ཡན་ཅིན་ཧའེ་ཡིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་བ།
ཟླ་5ཚེས་31ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་སྟེ། གཞི་ཁྱོན་ཆེན་པོས་སྒྲིག་ཆས་གསར་སྒྱུར་དང་། འཛད་རྫས་རྙིང་ཚབ་གསར་བརྗེས། སྨན་བཅོས་འཕྲོད་བསྟེན། སྣེ་ཁྲིད་དེ་ཟ་མཁས་འཐུང་མཁས་བྱེད་པ་སོགས་ཀྱི་ལས་དོན་ལ་སྐུལ་འདེད་གཏོང་བར་ཞིབ་འཇུག་གནང་བ་རེད།
ཚོགས་འདུའི་ཐོག་བསྟན་དོན། གཞི་ཁྱོན་ཆེན་པོས་སྒྲིག་ཆས་གསར་སྒྱུར་དང་འཛད་རྫས་རྙིང་ཚབ་གསར་བརྗེས་ལ་སྐུལ་འདེད་གཏོང་བ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བཏོན་པའི་ཐབས་ཇུས་བཀོད་སྒྲིག་གལ་ཆེན་ཞིག་རེད། རྩ་དོན་ཁོང་དུ་ཆུད་པ་བྱེད་པར་རྗེས་ལུས་མེད་པར་བཟོ་བ་དང་སྔོན་ཐོན་ལ་སྐུལ་ལྕག་གཏོང་བ་དང་། ཚད་གཞི་ཁྲིད་སྟོན་དང་དཔེ་སྟོན་སྐུལ་ཁྲིད། ཁྲོམ་ར་གཙོར་བཟུང་དང་སྲིད་གཞུང་གི་ཁྲིད་སྟོན་བཅས་མཐའ་འཁྱོངས་ཀྱིས་ནོར་སྲིད་དང་། ཁྲལ་བསྡུ། དངུལ་རྩ་སོགས་ཀྱི་རྒྱབ་སྐྱོར་སྲིད་ཇུས་ལ་སྤྱི་འདོམས་བྱས་ཏེ་སྒྲིག་ཆས་གསར་སྒྱུར་དང་། འཛད་རྫས་རྙིང་ཚབ་གསར་བརྗེས། ཚུར་བསྡུའི་རྒྱུན་འཁོར་བེད་སྤྱོད། ཚད་གཞི་མཐོར་གཏོང་བཅས་ཀྱི་བྱ་སྤྱོད་ཆེན་པོ་བཞིར་སྐུལ་འདེད་ཏན་ཏིག་གཏོང་དགོས། གཙོ་གནད་འབུར་དུ་ཐོན་པ་དང་གྲོང་ཁྱེར་གསར་སྒྱུར་དང་ཁུལ་ཆུང་རྙིང་པ་སྒྱུར་བཀོད་ལ་སྐུལ་འདེད་གཏོང་རྒྱུ་ཟུང་འབྲེལ་བྱས་ཏེ། ཨར་སྐྲུན་དང་། གྲོང་ཁྱེར་འཛུགས་སྐྲུན། ནུས་རྒྱུ་སོགས་ཁྱབ་ཁོངས་ཀྱི་སྒྲིག་ཆས་དང་སྒྲིག་བཀོད་གསར་སྒྱུར་དང་སྒྱུར་བཀོད་མགྱོགས་སུ་གཏོང་བ་དང་། འགྲིམ་འགྲུལ་སྐྱེལ་འདྲེན་སྒྲིག་ཆས་དང་ཞིང་འཕྲུལ་སྒྲིག་ཆས་རྙིང་པ་གསར་སྒྱུར་ལ་རྒྱབ་སྐྱོར་བྱེད་པ། སློབ་གསོ་དང་། རིག་གནས་ཡུལ་སྐོར། སྨན་བཅོས་སོགས་ཁྱབ་ཁོངས་ཀྱི་སྒྲིག་ཆས་གསར་སྒྱུར་རིམ་སྤོར་ལ་སྐུལ་འདེད་གཏོང་བ། སྤྱི་འདོམས་བྱེད་ཤུགས་ཆེ་རུ་གཏོང་བ་དང་ལས་ཀར་སྐུལ་འདེད་གཏོང་བའི་ལམ་སྲོལ་འཐུས་སྒོ་ཚང་དུ་གཏོང་བ་དང་སྲིད་ཇུས་དྲིལ་བསྒྲགས་དང་གསལ་འགྲེལ་བྱེད་ཤུགས་ཆེ་རུ་བཏང་ནས། དངོས་ཚན་དཔལ་འབྱོར་ལ་དངུལ་སྨར་ཐད་ཀར་འབྱོར་བ་དང་དུད་ཚང་ཁྲི་སྟོང་མང་པོར་གཟིགས་སྐྱོང་ཐོབ་པར་བྱས་ཏེ་རྒྱལ་ཁབ་ཀྱི་སྲིད་ཇུས་ཡག་པོ་དངོས་འབྲེལ་ཚོར་བ་བྱེད་དགོས།
ཚོགས་འདུའི་ཐོག་བསྟན་དོན། ཧྭ་ཤིས་བོད་ལྗོངས་སྨན་ཁང་ནི་རྒྱལ་སྲིད་སྤྱི་ཁྱབ་ཁང་གིས་གཏན་འཁེལ་གནང་བའི་བོད་ཀྱི་དམངས་འཚོའི་རྣམ་གྲངས་ཆེན་པོ་གསུམ་གྱི་གྲས་ཤིག་རེད། དེ་ཉིད་སླད་ཕྱིན“ནད་ཆེན་བོད་ནས་བཅོས་ཐུབ་པའི”ཐ་སྐྱོང་སྨན་ཁང་དང་། རང་སྐྱོང་ལྗོངས་ཀྱི་རྩད་ཆོད་དཀའ་བའི་ནད་གཞི་ལྕི་རིགས་སྨན་བཅོས་མཛུབ་ཁྲིད་ལྟེ་གནས། དེ་བཞིན་བོད་ལྗོངས་གསོ་རིག་ཤེས་ལྡན་པ་གསོ་སྐྱོང་ལྟེ་གནས་བཅས་ཡིན་པའི་ངོས་ནས་ངོས་འཛིན་མཐོ་རུ་དང་། ཆབ་སྲིད་ཀྱི་འགན་འཁྲི་འཁུར་སེམས་དང་ལོ་རྒྱུས་ཀྱི་ལས་འགན་སྒྲུབ་སེམས་ཆེན་པོར་བརྟེན་ནས་བྱ་བཟང་དངོས་འབྲེལ་ཡག་པོ་བསྒྲུབས་ཏེ་རང་ལྗོངས་ཀྱི་སྤུས་ལེགས་སྨན་བཅོས་ཐོན་ཁུངས་རྒྱ་སྐྱེད་གཏོང་བར་སྔར་བས་སྐུལ་འདེད་གཏོང་བ་དང་། ས་ཁོངས་ཀྱི་སྨན་བཅོས་འཕྲོད་བསྟེན་ཞབས་ཞུའི་ཆུ་ཚད་མཐོ་རུ་བཏང་ནས། ལྗོངས་ཡོངས་ཀྱི་མི་དམངས་མང་ཚོགས་ཀྱི་གཟུགས་གཞི་བདེ་ཐང་ལ་འགན་ལེན་དེ་བས་ལེགས་པ་བྱ་རྒྱུ་རེད། བསམ་ཕྱོགས་གསར་གཏོད་དང་ལྷག་པར་དུ“ཚོགས་སྒྲིག་རྣམ་པའི”སྨན་བཅོས་བོད་སྐྱོར་སོགས་དམིགས་བསལ་སྲིད་ཇུས་དང་ཟུང་འབྲེལ་དམ་ཟབ་བྱས་ཏེ། མཐུན་རྐྱེན་འདུས་གྲུབ་དང་། ཐོན་ཁུངས་གཅིག་སྡུད། ལེགས་ཆ་གཅིག་སྡུད་བཅས་བྱས་ནས་བོད་ཀྱི་སྨན་ཁང་འཛུགས་སྐྲུན་གྱི་ཚད་ཤིང་གསར་པ་ཧུར་ཐག་གཏོད་རྒྱུ་རེད།
