར་སློབ་ཁྲིད་དང“མཛུབ་རྩེའི་སློབ་ཁྲིད”སོགས་ཀྱི་བྱ་ཐབས་སྤྱད་དེ། ཏང་ཡོན་ལས་བྱེད་པ་དང་ལྷག་པར་དུ་ཞིང་འབྲོག་ཏང་ཡོན་སྒྲིག་འཛུགས་བྱས་ནས《སྲོལ་ཡིག》སློབ་སྦྱོང་ནན་ཏན་དང་། གོ་བ་ཡང་དག་ལེན་པ། ལག་བསྟར་མཐའ་གཅིག་ཏུ་བྱས་ཏེ་མང་ཚོགས་སྒྲིག་འཛུགས་དང་མང་ཚོགས་ལ་ཞབས་འདེགས་ཞུ་བའི་ལས་དོན་དངོས་ཁྲོད་གཟུགས་བརྙན་བཟང་པོ་མངོན་པར་བྱས་ཡོད། མིག་སྔའི་བར་རིམ་ཁག་ཏང་རྩ་འཛུགས་ཀྱིས་རིམ་རྩིས་བྱས་ན་ཏང་ཡོན་ལས་བྱེད་པ་སྒྲིག་འཛུགས་བྱས་ནས་སློབ་སྦྱོང་ཐེངས་900ལྷག་ཙམ་བྱས་པར་ཏང་ཡོན་ཁྲི་1.4ལྷག་ཙམ་ལ་ཁྱབ་ཡོད།

ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བ་ནས་བཟུང་། ལྷོ་ཁ་གྲོང་ཁྱེར་གྱིས་སློབ་སྦྱོང་གི་གཙོ་གནད་ལ་དམ་པོར་དམིགས་ཏེ་རྣམ་པ་སྣ་ཚོགས་ཀྱི་སློབ་སྦྱོང་ལག་ལེན་བྱེད་སྒོ་སྒྲིག་འཛུགས་ཞིབ་ཚགས་བྱས་ནས་སློབ་སྦྱོང་ལ་སྤུས་ཚད་ལྡན་པར་བྱས་ཡོད། ལྷོ་ཁ་གྲོང་ཁྱེར་ཐད་གཏོགས་ལས་ཁུངས་ལས་དོན་ཨུ་ལྷན་གྱིས་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཚན་པ་འཛུགས་གཏོད་དམིགས་ཚད་ལ་འཛིན་ནས《སྲོལ་ཡིག》གི་མི་རིགས་མཐུན་སྒྲིལ་གྱི་འབྲེལ་ཡོད་སྒྲིག་ཁྲིམས་བླང་བྱ་སློབ་སྦྱོང་གཏིང་ཟབ་བྱས་ཏེ་ཏང་ཡོན་ལས་བྱེད་པར་ཆབ་སྲིད་ཀྱི་ལངས་ཕྱོགས་བརྟན་དུ་བཏང་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་ཕན་འབྲས་དེ་མི་རིགས་མཐུན་སྒྲིལ་ཡར་ཐོན་འཛུགས་གཏོད་ལས་དོན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྒུལ་ཤུགས་ཆེན་པོ་ཞིག་ཏུ་བསྒྱུར་རྒྱུའི་སློབ་གསོ་དང་ཁྲིད་སྟོན་བྱས་ཡོད། གོང་དཀར་རྫོང་རྒྱ་དྲུག་གླིང་གྲོང་རྡལ་གྱིས་ཏང་ཡོན་ལས་བྱེད་པ་སྒྲིག་འཛུགས་བྱས་ནས་ལྷོ་ཁ་གྲོང་ཁྱེར་གྱི“ཉེ་འགྲམ་གྱི་གནས་ཚུལ་དྲངས་ནས་ཉེ་འགྲམ་གྱི་མི་ལ་སློབ་གསོ་གཏོང་བའི”སྲིད་གཙང་ཉེན་བརྡའི་སློབ་གསོའི་འགྲེམས་སྟོན་ལ་ལྟ་སྐོར་བྱས་ཤིང་། རྒྱ་ཆེའི་ཏང་ཡོན་ལས་བྱེད་པས་འགྲེལ་བཤད་ལ་ཉན་པ་དང་། པར་རིས་ལ་ལྟ་བ། ཉེན་བརྡའི་བརྙན་ཐུང་ལ་ལྟ་བ་བཅས་བརྒྱུད་ལྷོ་ཁ་གྲོང་ཁྱེར་གྱི་ཏང་ཡོན་ལས་བྱེད་པའི་ཁྲིམས་འགལ་སྒྲིག་འགལ་གྱི་དཔེ་མཚོན་གྱོད་གཞི་ཤེས་རྟོགས་བྱས་ཡོད།