2024ལོའི་བོད་རང་སྐྱོང་ལྗོངས་ཀྱི་དམངས་ཡོངས་ཀྱི་གྲངས་འཛིན་བྱང་ཚད་དང་རྩལ་ནུས་ཆེར་གཏོང་ཟླ་བའི་བྱེད་སྒོ་འགོ་ཚུགས་པ།
དབང་ཧའེ་ཀྲོའུ་ཞུགས་པ་དང་ཤིས་ཚིག་སྒྲོན་པ།
ཚེས་1ཉིན་གྱི་སྔ་དྲོར་2024ལོའི་བོད་རང་སྐྱོང་ལྗོངས་ཀྱི་དམངས་ཡོངས་ཀྱི་གྲངས་འཛིན་བྱང་ཚད་དང་རྩལ་ནུས་ཆེར་གཏོང་ཟླ་བའི་བྱེད་སྒོ་འགོ་ཚུགས་པའི་མཛད་སྒོ་ལྷ་སར་འཚོགས་ཤིང་། ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཞུགས་པ་དང་འབྲེལ། ཤིས་ཚིག་ཀྱང་བསྒྲོན་པ་རེད།
དབང་ཧའེ་ཀྲོའུ་ཡིས། རང་སྐྱོང་ལྗོངས་ཏང་ཨུད་ཀྱིས་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་བྱས་ནས་གྲངས་འཛིན་ཅན་འཛུགས་སྐྱོང་དང་འཕེལ་རྒྱས་གནས་བབ་གལ་ཆེན་དུ་བཞག་སྟེ“གྲངས་འཛིན་བོད་ལྗོངས”འཛུགས་སྐྱོང་བྱེད་པའི་འཕེལ་རྒྱས་དམིགས་ཚད་བཏོན་པ་དང་། གྲངས་འཛིན་ཅན་ཁྱབ་ཁོངས་ཀྱི་རྣམ་གྲངས་གལ་ཆེན་ལག་བསྟར་དང་ཐོན་ལས་གལ་ཆེན་འཕེལ་རྒྱས་ལ་སྐུལ་འདེད་བཏང་བས། གྲངས་འཛིན་དཔལ་འབྱོར་སྤུས་ཚད་མཐོ་བའི་འཕེལ་རྒྱས་བྱུང་ཡོད། དམངས་ཡོངས་ཀྱི་གྲངས་འཛིན་བྱང་ཚད་དང་རྩལ་ནུས་ཆེར་གཏོང་དེ་ལས་འགན་གལ་ཆེན་ཞིག་ལ་བརྩིས་ནས་དམ་འཛིན་མཐའ་འཁྱོངས་བྱེད་པ་དང་། གྲངས་འཛིན་ཅན་གྱི་འཕེལ་རྒྱས་གྲུབ་འབྲས་ལ་བརྟེན་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྔར་བས་འདེགས་སྐྱོར་ཡག་པོ་བྱེད་པ་དང་དམངས་འཚོའི་བདེ་རྩ་ཆེ་རུ་གཏོང་བར་སྐུལ་འདེད་གཏོང་བ། གྲངས་འཛིན་བོད་ལྗོངས་འཕེལ་རྒྱས་གཏོང་བར་བརྟེན་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་ལ་སྒུལ་ཤུགས་ཆེན་པོ་སྣོན་པ་བཅས་བྱེད་དགོས་ཞེས་གསུངས་པ་རེད། ཁོང་གིས། རིམ་ཁག་སྡེ་ཚན་ཁག་གིས་སྤྱི་འདོམས་མཉམ་འགུལ་ལ་ཤུགས་སྣོན་རྒྱག་པ་དང་། ལས་ཀའི་བརྒྱུད་རིམ་རང་བཞིན་དང་ཀུན་ཕན་རང་བཞིན་ཆེ་རུ་གཏོང་བ། “དྲ་གཅིག”གི་བཀོད་པ་ཧུར་ཐག་གཏོད་པ། གྲངས་འཛིན་སྒྲིག་བཀོད་དང་རིག་ནུས་ཐོན་རྫས་ཀྱི་ཞབས་ཞུའི་ནུས་པ་ཆེ་རུ་གཏོང་བ་བཅས་བྱས་ཏེ་དམངས་ཡོངས་ཀྱི་གྲངས་འཛིན་ཅན་གྱི་གསར་གཏོད་གསོན་ཤུགས་ལ་སྐུལ་སྤེལ་དང་གྲངས་འཛིན་ཁོར་ཡུག་བཟང་པོ་ཐུན་མོང་ཐོག་གཏོད་དགོས། དྲིལ་བསྒྲགས་ཀྱི་ཁྲིད་སྟོན་ལ་ཤུགས་སྣོན་རྒྱག་པ་དང་། མང་ཚོགས་དེའི་ནང་ཞུགས་ཚད་དང་བདེ་འཇགས་ཀྱི་འདུ་ཤེས་ཟབ་ཏུ་གཏོང་བ། གཙོ་བོ་གཞི་རིམ་དང་མང་ཚོགས་ལ་ཁ་ཕྱོགས་པ། ད་ཡོད་ཀྱི་གསོ་སྦྱོང་རྟེན་གཞིའི་ནུས་པ་འདོན་སྤེལ་བཅས་བྱས་ཏེ་དམངས་ཡོངས་ལ་དྲ་རྒྱའི་ཆ་འཕྲིན་ངན་པ་རང་རྟོགས་ངང་བཀག་འགོག་བྱེད་པ་དང་ཁྲིམས་བཞིན་ཚད་ལྡན་ཡ་རབས་ངང་དྲ་ཞུགས་དྲ་སྤྱོད་བྱ་རྒྱུར་ཁྲིད་སྟོན་བྱེད་པ་དང་། དམངས་ཡོངས་ཀྱི་དྲ་རྒྱའི་བདེ་འཇགས་སྲུང་ནུས་ཁྱོན་ཡོངས་ནས་ཆེ་རུ་གཏོང་བ། “དམངས་ཡོངས་ཞུགས་པ་དང་མཉམ་སྐྲུན་མཉམ་སྤྱོད”ཀྱི་རྣམ་པ་ཟབ་མོ་ཞིག་གཏོད་པ་བཅས་བྱེད་དགོས་པའི་ནན་བཤད་གནང་བ་རེད།