ཚོགས་འདུའི་ཐོག་བསྟན་དོན། གཞི་རིམ་སྨན་བཅོས་འཕྲོད་བསྟེན་སྒྲིག་གཞི་ནི་ཞིང་འབྲོག་མང་ཚོགས་ཀྱི་བདེ་ཐང་ལ་སྲུང་སྐྱོང་བྱེད་པའི་འགོག་སྲུང་འཛིང་རགས་དང་པོ་དེ་རེད། ཞབས་ཞུའི་མ་ལག་ལེགས་སུ་བཏང་ནས་རྫོང་རིམ་པའི་སྨན་ཁང་གི“སྣེ་འདྲེན”གྱི་ནུས་པ་དང་། ཤང་དང་གྲོང་རྡལ་འཕྲོད་བསྟེན་ཁང་གི“ལྟེ་བའི”ནུས་པ། གྲོང་ཚོའི་འཕྲོད་བསྟེན་ཁང་གི“ཐ་སྐྱོང”གི་ནུས་པ་བཅས་ཆེ་རུ་གཏོང་བ་དང་མང་འདུས་རྣམ་པའི་རྫོང་ཁོངས་སྨན་བཅོས་ཐུན་མོང་ཚོགས་པ་འཛུགས་སྐྱོང་ཧུར་ཐག་བྱས་ཏེ་གྲོང་གསེབ་ཀྱི་སྨན་བཅོས་འཕྲོད་བསྟེན་ཆ་འཕྲིན་ཅན་འཛུགས་སྐྲུན་མགྱོགས་པོ་བྱེད་དགོས། ཤེས་ལྡན་པའི་འདེགས་སྐྱོར་བྱེད་ཤུགས་ཆེ་རུ་གཏོང་བར་སྨན་སློབ་མཐུན་སྦྱོར་མངོན་གསལ་དོད་པོ་དང་། ཤེས་ལྡན་པ་ཟབ་སྐྱོད་མངོན་གསལ་དོད་པོ། སྐུལ་ལྕག་ཁྲིད་སྟོན་མངོན་གསལ་དོད་པོ་བཅས་བྱས་ནས་ཐབས་ལམ་མང་པོ་བརྒྱུད་ཤེས་ལྡན་པ་གདན་འདྲེན་པ་དང་ཤེས་ལྡན་པ་གསོ་སྐྱོང་བྱས་ཏེ་སྲིད་ཇུས་ཀྱི་ལག་ཆ་བེད་སྤྱོད་ཡག་པོ་བྱེད་དགོས། སྒྱུར་བཅོས་གསར་གཏོད་གཏིང་ཟབ་ཏུ་གཏོང་བར་དོ་དམ་ལམ་སྲོལ་སོགས་སྔར་བས་ལེགས་སྒྱུར་དང་འཐུས་སྒོ་ཚང་དུ་བཏང་སྟེ་གཞི་རིམ་མང་ཚོགས་ཀྱི་དགོས་མཁོ་གང་ལེགས་སྐོང་དགོས།
ཚོགས་འདུའི་ཐོག་བསྟན་དོན། ཏང་དང་སྲིད་གཞུང་གིས་སྣེ་ཁྲིད་དེ་ཟ་མཁས་འཐུང་མཁས་བྱེད་པ་ནི་མི་སེར་ལ་འཚོ་བ་ཡག་པོ་སྐྱེལ་རྒྱུ་ཡོང་བ་དེ་རེད། ཞིང་སྟོབས་ཞིང་ཕན་དང་། སློབ་གསོ་སྨན་བཅོས། སྦགས་བཙོག་འགོག་བཅོས་སོགས་དམངས་འཚོའི་གཙོ་གནད་ཁྱབ་ཁོངས་དང་དེ་བཞིན་གཞི་རིམ་གྱི“འགན་ལེན་གསུམ”གྱི་མ་དངུལ་སོགས་ཀྱི་མཐའ་ཚད་བརྟན་པོར་བསྲུངས་ནས་ནོར་ཤུགས་གཅིག་སྡུད་ཀྱིས་དོན་ཆེན་སྒྲུབ་དགོས་པ་དང་། ཀྲུང་དབྱང་གིས་གཏོང་སྤྲོད་སྤོ་སྒྱུར་བགོ་བཤའི་འབྲེལ་ཡོད་ལས་དོན་སྔར་བས་ཡག་པོ་སྒྲུབ་པ་དང་མ་དངུལ་བེད་སྤྱོད་ཀྱི་ཕན་འབྲས་ཆེ་རུ་གཏོང་བར་དམ་འཛིན་ནན་པོ་བྱས་ཏེ། “མ་དངུལ་བཏང་རིགས་ལ་ཕན་འབྲས་ངེས་པར་དུ་འདྲི་རྩད་བྱེད་པ་དང་། ཕན་འབྲས་མེད་རིགས་ལ་འགན་འཁྲི་ངེས་པར་དུ་རྩད་གཅོད་བྱེད་པ”དངོས་འབྲེལ་མཚོན་པར་བྱེད་དགོས།